Чӑваш Енри прокуратура Ростехнадзорпа, Роспотребнадзорпа тата Патшалӑхӑн ҫурт-йӗр инспекцийӗпе пӗрле пулса республикӑри аслӑ шкулсен общежитийӗсемпе вӗренӳ корпусӗсенче ӑшӑпа епле тивӗҫтернине тӗрӗсленӗ.

Чӑваш Енре пурӗ 9 аслӑ шкул, вӗсен 29 вӗренӳ корпусӗпе 20 общежити.

Чӑваш аграри университечӗн тата Чӑваш патшалӑх университечӗн общежитийӗсенче коммуникацисенче ӑшӑ изолоцийӗ япӑхнине тата ытти хӑш-пӗр пысӑках мар кӑлтӑка тупса палӑртнӑ. Общежитисенчен пӗринче вӗри шыв нормативран пӗчӗкки ҫиеле тухнӑ.

Аслӑ шкулсен ертӳҫисене кӑлтӑка пӗтерме асӑрхаттру хучӗ ҫырса панӑ.

Инкеклӗ лару-тӑру министерстви тунӑ сӑн

Паян Шупашкарта автобус ҫунса кайнӑ. Инкек 16 сехетре «Энергозапчасть» чарӑнура пулнӑ. Шупашкартан Ҫӗнӗ Шупашкара 101-мӗш маршрутпа ҫӳрекен автобус ҫунма пуҫланӑ. Пушарнӑйсем киличчен ҫулӑм хӑвӑрт сарӑлма ӗлкӗрнӗ: салона, транспорта йӑлтах ярса илнӗ.

16:20 сехетре пушара сӳнтернӗ. Телее, никам та шар курман

«Контактри» сӑн

Муркаш округӗнчи Турай тӑрӑхӗнче пурӑнакан Ольга Краснова ҫак кунсенче 100 ҫулхи юбилейне паллӑ тунӑ.

Ольга Дмитриевна Уйкас ялӗнче ҫуралса ӳснӗ. Ҫамрӑклах колхоз ӗҫне кӳлӗннӗ, фронта кайнӑ арҫынсен вырӑнне тӑрӑшнӑ.

Вӑл – тыл ӗҫченӗ. Ҫӗнтерӗве ҫывхартма пулӑшнӑшӑн ӑна «1941-1945 ҫулсенчи Тӑван ҫӗршывӑн Аслӑ вӑрҫинче хастар ӗҫленӗшӗн» медальпе чысланӑ.

«Контактри» сӑн

Чӑваш Ен боксерӗ ӑмӑртуран куҫ айӗнчи кӑвакпа таврӑннӑ, анчах – медальпе.

Федор Сидоров Тольятти хулинче иртнӗ «Спартак» спортобществӑн Пӗтӗм Раҫҫейри ӑмӑртӑвне хутшӑннӑ. Вӑл 57 килограмм тайман 19-22 ҫулсенчи спортсменсемпе кӗрешсе пӑхӑр медаль ҫӗнсе илнӗ.

Саламлатпӑр ентешӗмӗре!

«Контактри» сӑн

Чӑваш Енре кӑҫал пӗрремӗш йӗкӗреш – ывӑлпа хӗр – ҫуралнӑ. Нумаях пулмасть вӗсене киле кӑларнӑ.

Ку телей Бургановсен ҫемйине ҫитнӗ. Ачасем 37-мӗш эрнере кун ҫути курнӑ. Малтан Самира ҫуралнӑ – 2700 грамм тайнӑ, 49 сантиметр тӑршшӗ пулнӑ. Унтан, тепӗр 6 минутран, Самир ҫут тӗнчене килнӗ. Арҫын ача 2810 грамм тайнӑ, 48 сантиметр тӑршшӗ пулнӑ.

Йӑлана кӗнӗ тӑрӑх, ачасене «Эпӗ Чӑваш Енре ҫуралнӑ» парне панӑ.

admkrai.krasnodar.ru сайтри сӑн

Ыран Шупашкарта каллех сирена янӑрӗ. Хальхинче те ку тытӑма тӗрӗслени пулӗ, ҫавӑнпа хӑраса ан ӳкӗр.

Сирена 10:30-11:00 сехетре янӑрӗ. Инкеклӗ лару-тӑру министерстви пӗлтернӗ тӑрӑх, хӑрушсӑрлӑх тытӑмне тестировани тӑвӗҫ. Лӑпкӑ пулӑр: сирена сассине илтсен килтех юлӑр, ӗҫ вырӑнне пӑрахса ан кайӑр.

cheb-centr.soc.cap.ru сӑнӳкерчӗк

Шупашкарта пурӑнакан Ивенира Сапожникова ӗнер 80 ҫул тултарнӑ. Ҫав ятпа ӑна хулари халӑхӑн социаллӑ ыйтӑвӗсене тивӗҫтерекен комплекслӑ центрӑн ӗҫченӗсем: Александра Смирнова тата Наталия Митрофанова — саламланӑ.

Ивенира Николаевна 1946 ҫулхи кӑрлач уйӑхӗн 21-мӗшӗнче Етӗрне районӗнчи Кӑташ ялӗнче ҫуралнӑ. Пӗр вӑхӑт шкулта пионервожатӑй пулса тӑрӑшнӑ, унтан Шупашкара куҫса килнӗ. Пир-авӑр комбинатне вӑхӑтлӑха тесе вырнаҫнӑ та унта 35 ҫул ӗҫленӗ.

Вӑл мӑшӑрӗпе икӗ ывӑл пӑхса ӳстернӗ. Паян кинемейӗн мӑнуксемпе вӗсен ачи таранах пур. Ҫамрӑксем ватта ҫӑмӑлтарах пултӑр тесе социаллӑ ӗҫчен те тытнӑ. Наталия Митрофановӑна ватӑ ҫын хӑйӗн хӗрӗ вырӑннех хурать. Центрта пӗлтернӗ тӑрӑх, Наталия Станиславовна та ватта чунтан хисеплет.

«Чӑваш Ен» ПТРК тунӑ видео скринӗ

И.Н.Ульянов ячӗллӗ Чӑваш патшалӑх университечӗн чӑваш тата вырӑс филологийӗпе журналистика факультечӗн студенчӗсем экзамена чӑваш наци тумӗпе килеҫҫӗ. Ку йӑлана вӗсем пилӗкмӗш ҫул ӗнтӗ тытса пыраҫҫӗ.

Студентсем вӗренме килсенех пӗлеҫҫӗ: семестр вӗҫӗнче вӗсен экзамена наци тумӗпе пымалла. Пурте ку шухӑша хапӑлласа йышӑнаҫҫӗ.

Студентсем хӑйсем ҫуралса ӳснӗ вырӑнти чӑваш наци тумне тӑхӑнма тӑрӑшаҫҫӗ. Кунсӑр пуҫне вӗҫем экзамен тӗлне хӑйсен ялӗнчи фольклора пухаҫҫӗ, унтан хатӗрленӗ материала хӳтӗлеҫҫӗ.

cap.ru сайтри сӑн

Ку эрнере Сывлӑхпа спорт кунӗ иртӗ. Вӑл кӑҫал пӗрремӗш хут пулӗ.

Ку шӑматкун, кӑрлачӑн 24-мӗшӗнче, Чӑваш Енре пурӑнакансем бассейна, тренажер залне тата ытти спорт учрежденине тӳлевсӗрех кайма пултараҫҫӗ. Кун пирки спорт шкулӗсемпе физкультура комплексӗсен сайчӗсенче тӗплӗнрех пӗлме май пур.

Яндекс сӑнӳкерчӗкӗ

Паян Агриппина Янович вӑрҫӑ ветеранӗ пурнӑҫран уйрӑлса кайнӑ. Вӑл 100 ҫулта пулнӑ.

Ҫак йӗркесен авторӗ ун патӗнче ӗҫпе темиҫе те пулнӑччӗ. Иртнӗ кунҫулне туллин те кӑсӑклӑн аса илсе каланипе вӑл асра юлнӑ. Пӗр икӗ-виҫӗ ҫул каялла та ветеран дачӑра ӗҫленӗ, хулари хӑй пурӑнакан нумай хваттерлӗ ҫурт умне чечек лартса пӑхса тӑнӑ.

Агриппина Ивановнӑпа кӑрлач уйӑхӗн 23-мӗшӗнче сывпуллашӗҫ.