Олег Алексеевич Николаев — Раҫҫей патшалӑх тата политика ӗҫченӗ, экономист. 2020 ҫултанпа — Чӑваш Республикин Пуҫлӑхӗ. Маларах — VII суйлаври Патшалӑх Думин депутачӗ, V суйлаври Чӑваш Республикин Патшалӑх канашӗн депутачӗ. «Справедливая Россия — За правду» парти членӗ. Чӑваш Республикин III класлӑ чӑн патшалӑх советникӗ.
1969 ҫулхи раштавӑн 10-мӗшӗнче Чӑваш АССРти Хӗрлӗ Чутай районӗнчи Чурпай ялӗнче хресчен ҫемйинче ҫуралнӑ. Ашшӗ, Алексей Тимофеевич Николаев, водитель пулса ӗҫленӗ.
1985 ҫулта Шупашкарти строительство техникумне «промышленноҫпа гражданла строительство техник-строителӗ» специальноҫпе вӗренсе пӗтернӗ.
1989 ҫултанпа 1991 ҫул таран Совет Ҫарӗнче вӑхӑтлӑх ҫар службинче тӑнӑ.
1998 ҫулта И. Н. Ульянов ячӗллӗ Чӑваш патшалӑх университетне «предприятисен экономики тата предпринимательлӗх ӗҫ-хӗлӗ» специальноҫпе вӗренсе пӗтернӗ, экономист квалификацине илнӗ.
2007 ҫултанпа — «Справедливая Россия» (халӗ «Справедливая Россия — За правду») парти членӗ, каярахпа партин Чӑваш Енри регион уйрӑмне ертсе пыма пуҫланӑ.
2011 ҫулта «Справедливая Россия» партирен V суйлаври Чӑваш Республикин Патшалӑх канашӗн депутатне суйланнӑ.
2015 ҫулхи авӑн уйӑхӗнче Чӑваш Ен пуҫлӑхӗн должноҫне суйланма хутшӑннӑ, 14,7 % сасӑ пухса иккӗмӗш вырӑн йышӑннӑ, ҫавӑн хыҫҫӑн республикӑн Патшалӑх канашӗн депутачӗ пулса юлнӑ.
2016 ҫулхи авӑн уйӑхӗнче «Справедливая Россия» партин федераци списокӗпе VII суйлаври Патшалӑх Думин депутатне суйланнӑ. Патшалӑх Думин нацисен ӗҫӗсен комитетне ертсе пынӑ, ҫавӑн пекех Патшалӑх Думин депутачӗсен тупӑшӗсем ҫинчен панӑ сведенисен тӗрӗслӗхне тӗрӗслесе тӑракан комисси председателӗн заместителӗ пулнӑ.
2020 ҫулхи кӑрлачӑн 29-мӗшӗнче Раҫҫей Президенчӗн Владимир Путинӑн указӗпе — шанӑҫран тухнине пула Михаил Игнатьева отставкӑна янӑ хыҫҫӑн — Чӑваш Республикин пуҫлӑхӗн тивӗҫӗсене вӑхӑтлӑх пурнӑҫлакан пулма лартнӑ. Ҫав тапхӑртах Патшалӑх Думин депутачӗн полномочийӗсене вӗҫленӗ; пушаннӑ мандата Чӑваш Ен Патшалӑх канашӗн депутатне Игорь Молякова панӑ.
2020 ҫулхи нарӑсӑн 6-мӗшӗнче Чӑваш Республикин министрсен кабинетне ертсе пыма пуҫланӑ.
2020 ҫулхи авӑнӑн 13-мӗшӗнче 75,61 % сасӑ пухса Чӑваш Республикин пуҫлӑхне суйланнӑ (суйлава хӑй тӗллӗн тӑратнӑ кандидат пулса хутшӑннӑ). 2020 ҫулхи авӑнӑн 22-мӗшӗнче официаллӑ майпа должноҫа йышӑннӑ.
2025 ҫулхи пушӑн 26-мӗшӗнче Раҫҫей президенчӗпе тӗл пулнӑ вӑхӑтра иккӗмӗш срока суйланма хутшӑнас шухӑшли ҫинчен пӗлтернӗ. 2025 ҫулхи авӑнӑн 14-мӗшӗнче 67,06 % сасӑ пухса Чӑваш Ен пуҫлӑхне тепӗр хут суйланнӑ. 2025 ҫулхи авӑнӑн 26-мӗшӗнче Чӑваш патшалӑх оперӑпа балет театрӗнче вӑл иккӗмӗш срока должноҫа кӗнин савӑнӑҫлӑ церемонийӗ иртнӗ.
Статья каҫми :: Пичет версиӗ 