1 пин тенкӗлӗх укҫа ҫине мӗн ӳкерессине суйлаҫҫӗ. Списокра – 25 символ. Вӗсен йышӗнче Шупашкарти Анне палӑкӗ те пур.

Укҫа Атӑлҫи федераци округне халалланӑскер пулӗ. Халӗ хӑш хулари паллӑ вырӑна сӑнлассине суйлаҫҫӗ. Сасӑлав раштав уйӑхӗн 12-мӗшӗччен пырӗ.

"Контактри" сӑн

Республикӑра тӑватӑ модельлӗ библиотека уҫӑлмалла. Вулакансене раштав уйӑхӗн 4-мӗшӗнче кӗтеҫҫӗ.

Шӑмӑршӑри, Хӗрлӗ Чутайри, Куславккари тӗп библиотекӑсем, Улатӑр, Ҫӗмӗрле тата Елчӗк округӗсенчи вулавӑшсем ҫӗнелнӗ. Вӗсенче интерьер, оборудовани ҫӗнӗ. Йӑлтах – хальхи пурнӑҫ ыйтнӑ пек.

Шупашкар хулине кӗрекен Йӑлӑмра пурӑнакан Агниса Григорьева паян, чӳк уйӑхӗн 29-мӗшӗнче, 100 ҫул тултарнӑ. Вӑл Сӗнтервӑрри районӗнчи Хуракасси ялӗнче ҫуралнӑ.

Ҫамрӑклӑхӗ, ытти тантӑшӗнни евӗрех, Тӑван ҫӗршывӑн аслӑ вӑрҫин ҫулӗсене тивнӗ. Торф кӑларакан предприятире ӗҫленӗ, кайран шкулта кочегарта тӑрӑшнӑ. Унтан мӗн ӗмӗр тӑршшӗпе Туберкулез диспансерӗнче санитаркӑра тӑрӑшнӑ.

Юбилей ячӗпе кинемее Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр директорӗ Светлана Милкина тата Шупашкар хулин Йӑлӑмри территори управленийӗн пуҫлӑхӗ Олег Николаев саламланӑ.

Елена Атаманова страницинчен илнӗ сӑнӳкерчӗк

Пушкӑртстанра тухса тӑракан «Урал сасси» хаҫат 35 ҫул тултарнине уявланӑ.

Унта «Хыпар» издательство ҫурчӗн ӗҫченӗсем те пулнӑ.

«Мӗн тери телейлӗ кун паян! Пуринчен ытла мана юратнӑ хаҫатӑм аякра, тӗрлӗ халӑх хушшинче, ниме пӑхмасӑр паянхи кун та ҫирӗппӗн малалла утни, аталанни, республикӑри мӗн пур чӑваша пӗрлештерсе тӑни савӑнтарать, мӑнаҫлантарать!

«Урал сасси» ача чухне мана ырӑ тӗслӗх кӑтартаканӗ, ҫул уҫса параканӗ пулнӑ! Халӗ те чуна ӑшӑтса, вӑй парса тӑрать», — хӑпартланса пӗлтернӗ издательство ҫурчӗн ача-пӑча кӑларӑмӗсен редакторӗ Елена Атаманова.

Ютубри видеоран илнӗ скриншот

Шупашкар хулин администрацийӗн Йӑлӑмри территори пайне ҫӗнӗ пуҫлӑх ертсе пыма тытӑннӑ. Ку должнорҫре Олег Алексеев тӑрӑше.

Хула пуҫлӑхӗ Владимир Доброхотов ҫӗнӗ ертӳҫӗпе ирхи планеркӑра тунтикунах паллаштарнӑ-ха. Ку хыпара официаллӑ сайтра ӗнер вырнаҫтарнӑ.

Олег Алексеев унччен «Инженери хӳтлӗхӗ» обществӑна ертсе пынӑ.

cap.ru сайтри сӑн

Тӑвай округӗнчи Лачкассинче пурӑнакан Анна Тихонова 100 ҫулхи юбилейне паллӑ тунӑ. Ун патне ҫак ятпа РФ Президенчӗн саламлӑ открыткине илсе ҫитернӗ, чечек ҫыххи парнеленӗ.

100 ҫулта та вӑл хастар, вӑйӗ тапса тӑрать. Кинемей хӑнасемпе калаҫнӑ хушӑра шӳтлесе те илнӗ.

Анна Тихоновна Сӑр тата Хусан хӳтӗлев чиккисене тунӑ ҫӗре хутшӑннӑ. Вӑрҫӑ хыҫҫӑн «Канаш – Тӑвай» ҫула тунӑ ҫӗре хутшӑннӑ. Халӗ ӑна ывӑлӗпе хӗрӗ пулӑшсах тӑраҫҫӗ.

«Про Город» сайтри сӑн

Шупашкарти таксист Геннадий Васильев пассажира ҫӑлнӑ. Вырӑна ҫитиччен 500 метр юлсан 30 ҫулти клиента япӑх пулса кайнӑ, эпилепси пуҫланнӑ.

Геннадий ҫухалса кайман, машинӑна чарса пассажира айккӑн вырттарнӑ, васкавлӑ медпулӑшу чӗннӗ. Клиент тӑна кӗрсен киле кайма тӑнӑ, анчах таксист ӑна яман, тухтӑрсене кӗтсе илме ыйтнӑ. Васкавлӑ медпулӑшу ӑна пульницӑна илсе кайнӑ.

Геннадий таксире 4 ҫул ӗҫлет. Кун пеккипе ҫак тапхӑрта вӑл пӗрремӗш хут тӗл пулнӑ.

Виктор Чугаров тунӑ сӑн

Хӗлле – сырӑш ҫакмалли вӑхӑт. Шупашкарта вӗсем унта та кунта курӑнкалама пуҫланӑ ӗнтӗ.

Виктор Чугаров хулари пӗр паркра хӑйне евӗр сырӑш ҫакӑнса тӑнине курсан ӑна ӳкерсе илнӗ. Ӑна чӑваш эрешӗллӗ ӳкерчӗксемпе илемлетнӗ.

Истори ӑслӑлӑхӗсен докторӗ Иван Бойко пособи илсе тӑрӗ. Ӑна кашни уйӑхрах 5 пин тенкӗ парӗҫ. Хушӑва ЧР Элтеперӗ Олег Николаев чӳк уйӑхӗн 28-мӗшӗнче алӑ пуснӑ.

Иван Бойко – Чӑваш патшалӑх гуманитари ӑслӑлӑхӗсен институчӗн ӗҫченӗ. Унта 1976 ҫултанпа ӗҫлет. Унӑн тӗп ӗҫӗсем: «Этнография переписи в Чувашской Республике» (авторпа пӗрле), «Рабочие Волго-Вятского региона: опыт и уроки социально-экономического развития».

Сӑмах май, ҫӗртме уйӑхӗнче ҫак институтрах ӗҫлекен Михаил Кондратьева та пособи пама йышӑннӑ.

yar.mk.ru сайтри сӑн

Ҫӗмӗрлере ачине пӗччен ӳстерекен хӗрарӑм ултавҫӑсен аллине лекнӗ. Вӑл ҫулталӑк пуҫламӑшӗнче пӗлтерӳ курнӑ, унта инвестицие укҫа хывса тупӑш тума сӗннӗ.

Хӗрарӑм телефонӗ ҫине сарӑм лартнӑ, кайран экран демонстрацине ҫутнӑ. Вал «брокер счечӗ» ҫине 25 пин тенкӗ куҫарнӑ. Унтан вӑл палламан ҫынсемпе хутшӑнма пӑрахнӑ.

Ҫулла ун патне каллех шӑнкӑравланӑ, «инвестици капиталне» ют ҫӗршывран хамӑрӑнни ҫине куҫармалла тесе ӗнентернӗ. Ҫапла вӑл ултавҫӑсене 1,5 миллион тенкӗ куҫарса панӑ.

Хӗрарӑм хӑйне улталанине ӑнлансан полицие кайнӑ.