forum.na-svyazi.ru порталтан илнӗ сӑнӳкерчӗк

Ӗнертенпе, юпа уйӑхӗн 26-мӗшӗнченпе, Шупашкарти аэропорт хӗллехи расписанипе ӗҫлеме пуҫланӑ.

«Победа» авиакомпани самолёчӗсем Шупашкартан Мускаври Шереметьево аэропорта кунне икӗ хутчен вӗҫӗҫ: ирхи 8 сехет те 40 минутра тата каҫхи 21 сехет те 40 минутра.

«Аэрофлот» авиакомпани самолёчӗ 19 сехетре ҫула тухма тытӑннӑ.

Санкт-Петербурга тунтикунсерен, ытларикунсерен, кӗҫнерникунсерен тата шӑматкунсерен 12 сехет те 25 минутра «Победа» самолёчӗпе вӗҫсе кайма май килӗ.

«Nordwind» Сочи тунтикунсерен 17 сехет те 15 минутра илсе ҫитерӗ, раштав уйӑхӗн 26-мӗшӗнчен вӑл кӗҫнерникун та ҫав вӑхӑтра вӗҫме пуҫлӗ.

«Азимут» авиакомпани тунтикунсерен Сургута 16 сехет те 20 минутра, Минеральные Воды хулине 20 сехет те 50 минутра илсе кайӗ. Чӳк уйӑхӗнченпе ҫав компани самолечӗсем шӑматкунсерен те Сургутпа Минеральные Воды хулисене вӗҫме пуҫлӗҫ.

chuvbook.ru сӑнӳкерчӗкӗ

Пирӗн республикӑра ачасемпе ҫамрӑксем валли чӑвашла ҫыракан авторсем валли ҫулсеренех конкурс ирттереҫҫӗ. Ҫӗнтерӳҫӗсен ӗҫӗсене Чӑваш кӗнеке издательствинче кун ҫути кӑтартаҫҫӗ.

Аса илтерер: пӗлтӗрхи конкурсра Николай Ларионов шкул ҫулне ҫитменнисемпе кӗҫӗн ҫулсенчи шкул ачисем валли ҫырнӑ «Акуш» алҫырупа палӑрнӑччӗ. Вӑтам шкул ҫулӗсенчи ачасем валли Римма Прокопьева ҫырнӑ «Пӗчӗкки» ҫӗнтернӗччӗ, аслӑ ҫулсенчи ачасем валли шӑрҫаланисенчен — Владимир Степановӑн «Ӑннӑ та ӑнман кун» алҫырӑвӗ.

Николай Ларионовӑн «Акуш» кӗнеки нумаях пулмасть кун ҫути курнӑ. Унта икӗ юмах тата вунӑ калав кӗнӗ.

chuvbook.ru сӑнӳкерчӗкӗ

Нумаях пулмасть Чӑваш кӗнеке издательствинче чӑваш тумӗпе паллаштаракан кӗнеке пичетленсе тухнӑ.

«В мире чувашского костюма. Чӑваш тумӗн тӗнчинче» кӑларӑм авторӗ — Елена Енькка (Михайлова). 2 пин экземпляр тиражпа кун ҫути курнӑ кӗнекене ӳкерчӗксемпе вӑл хӑех илемлетнӗ.

Автор кӑларӑм ачасене те, аслисене те ӑнланмалла пултӑр тесе тӑрӑшнӑ.

Кӗнеке издательствин ӗҫченӗ Алина Майорова пӗлтернӗ тӑрӑх, Елена Викторовна ачасем валли чӑваш тумтирӗпе капӑрлӑхӗсем ҫинчен унччен «Чӑваш кӗпе-тумтирӗ» тата «Чӑваш пуканисем» кӗнекесем кун ҫути кӑтартнӑ, анчах вӗсем ҫийӗнчех саланса пӗтнӗ.

Чӑваш Енри писательсен союзӗн сӑнӳкерчӗкӗ

Чӑваш ҫыравҫисем вилӗмсӗр вӗрентекенӗмӗре, аслӑран та аслӑ Иван Яковлева асра тытаҫҫӗ. Иртнӗ эрнере, юпа уйӑхӗн 23-мӗшӗнче, вӗсем Чӑваш Енӗн Наци вулавӑшӗ умӗнчи скверти Иван Яковлевӑн палӑке умне чӗре чечек хума пуҫтарӑннӑ.

Аса илтерер: паллӑ педагог, писатель 1848 ҫулхи ака уйӑхӗн 25-мӗшӗнче Тутарстанри Кӑнна Кушки ялӗнче ҫуралнӑ, 1930 ҫулхи юпа уйӑхӗн 23-мӗшӗнче Мускавра пурнӑҫран уйрӑлса кайнӑ.

Чечек хунӑ ҫӗре республикӑн культура министрӗ Светлана Каликова, культура учрежденийӗсенче ӗҫлекенсем, студентсем, преподавательсем, общество хастарӗсем те хутшӑннӑ.

«Контактра» халӑх тетелӗнчи сӑн

Шупашкарти фармаколог, вӗрентекен, ӑсчах тата медблогер Ксения Георгиева медиа тата журналистика енӗпе «ШУМ» Пӗтӗм Раҫҫейри ҫамрӑксен преминче ҫӗнтернӗ. Вӑл «Ҫамрӑклӑх энергийӗ» номинацире мала тухнӑ.

Ксения – 30 ҫулта. Вӑл Республикӑри кардиологи центрӗнче ӗҫлет, И.Н.Ульянов ячӗллӗ ЧПУра фармакологи предметне вӗрентет, ӑслӑлӑх енӗпе ӗҫлет. Ҫав вӑхӑтрах вӑл блог ертсе пырать, унӑн «Будь здоров с доктором Георгиевой» рубрикине пин-пин ҫын пӑхса тӑрать.

ШӖМ тунӑ сӑн

Паян Улатӑрти Грибоедов урамӗнче 77 ҫулти хӗрарӑмпа 14-ри хӗрачана машина ҫапса кайнӑ. Шел те, вилмеллех.

Вӗсем «зебра» тӑрӑх ҫул урлӑ каҫма тӑнӑ. Ҫав вӑхӑтра машина пысӑк хӑвӑртлӑхпа килнӗ, чарӑнман.

Руль умӗнче 30 ҫулти арҫын ларнӑ, вӑл ӳсӗр пулни паллӑ. Ӑна тытса чарнӑ.

t.me/nikamran каналта вырнаҫтарнӑ видеоран илнӗ сӑнӳкерчӗк

Шупашкарта пурӑнакан пӗр ҫемье ҫулталлӑкри ачана татурировка тунине кӑтартакан видео ӳкернӗ, ӑна халӑх тетелӗнче вырнаҫтарнӑ.

Ҫав ҫемьене йӗрке хуралҫисем тупнӑ. Ҫамрӑк ашшӗ ӑнлантарнӑ тӑрӑх, вӗсем тату туман, тату машинин сассине ҫыртарса илнӗ. Вӑл видеопа темле конкурса хутшӑнса ҫамрӑк ҫемье хваттер щыраса илес тенӗ-мӗн.

Халӗ ку ҫемьене учета илӗҫ, йӗрке хуралҫисем вӗсем мӗнле пурӑннине тӗрӗслесе тӑрӗҫ.

bookunion.ru сӑнӳкерчӗкӗ

Хальхи вӑхӑтра пирӗн ҫӗршывра Валентин Распутин ячӗллӗ литература премине илме заявкӑсем йышӑнаҫҫӗ. Конкурса Раҫҫейӗн кӗнеке союзӗ тата Иркутск облаҫӗн правительстви ирттерет. Премин соучредителӗсем — Раҫҫейӗн Цифра аталанӑвӗн министерстви тата «Ростех» корпораци.

Лауреат ятне илес тесе роман, повесть е повеҫсемпе калавсем вырӑсла ҫыракан кирек хӑш ҫулти автор та хутшӑнма пултарать.

Заявкӑсене чӳк уйӑхӗн 24-мӗшӗччен йышӑнӗҫ.

(«Ӗмер иртет те, кун юлать» сӑвӑ пуххине вуланӑ хыҫҫӑнхи шухӑшсем)

Ку чухнехи наци юхӑмӗн вӗри юнлӑ кӗрешӳҫи, паллӑ тӗпчевҫӗ, ӑсчах, поэт, публицист, таврапӗлӳҫӗ, филологи наукисен кандидачӗ, доцент, Халӑх академикӗ, Чӑваш Республикин аслӑ шкулӑн тава тивӗҫлӗ ӗҫченӗ Виталий Петрович Никитин – Станьял чӑваш поэзи анинче хӑйне тивӗҫлӗ тӑван халӑхшӑн усӑллӑ ҫимӗҫ ӳстерес тесе тӑрмашать. Шкул ҫулӗсенчех сӑвӑ ҫырас ӑсталӑха алла илес ӗмӗтпе ҫунатланнӑскерӗн хайлавӗсем Анат-Кӗнер вӑтам шкулӗнче тухса тӑракан класс хаҫатӗнче тата шкул хаҫатӗнче пуҫласа кун ҫути курнӑ. Сӑмах хӑватне ҫамрӑкран туйнӑ Виттусӑн, Виттус Неберингӑн поэзи хайлавӗсем пуҫласа уйрӑм кӗнекен «Ытамлатӑн, Ҫӗршывӑм ман» (1980) вулакан патне ҫитнӗ. «Ӑраскал тӗпренчӗкӗ» (2001) тата 2004 ҫулта “Юрату йӗтесӗ” ятпа пичетленсе тухнӑ сӑвӑ кӗнекисене те поэзие кӑмӑллакансем юратса йышӑннӑ. Поэзири туйӑмлӑхпа сисӗмлӗхе мала лартаканскерӗн ҫапла хайлав хыҫҫӑн хайлав ҫуралнӑ. Сӑвӑҫ тивӗҫне – тӑван чӗлхе илемӗпе сӑнарлӑхне пархатарлӑн, сӑваплӑн тытса пырассинче ҫеҫ мар кӗрешӳпе тӗрӗслӗх ҫутин ялавне ҫавӑрнӑскер – Станьял паян та сӑмах хӑватлӑхӗпе яваплӑхӗн шӑнӑрне ҫемҫетмест.

Малалла...

«Контактра» халӑх тетелӗнчи сӑн

Вӑрнарти 2-мӗш шкулта агрокласс уҫӑлнӑ. Вӑл республикӑра – ҫиччӗмӗш.

Класра ҫӗнӗ йышши оборудовани вырнаҫтарнӑ, ҫавна май ачасем шкултах тӗпчевсем, сӑнавсем тума пултараҫҫӗ. Агрокласа уҫнӑ кун ӑсталӑх класӗ иртнӗ: ачасем юман йӗкелне лартнӑ.

Палӑртмалла: класа уҫма «Август» фирмӑн «Вӑрнарти хутӑш препаратсен савучӗ» спонсор пулӑшӑвӗ панӑ.