Ҫӗнӗ Шупашкарти 37 ҫулти арҫын ҫухалнӑ. Ҫамрӑк арҫынна «Лиза Алерт» шырав отрячӗн хастарӗсем шыраҫҫӗ.

Арҫын чӳк уйӑхӗн 19-мӗшӗнче таҫта ҫӗтнӗ. Шӑпах ҫав кунтанпа вӑл ӑҫтине пӗлмеҫҫӗ.

Ҫухалнӑ арҫын 165 см тӑршшӗ, вӑтам пӳ-силлӗ, ҫӳҫӗ ҫырӑ тӗслӗ, куҫӗ сӑрӑрах симӗс тӗслӗ. Вӑл тӗксӗм кӑвак спорт шӑлаварӗпе, ҫавӑн тӗслӗ курткӑпа, хура кроссовкипе пулнӑ.

Ҫамрӑксен театрӗн сӑнӳкерчӗкӗ

Ӗнер, чӳк уйӑхӗн 21-мӗшӗнче, Чӑваш патшалӑх ҫамрӑксен театрӗн артистки, Чӑваш Республикин культурӑн тава тивӗҫлӗ ӗҫченӗ Елизавета Шайдукова 90 ҫул тултарнӑ.

Асӑннӑ театрта Елизавета Федоровна 1959 ҫулта ӗҫлеме пуҫланӑ. Вӑл ҫулсене театрта йывӑр вӑхӑт тесе палӑртаҫҫӗ. Ун чухне учрежденири вырӑс труппине пӗтернӗ. Елизавета Шайдукова театрти 16 артистран пӗри пулнӑ.

https://t.me/gibdd121 сайтри сӑн

Патшалӑх автоинспекцийӗн ӗҫченӗ Никита Черноносов отпускра чухне ӳсӗр водителе тытса чарнӑ.

Чӳк уйӑхӗн 16-мӗшӗнче каҫхине полици лейтенанчӗ Стрелоксен 324-мӗш дивизийӗн урамӗнчи кафе умӗнче арҫын тайкаланса машина патне пынине, руль умне ларнине курнӑ. Вӑл тусӗпе Михаил Максимовпа пӗрле ун хыҫҫӑн кайнӑ. Светофор тӗлӗнче вӗсем ӑна хӑваласа ҫитнӗ.

Полицейски водителе чарсан хӑйӗнпе паллаштарнӑ. Анчах арҫын тытнӑ та вырӑнтан хускалса тарнӑ. Эгер бульварӗнчи 33-мӗш ҫурт картишӗнче водитель машинӑна хӑварса ҫуран тарма хӑтланнӑ. Анчах Никита Черноносов ӑна тытса чарнӑ та ӗҫтешӗсене вырӑна чӗнсе илнӗ.

Чӑваш Енӗн Культура министерствин сӑнӳкерчӗкӗ

Чӳк уйӑхӗн 26-мӗшӗнче пирӗн республикӑра Чӑваш тӗррин кунне уявлаҫҫӗ. Ҫавна май республикӑн Культура министерстви кӑҫал та ҫав кун ӗҫе е вӗренме чӑваш тӗрриллӗ ҫипуҫпа, эрешпе кайма сӗнет.

Сӑнӳкерчӗксене сайтсенче тата халӑх тетелӗсенче вырнаҫтарма, вӗсене #Деньчувашскойвышивки2025, #наработусвышивкой, #научебусвышивкой хештгесемпе палӑртмалла.

«Ӗҫе е вӗренме чӑваш тӗррипе» акцие пирӗн республикӑра 2023 ҫултанпа ирттереҫҫӗ.

«Контактри» сӑн

Чӑваш Ене савӑнӑҫлӑ хыпар ҫитнӗ: библиотекарь Раҫҫей конкурсӗн лауреачӗ пулса тӑнӑ.

Канаш округӗн тӗп библиотекин пай ертӳҫи Людмила Чебукова «Ҫулталӑк библиотекарӗ — 2025» конкурс премине тивӗҫнӗ. Палӑртса хӑвармалла: пултарулӑх тупӑшӑвӗ хӗрӳ иртнӗ. Унта тӗрлӗ регионти вулавӑшсенче ӗҫлекен 413 ҫын хутшӑннӑ. Вӗсенчен 11-шӗ вара сумлӑ наградӑна тивӗҫнӗ, кунсӑр пуҫне палӑрнӑ ҫак 11 библиотекаре ятарлӑ премипе хавхалантарнӑ.

culture.cap.ru сӑнӳкерчӗкӗ

Паян, чӳк уйӑхӗн 21-мӗшӗнче, Чӑваш Енӗн Наци вулавӑшӗнче Надежда Кириллован «Чун ыратӑвӗ» кӗнекине хаклама пуҫтарӑнӗҫ.

Надежда Мефодьевна – Чӑваш Енӗн тава тивӗҫлӗ артистки, педагог, публицист, драматург тата республикӑн театр ӳнерӗн тӗпчевҫи. Чӑваш академи драма театрӗнче вӑл 30 ҫул ӗҫленӗ. Спектакльсенче вылянипе пӗрлех хӑйӗн пултарулӑхне сценарист тата режиссёр пулса та кӑтартнӑ.

Надежда Кириллован ҫӗнӗ кӗнеки XX ӗмӗрти культурӑпа ӳнерти ӗҫченсемпе паллаштарать, ҫав шутра – Ираида Петрова-Нарс тата Геннадий Айхи писательсемпе, Виталий Соломин, Вера Кузьмина тата Владимир Бурмистров артистсемпе, Геннадий Волков этнопедагогпа, Иосиф Дмитриев режиссёрпа, Станислав Кошкин художникпа тата ыттисемпе.

Чӑваш Енӗн Культура институчӗн сӑнӳкерчӗкӗ

Чӑваш патшалӑх культура тата ӳнер институтӗнче чӳк уйӑхӗн 18-мӗшӗнче «Чувашская вышивка – достояние народа» (чӑв. Чӑваш тӗрри – халӑх пуянлӑхӗ) пӗтӗм тӗнчери V ӑслӑлӑхпа практика конференцийӗ ирттернӗ.

Ҫамрӑксене чӑваш тӗррипе тата Евгения Жачева ӑстан пуян эткерлӗхӗпе паллаштарас тӗллевпе ирттерекен мероприятире сумлӑ ҫынсем тухса калаҫнӑ: Чӑваш тӗррин музейӗн заведующийӗ Алина Иванова, халӑх художество пултарулӑхӗн кафедрин заведующийӗ Раиса Васильева, Николай Балтаев художник тата доцент.

Конференцие Беларуҫ тата Узбекистан ҫӗршывӗсем те хутшӑннӑ. Унсӑр пуҫне — Иркутскри, Пензӑри, Питӗрти тата Ленинград облаҫӗнчи чӑвашсем, Чӑваш Енри таджик культурин центрӗ.

forum.zarulem.ws форумра илнӗ сӑнӳкерчӗк

Шупашкарта пурӑнакан 17 ҫулти яшӑн питех те курнӑҫланасси килнӗ. Ара вӑл питбайклӑ пулнӑ-ҫке. Пӗр кунхине каччӑ республикӑн Шалти ӗҫсен министерствин тата прокуратурин ҫурчӗсем умӗпе хӑйӗн мотоциклӗпе светофорӑн хӗрлӗ ҫутипе каҫса кайнӑ. Ҫав вӑхӑтра вӑл икӗ урапаллӑ транспортӑн хыҫалти урапи ҫинче ярӑнса пынӑ.

Кӑштахран ҫамрӑка тытса чарнӑ. Шлемсӑр ярӑннишӗн, светофрӑн хӗрлӗ ҫутине пӑхӑнманшӑн ӑна протокол ҫырса парса тултарнӑ, питбайкне туртса илнӗ.

Курнӑҫ ҫамрӑк ытти вырӑнта еплерех ярӑнса ҫӳренине камерӑсем тӑрӑх пӑхнӑ та вӑл йӗркене татах пӑснине тупса палӑртнӑ.

Ҫул ҫитменнисене вӑхӑтлӑх хупса хуракан центрта ҫӗр каҫнӑ хыҫҫӑн ирхине яш ӳкӗннӗ пек пулнӑ.

Чӑваш Енӗн Культура министерствин сӑнӳкерчӗкӗ

Чӑваш патшалӑх филармонийӗ ҫӗнӗ опера-мюзикла сцена ҫине кӑларассипе ҫине тӑрать. «Сказ о купеческой дочери и волшебном цветке» ӗҫе курма культура учрежденийӗ куракансене ҫитес уйӑхра, раштав уйӑхӗн 13 тата 14-мӗшӗсенче, йыхравлать.

Музыка спектакльне филармони республика Элтеперӗн укҫипе хатӗрлет.

Опера-мюзикла Сергей Аксаковӑн «Аленький цветочек» юмахне тӗпе хурса хатӗрленӗ. Финала хаваслӑн вӗҫлес тенӗ.

Либретто авторӗсем — Игорь Зубков тата Олег Машаров, композиторӗ — Игорь Зубков (Мускав), сӑвӑ авторӗ — Сергей Плотов (Мускав), режиссёрӗ — Олег Машаров (Мускав), хореографӗсем — Кристина Игнатьева, Сергей Ререкин, Ирина Гаврилова.

bloknot-rostov.ru сайтри сӑн

«Ҫанталӑк 21» портал пӗлтернӗ тӑрӑх, ҫитес эрнере те ҫанталӑк чуччупа ярӑннӑ евӗр пулӗ: сивӗтӗ, ӑшӑтӗ… Паян каҫхинех ҫумӑрпа йӗпе юр ҫӑвӗ. Ҫурҫӗр-анӑҫ районӗсенче вара пӑрлӑ ҫумӑр ҫума пултарать.

Ыран кӑнтӑрла хыҫҫӑн тӗтре карса илӗ. Вӑл тунтикун кантӑрлачченех тытӑнса тӑрӗ. Ыран каҫхине каллех ҫумӑр ҫума тытӑнӗ.

Ҫурҫӗр-анӑҫ районӗсенче вырсарникун ирхине йӗпе юр ҫӑвӗ, ҫӗр те шуралӗ. Анчах кӑнтӑрла хыҫҫӑн ҫумӑр ҫума тытӑнӗ те вӑл ирӗлсе кайӗ. Ытларикун ҫил вӑйланӗ. Эрне варринче уяртӗ, ҫил те лӑпланӗ.

Малтанлӑха палӑртнӑ тӑрӑх, чӳкӗн 28-мӗшӗччен юр ҫуса лартмӗ. Ун хыҫҫӑн ҫӑвӗ-ха, анчах ирӗлсе кайӗ.