forum.na-svyazi.ru сӑнӳкерчӗкӗ

Кӳкеҫри «Крепыш» ача пахчинчи пӑтӑрмах пирки Софья Савнеш ӗнер пӗлтернӗччӗ-ха. Аса илтерер: унта физкультура инструкторӗ ачасене алӑран кӑнттаммӑн тытса сӗтӗрнӗ-мӗн.

Видео халӑх тетелӗнче сарӑлнӑ хыҫҫӑн прокуратура тӗрӗслев пуҫарнӑ.

Пӑтӑрмах хыҫҫӑн физкультура инструкторӗ ӗҫрен пӑрахса кайнӑ иккен.

sportgymrus.ru сӑнӳкерчӗкӗ

Раҫҫейри паллӑ гимнаст, Шупашкарти Владислав Поляшов спорт гимнастики енӗпе тӗнче чемпионачӗн финалне лекнине эпир унччен пӗлтернӗччӗ-ха.

Аса илтерер: ӑмӑрту Индонези ҫӗршывӗн тӗп хулинче, Джакартӑра, иртет.

Мӑшӑр пӑрӑс ҫинче финала лекнӗ тӗнчери чи вӑйлӑ гимнаст хушшинче Раҫҫейри икӗ спортсмен пулчӗ: Даниел Маринов тата Владислав Поляшов. Даниел бронза медале тивӗҫрӗ, Владислав Поляшов улттӑмӗш вырӑн йышӑнчӗ.

culture.ru сайтри сӑн

Тивӗҫлӗ канури хӗрарӑм ултавҫӑсене укҫа парас тесе Мускавах самолетпа вӗҫнӗ.

Ку Шупашкарта пурӑнакан 78 ҫулти хӗрарӑмпа пулса иртнӗ. Вӑл ултавҫӑсене 1 млн та 700 пин тенкӗ куҫарса панӑ.

Ун патне домофон улӑштармалла тесе шӑнкӑравланӑ. Хӗрарӑм хӑйӗн даннӑйӗсене пӗлтернӗ, кун хыҫҫӑн унпа темиҫе палламан ҫын ҫыхӑннӑ: опер, юрист... Вӗсем ӑна хӑратса, пӑрахнӑ. Ҫапла вӑл мӗн хушнине пурнӑҫланӑ. Ӑна 75-ри арҫынпа тӗл пулма хушнӑ, унран 1 миллион тенкӗ илме ыйтнӑ. Ҫак арҫын та улталаннӑ. Унтан хӗрарӑма хӑйӗн укҫине хушса курьера парса яма каланӑ. Унӑн укҫа татах пуррине пӗлсен ултавҫӑсем ун валли Мускава самолетпа вӗҫме билет туянса панӑ.

Хайхи «юрист» ҫыхӑнӑва тухма пӑрахсан тин хӗрарӑм хӑйне улталанине ӑнланнӑ.

Халӑх тӗтелӗсенче Кӳкеҫри «Крепыш» ача пахчинчи видео сарӑлма тытӑннӑ. Унта физкультура инструкторӗ ачасене алӑран кӑнттаммӑн тытса сӗтӗрни курӑнать.

Кун пекки унта пӗрре кӑна мар пулнӑ иккен. Видео ҫинче ку хӑш кун пулса иртнисем паллӑ.

Шупашкар районӗн прокуратури ҫак тӗслӗх тӗлӗшпе тӗрӗслев пуҫарнӑ. Ку ӗҫе вырӑнти хӑйтытӑмлӑх тата йӗрке органӗсене те явӑҫтараҫҫӗ.

ЧР Элтеперӗн мӑшӑрӗ Наталья Николаева ертсе пыракан Хӗрарӑмсен пӗрлӗхне республикӑри Общество палатин председателӗ Ванифатий Шайкин Тав хучӗ панӑ. Ку – Элтепер суйлавне тӳпе хывнӑшӑн.

Кун пирки Наталья Николаева телеграм-каналӗнче пӗлтернӗ. Суйлав умӗн Чӑваш Енри Хӗрарӑмсен пӗрлӗхӗ тата Общество сӑнавӗн штабӗ «суйлава тӗрӗс те уҫӑмлӑ» ирттерес тӗлӗшпе пӗрле ӗҫлеме килӗшсе татӑлнӑ.

Шупашкарти ача пахчисенчен пӗринче ӗҫлекен 19 ҫулти хӗр патне икӗ эрне каялла ют ҫын шӑнкӑравланӑ та ҫӗнӗ саккун йышӑннине, ҫавна май абонент номерӗпе усӑ курма май пулмассине пӗлтернӗ. Хӑнӑхнӑ номере упраса хӑварас тесен хӑш-пӗр даннӑя пӗлтерме ыйтнӑ. Унсӑр пуҫне смс ҫырупа килнӗ кода ыйтнӑ.

Унтан пике патне тата теприсем шӑнкӑравланӑ, хайхи патшалӑх пулӑшӑвӗн порталӗн ӗҫченӗ тесе тыттарнӑ. Хӗр пурне те ӗненнӗ. Ӗненнине пула вӑл банкран 300 пине яхӑн кредит илсе пӗлмен-туман ҫынсене укҫа куҫарса панӑ.

forum.na-svyazi.ru сӑнӳкерчӗкӗ

Шупашкар районӗнчи Кӑшавӑшра хуҫасӑр йытӑсем сурӑхсене тапӑннӑ. Вӗсем сакӑр сурӑха ҫурса тӑкнӑ.

Вырӑнти администрацире пӗлтернӗ тӑрӑх, хуҫасӑр йытӑсем выльӑха унччен те тапӑннӑ.

Ҫанталӑк кӗр енне сулӑнса сивӗтме пуҫласан хуҫасӑр йытӑсем ял еннелле апат шыраса пыраҫҫӗ. Ҫулла вӗсене дача хуҫисем тӑрантарса пурӑннӑ.

Шупашкар районӗнче ҫулталӑк пуҫланнӑранпа 29 килсӗр йытта тытнӑ-мӗн. Тӳре-шара хуҫасӑр йытӑсем пирки тӳрех пӗлтерме ыйтать иккен.

vk.com/chuv_kray пабликран илнӗ сӑнӳкерчӗк

Шупашкарти Арбатра ҫутӑ мачи тӑвӗҫ.

Шупашкарти Арбат тесе Ехрем хуҫа бульварне каланине пурте пӗлеҫҫӗ пулӗ ӗнтӗ. Шӑпах ҫавӑнта Мускаври Арбатри пек ҫутӑ мачи вырнаҫтарасшӑн.

Ҫуран утса ҫӳрекенсем ҫав вырӑн вара тата та илемлӗрех пуласса шанаҫҫӗ.

vk.com/chuv_kray пабликран илнӗ сӑнӳкерчӗк

Раҫҫейри вӑрман чи лайӑх касакан хӗрарӑм — Чӑваш Енрен. Йӑлӑмра пурӑнакан пилӗк ача амӑшӗн Галина Климинӑн чи кӗҫӗн ачи ҫур ҫулта ҫеҫ. Упӑшки Мускавра монтажникра тӑрӑшать та нумай ача амӑшӗ кил-тӗрӗшри ӗҫе хӑех пурнӑҫласа ӗлкӗрет.

Галина ачаранпах вӑрманта ӳснӗ. Ашшӗ лесник пулнӑран вӑрманҫӑ ӗҫне аван пӗлнӗ. Анчах малтанласа ашшӗн ҫулӗпе кайман-ха вӑл — Шупашкарта автослесарь пулса тӑрӑшнӑ. Авточупусене те хутшӑннӑ. Анчах чунӗ вӑрман еннех туртнӑ. Кӑштахран Галина Йӑлӑма таврӑннӑ, вӑрманти пушарпа кӗрешекен служба пуҫлӑхӗ пулса тӑнӑ.

Вӑрман касакансен конкурсне хӗрарӑм кашни ҫулах хутшӑнать. Йывӑр ҫын пулнӑ чухне те конкурса хутшӑннӑ. Кӑҫал вара Раҫҫейри конкурсра ҫӗнтернӗ.

stihi.ru сайтри сӑн

«Чӑваш Енри ҫанталӑк» портал канмалли кунсенче хӗвеллӗ ҫанталӑкпа савӑнса юлмалли пирки пӗлтерет.

Шӑматкун пирӗн региона ӑшӑ килӗ, кӑнтӑр енчен вӗрекен ҫил вӑйланӗ. Кӑнтӑрла хыҫҫӑн уяртма тытӑнӗ. Ҫӗрле вара термометр 0 градус кӑтартӗ.

Вырсарникун каллех сивӗ фрончӗ килӗ, вырӑнӑн-вырӑнӑн ҫумӑр ҫӑвӗ. Тунтикун вара уяртӗ, 6-11 градус таран ӑшӑтӗ, ҫил лӑпланӗ.

Ытларикун ҫумӑрлӑ пулӗ, ҫил вӑйланӗ. Юнкунпа кӗҫнерникун та ҫумӑр ҫӑвӗ. Чӳкӗн 1-2-мӗшӗсенче ҫӗре юр шуратма пултарать.