dzen.ru сайтри сӑн

Республика правительстви ҫитес ҫул пӗр уйӑхра пурӑнма кирлӗ виҫе мӗн чухлӗ пулассине палӑртнӑ. Кӑҫалхипе танлаштарсан, вӑл 6,8 процент ӳсӗ, 1049 тенкӗ ытларах пулӗ.

Кӑҫал ку виҫе 15428 тенкӗпе танлашать. Ҫитес ҫултан вара 16477 тенкӗ пулӗ. Ӗҫлекен ҫынсем валли ку виҫе 17960 тенкӗ пулӗ, пенсионерсем валли – 14170 тенкӗ, ачасем валли – 15983 тенкӗ.

culture.ru сайтри сӑн

Раҫҫейре ҫитес ҫул Халӑх пӗрлӗхӗсен ҫулталӑкӗ пулӗ. Ҫӗршыв Президенчӗ Владимир Путин ҫапла йышӑну тунӑ.

Чӑваш Енре 2026 ҫула мӗне халаллассине хальлӗхе палӑртман. ЧР Элтеперӗ Олег Николаев хӑйӗн телеграм-каналӗнче ыйтӑм ирттерет, 5 вариантран суйлама сӗнет. Унӑн пӗтӗмлетӗвӗ тӑрӑх ҫитес ҫул тематикине суйлӗҫ.

Вариантсем вара ҫапларах:

1. Халӑхсен туслӑхӗн ҫулталӑкӗ.

2. Пултарулӑх тата ырлӑх ҫулталӑкӗ.

3. Пӗрлӗх тата тачӑлӑх ҫулталӑкӗ.

4. Ҫемье хаклӑхӗсен ҫулталӑкӗ.

5. Йӑла-йӗрке хаклӑхӗсен ҫулталӑкӗ.

Чӑваш Енӗн Наци вулавӑшӗн сӑнӳкерчӗкӗ

Нумаях пулмасть Чӑваш Енӗн Наци вулавӑшӗнче Александр Ильинӑн кӗнекине хаклама пуҫтарӑннӑ.

«Судьба солдата = Салтак шӑпи» кӗнеке авторӗ – чӑваш поэчӗ, публицист, краевед, Ҫӗрпӳ районӗн хисеплӗ ҫынни. Кӗнекене авторӑн чӑвашла тата вырӑсла ҫырнӑ сӑввисем, поэмисем кӗнӗ. Кӗнекене ҫар ҫыннисене тата Аслӑ Ҫӗнтерӗве 80 ҫул ҫитнине халалланӑ.

Кӗнекене хаклама журналистсем, культура ҫыннисем тата ыттисем хутшӑннӑ. Сӑмахран, истори наукисен докторӗ, профессор Валерий Андреев; Чӑваш патшалӑх аграри университетечӗн профессорӗ Николай Евдокимов; Ҫӗрпӳ районӗнчи тӳре-шара, Чӑваш Республикин тава тивӗҫлӗ учителӗ Геронтий Никифоров; Светлана Асамат, Николай Максимов, Галина Матвеева, Владимир Степанов, Лидия Ковалюк, Василий Кервен, Лидия Сарине поэтсем пулнӑ.

ФСБ тунӑ видео скринӗ

ФСБ ӗҫченӗсем Хусанти аэропортра Ҫывӑх Хӗвелтухӑҫӗнчи террористсен организацине кӗме палӑртнӑ 52 ҫулти арҫынна тытса чарнӑ. Ун тӗлӗшпе пуҫиле ӗҫ пуҫарнӑ.

Следстви палӑртнӑ тӑрӑх, вӑл мессенджер урлӑ Раҫҫейре йӗркелеме юраман террористсен организацийӗпе ҫыхӑннӑ. Ҫырӑннӑ чухне арҫын унӑн ӗҫӗ-хӗлне хутшӑнма хатӗрри пирки пӗлтернӗ. Ҫапла вӑл Раҫҫейрен тухса кайма хӑтланнӑ.

Лерен ӑна мӗнле тухса каймалли пирки инструкци панӑ. Арҫын вӗсем каланине пурнӑҫласа Хусанти аэропорта ҫитнӗ. Шӑпах ҫавӑнта тытса чарнӑ ӑна.

Чӑваш академи драма театрӗн сӑнӳкерчӗкӗ

Ӗнер Чӑваш академи драма театрӗнче СССР халӑх артисткине Вера Кузьминана халалланӑ Наци театрӗсен регионсем хушшинчи «Чӗкеҫ» фестивалӗ иккӗмӗш хут уҫӑлнӑ.

Театрта пӗлтернӗ тӑрӑх, Чӑваш Республикин Пуҫлӑхӗ Олег Николаев куракансене, фестивале хутшӑнакан театрсене саламланӑ.

Чӑваш академи драма театрӗ «Хуркайӑк ҫулӗ» спектакль кӑтартнӑ. Ӑна куракансем питех те юратса йышӑннӑ, куҫҫуль витӗр курнӑччӗ.

«Контактри» сӑн

Паян Чӑваш кӗнеке издательстви 105 ҫул тултарать. Юбилей тӗлне «С книгой по жизни. Кӗнекепе пурӑнатпӑр: Чувашскому книжному издательству — 105 лет» кӗнеке кун ҫути курнӑ. Ӑна Ольга Федорова тата Ольга Иванова хатӗрленӗ. Ӳнерҫи – Наталия Орлова, макет оригиналӗ – Екатерина Васильевӑн.

Чӑваш кӗнеке издательстви 1920 ҫулхи чӳк уйӑхӗн 12-мӗшӗнче йӗркеленнӗ. Ҫав кун Шупашкарта чӑвашсен хушшинчи II Пӗтӗм Раҫҫейри канашсен съезчӗ уҫӑлнӑ. Унта пӗлтерӗшлӗ ыйтӑва пӑхса тухнӑ – Чӑваш патшалӑх издательствине уҫма йышӑннӑ. Унӑн пӗрремӗш ертӳҫи Александр Иванов (Ванюшке, 1897-1942) пулнӑ.

cap.ru сайтри сӑн

«Сӑрнай» халӑх вокал ансамбльне йӗркеленӗ, ӑна нумай ҫул ертсе пыракан Николай Эриванов «Ҫӗнӗ Шупашкарӑн хисеплӗ ҫынни» ята тивӗҫнӗ.

Николай Лазаревича композитор пек те пӗлеҫҫӗ. Вӑл чӑваш фольклорне те пухать, чӑваш халӑх инструменчӗсене ӑсталать. Николай Эриванов унччен «Чӑваш Республикин тава тивӗҫлӗ ӗҫченӗ», «Нӑрваш Шӑхаль ялӗн хисеплӗ гражанинӗ» ятсене тивӗҫнӗ.

Николай Лазаревич 1938 ҫулхи ҫурлан 20-мӗшӗнче Патӑрьел округӗнчи Вӑрманхӗрри Шӑхаль ялӗнче ҫуралнӑ. Шупашкарти музыка училищинчен вӗренсе тухнӑ. 1979 ҫулхи чӳк уйӑхӗнче Ҫӗнӗ Шупашкарти «Химик» культура ҫурчӗ ҫумӗнче «Сӑрнай» халӑх вокал ансамблӗ йӗркеленӗ.

cap.ru сайтри сӑн

Канаш округӗнчи Чӑрӑшкасси ялӗнче пурӑнакан Николаевсем пӗр сукмакпа 55 ҫул утаҫҫӗ. Вӗсем ҫак уява паллӑ тунӑ.

Ҫамрӑксем Шупашкарта паллашнӑ. Фаина ун чухне Культура министерствинче методистра ӗҫленӗ, Анатолий Культура ҫуртӗнче илемлӗх ертӳҫи пулнӑ. Вӗсен хушшинче юрату ҫуралнӑ.

1970 ҫулхи чӳкӗн 8-мӗшӗнче 24-ри каччӑпа 21 ҫулти хӗр пӗрлешнӗ. Анатолий вырӑнти фабрикӑра столярта ӗҫленӗ, райсудра завхоз пулнӑ. Фаина Атнаш шкулӗнче малтан – пионервожатӑй, унтан вырӑс чӗлхипе литературин вӗрентекенӗ пулнӑ, тивӗҫлӗ канӑва тухиччен директор тивӗҫне пурнӑҫланӑ. Вӗсем икӗ ача ӳстернӗ, халӗ 3 мӑнук пур.

«Контактра» халӑх тетелӗнчи сӑн

Чӑваш Ен спортсменки Анна Борисова Словакире иртнӗ Европа чемпионатӗнче икӗ медаль ҫӗнсе илнӗ.

Пирӗн ентеш мас-рестлинг енӗпе иртнӗ ӑмӑртура 75 килограмм тайман спортсменсемпе вӑй виҫнӗ, «кӗмӗле» тивӗҫнӗ. Унтан вӑл тӗрлӗ виҫе категорийӗнчи спортсменсемпе тупӑшса пӑхӑр медаль ҫӗнсе илнӗ.

Палӑртмалла: Анна И.Н. Ульянов ячӗллӗ Чӑваш патшалӑх университечӗн медицина факультетӗнче вӗренет.

«Чувашский коай» пабликра вырнаҫтарнӑ сӑнӳкерчӗк

Ханна юрӑҫ Шупашкара Мускавран пуйӑспа килнине кӑтартакан сӑнӳкерчӗксене халӑх тетелӗнче вырнаҫтарнӑ.

Ханна Шупашкара ҫемьепе килнӗ. Хӗрарӑм пӗлтернӗ тӑрӑх, вӑл хӑйӗн ачисене ҫул илӗртӳлӗхне кӑтартас тенӗ.

Кунта Ханнӑн ашшӗпе амӑшӗпе тӗл пулнӑ.

Ханна (Анна Иванова) тӗрлӗ илем конкурсӗнче ҫӗнтернӗ, «Ылтӑн граммофон» премие тӑватӑ хутчен тивӗҫнӗ.

Унӑн упӑшки — «Black Star Inc» лейбл ертӳҫи. Вӗсен икӗ хӗр, иккӗшне те ҫынтан уйрӑлса тӑмалла ят панӑ: Адриана тата Камилла.