forum.na-svyazi.ru сайтра вырнаҫтарнӑ сӑнӳкерчӗк

Чӑваш Ен ертӳҫисем тата тепӗр икӗ района центрне автобуспа ҫыхӑнтарма шантарнӑ. Аса илтерер: маларах вӗсем Елчӗкрен Патӑрьеле автобуссем ҫӳретме пуҫлас ӗмӗтлине пӗлтернӗччӗ. Халӗ Куславккаран Сӗнтӗрваррине автобус ҫӳретме пуҫлас пирки хыпарланӑ.

Кун пек йышӑну тума шантарни районти больницӑсене тепӗр муниципалитетсенчисемпе пӗрлештерес ӗмӗтпе ҫыхӑннӑ. Республикӑн Сывлӑх сыхлав министерстви ҫак енӗпе ҫине тӑрсах халӑха ӳкӗте кӗртме хӑтланать, ҫыннисем хавхаланас вырӑнне кӑмӑлсӑрланаҫҫӗ.

Ҫывӑх вӑхӑтра Ҫӗнӗ Шупашкарти хула больниципе унти медицина центрне, стоматологи поликлиникине тата Куславккапа Сӗнтӗрвӑрринчи район больницсене пӗрлештересшӗн иккен.

pravdapfo.ru сайтран илнӗ сӑнӳкерчӗк

Шӑмӑршӑри тӳре-шарана суд тата прокуратура хистенипе шыв пӑрӑхне юсаттарӗҫ. Надзор органӗ тӗрӗслев ирттерсе палӑртнӑ тӑрӑх, шыв парӑхӗ пӗтӗмпех япӑхса ҫитнӗ, ӑна йӑлтах ҫӗнӗрен юсамалла.

Шӑмӑршӑ районӗнчи тӳре-шара ку ыйтупа чылай ҫул нимӗн те туман иккен. Япӑхса кайнӑ пӑрӑх тӑрӑх уҫлакан шыв пахалӑхӗ те начар.

pravdapfo.ru сайтран илнӗ сӑнӳкерчӗк

Чӑваш Енре пурӑнакансем укҫа-тенке банкра тытма тӑрӑшаҫҫӗ. Иртнӗ ҫул вкладсен виҫи унчченхинчен 19 процент ӳснӗ. Кашни ҫыннӑн банкра вӑтамран 343 пин тенкӗ упранать.

Укҫана банкра тытнин виҫипе Чӑваш Ен Раҫҫейре 37-мӗш вырӑн йышӑнать, Атӑлҫи тӑрӑхӗнчи регионсем хушшинче вара — тӑваттӑмӗш.

Банкра укҫа пухса пыракансен пысӑк пайӗ Мускавпа Питӗр хулисенче пурӑнать. Ингуш тата Чечня республикисенче ун пеккисем ытти регионпа танлаштарсан сахалтарах.

Прокуратура тунӑ сӑн

Ҫӗрпӳ округӗнчи Чурачӑк ялӗнче нумай хваттерлӗ ҫурт тӑрри йӑтӑнса аннӑ. Вырӑна район прокурорӗ ҫитнӗ.

Ку паян 13 сехетре Савут урамӗнчи 3-мӗш ҫуртра пулнӑ. Пӗр подъезд тӑрринчи ҫивитти йӑтӑнса аннӑ.

Халӗ прокуратура тӗрӗслев ирттерет. Ҫакӑ паллӑ: ҫурт авариллисен йышне кӗмен. Юсав ӗҫӗсене пуҫӑннӑ ӗнтӗ.

МЧС сӑнӳкерчӗкӗ

Чӑваш Енре пӗр кинемей дачӑна кайма тухса кӗрт ӑшне путса ларнӑ.

Пӑтӑрмах нарӑс уйӑхӗн 8-мӗшӗнче пулса иртнӗ. 75 ҫулти кинемей Ҫӗнӗ Шупашкарти «Туслӑх» сад юлташлӑхне кайма тухнӑ. Вӑл дача ҫуртне кайса пӑхас тенӗ. Ҫула ҫил-тӑман хӳсе лартнине пӑхмасӑрах ватӑ 2 ҫухрӑм ытла утма пултарнӑ-ха, анчах кайран вӑйран кайнӑ.

Кинемее пулӑшма (хӑех телефонпа шӑнкӑравласа пулӑшу чӗннӗ-ши, хыпарта ун пирки каламан) 11-мӗш пушарпа ҫӑлав пайӗн ӗҫченӗсем пырса ҫитнӗ. Вӗсем ватӑ ҫынна наҫилкка ҫине хурса васкавлӑ пулӑшу машини патне йӑтса тухнӑ.

«Хыпар» Издательство ҫурчӗн директорне-тӗп редакторне Виктория Вышинскаяна ӗҫрен кӑларнӑ.

Ку хушӑва право информацийӗн сайтӗнче пичетленӗ.

Палӑртмалла: Виктория Вышинская ку должноҫе 2024 утӑ уйӑхӗнченпе йышӑннӑ.

pravdapfo.ru сӑнӳкерчӗкӗ

Елчӗкри тата Шӑмӑршӑри район пульницисене республикӑн Сывлӑх сыхлав министерстви Патӑрьел районӗнчипе пӗрлештересшӗннине эпир унччен пӗлтернӗччӗ-ха. Ҫак ыйтӑва сӳтсе явма Елчӗкре пуҫтарӑнсан ҫынсем Патӑрьеле епле кайса килмелле тесе те ыйтнӑ.

Республикӑн транспорт министрӗ Максим Петров Елчӗкрен Патӑрьеле автобус ҫӳреме пуҫлӗ тесе шантарнӑ. Хыснаран ун валли 20 миллион тенкӗ уйӑрма палӑртнӑ-мӗн. Ҫул ҫинче икӗ автобус ҫӳрӗ. Пӗрремӗш рейс ирхи 7-ре ҫула тухӗ, каҫхи — 17 сехетре. Автобус сехетре пӗрре пулмалла иккен.

cap.ru сайтри сӑн

Чӑваш патшалӑх пукане театрӗ ачасене Ҫӑварни уявлама чӗнет. Аса илтеретпӗр: кӑҫал Ҫӑварни эрни нарӑсӑн 16-22-мӗшӗсенче иртӗ.

Нарӑс уйӑхӗн 19-22-мӗшӗсенче театрта Ҫӑварни уявне халалланӑ программа пулӗ. Унпа килӗшӳллӗн шӑпӑрлансем «Умка», «Снегурочка», «Проделки козы-дерезы» постановкӑсене курма пултарӗҫ.

Ҫавӑн пекех ачасем патне хӑнана Ҫӑварни сӑнарӗ килӗ, театрализациленӗ представлени те пулӗ.

ru.pinterest.com сайтри сӑн

«Ҫанталӑк 21» сайт пӗлтернӗ тӑрӑх, ку эрнере юр нумай ҫумӗ, ҫанталак сивӗтӗ.

Каҫсерен 15-20 градус сивӗ пулӗ, хӑш-пӗр ҫӗрте вара — 25 градус таранах. Ҫил лӑпланнӑ май паян каҫхине тӗтре карса илӗ.

Юнкунранпа вара каллех ҫил вӑйланӗ. Эрнекун кӑштах юр ҫӑвӗ, ӑшӑтӗ: 0 градус пулӗ. Канмалли кунсенче вара термометр «плюс» кӑтартӗ, ҫавӑнпа йӗпе юр тата ҫумӑр ҫӑвӗ. Юр кӑштах ирӗлӗ, ҫурт тӑррисенчен юр анма пултарӗ – асӑрханӑр.

Ҫанталӑк ӑшӑтать пулсан та хальлӗхе ҫуркунне ҫывхарать теме ҫук-ха. Малтанлӑха палӑртнӑ тӑрӑх, ҫитес эрнере каллех сивӗтӗ.

visitvolga.ru сӑнӳкерчӗкӗ

Чӑваш Енри хӑна ҫурчӗсене броньлакансен йышӗ ӳснӗ. Кун пирки Раҫҫейӗн туриндустри пӗрлешӗве пӗлтернӗ.

Кӑҫалхи ҫур ҫул валли хӑна ҫурчӗсене йышӑнса хурасси унчченхи танлаштаруллӑ тапхӑртинчен 26 процент ӳснӗ.

Чӑваш Енри хӑна ҫурчӗсене ытларах чухне Мускав тата Мускав облаҫӗнчи, Тутарстанри тата Чулхула облаҫӗнчи ҫынсем йышӑнса хураҫҫӗ. Хамӑр патрисен тӳпи те пур — ку цифра 10 процентпа танлашать.