Инкеклӗ лару-тӑру министерстви тунӑ сӑн

Паян Шупашкарти саунӑра пулнӑ пушарта икӗ ҫын вилнӗ. Инкек ирхи 7-ре «Сокол» кинотеатр пулнӑ зданири «Банный эталон» саунӑра пулнӑ.

Ҫав вӑхӑтра унта арҫынпа хӗрарӑм каннӑ. Ҫапӑнмалли пӳлӗмре ҫулӑм тухнӑ, вӗсем тӗтӗмпе наркӑмӑшланнӑ.

Ҫӑлавҫӑсем арҫынпа хӗрарӑма урама илсе тухнӑ. Анчах, шел те, вӗсен пурнӑҫне ҫӑлма май килмен.

Халӗ пушар сӑлтавне уҫӑмлатаҫҫӗ, арҫынпа хӗрарӑм кам пулнине палӑртаҫҫӗ.

«Контактри» сӑн

Паян Етӗрне округӗнчи Совхозный поселокӗнче лаша чупӑвӗпе Чӑваш Ен Кубокӗн финалӗ иртнӗ. Йӑлана кӗнӗ спорт ӑмӑртӑвне ҫын нумай пухӑннӑ: ӑмӑртакансем те, куракансем те.

Тӗп парнене – ылтӑн кубока тата 300 пин тенке – Маршак ятлӑ тиха ҫӗнсе илнӗ. Унпа Александр Пыркин чупнӑ. Кӗмӗл медале Блейдж Лок тивӗҫнӗ, унӑн юланутҫи – Павел Матьянов. Пӑхӑр медале Флюид тата Николай Пыркин илнӗ.

Ӑмӑрту вӑхӑтӗнчех юрӑҫсен, пултарулӑх ушкӑнӗсен юрри-ташшипе киленме май пулнӑ.

cap.ru сайтри сӑн

Улатӑр округӗнче пурӑнакан Виктор тата Зоя Арефьевсем пӗрлешнӗренпе 60 ҫул иртнӗ. Вӗсен юрату историйӗ 1965 ҫулта пуҫланнӑ. Виктор Ҫурҫӗр флотӗнче ҫарта пулнӑ хыҫҫӑн таврӑннӑ кӑна – Зойӑна курнӑ. Ҫавӑнтанпа вӗсем пӗр-пӗрне килӗштернӗ.

Виктор Михайлович «Электравтомат» савутра ӗҫлесе ӗмӗрне ирттернӗ, Зоя Михайловна вара музыка инструменчӗсен савутӗнче тӑрӑшнӑ.

Халӗ Арефьевсен 3 мӑнук, 3 кӗҫӗн мӑнук тата вӗсен 2 ачи.

Елчӗк районӗнче пурӑнакан 55 ҫулти арҫын питӗ кӗвӗҫ пулнӑ тата ҫынна хӗнеме юратнӑ.

Тӑнлавӗ пасарнӑ арҫын ҫулӗ кайнине пӑхмасӑрах кӗвӗҫме пӑрахман. Пӗрле пурӑнакан хӗрарӑма вӑл кӳрши ҫумне хушса вӑрҫнӑ. Кӑҫалхи пуш уйӑхӗн 20-мӗшӗнчен пуҫласа ака уйӑхӗн 10-мӗшӗччен хӗрарӑма виҫӗ хутчен хӗненӗ, 5 аяк пӗрчине хуҫнӑ. Ун хыҫҫӑн хӗрарӑм унпа текех пурӑнас темен.

Ҫу уйӑхӗн 6-мӗшӗнче арҫын унччен пӗрле пурӑннӑ хӗрарӑма шыраса 80-ри карчӑк патне кайнӑ. Лешӗ ман патра ҫук тесе калани килӗшмен, ватӑ ҫынна хӗнесе пӗтернӗ, унӑн икӗ карас телефонне, телефона зарядкӑна лартмалли хатӗрсене тата ҫӑра уҫҫине йӑтса тухса кайнӑ.

Кӗҫех арҫынна РФ Пуҫиле кодексӗн виҫӗ статйипе, ҫав шутра ҫын пурлӑхне вӑрланӑшӑн та, суд тӑвӗҫ.

t.me/nikamran каналтан илнӗ сӑнӳкерчӗк

Чӑваш Енре ҫерҫи йышне шутлӗҫ. Телеграмри «Пуринчен малтан» каналта пӗлтернӗ тӑрӑх, ятарлӑ акци ҫурла уйӑхӗн 17-мӗшӗччен иртӗ.

Шутлава кашниех хутшӑнма пултарать. Ҫерҫисене сӑн ӳкерсе илмелле те вӗсене шутласа даннӑйсене проектӑн сайтӗнче ҫырса кӑтартмалла.

Ырӑ ӗҫе хутшӑннисене сертификат парӗҫ.

Хӗлле Чӑваш Ен ҫерҫисен йышӗпе 81 регион хушшинче 21-мӗш вырӑн йышӑннӑ.

forum.zarulem.ws сайтран илнӗ сӑнӳкерчӗк

Шупашкарта пурӑнакан 85 ҫулти кинемее «Ларгус» автомашина таптаса кайнӑ.

Пӑтӑрмах ҫурла уйӑхӗн 11-мӗшӗнче 17 сехет тӗлӗнче пулса иртнӗ.

Дачӑран килекен виҫӗ хӗрарӑм «Заря» пахча юлташлӑхӗн киле кайма тухсан Вӑрнар шосси урлӑ каҫма тӑнӑ. «Ларгус» машина 85-ри хӗрарӑм ҫине пырса кӗнӗ. Кинемей инкек вырӑнӗнчех вилсе кайнӑ.

Муркаш районӗнчи пӗр ялта пурӑнакан арҫын урах пулнӑ. Вӑл йӗрке хуралҫисене каланӑ тӑрӑх, ҫуран ҫӳрекенсене ытти транспорт кансӗрленӗрен курман имӗш.

.

forum.zarulem.ws сайтран илнӗ сӑнӳкерчӗк

Нумаях пулмасть ирхи 8 сехет ҫитеспе «Сызрань – Сарту –Волгоград» автоҫулӑн 492 ҫухрӑмӗнче чӑваш номерӗсемлӗ «Фольксваген Тикуан» тата «КамАЗ» ҫапӑннӑ.

Иномарка водителӗ васкавлӑ пулӑшу машининче вилнӗ. Салонта пулнӑ унӑн арӑмӗпе ачине больницӑна илсе кайнӑ. Хӗрарӑм халӗ Камышин больницинче выртать, ачине Волгограда вертолётпа илсе ҫитернӗ.

Патшалӑхӑн ҫул-йӗр хрушсӑрлӑхӗн инспекцийӗнче

ӑнлантарнӑ тӑрӑх, «Фольксваген» хирӗҫ ҫулҫине тухса кайнӑ. Чӑваш Енри ҫемье тинӗс хӗрринчен канса килет пулнӑ.

chuvashia.sledcom.ru сӑнӳкерчӗкӗ

Чӑваш Енре пӗр сутуҫӑ темиҫе мандарин вӑрланӑ икӗ ачана тӗлӗнсе каймалла майпа явап тыттарас тенине эпир унччен пӗлтернӗччӗ-ха. Аса илтерер: 11-ти арҫын ачапа 13-ри хӗрача сентре ҫинчи темиҫе мандарина вӑрланӑ. Ҫавӑншӑн сутуҫӑ вӗсене ҫын ҫук ҫӗре лартса кайнӑ. Унта вӑл пите зелёнка сӗртерттернӗ.

Арҫын Волгоград облаҫӗнчен Чӑваш Ене куҫса килнӗ вӑйпитти-мӗн. Пӑтӑрмах Етӗрнере пулнӑ. Ачасем пӗр тӑвансем иккен.

Ачасене ҫын ҫук ҫӗре ирӗксӗр лартса кайнӑ арҫын тӗлӗшпе пуҫиле ӗс пуҫарнӑ. Ӑна ҫын вӑрланӑшӑн явап тыттарма пултараҫҫӗ.

«Контактри» сӑн

Японири Осако хулинче ҫамрӑк изобретательсен конкурсӗ иртнӗ. Унта Шупашкарти ҫамрӑксем пысӑк ҫитӗнӳ тунӑ.

Абруков ячӗллӗ Ӑслӑлӑх коллабрацийӗн ҫуртӗнче ӑсталӑхне туптакан Иван Воронцов, Вадим Фесенко тата Виктория Копышева хӑйсен «СМАРТ «ТорфоТрак» проекчӗпе кӗмӗл медаль ҫӗнсе илнӗ.

Вӗсем торф кӑлармалли навигациллӗ пилотсӑр система хатӗрленӗ. Ҫамрӑксем каланӑ тӑрӑх, ку торфяниксенчи ӗҫе хӑрушсӑр, тухӑҫлӑ тата экологи тӗлӗшӗнчен таса пурнӑҫлама май парать.

Пӗтӗмӗшле илсен, Раҫҫей команди ӑмӑртуран 8 медаль илсе килнӗ.

Матвеевскисен архивӗнчи сӑн

Оксанӑпа Егор Матеевскисем Раҫҫейри патриотизм юррисен «Музыка Гордых» конкурсӑн ҫурма финалне тухнӑ тата топ-100 йыша кӗнӗ.

Унта ҫӗршыври 32 регионти дуэтсем хутшӑнаҫҫӗ. Вӗсен пултарулӑхне «Любэ» ушкӑн лидерӗ Николай Расторгуев, Зара, Александр ST Степанов, Алексей Поддубный (DJANGO), Виктория Черенцова, Александр Носков («Зверобой»), Дмитрий Нестеров («Свинцовый Туман»), Александр Шаганов поэт тата ыттисем хаклӗҫ.

Ҫӗнтерӳҫӗсен «Гордость» федераци радиовӗнче юрӑсен ротацийӗ пулӗ. Ҫавӑн пекех вӗсем ҫурла уйӑхӗн 31-мӗшӗнче Чулхулара гала-фестивальте юрлӗҫ.