ria.ru сайтри сӑн

Шупашкарта студентсен кампусне тӑвасшӑн. Вӑл – аслӑ шкул ҫумӗнчи хӑйне евӗр хула. Ку ыйтӑва республика Элтеперӗ Олег Николаев Раҫҫей Президенчӗпе Владимир Путинпа тӗл пулсан сӳтсе явнӑ.

Проектпа килӗшӳллӗн, 3 общежити, вӗренӳ лапамӗ, культура ҫурчӗ, технопарк, спорт комплексӗ пулмалла.

«Пирӗн тӗллев - хамӑр ҫамрӑксене республикӑрах хӑварасси, ытти регионти яш-кӗрӗме те Чӑваш Ене илӗртсе вӗренмелли, ӗҫлемелли тивӗҫлӗ майсем туса парасси», - палӑртнӑ Олег Николаев.

cap.ru сӑнӳкерчӗкӗ

Красноармейски тӑрӑхӗнчи Крентейкассинче ҫуралса ӳснӗ Сира Спиридонова 100 ҫул тултарнӑ. Юбилея кинемей пульницӑра кӗтсе илнӗ. Вӑл Тӑван ҫӗршывӑн Аслӑ вӑрҫи вӑхӑтӗнче окоп чавнӑ, колхозра ӗҫленӗ. Ҫӗрлесерен вара фронтри салтаксем валли нуски ҫыхнӑ. Вӑрҫӑ хыҫҫӑн Сира офицера качча тухнӑ.

Унӑн ӗҫ стажӗ – 50 ҫула яхӑн. Вӑл ҫулне кура мар правур, пурнӑҫа юратать. Кинемей пӗчченех пурӑнать.

t.me/neuro_praxis сӑнӳкерчӗкӗ

Искусство интеллекчӗ шӳтлеме те пӗлет, судлашать те, хаҫат та кӑларать.

Китайри пӗр ҫыравҫӑ, ав, ҫав мелпе усӑ курса эротика романӗсем ҫырнӑ та кайран ӑна тӗрмене хупнӑ. Текста ҫыраканни искусство интеллекчӗ пулсан та айӑпли ҫыравҫӑ тесе йышӑннӑ суд.

Нумаях пулмасть «Яндекс» сӑнӳкерчӗксене хатӗрлемелли ҫӗнетнӗ нейросеть ӗҫлеттерсе янӑ — YandexART 2.5 латиницӑпа ҫырнисене лайӑхрах ӑнланать тата мӗн ыйтнине аванрах тӗшмӗртет-мӗн.

Нейросеть ҫынсенчен лайӑхрах шӳтлет. Мемсем валли нейросеть ҫырнине ҫынсем ытларах юратса йышӑнаҫҫӗ иккен. Ҫынпа танлаштарсан нейросеть лайӑхрах шӳтсем шӑрҫалать.

Италире искусство интеллекчӗ хаҫат кӑларса пӑхнӑ. Журналистсем ӑна ыйтусем ҫеҫ панӑ тата хуравсене редакциленӗ.

Искусство интеллекчӗ ҫын шухӑшлавӗ пекрех тесе калаҫҫӗ. Google пуҫ мими тата нейросеть епле ӗҫленине танлаштарнӑ вӗсен хастарлӑхӗ пӗр пекрехне палӑртнӑ.

"Контактри" сӑн

Ҫӗнӗ Шупашкарта пурӑнакан ветеран Алексей Афанасьев 101 ҫул тултарнӑ.

Вӑл Тӑван ҫӗршывӑн Аслӑ вӑрҫине хутшӑннӑ, Украина фронтӗнче ҫапӑҫнӑ. 19 ҫулта чухне Алексей Афанасьев ҫапӑҫура пӗр урине ҫухатнӑ.

Вӑрҫӑ пӗтсен Чӑваш Ен каччи тӑван ялӗнче ӗҫлесе пурӑннӑ. Ҫарти паттӑрлӑхшӑн ӑна Хӗрлӗ Ҫӑлтӑр орденӗпе, Жуков медалӗпе тата ытти наградӑпа чысланӑ.

ШӖМ тунӑ сӑн

Ӗнер Канаш округӗнче машина кювета чӑмса ҫаврӑнса ӳкнӗ. Салонра 6 ҫамрӑк ҫын пулнӑ. Шел те, иккӗшӗ вилмеллех аманнӑ.

Ҫакӑ паллӑ: ҫамрӑксем ача ҫуралнине паллӑ тунӑ. «Чеб.ру» портал пӗлтернӗ тӑрӑх, ҫамрӑк ашшӗ – вилнисен йышӗнче. Машина кювета чӑмсан 22 ҫулти каччӑ салонран тухса вӗҫнӗ. Вӑл ҫак округри Вӑтапуҫ ялӗнчен. Ҫавӑн пекех Сӗнтӗрвӑрринчи 26 ҫулти каччӑ вилмеллех аманнӑ. «Хондӑн» 28-ти водительне тата тепӗр 3 пассажира пульницӑна илсе кайнӑ, вӗсем йывӑр аманнӑ.

culture.cap.ru сӑнӳкерчӗкӗ

Чӑваш Енре чикансен ачисене вырӑнти йӑла-йӗркепе паллаштараҫҫӗ. Кун пирки республикӑн влаҫ органӗсен официаллӑ порталӗнче пӗлтернӗ.

Асӑннӑ ӗҫе пурнӑҫласа чикансен ачисене Сӗнтӗрвӑрри районӗнчи Шуршӑлти А.Г. Николаевӑн мемориал комплексне илсе кайса кӑтартнӑ. Кун пек ҫулҫӳрӗве Чӑваш Енри Халӑхсен туслӑхӗн ҫурчӗ Чӑваш Енӗн Культура министерстви пулӑшнипе йӗркеленӗ.

Музейпа паллашнисем — «Лулуди» наципе культура пӗрлӗшӳри ачасем. Вӗсем Шупашар 63-мӗш тата 1-мӗш шкулсенче вӗренеҫҫӗ.

Чикан культурин пайташӗ Григорий Маркович каланӑ тӑрӑх, ачасене музейра питех те килӗшнӗ, экскурсовода вӗсем чунтан кӑҫӑкланса итленӗ.

www.cap.ru сӑнӳкерчӗкӗ

Чӑваш Енре ҫурхи сунар тапхӑрӗ пуҫланнӑ. Вӑл паянтан пуҫласа ака уйӑхӗн 30-мӗшӗччен пырӗ.

Сӑмах май каласан, пирӗн тӑрӑхра сунар улӑх-ҫаранне икӗ зонӑна уйӑрнӑ: пӗрремӗш тата иккӗмӗш. Кашни зонӑра сунар тапхӑрне палӑртнӑ.

Пӗрремӗш зонӑна Улатӑр, Патӑрьел, Йӗпреҫ, Комсомольски, Пӑрачкав, Шӑмӑршӑ, Ҫӗмӗрле, Елчӗк тӑрӑхӗсем кӗреҫҫӗ.

Иккӗмӗш зонӑра — Элӗк, Вӑрнар, Канаш, Куславкка, Красноармейски, Хӗрлӗ Чутай, Сӗнтӗрвӑрри, Муркаш, Вӑрмар, Ҫӗрпӳ, Шупашкар, Етӗрне, Тӑвай районӗсем.

Чӑваш Енӗн граждан оборонин тата инкеклӗ ӗҫсен комитетне министерство туса хунӑ. Халӗ ҫав ведомство Чӑваш Республикин граждан оборонин тата инкекле лару-тӑру ӗҫӗсен министерстви ятлӑ.

Ҫӗнӗ министерство унчченхи комитетӑн ӗҫне пурнӑҫласа пырӗ.

Хушӑва республика Элтеперӗ Олег Николаев паян, ака уйӑхӗн 1-мӗшӗнче, алӑ пуснӑ.

А.Г. Николаев ячӗпе хисепленекен Шупашкарти аэропорт иртнӗ уйӑх вӗҫӗнче, пуш уйӑхӗн 30-мӗшӗнче, ҫуркуннепе ҫуллахи тапхӑр ҫине куҫнӑ.

Ҫӗнӗ тапхӑр ҫине куҫнӑ май расписанире хӑш-пӗр улшӑну пулса иртнӗ. Сӑмахран, самолетсем Питӗрпе Мускава каймалли вӑхӑта улӑштарнӑ. «Аэрофлот» самолёчӗ Шупашкартан Мускава каллех ирхи 7 сехетре вӗҫсе кайӗ, кунта вӑл 23 сехет те 30 минутра вӗҫсе килӗ.

cap.ru сӑнӳкерчӗкӗ

Ҫитес канмалли кунсенче Шупашкарта, ял хуҫалӑх ярмӑрккисем уҫӑлӗҫ. Вӗсем ака уйӑхӗн 27-мӗшӗччен кашни шӑматкунпа вырсарникун 9-14 сехетсенче ӗҫлӗҫ.

Ярмӑрккӑсем виҫӗ лапамра вырнаҫӗҫ: «Шупашкар» суту-илӳ центрӗ умӗнче, «Николаевски» суту-илӳ комплексӗнче, Эльгер урамӗнчи 11-мӗш «а» ҫурт умӗнчи фермер суту-илӳ речӗсенче.