«Контактра» халӑх тетелӗнчи сӑн

Санкт-Петербургра пурӑнакансем валли чӑваш наци апатне пӗҫерес енӗпе ӑсталӑх класӗ иртнӗ.

Ӑна хулари чӑваш чӗлхипе культурин клубӗ йӗркеленӗ. Унӑн ертӳҫи – Надежда Котельникова.

Ӑсталӑх класӗ кулинари студийӗнче иртнӗ. Унӑн хуҫисем Игорь Танцырев тата Венера Дасаева хӑнасене чӑваш сӑрипе кӗтсе илнӗ. Ӑсталӑх класне килнисем шеф-повар пулӑшнипе хуплу тата хуран кукли пӗҫернӗ.

Кӑмакара хуплу пиҫнӗ вӑхӑтра вырӑнти чӑваш артисчӗсем юрӑсем шӑрантарнӑ.

Яндекс сӑнӳкерчӗкӗ

Чӑваш Енӗн пӗрлештернӗ командисен спорт енӗпе хатӗрлекен А. Игнатьев ячӗллӗ центр директорӗ пулма Геннадий Егоров шаннӑ.

Геннадий Егоров унччен 11-мӗш спорт шкулӗн директорӗ пулнӑ, чӑваш наци кӗрешӗвӗн федерацийӗн президенчӗ.

Республикӑн Спорт министерствинче шухӑшланӑ тӑрӑх, Геннадий Егоров А. Игнатьев ячӗллӗ центра ертсе пыма чӑннипех те тивӗҫ.

cap.ru сӑнӳкерчӗкӗ

Республикӑн ача-пӑча клиника пульницинче 15-ри пике хӑлхинчен кӑпшанкӑ туртса кӑларнӑ. Унти йышӑнупа диагностика уйрӑмне пынӑ пике хӑлхара тем канӑҫсӑрлантарнине пӗлтернӗ.

Вӑл шурӑ халатлисене ӑнлантарнӑ тӑрӑх, хӑлха ыратать, унта тем кӗрсе ларнӑ пек сасӑ пур.

Тухтӑрсем тӗрӗсленӗ те хӑлхара чӗрӗ кӑпшанкӑ пуррине асӑрханӑ. Ӑна вӗсем ятарлӑ оборудовани пулӑшнипе кӑларнӑ.

Ольга Австрийская сӑнӳкерчӗкӗ

Чӑваш кӗнеке издательствинче «Эсӗ манӑн тус пулсан...» ятпа кӗнеке пичетлесе кӑларнӑ.

Вӑтам классенче вӗренекенсем валли Ольга Федорова пухса хатӗрленӗ ҫӗнӗ кӑларӑмра паллӑ чӑваш прозаикӗсен ӗҫӗсемпе пӗрлех хальхи вӑхӑтри чӑваш литературинчи ҫӗнӗ ятсен пултарулӑхӗпе те паллашма пулать.

Чӑваш кӗнеке издательствинче пӗлтернӗ тӑрӑх, вӗсем ҫаксем иккен: Николай Ишентей, Лариса Петрова, Николай Ларионов, Ольга Рубцова, Елен Нарпи, Валентина Тарават, Микул Ишимбай, Ольга Австрийская, Ольга Тургай, Улькка Эльмен, Светлана Асамат, Галина Матвеева, Ольга Васильева, Владислав Николаев, Елена Кудрявцева, Ирина Кошкина, Нина Царыгина, Анастасия Семенова, Раиса Сарпи, Александр Трофимов, Сергей Павлов, Марина Карягина, Владимир Степанов, Василий Кервен.

Кӗнекене 1000 экземпляр тиражпа пичетлесе кӑларнӑ.

chgign.ru сӑнӳкерчӗкӗ

Иртнӗ уйӑх вӗҫӗнче, чӳк уйӑхӗн 28-мӗшӗнче, Шупашкарта «Чувашский язык и культура речи в современном информационном обществе» (чӑв. Хальхи информаци уҫлӑхӗнчи чӑваш чӗлхипе калаҫӑвӑн культури) ятпа ӑслӑлӑхпа практика конференцийӗ иртнӗ.

Республикӑн Вӗрену министерстви, Чӑваш патшалӑх гуманитари ӑслӑлӑхӗсен институчӗ тата «Пӗлӳ» общество йӗркеленӗ форума чӑваш чӗлхи тӗпчевҫи, поэчӗ тата тӑлмачӗ Петӗр Яккусен ҫуралнӑранпа 75 ҫул, Чӑваш халӑх сайтне йӗркеленӗренпе 20 ҫул ҫитнине халалланӑ.

Конференцие аслӑ шкулсенчи преподавательсем, учительсем, хаҫат-журнал ӗҫченӗсем, интернет-блогерсем, ученӑйсем хутшӑннӑ. Вӗсен йышӗнче Тутарстанран, Мари Республикинчен, Пушкӑртстанран, Самар облаҫӗпе Чӗмпӗр хулинчен килсе ҫитнисем те пулнӑ.

«Контактри» сӑн

Ҫӗнӗ Шупашкарти Марина Нехаева «Раҫҫей 1» каналпа кӑтартакан «Сто к одному» шоу ҫӗнтерӳҫи пулса тӑнӑ. Вӑл «Чревовещатели» командӑпа пӗрле тупӑшса 100 пин тенкӗ выляса илнӗ. Команда 397:126 шутпа мала тухнӑ.

Марина шоуна хӑйӗн Ляля ятлӑ пуканипе кайнӑ. Вӑл ӑна хӑйӗн копийӗ тет. Пирӗн ентеш Раҫҫейри ытти ертӳҫӗпе пӗрле командӑра пулнӑ.

Палӑртмалла: Марина Ҫӗнӗ Шупашкарта ҫуралса ӳснӗ. Мӗн ачаран сӑнарсем валли сасӑсем хатӗрлеме юратнӑ, паллӑ ӑстапа Ольга Лифенцевӑпа паллашсан вӑл чревовещатель профессине суйланӑ. Ляля пуканене вӑл Пермьри ӑстаран саккас панӑ.

ru.freepik.com сайтри сӑн

Кӑҫал хӗл мӗнле килӗ? Урамра юр ҫук та, хӗллехи уйӑх ҫитни те туйӑнмасть. Ҫапах хӗл ларӗ. Вӑл мӗнле пулассине «Ҫанталӑк 21» проект авторӗ палӑртнӑ.

Вӑл шутланӑ тӑрӑх, раштав-нарӑс уйӑхӗсем климат норминчен 1 градус ӑшӑрах пулӗҫ (пӗлтӗр 4 градус ӑшӑрах пулнӑ). Ҫав вӑхӑтрах уйӑхри вӑтам температура виҫӗ уйӑхӗнче те нормӑран пысӑкрах пулмалла. Эппин, ӑшӑ кунсемсӗр иртмӗ. Пӗтӗмӗшле илсен, хӗллехи ҫанталӑк хӗллехи пек пулӗ: сивӗ, юрлӑ, ҫил-тӑманлӑ.

30 градуслӑ шартлама сивӗ кунсем раштавра кӑна пулӗҫ (пулас шанчӑк 20 процент). Пӗлтӗр, сӑмахран, Шупашкарта термометр хӗлӗпе те 20 градус сивӗ кӑтартман.

Раштавра юр дефицичӗ кӑштах пулӗ: юр хулӑнӑшӗ 20-22 сантиметра ҫитӗ. Кӑрлачра тата нарӑсра вара юр нормӑран кӑшт ытларах ҫӑвӗ. Нарӑс тата пуш уйӑхӗсенче юр хулӑнӑшӗ 40 сантиметра ҫитӗ.

chuvbook.ru сӑнӳкерчӗкӗ

Чӑваш кӗнеке издательствинче «Юрататӑп аттене» кӑларӑм пичетленсе тухнӑ.

Издательство ӗҫченӗ Ольга Иванова пӗлтернӗ тӑрӑх, «унта кукаҫи-асаттене, аттене, шӑллӑм-пиччене халалланӑ калавсемпе сӑвӑсем кӗнӗ. Кӗҫӗн классенче вӗренекенсем валли тесе палӑртнӑскер аслӑраххисемшӗн те интереслӗ, усӑллӑ пулӗ».

Кӗнекене пухса хатӗрлекенӗ тата редакторӗ – Ольга Иванова. Ӳнерҫи – Татьяна Бурдина.

Ҫӗнӗ кӑларӑма 1000 экземпляр тиражпа пичетлесе кӑларнӑ.

dzen.ru сайтри сӑн

Йӗпреҫ округӗнчи медсестра ултавҫӑсене 3 млн ытла тенкӗ куҫарса панӑ. Ун патне «пульницӑн тӗп тухтӑрӗ» шӑнкӑравланӑ, кӗҫех унпа ФСБ ӗҫченӗ ҫыхӑнассине пӗлтернӗ.

Кӑштахран чӑнах та «ятарлӑ службӑран» шӑнкӑрав килнӗ. Хайхискер каланӑ тӑрӑх, хӗрарӑм ячӗпе такам Украина ҫарӗсене куҫарса пама кредит илнӗ. Ку ӗҫе чарса лартма часрах пӗтӗм укҫана «шанчӑклӑ» счет ҫине куҫарма хушнӑ.

Пухнӑ укҫине счет ҫинчен илнӗ, машинине сутнӑ, тӑванӗсемпе ӗҫтешӗсенчен кивҫен ыйтнӑ. Пӗтӗмпе 3 млн ытла тенкӗ куҫарса панӑ. Хӗрарӑм ултавҫӑ хушнипе ҫӗнӗ телефон туяннӑ, мӗн ҫырӑннине хуратнӑ, укҫа куҫарма кӳршӗ хулана кайнӑ. Хӑйне улталанине вӑл виҫҫӗмӗш кунхине кӑна ӑнланнӑ.

chrio.rchuv.ru сӑнӳкерчӗкӗ

«Чӑваш Республикин Вӗренӳ министерстви шкул ачисен чӑваш чӗлхипе литературине хӑй тӗллӗн илемлӗ текст хайласа пӗлес кӑмӑлне ырлас тата аталантарас тӗллевпе пӗтӗмӗшле пӗлӳ паракан организацисен 9–11-мӗш класӗсенче вӗренекенсемпе чӑвашла хайлавсен конкурсне ирттерет», — тесе пӗлтерет республикӑн Вӗренӳ институчӗ.

Йӗркелӳ комитечӗ конкурс валли ҫак темӑсем палӑртнӑ:

«Эп – чӑваш ачи, саватӑп хамӑрӑн Чӑваш ҫӗрне»;

«Илемлӗ чӑваш тӗрри те тӗрлеме пӗлсен кӑна»;

«Тӑван ҫӗр-шывран хакли нимӗн те ҫук».

Конкурса виҫӗ тапхӑрпа ирттерме палӑртнӑ. Муниципалитет тапхӑрӗ — юпа уйӑхӗн 24-мӗшӗччен, республикӑн кӗретсӗр тапхӑрӗ – чӳк уйӑхӗн 25-мӗшӗнчен пуҫласа 29-мӗшӗччен.

Виҫҫӗмӗш тапхӑра Чӑваш Республикин Вӗренӳ институтӗнче ирттерӗҫ.