Инкеклӗ лару-тӑру министерстви тунӑ сӑн

Ӗнер, утӑ уйӑхӗн 22-мӗшӗнче, каҫхине Атӑл леш енче вӑрман ҫунма тытӑннӑ. Юрать-ха, ӑна часах сӳнтернӗ.

Инкеклӗ лару-тӑру министерствин Чӑваш Енри Тӗп управленийӗ пӗлтернӗ тӑрӑх, ӗнер 18 сехет те 55 минутра ҫулӑм Сосновка участок лесничествинче, «Прометей» кану базинчен инҫех мар, тухнӑ. Ҫулӑм 200 тӑваткал метр лаптӑка ярса илнӗ.

Пушара икӗ сехетрен сӳнтернӗ. Унта 7 ҫӑлавҫӑ, 3 техника хутшӑннӑ. Малтанлӑха палӑртнӑ тӑрӑх, пушар ҫулӑмпа асӑрханмасӑр усӑ курнӑран тухнӑ.

Палӑртса хӑвармалла: кӑҫал вӑрманта пушар тухнӑ пӗрремӗш тӗслӗх ку.

Мордвари кӗнеке издательствин сӑнӳкерчӗкӗ

Мордвари кӗнеке издательстви чӑваш писателӗн кӗнекине кун ҫути кӑтартнӑ. Кунта сӑмах хальхи вӑхӑтри пултаруллӑ калем ӑстисенчен пӗри, Николай Максимов, пирки пырать.

Ҫӗнӗ кӑларӑма ҫыравҫӑн икӗ романӗ: «Сон шизофреника» тата «Последний оптимист» романӗсем кӗнӗ. Кӗнеке тиражӗ — 1 пин экземпляр.

Кӗнекене Мордвари кӗнеке издательствин лавккисенче туянма пулать, унсӑр пуҫне тата «Вайлдберриз» маркетплейс урлӑ ҫырӑнса илме май пур.

Николай Николаевич 1944 ҫулхи кӑрлач уйӑхӗн 6-мӗшӗнче Чӑваш Енре ҫуралнӑ. Мордва Республикинчи Н.П. Огарев ячӗллӗ патшалӑх университетӗнче «Вырӑс чӗлхипе литератури» специальноҫа алла илнӗ, унсӑр пуҫне вӑл Горький (хальхи Чулхула) хулинчи Аслӑ парти шкулӗнчи журналистика уйрӑмӗнче вӗреннӗ. Журналистикӑри ӗҫ биографине район хаҫатӗнчи пай заведующийӗнчен пуҫланӑ, «Советская Чувашия» хаҫатӑн генеральнӑй директорӗ — тӗп редакторӗ таран пулса ӗҫленӗ. Чӑваш Республикин культурӑн тава тивӗҫлӗ ӗҫченӗ.

Писатель чӑвашла та, вырӑсла та ҫырать. 12 роман, 20 ытла повесть, калав, пьесӑсен авторӗ.

Чӑваш кӗнеке издательствин сӑнӳкерчӗкӗ

Чӑваш кӗнеке издательствинче виҫӗ поэтӑн сӑввисене пӗр кӗнекене пухса пичетленӗ.

«Три поэта. Виҫӗ поэт. А.С. Пушкин, М.Ю. Лермонтов, С.А. Есенин» ят панӑ кӑларӑма кун ҫути кӑтартассишӗн Василий Кервен ҫине тӑнӑ.

Василий Кошкин-Кервен — Раҫҫейри писательсен союзӗн членӗ, Чӑваш Республикин культурӑн тава тивӗҫлӗ ӗҫченӗ, М.Д. Трубина ячӗллӗ литература премийӗн лауреачӗ.

Ҫӗнӗ кӗнекене Сергей Орлов художник ӳкерчӗкӗсемпе илемлетнӗ. Тиражӗ пысӑк мар, пӗтӗмпе те 520 экземпляр.

Кӑларӑма аслӑ классенче вӗренекен шкул ачисем валли тесе хатӗрленӗ. Унта Александр Пушкин, Михаил Лермонтов тата Сергей Есенин сӑввисемпе паллашма пулать. Сӑвӑсене вырӑсла тата чӑвашла куҫарса пичетленӗ. Кӑларӑм классика литературине юраткан ҫынсен кӑмӑлне каймаллах.

Литература музейӗн пабликӗнчен илнӗ сӑнӳкерчӗк

Чӑваш Енре «Тӑван тӑрӑхӑн чӗрӗ историйӗ» проект пурнӑҫа кӗрет. Ӑна шухӑшласа кӑлараканни тата пурнӑҫа кӗртекенни — Чӑваш наци музейӗ. Республика шайӗнчи ҫав проекта ҫӗртме уйӑхӗн 1-мӗшӗнче ӗҫлеттерсе янӑ.

Музейра ӗҫлекенсем шухӑшланӑ тӑрӑх, клубсенче, вулавӑшсенче, шкулти музейсенче авалхи чӑн-чӑн пуянлӑх самай упранать. Унсӑр пуҫне тата уйрӑм ҫынсен килӗсенче ун пекки мӗн чухлӗ!

Проект авторӗсем ҫав пуянлӑха музей хатӗрӗн официаллӑ статусне парасшӑн, пӗрлехи реестрта ҫырса хурасшӑн тата турист маршрутне кӗртесшӗн.

Ҫӗнӗ проект пирки тӗплӗнрех пӗлес тесен проектӑн чат-ботне vk.cc/cZDjmj ҫырса яма пулать. Унтах сӑнӳкерчӗксене тата хаклӑ япалан адресне кӑтартнӑ тӗрӗс адреса та ярса памалла.

Литература музейӗн сӑнӳкерчӗкӗ

Иван Малкай поэт ҫуралнӑранпа 125 ҫул ҫитрӗ.

Вӑл 1911 ҫулхи утӑ уйӑхӗн 21-мӗшӗнче хальхи вӑхӑтра Ҫӗрпӳ муниципалитет тӑрӑхне кӗрекен Кӑтак ялӗнче ҫуралнӑ.

Поэт Тӑван ҫӗршывӑн аслӑ вӑрҫине те хутшӑннӑ, анчах шӑпа ӑна унтан тӑван тӑрӑхне таса сывӑ илсе ҫитернӗ. Чылай ҫул республикӑри хаҫат-хурналта журналист пулса ӗҫленӗ.

Поэзие ӑнланакансем хакланӑ тӑрӑх, Иван Малкай сӑввисем юрӑ евӗр янӑраҫҫӗ. Сӑмахран: «Хӗллехи савӑнӑҫ», «Тӑри», «Пирӗн туслӑх».

Калем ӑсти ют чӗлхепе ҫырнӑ авторсен хайлавӗсене те чӑвашла куҫарнӑ. Тӗслӗхрен, калмӑксен «Джангар» эпосне.

Иван Малкайӑн «Атӑл ҫилӗ», «Сывлӑм», «Шуҫӑм ҫути» кӗнекисенче тӑван тӑрӑхӑн ытарайми илемне сӑнласа панӑ. Вӑл кӑларӑмсемпе вулавӑшсенче паллашма пулать.

cap.ru сайтри сӑн

Ҫӗнӗ Шупашкар хулинче пурӑнакан 56 ҫулти арҫын 41 штраф тӳлемен, парӑмӗ 120 пин тенке ҫитнӗ. Кунсӑр пуҫне унӑн коммуналлӑ тӑкаксемшӗн парӑм пухӑннӑ.

Анчах арҫын парӑмсене татма шухӑшламан та. Ҫавна май приставсем 51 пин тенкӗ исполнительнӑй сбор шыраса илме йышӑннӑ.

Кайран ҫакӑ та палӑрнӑ: арҫыннӑн «Митсубиси Лансер» машина та харпӑрлӑхра пур иккен. Приставсем ӑна арестленӗ.

Ахӑртнех, арҫыннӑн машинӑсӑр юлас килмен. Вӑл ҫичӗ кунран парӑмсене татнӑ, ҫав шутра – исполнительнӑй сбора та. Кун хыҫҫӑн машинӑна хуҫине тавӑрса панӑ.

Прокуратура архивӗнчи сӑн

Республикӑра каллех ача путса вилнӗ. Инкек Вӑрмар округӗнче паян, утӑ уйӑхӗн 22-мӗшӗнче, пулнӑ.

Район прокуратури пӗлтернӗ тӑрӑх, 12 ҫулти арҫын ача Кӗтеснер ялӗ ҫывӑхӗнчи пӗвере путса вилнӗ. Вӑл виҫӗ тантӑшӗпе юраман ҫӗрте шыва кӗнӗ.

Прокуратура халӗ тӗрӗслев ирттерет, ӗҫ-пуҫа уҫӑмлатать. Кун хыҫҫӑн вырӑнти хӑйтытӑмлӑх органӗсен тата ача ҫемйин ӗҫне хак парӗҫ.

Палӑртса хӑварар: ҫулла пуҫланнӑранпа республикӑра 5 ача путса вилнӗ. Ҫӗмӗрлере Сӑр юханшывӗнче 17 ҫулти каччӑ путса вилни пирки паян кӑна пӗлтернӗччӗ.

«Контактри» сӑн

Чӑваш Енри нумай ачаллӑ икӗ ҫемье «Ашшӗ-амӑшӗн мухтавӗ» орден медальне тивӗҫнӗ. Вӗсене Раҫҫей президенчӗн указӗпе килӗшӳллӗн чысланӑ.

Ҫак чыса Шупашкар хулинчи Григорьевсем тата Вӑрмар округӗнчи Егоровсем тивӗҫнӗ.

Вячеслав Ильич тата Елена Вячеславовна Егоровсем 32 ҫул пӗрле пурӑнаҫҫӗ. Вӗсем ултӑ ача ҫуратса ӳстернӗ. Вӗсем ачисене мӗн пӗчӗкрен ӗҫпе пиҫӗхтерсе ӳстереҫҫӗ. Вӗсен килӗнче яланах ӑшӑлӑх тата ырӑлӑх хуҫаланаҫҫӗ.

Шупашкарти Григорьевсен вара – тӑватӑ ача. Вӗсем те туслӑ пурӑнаҫҫӗ, пӗр-пӗрне пулӑшаҫҫӗ, общество ӗҫне хастар хутшӑнаҫҫӗ.

Следстви комитечӗ тунӑ сӑн

Пӗрле пурӑннӑ хӗрарӑма хӗнесе вӗлернӗ те кайран виллине ейӳ шывӗпе тулнӑ тӗп сакайне пенӗ. Кун пек тискер тӗслӗх Етӗрне округӗнчи Кӑмаккасси ялӗнче пулнӑ.

Куншӑн 64 ҫулти арҫыннӑн уйрӑм режимлӑ колонире 8 ҫул ларма тивӗ. Суд тата следстви ҫирӗплетнӗ тӑрӑх, ака уйӑхӗн 5-мӗшӗнче арҫын ӳсӗр пулнӑ. Пӗрле пурӑннӑ хӗрарӑмпа хирӗҫсе кайсан ӑна 30 хутран кая мар ҫапнӑ. Лешӗ кӑштахран вилнӗ.

Кун хыҫҫӑн арҫын хӗрарӑм виллине тӗп сакайне пенӗ. Унта вара ейӳ шывӗ пулнӑ. Ҫапла вӑл хӗрарӑм сарӑмсӑр вилнӗ пек туса яваплӑхран тарма хӑтланнӑ.

Палӑртмалла: арҫын унччен те ҫакнашкал преступленишӗн явап тытнӑ.

Инкеклӗ лару-тӑру министерстви тунӑ сӑн

Республикӑра шыв ҫинче каллех инкек пулнӑ. Ҫӗмӗрле округӗнче 17 ҫулти каччӑ путса вилнӗ.

Инкек ӗнер кӑнтӑрла Ҫӗмӗрле хули ҫывӑхӗнче пулнӑ. Малтанлӑха палӑртнӑ тӑрӑх, икӗ каччӑ понтон кӗпер патӗнче Сӑр юханшывӗ урлӑ ишсе каҫма тӑнӑ. Анчах пӗри вӑйлӑ шыв юххине пула вӑйран кайнӑ та путнӑ.

Ӑна иртен-ҫӳрен ҫыран хӗррине илсе тухнӑ. Васкавлӑ медпулӑшу тухтӑрӗсем вырӑна ҫитсен реанимаци тунӑ, искусственнӑй майпа сывлаттарнӑ, кайран пульницӑна илсе ҫитернӗ. Вырӑнти тухтӑрсене пулӑшма Республикӑри ача-пӑча клиника пульницин тухтӑрӗсем килнӗ. Анчах, шел те, тухтӑрсем тем пек тӑрӑшсан та ҫамрӑка ҫӑлма май килмен.

Палӑртса хӑварар: ҫулла пуҫланнӑранпа республикӑра тӑватӑ ача путса вилнӗ.