
Хӗрлӗ Чутай округӗнчи Мучикасси ялӗнче пурӑнакан тыл ӗҫченӗ Варвара Ивановна Пандюхина 100 ҫулхи юбилейне паллӑ тунӑ.
Хӑйӗн ҫамрӑклӑхне вӑл савӑнӑҫпа аса илмест. «Вӑрҫӑ ҫулӗсенче ҫинҫе те черчен хӗрсем арҫынсен вырӑнне юлнӑ. Эпир йывӑр ӗҫленӗ: вӑрман каснӑ», — каласа кӑтартать Варвара Ивановна.
Вӑрҫӑ хыҫҫӑн вӑл «Присурский» совхозра ӗҫленӗ, унта 51 ҫул тӑрӑшнӑ. Ырми-канми ӗҫленӗшӗн ӑна «1941–1945 ҫҫулсенчи Тӑван ҫӗршывӑн Аслӑ вӑрҫинче паттӑрла ӗҫшӗн» медальпе чысланӑ.
Паян Варвара Ивановнӑн тӗп пуянлӑхӗ — унӑн пысӑк ҫемйи: вӑл мӑшӑрӗпе тӑватӑ ача ҫуратнӑ, халӗ ҫичӗ мӑнукпа тата тӑватӑ кӗҫӗн мӑнукпа савӑнса пурӑнать.
Ҫӗр ҫулхи юбилейпа ӑна чун-чӗререн саламлатпӑр тата ҫирӗп сывлӑх сунатпӑр!

Ҫу уйӑхӗн 24-мӗшӗнче 20 сехет те 15 минутра Хӗрлӗ Чутай округӗнчи Мучикасси ялӗнче «Санг Енг» машина «Лада Веста» ҫине пырса кӗнӗ. «Веста» рулӗ умӗнче ларнӑ 25 ҫулти хӗрарӑм вырӑнтах вилнӗ. Унӑн пассажирӗ, 9 ҫулти ача, аманнӑ, ӑна пульницӑна илсе кайнӑ.
«Санг Енг» рулӗ умӗнче 44 ҫулти арҫын ларнӑ. Аварие курнӑ ҫынсем каланӑ тӑрӑх, вӑл ӳсӗр пулнӑ. Ӑна хӑйне те тухтӑрсен пулӑшӑвӗ кирлӗ пулнӑ.

Хӗрлӗ Чутайри тӗп вулавӑшра Мучикассинче пурӑнакан Зинаида Михайловна Черновӑн «Ма савӑнса юрлас мар...» сӑвӑсемпе юрӑсен пуххин хӑтлавӗ иртрӗ. Авторӑн ку иккӗмӗш кӗнеки.
Зинаида Чернова 1941-мӗш ҫулта Тралькасси ялӗнче йышлӑ ҫемьере ҫуралнӑ. Ашшӗ вӗрентекен пулнӑ, вӑрҫӑра пуҫне хунӑ. Зинаидӑн вӑрҫӑ нушисене ытти ҫынсемпе танах тӳсме тивнӗ. 20 ҫула ҫитсен вӑл Мучикассинчи Николай Андреевича качча тухнӑ. Нумаях пулмасть ҫӗре кӗнӗ мӑшӑрӗпе 5 ача ҫуратса ӳстернӗ, пурне те аслӑ пӗлӳ панӑ. Черновсен хушма хуҫалӑхӗ районти «Чи лайӑх хушма хуҫалӑх» конкурсра ҫӗнтерӳҫӗ ята та тивӗҫнӗ.
Зинаида Михайловна пушӑ вӑхӑтра сӑвӑ-юрӑ хайлать, хӑйӗн юррисене районта иртекен тӗрлӗ концерт-фестивальте юрласа халӑха савӑнтарать. Халӑх унӑн юррисене тӑвӑллӑн алӑ ҫупса кӗтсе илет.
Кӗнеке хӑтлавне кӗнеке тусӗсем, унӑн ҫывӑх тӑванӗсем, вырӑнти юрӑҫсем, сӑвӑ-юрӑ юратакансем пухӑннӑ. Кашниех ӑшӑ кӑмӑллӑ автора хӑйне евӗрлӗ сӑвӑсемпе юрӑсемшӗн тав тунӑ. Райадминистраци элчисем, Зоя Спиридонова юрӑҫ, районти ветерансен канашӗн ертӳҫи Галина Тимакова, Светлана Яруткина сӑвӑҫӑ тата ыттисем ӗҫ ветеранне пултарулӑх ӗҫӗнче татах та пысӑкрах ҫитӗнӳсем тума сӗннӗ.
