Чӳк уйӑхӗн 3-12-мӗшӗсенче Чӑваш Енре «Пысӑк этнографи диктанчӗ» акци иртӗ. Унта хутшӑнакансем ҫӗршыври халӑхсен культурине, историне, чӗлхине, йӑли-йӗркине мӗнле пӗлнине тӗрӗслеме пултараҫҫӗ.

Палӑртма кӑмӑллӑ: Чӑваш Республикинче пурӑнакансем диктанта кашни ҫулах хутшӑнаҫҫӗ. Пӗлтӗр акцие тӗрлӗ ӳсӗмри 9424 ҫын хутшӑнма кӑмӑл тунӑ.

Акци икӗ форматпа иртӗ. Куҫӑн мар майпа – ҫынсем Раҫҫейри лапамсене килсе диктант ҫырӗҫ. Тепри – онлайн майпа. Диктанта национальнаяполитика.рф сайтра ҫырмалла.

Кӑтартусем раштав уйӑхӗн 12-мӗшӗнче, Конституци кунӗнче, паллӑ пулӗҫ. Тӗплӗнрех ҫак номерпе ыйтса пӗлме пулать: 8 (8352) 56-54-34 (Эдуард Александрович Краснов).

cap.ru сайтри сӑн

Санитари авиацийӗ Улатӑр округӗнчи Алтышево поселокӗнче пурӑнакан 85 ҫулти арҫынна икӗ ҫулта Шупашкар хулине икӗ хутчен илсе ҫитернӗ.

Михаил Кипкаев чӗрепе аптӑрать. Санитари вертолечӗ пӗрремӗш хутчен ун патне 2024 ҫулхи ҫурла уйӑхӗнче килнӗ. Унӑн ун чухне инфаркт пулнӑ. Улатӑр районӗн пульницин тухтӑрӗсем пӗр тӑхтамасӑр санитари авиацине чӗнсе илнӗ. Экипаж ватӑ арҫынна пульницӑна илсе ҫитернӗ.

Ун чухне арҫын питӗ йывӑр аптӑранӑ, ыратнине темиҫе кун чӑтнӑ, нитроглицирен ӗҫнӗ, дозӑна пысӑклатса пынӑ. Ҫавӑнпа пӗрремӗш вӗҫеве вӑл астуса та юлман.

Иккӗмӗш хутчен ӑна кӑҫал авӑн уйӑхӗнче Шупашкара вертолетпа илсе ҫитернӗ. Вӑл татах чӗрепе аптӑраса ӳкнӗ. Хальхинче вӑл вертолетпа вӗҫнине астуса юлнӑ.

Патшалӑх автоинспекцийӗ тунӑ сӑн

Паян, юпа уйӑхӗн 22-мӗшӗнче, Шупашкар хулинче «Садовый» микрорайонта 14 ҫулти хӗрача машина кустӑрми айне лекнӗ.

Ку ирхи 9 сехетре Геннадий Айхи урамӗнчи 28-мӗш ҫурт ҫывӑхӗнче пулнӑ. Малтанлӑха пӗлтернӗ тӑрӑх, 9-мӗш класра вӗренекен хӗрача юраман ҫӗрте ҫул урлӑ каҫнӑ. Ҫав вӑхӑтра ун ҫине «Мерседес-Бенц» микроавтобус пырса кӗнӗ. Руль умӗнче 31 ҫулти арҫын ларнӑ.

Аварире хӗрача аманнӑ. Малтанлӑха каланӑ тӑрӑх, вӑл урине хуҫнӑ. Ӑна пульницӑна илсе кайнӑ. Халӗ йӗрке хуралҫисем ку ӗҫ-пуҫ тӗлӗшпе тӗрӗслев ирттереҫҫӗ.

forum.na-svyazi.ru сӑнӳкерчӗкӗ

Чӑваш Ен Элтеперӗн пулӑшуҫи пулнӑ хӗрарӑм республика Правительствин вице-премьерӗ пулса тӑнӑ. Кунта сӑмах Наталия Воскресенская пирки пырать. Хушӑва республика Элтеперӗ Олег Николаев паян, юпа уйӑхӗн 22-мӗшӗнче, алӑ пуснӑ.

Наталия Воскресенская 2026 ҫулхи пуш уйӑхӗн 2-мӗшӗнченпе Чӑваш Енӗн Элтеперӗн пулӑшуҫи пулса ӗҫленӗ. Вӑл кадрсене хатӗрлессишӗн яваплӑ пулнӑ, республикӑра «Кадрсем» наци проектне пурнӑҫа кӗртес енӗпе тимленӗ. Унччен ҫак хӗрарӑм И.Н. Ульянов ячӗллӗ Чӑваш патшалӑх университетӗнче хушма пӗлӳ паракан пай пуҫлӑхӗнче тӑрӑшнӑ.

Паян, ав, ӑна Чӑваш Енӗн Министрсен Кабинечӗн Председателӗн ҫумӗ пулма ҫирӗплетнӗ. Ку должноҫре вӑл ӑслӑлӑх енӗшӗн яваплӑ пулӗ.

Наталия Валерьевна ЧПУран 2002 ҫулта экономист пулма вӗренсе тухнӑ. Экономика наукисен кандидачӗ.

Гигачат сӑнӳкерчӗкӗ

Ҫӗмӗрле районӗнче ҫамрӑк хӗрарӑма суд тунӑ. Унсӑр пуҫне унӑн хаклӑ машинине тата телефонне конфискациленӗ.

Хӗрарӑма пысӑк калӑпӑшпа наркотик сутма тӑнӑшӑн явап тыттарнӑ.

Вӑл Мускав облаҫӗнче Тольяттинче сутса яма наркотик илнӗ. Пӗтӗмпе 5-е яхӑн килограмм. «М-12» ҫулпа Чӑваш Ен территорийӗпе иртсе пынӑ чух ӑна йӗрке хуралҫисем тытса чарнӑ. «Ниссан Пантфайдер» машинӑри 5 килограма яхӑн наркотика туртса илнӗ.

Пӑтӑрмах кӑҫалхи нарӑс уйӑхӗнче пулнӑ. Халӗ суд та пулса иртнӗ. Хӗрарӑма пӗтӗмӗшле режимлӑ колоние 5 ҫуллӑха ӑсатма йышӑннӑ. Транспортпа унӑн 5 ҫул ҫӳреме юрамасть. «Ниссан Пантфайдер» маркӑллӑ хаклӑ автомобиле тата телефона йӗрке хуралҫисем конфискациленӗ, вӗсене сутса тунӑ тупӑш патшалӑх хыснине кайӗ.

forum.na-svyazi.ru сӑнӳкерчӗкӗ

Патӑрьел районӗнче пурӑнакан пӗр хӗрарӑма патшалӑха улталанӑшӑн явап тыттарӗҫ. Ун тӗлӗшпе РФ Пуҫиле кодексӗн 159-мӗш статйин 3-мӗш пайӗпе пуҫиле ӗҫ пуҫарнӑ.

Ҫав хӗрарӑм социаллӑ контракт илнӗ. 2023 ҫулхи пуш уйӑхӗнче вӑл хӑйӗн тупӑшне пытарнӑ та сахал тупӑшлӑ ҫын пек регистрациленнӗ. Ун хыҫҫӑн вӑл «Социаллӑ пулӑшу паракан центр» хысна учрежденине усламҫӑ пулса тӑма укҫа ыйтса заявлени панӑ. Ӑна 350 пин тенкӗ уйӑрса панӑ. Анчах хӗрарӑм вӑл укҫапа тивӗҫлипе усӑ курман, хӑй пӗлнӗ пек тӑкакланӑ.

Укҫана хыснана каялла шыраса илме Патӑрьел районӗнчи прокуратура граждан тавӑҫӗ хатӗрленӗ. РФ Следстви комитечӗн Чӑваш Енри управленийӗнче пӗлтернӗ тӑрӑх, пуҫиле ӗҫе районти суда ярса панӑ.

чувашхмельпром.рф сайтри сӑн

Кӑҫал Чӑваш Республикинче, пӗлтӗрхипе танлаштарсан, хӑмла сахалрах туса илнӗ. ЧР Ял хуҫалӑх министерстви пӗлтернӗ тӑрӑх, кӑҫал 131 гектар лаптӑк ҫинчен 217 тонна хӑмла татнӑ. Тухӑҫлӑхӗ пӗр гектартан 16,6 центнерпа танлашнӑ.

Пӗлтӗр 137 гектар лаптӑк ҫинчен рекордла тухӑҫ илнӗ: 239 тонна. Тухӑҫлӑхӗ те пысӑкрах пулнӑ: пӗр гектартан 17,4 центнер. Виҫӗм ҫул вара республикӑра 131 гектар ҫинче хӑмла ӳстернӗ, унтан 188,9 тонна пухса илнӗ. Тухӑҫлӑхӗ самай пӗчӗкрех пулнӑ: пӗр гектартан 14,4 центнер хӑмла татнӑ.

Сӑмах май, 2035 ҫул тӗлне республикӑра хӑмла лаптӑкне 2 пин гектар ытларах хатӗрлесшӗн. Кӑҫал хӑмла ӳстермелли лаптӑка 100 гектар таран пысӑклатасшӑн.

forum.na-svyazi.ru сӑнӳкерчӗкӗ

Чӑваш Енӗн Патшалӑх Канашне тытса тӑма хакланӗ. Тепӗр 28 процент, е укҫа ҫине куҫарсан ку вӑл 173 миллион тенкӗрен ытларах пулӗ.

Республика парламентне тытса тӑма кирлӗ тӑкак кӑҫалхи 135,9 миллион тенкӗрен 173.8 миллион тенке ҫитӗ. Ку цифрӑсене республика хыснин проектӗнче палӑртса хӑварнӑ.

Паян, юпа уйӑхӗн 22-мӗшӗнче, «халӑх тарҫисем» республика хыснине улшӑну кӗртмессине пӑхса тухӗҫ.

Чӑваш Енӗн Патшалӑх Канашӗ валли уйӑракан укҫа-тенкӗ виҫи хальхинчен 37,9 миллион тенкӗ ӳсӗ. «Ҫыхӑнура» форумра пӗлтернӗ тӑрӑх, ҫав шутран ытларах пайӗ, пурӗ 35,4 миллион тенкӗ, персонала тытса тӑма кайӗ.

2024 ҫулта республикӑн Патшалӑх Канашӗ валли 113,3 миллион тенкӗ уйӑрнӑ, 2025 ҫулта - 135,9 миллион тенкӗ.

Чӑваш Республикинче пурӑнакансене ҫитес ҫул, 2027 ҫул, валли тематика суйлама сӗнеҫҫӗ.

Унччен маларах ЧР Элтеперӗ Олег Николаев ҫынсенчен сӗнӳсем пухнӑ. Паян Олег Алексеевич ку ӗҫе вӗҫленине пӗлтернӗ. Вӑл кашни сӗнӗве интересленсе вуланине, ҫавӑн чухлӗ ҫын Чӑваш Ен пуласлӑхӗшӗн пӑшӑрханнӑшӑн савӑннине каланӑ.

Экспертсем ҫынсенчен килнӗ сӗнӳсене систематизацилесе финала тухнӑ 5 вариантпа паллаштарнӑ. Вӗсем ҫаксем: Ӑслӑлӑхпа технологисен ҫулталӑкӗ, Цифра пуласлӑхӗн ҫулӗ, Ҫемье йӑли-йӗркипе наставничество ҫулталӑкӗ, Амӑшӗпе ачин сывлӑхӗн ҫулталӑкӗ, Тараватлӑхпа туризм ҫулталӑкӗ.

Хальхи вӑхӑтра ҫаксенчен пӗрине суйлас тӗллевпе «Чувашия онлайн» порталта сасӑлав пырать. Вӑл юпа уйӑхӗн 26-мӗшӗччен пырӗ.

Чӑваш Енӗн Правительствинче юлашки вӑхӑтра кадрсемпе ҫыхӑннӑ улшӑнусем пӗрмай пулса иртеҫҫӗ. Пӗрне ӗҫрен кӑлараҫҫӗ, тепри хӑйӗн кӑмӑлӗпе ӗҫлеме пӑрахать...

Халӗ тата Чӑваш Енӗн Ҫурт-йӗр инспекцийӗн ертӳҫин ҫумне Александр Юркина ӗҫрен кӑларнӑ. Кун пирки калакан йышӑнӑва республикӑн Праивтельствин прежседателӗн тивӗҫне вӑхӑтлӑх пурнӑҫлакан Олег Марков алӑ пуснӑ.

Юркин ку должноҫра 10 ҫул ӗҫленӗ. Унта пуҫлӑхӑн ҫумӗ пулма ӑна 2016 ҫулхи ҫу уйӑхӗнче ҫирӗплетнӗ. Унччен вӑл Ҫӗрпӳ районӗн администрацийӗн пуҫлӑхӗн пӗрремӗш ҫумӗ пулнӑ. Вӑл Сергей Артамонов ертӳҫӗпе пӗр вӑхӑтра тӑрӑшнӑ. Кайран вӑл республика Элтеперӗн Администрацийӗнче те тӑрӑшнӑ.

Ҫурт-йӗр инспекцийӗн ертӳҫин Виктор Кочетковӑн халӗ пӗр ҫум, Надежда Иванова, юлнӑ.