Ҫак кунсенче Шупашкартан Новосибирска самолет вӗҫме тытӑннӑ. S7 Airlines авиакомпани пӗрремӗш рейса пурнӑҫланӑ.

Новосибирскран Шупашкара килнӗ пассажирсене чӑвашсен йӑли-йӗркипе кӗтсе илнӗ. Пӗрремӗш кунхинех Шупашкартан Новосибирска 60 ҫын вӗҫнӗ.

ЧР Элтеперӗ Олег Николаев палӑртнӑ тӑрӑх, ҫак рейс ҫынсене Раҫҫейӗн хӗвелтухӑҫ пайне ҫӑмӑллӑнах ҫитме май парать.

Кӑҫал «Шупашкар – Канаш» маршрутпа ретро-пуйӑс ярасшӑн. Кун пирки ЧР Элтеперӗ Олег Николаев пӗлтернӗ.

Ҫакна региона туристсене илӗртес тӗллевпе тӑваҫҫӗ. Ретро-пуйӑс «пуҫӗнче» пӑспа ӗҫлекен Л сериллӗ локомотив пулӗ, ӑна «Лебедянка» тесен пӗлеҫҫӗ. Вакунсем XX ӗмӗр пуҫламӑшӗнчи евӗр пулӗҫ. Кунсӑр пуҫне проводниксем те ҫав тапхӑрти костюмсене тӑхӑнӗҫ.

Рейссене ҫак тапхӑрсенче пурнӑҫлама палӑртнӑ: ҫӗртмен 17-21-мӗшӗсенче тата 24-28-мӗшӗсенче, ҫурлан 12-16-мӗшӗсенче тата 19-23-мӗшӗсенче, авӑнӑн 9-13-мӗшӗсенче тата 16-20-мӗшӗсенче, раштавӑн 23-27-мӗшӗсенче.

Владимир Офаринов стоаницинчен илнӗ сӑнӳкерчӗк

Етӗрнере пурӑнакан Людмила Виноходова паян 100 ҫул тултарнӑ. Кун пирки вырӑнти депутат, Владимир Офаринов, халӑх тетелӗнчи хӑйӗн страницинче хыпарланӑ.

Сумлӑ юбилей ячӗпе кинемее вырӑнти тӳре-шарапа депутат саламланӑ.

Людмила Васильевна 40 ҫул ытла Етӗрнери район больницинче врач пулса ӗҫленӗ.

Кинемее Владимир Путинӑн саламлӑ открыткине те ҫитерсе панӑ.

Патшалӑх автоинспекцийӗ тунӑ сӑн

Паян ҫур ҫӗр иртсен Шупашкар округӗнчи Ҫӗнӗ Тутаркасси ялӗ патӗнче пулнӑ аварире 16-ри каччӑн пурнӑҫӗ татӑлнӑ.

Малтанлӑха палӑртнӑ тӑрӑх, «Сузуки» машинӑпа пынӑ 18-ти водитель руле итлеттереймесӗр хирӗҫ ҫул ҫине тухса кайнӑ та «Хендайпа» ҫапӑннӑ. «Сузукире» хыҫалти ларкӑчра 16-ри икӗ каччӑ пулнӑ.

Шел те, вӗсенчен пӗри пульницӑна темиҫе сехетрен вилнӗ.Ҫакӑ паллӑ: икӗ машина водителӗ те урах пулнӑ.

Патшалӑх автоинспекцийӗ тунӑ сӑн

Ӗнер каҫхине, 19:10 сехетре, Ҫӗмӗрле округӗнче «Улатӑр – Шупашкар» маршрутпа ҫӳрекен микроавтобус арҫынна ҫапса кайнӑ. Шел те, вилмеллех.

Малтанлӑха палӑртнӑ тӑрӑх арҫын ҫул варрипе транспорт ҫӳренӗ май пынӑ. Авари вӑхӑтӗнче автобус салонӗнче 2 пассажир пулнӑ, вӗсем суранланман. Водитель ӳсӗр пулманни паллӑ — вӑл медосвидетельствовани витӗр тухнӑ.

Ҫапса кайнӑ арҫын кам пулнине тӳрех палӑртайман. Вӑл 45-50 ҫулсенчи пек курӑннӑ.

Вӑрнар районӗнчи Тимӗрҫкасси ялӗнчи урамсенче юртан тасатса тӑмаҫҫӗ иккен.

«Вӑрнар районӗнчи Тимӗрҫкасси ялӗнче пурӑнатӑп. Вырӑнти ял тӑрӑхӗн администрацийӗ урамсенчи юра тасатса тӑмасть. Юр тасатакан техника хӗл каҫипе пӗрре ҫеҫ пулчӗ. Урамсене пӗр техника та, ҫав шутра васкавлӑ службӑсен те, кӗрсе тухаймасть. Ял тӑрӑхӗн администрацине шӑнкӑравласа каланин усси ҫук», – тесе пӗлтернӗ «Контактри» «Эпир Чӑваш Енрен» паблика вырӑнти пӗр ҫын.

Вӑрнар районӗнчи Мӑн Явӑшра пурӑнакансем яла автобус ҫӳреме пӑрахнишӗн пӑшӑрханаҫҫӗ.

Яла автобуссем Вӑрнартан ҫӳренӗ. Пӗлтӗрхи раштав уйӑхӗн 8-мӗшӗнчен вӗсем хутлама пӑрахнӑ.

Асӑннӑ рейс кӳршӗри тӑватӑ ял ҫыннисемшӗн те меллӗ пулнӑ. Унпа Кӗҫӗн Кипек, Уйкас Явӑш, Ҫӑкаллӑ Явӑш, Мулакасси ял ҫыннисем те район центрне ҫитсе килме пултарнӑ.

«Ӗҫе кайма та, ӗҫпе тухса кӗме те, больницӑна тухтӑр патне ҫитме те май ҫук», – тесе кулянаҫҫӗ вырӑнтисем.

Виталий Михайлов страницинчен илнӗ сӑнӳкерчӗк

2025 ҫулшӑн Нестер Янкас ячӗллӗ премие тата лауреат ятне Антонина Никонорова тивӗҫнӗ.

Антонина Николаевна – «Трак ен» халӑх фольклор ушкӑнӗн ертӳҫи. Преми лауреачӗ ята ӑна «юрӑ-кӗвӗ тӗнчинче ырми-канми тӑрӑшнӑшӑн, чӑваш юррине халӑх хушшинче анлӑ сарнӑшӑн, 2025 ҫулта пултарулӑх ӗҫӗнче пысӑк ҫитӗнӳсем тунӑшӑн тата ҫуралнӑранпа 50 ҫул ҫитнӗ май» парас тенӗ. Лауреат ятне пама ӑна Красноармейскинчи Тӗп централизациленӗ клуб тытӑмӗ тата Красноармейски тӑрӑхӗнчи культура ӗҫченӗсен профессиллӗ пӗрлешӗвӗ тӑратнӑ.

«Ҫанталӑк 21» сайт кӑҫал ҫанталӑк мӗнле пулассине палӑртнӑ. Паллах, ку – прогноз кӑна.

Пӗтӗмӗшле илсен, ҫулталӑк нӳрӗ килмелле. Нарӑсӑн пӗрремӗш ҫурринче сивӗ пулӗ, иккӗмӗш ҫурринче вара — ӑшӑ. Пуш уйӑхӗнче ӑшӑ кӗтмелле мар, ун пек ҫанталӑк питех савӑнтармӗ. Ака уйӑхӗн пӗрремӗш ҫурринче те юр ҫӑвӗ-ха. Ҫу уйӑхӗ вара типӗ килӗ, иккӗмӗш ҫурринче вара шӑрӑх ҫанталӑк тӑрӗ.

Ҫулла, ҫӗртме уйӑхӗ, сивӗрен пуҫланӗ. Ҫурла уйӑхӗ климат норминчен ӑшӑрах килӗ, ҫумӑр та сахалрах пулӗ Чӳк уйӑхӗнче ӑшӑ ҫанталӑк тӑрӗ, раштав вара сивӗ тата юрлӑ килӗ.

«Контактри» сӑн

Шупашкарти Рспублика тӳремӗнче вырнаҫтарнӑ тӗп ёлка Пӗтӗм Раҫҫейри «Раҫҫей ёлкисем» конкурса хутшӑнать.

Конкурс раштавӑн 25-мӗшӗнче пуҫланнӑ. Кӑҫал Шупашкарти тӗп ёлка ҫине 500 тетте ҫакнӑ, вӗсенчен 70-шӗ ҫутатать.

Шупашкарти ёлкӑшӑн кӑрлачӑн 9-13-мӗшӗсенче сасӑлама май пур. Ҫак каҫӑ ҫине кӑна пусмалла: vk.com/art.goroda_rossii. Пирӗн ёлкӑна ҫӗнтерме пулӑшӑр!