yantik.cap.ru сӑнӳкерчӗкӗ

Тӑвай муниципаллӑ округӗн администрацийӗн пуҫлӑхӗн пресс-секретарьне пысӑк наградӑпа чысланӑ.

Чӑваш Ен Элтеперӗ Олег Николаев Галина Егорова пресс-секретаре «вырӑнти хӑй тытӑмлӑха аталантарас ӗҫе пысӑк тӳпе хывнӑшӑн тата нумай ҫул тӳрӗ кӑмӑлпа ӗҫленӗшӗн» уйрӑмлӑх палли парса хавхалантарма йышӑннӑ. Ун пек документа вӑл ҫӗртме уйӑхӗн 13-мӗшӗнче алӑ пуснӑ.

dzen.ru сайтри сӑн

Ӗнер республикӑра икӗ ҫын путса вилнӗ. 16 сехет тӗлӗнче Улатӑр округӗнчи Алтышево ялӗ ҫывӑхӗнчи пӗвере Вӑрмар округӗнчен килнӗ арҫын виллине кӑларнӑ. Вӑл 40 ҫултан иртнӗ кӑна-ха.

Икӗ сехетрен Шупашкар округӗнчи Самукасси ялӗ ҫывӑхӗнче пӗвере 38 ҫулти арҫын путса вилнӗ. Вӑл 38 ҫулта пулнӑ.

Аса илтерер: нумаях пулмасть Шупашкарти тӗп пляжра 13 ҫулти хӗрача, 14-ри тата 15-ри арҫын ачасем путса вилнӗ.

"На связи" сайтӗнчи сӑн

Ӗнер каҫхине Атӑл леш енчи Ҫурҫӗр поселокӗнче аслатиллӗ ҫумӑр ҫунӑ, ҫил вӑйланнӑ. Хӑш-пӗр ҫурт тӑрри сиенленнӗ. Шупашкар пуҫлӑхӗн тивӗҫӗсене пурнӑҫлакан Владимир Доброхотов унта каҫхинех килсе ҫитнӗ.

Поселокра 16 ҫурт тӑррин шиферӗ сиенленнӗ, электричество ҫук. Авариллӗ бригада паян ирхинех пралук ӑҫтан татӑлнине шырама тытӑннӑ, юсав ӗҫӗсем ирттереҫҫӗ.

«Атӑл» управляющи компанийӗ Патшалӑх ҫурт-йӗр инспекцийӗн специалисчӗсемпе пӗрле пур ҫурта та тӗрӗслесе тухӗҫ, дефект ведомоҫӗсем хатӗрлӗҫ.

"На связи" форумри сӑн

Ӗнер каҫхи 10 сехет тӗлӗнче Шупашкарта вӑйлӑ ҫумӑр ҫунӑ. Хӑш-пӗр урамра шыв канализацие юхса ӗлкӗреймен.

«Радужный» микрорайонта Алентей урамӗнчи 3-мӗш ҫурт ҫывӑхӗнчи тӑвайккинчен тӑпра парковкӑна юхса аннӑ. Максим Горький проспектӗнче ҫул ҫинче шыв тулнӑ. ҪҪХПИ инспекторӗсем «Татнефть» заправка патӗнчи ҫула пӳлнӗ.

ЧР Элтеперӗ Олег Николаев хушӑвӗпе килӗшӳллӗн, ЧР ял хуҫалӑх министрӗнче ӗҫленӗ Сергей Павлова «Ял хуҫалӑхӗн тава тивӗҫлӗ ӗҫченӗ» ята панӑ. Хальхи вӑхӑтра вӑл Россельхозцентрӑн филиалне ертсе пырать.

Сергей Павлов 2010-2015 ҫулсенче вице премьер – ял хуҫалӑх министрӗ пулнӑ, 2015-2106 ҫулсенче ҫутҫанталӑк ресурсӗсемпе экологи министрӗнче ӗҫленӗ. 2016 ҫулта ӑна ЧР Патшалӑх Канашӗн депутатне суйланӑ. Россельхозцентрӑн регионти филиалӗн ертӳҫинче вӑл 2021 ҫултанпа ӗҫлет.

t.me/chuv_kray каналтан илнӗ сӑнӳкерчӗк

Шупашкарти Амӑшӗн палӑкӗ умӗнче виҫӗ пысӑк матрёшка вырнаҫтарнӑ. Вӗсене художниксем илемлетсе пӗтернӗ.

Шупашкара йӗркеленӗренпе 555 ҫул ҫитнине халалланӑ парнене Ксения Кокель, Василий Чапай, Яна Иванова художниксем сӑрласа илемлетнӗ.

Вӑл матрёшкӑсем Чӑваш Ен хӑнасене тарават тата нумай нациллӗ регион пулнине кӑтартса парать.

t.me/chuv_kray каналти видеоран илнӗ сӑнӳкерчӗк

Чӑваш юрри Камбоджи диджейне те килӗшнӗ. Августа Уляндина тата «Глянец» ушкӑн шӑрантаракан «Эпӗ Чӑваш Ен» юрӑ чӑн-чӑн хит пулса тӑнӑ. Ӑна Раҫҫейре ҫеҫ мар, чикӗ леш енче те итлеҫҫӗ.

«Камбоджирен нумаях пулмасть кӗтмен ҫӗртен ырӑ хыпар килчӗ. «Once» дидженинг шкулӗн никӗслевҫи, Арменире ҫуралнӑ Артуш Восконян (Dj Anti) пирӗн юрӑпа клуб ремиксӗ кӑларнӑ. Аудитори ҫав юрра юратса йышӑннӑ. Халӗ вӑл чӑваш юррипе dj-сет кӑларма хатӗрленет. Ӑнсӑртран-кӗмсӗрт Чӑваш Ене килсе лексен вӑл мана концерта хутшӑнма шантарчӗ», — каласа кӑтартнӑ Августа Уляндина.

БРИКС ҫӗршывӗсен вӑййисем малалла пыраҫҫӗ. Чӑваш Енри спортсменсемшӗн вара вӑл вӗҫленнӗ. Пирӗн ентешсем унтан пушӑ алӑпа таврӑнмаҫҫӗ.

Полина Андреева йывӑр атлетка пӗрремӗш кунхинех кӗмӗл медаль ҫӗнсе илнӗ. София Емелюкова тата Павел Иванов самбистсем вара пьедесталӑн ҫӳлти картлашка ҫине хӑпарнӑ – ылтӑн медаль илнӗ.

Ҫӗртмен 14-мӗшӗнче спорт гимнасчӗ Владислав Поляшов ылтӑн медале тивӗҫнӗ. Тепӗр кунхине вӑл кӗмӗл медальлӗ пулнӑ.

Ҫӗртмен 16-мӗшӗнче Виктория Максимова ҫӑмӑл атлетка 200 метра чупса виҫҫӗмӗш вырӑна тухнӑ.

gkchs.cap.ru сӑнӳкерчӗкӗ

Ку пӑтӑрмах 5 кун каяллах пулнӑ-ха. Ҫӗртме уйӑхӗн 12-мӗшӗнче ирхине Атӑлта кимӗ ҫаврӑнса ӳкнӗ. Кун пирки ҫӑлавҫӑсем патне ирхи 4 сехет те 25 минутра шӑнкӑравласа пӗлтернӗ.

Кимӗ Йӑлӑм ҫывӑхӗнче ҫаврӑнса ӳкнӗ. Ҫав кун икӗ байдарка ҫине ларса виҫӗ ҫын тренировкӑна тухса кайнӑ. Вӑйлӑ хум кимӗсенчен пӗрне ҫавӑрса ҫапнӑ. Шар курнисем ҫӑлавҫӑсем патне шӑнкӑравлама пултарнӑ.

Республикӑн шыравпа ҫӑлав службин ҫӑлавҫисем «Беркут» мотор кимми инкек вырӑнне вӗҫтернӗ. Ҫӑлав жилечӗ тӑхӑннӑ ҫамрӑксене вӗсем ҫывӑхри кимӗ станцине илсе ҫитернӗ.

Инкеклӗ лару-тӑру министерстви тунӑ сӑн

Шӑматкун Чӑваш Енре ике пушар пулнӑ. Вӗсенче икӗ ҫын пурнӑҫран уйрӑлнӑ.

Ирхи 8 сехетре Улатӑр округӗнчи Кире поселокӗнче йывӑҫ ҫурт ҫуннӑ. Ҫулӑм хуралтӑ таврашне те тӗп тунӑ. Пушарта 1956 ҫулта ҫуралнӑ арҫын вилнӗ. Малтанлӑха палӑртнӑ тӑрӑх, вӑл ӳсӗрле шӑрпӑкпа асӑрханман.

Тепӗр пушар Шупашкар округӗнчи Хыркассинче пулнӑ. Шел те, унта та ҫын пурнӑҫӗ татӑлнӑ – 80 ҫулти хӗрарӑм вилнӗ.

Ҫулталӑк пуҫланнӑранпа 663 пушар пулнӑ, вӗсенче 35 ҫын вилнӗ.