9111.ru сайтри сӑн

Пульницӑра ӗҫлекен тирпейлӳҫӗ патне палламан ҫын шӑнкӑравласа сим-карттӑн килӗшӗвне тӑсмалли пирки пӗлтернӗ. 59 ҫулти хӗрарӑм ӗненнӗ те укҫасӑр тӑрса юлнӑ.

Палламан ҫын ӑна килӗшӗве дистанци мелӗпех тӑсма сӗннӗ. Ҫапла вӑл смс-ҫырупа килнӗ кода калама ыйтнӑ. Вӑл вара Патшалӑх пулӑшӑвӗсен порталне кӗмелли пароль пулнӑ.

Унтан хӗрарӑм патне «йӗрке хуралҫисем», «банк ӗҫченӗсем» шӑнкӑравланӑ, кредитсем илсе «хӑрушсӑр счет» ҫине куҫарма ӳкӗте кӗртнӗ. Ҫапла вӑл 1 миллион та 800 пин тенкӗ куҫарса панӑ.

vyvoz-piter.ru сайтри сӑн

Ӗнер ҫутҫанталӑк министрӗ Эмир Бедертдинов Тарифсемпе ӗҫлекен патшалӑх службин ертӳҫин тивӗҫӗсене пурнӑҫлакан Сергей Егоровпа брифинг ирттернӗ. Унта ҫӳп-ҫапа илсе тухмалли тариф ҫинчен калаҫнӑ.

ЧР Ҫутҫанталӑк министерстви ҫӗнӗ нормативсем йышӑнать, ҫавна май ҫӳп-ҫап илсе тухнӑшӑн хак улшӑнать. Унччен ял ҫыннисем 57,23 тенкӗ тӳленӗ, хула ҫыннисем – 71,81 тенкӗ. Малашне, утӑ уйӑхӗнчен пуҫласа, нумай хваттерлӗ ҫуртсенче пурӑнакансем /ялтисем те, хуларисем те/ 52,02 тенкӗ тӳлӗҫ. Хулара харпӑр ҫуртра пурӑнакансен – 60,67 тенкӗ, ялта харпӑр ҫуртра пурӑнакансен 57,23 тенкӗ тӳлемелле.

"Чеб.ру" сайтри сӑн

Шупашкарти кӳлмекре, Анне монуменчӗ патӗнче, Раҫҫейӗн тӗрленӗ картти пулассине пӗлтернӗччӗ. Ӑна халӗ тума тытӑннӑ.

Нумаях пулмасть унта ҫӗре сухаласа кӑпкалатнӑ. Халӗ «Зеленстрой» ӗҫченӗсем унта чечексене лартма пуҫланӑ. Хальхи вахӑтра карттӑ ҫинче регионсен чиккисем курӑнаҫҫӗ. Чечекӗсене ҫӗршыври регионсем ярса панӑ.

Сӑмах май, унтан инҫех мар матрӳшкесем вырнаҫтарнӑ. Хальхи вӑхӑтра ӳнерҫӗсем, Ксения Кокельпе Василий Чапай, вӗсене сӑрласа илемлетеҫҫӗ.

culture.cap.ru сӑнӳкерчӗкӗ

Ӗнер, ҫӗртме уйӑхӗн 5-мӗшӗнче, Ҫӗрпӳ тӑрӑхӗнче Аристарх Орлов-Шуҫӑм композиторӑн палӑкне уҫнӑ. Палӑка Апакасси ялӗнче туса лартнӑ.

Асӑннӑ ялтан ҫухрӑм ҫурӑра, Уйкасси ялӗнче, чӑваш музыкинче тарӑн йӗр хӑварнӑ композитор ҫут тӗнчене килнӗ. Ку вӑл 1914 ҫулта пулнӑ. Пӗчӗк чӑваш ялӗн арӗ паллӑ хор дирижёрӗ, композитор пулса тӑнӑ. Чӑваш АССРӗн телевиденийӗпе радивовещанин патшалӑх комитечӗн хорне пуҫарса янӑ. Вӑл коллектив паян Чӑваш патшалӑх академи симфони капелли пулса ырӑ ӗҫе малалла тӑсать.

chuvashia.sledcom.ru сӑнӳкерчӗкӗ

Ҫӗнӗ Шупашкарта спорткомплекса юсанӑ чухне рабочи вилнине эпир унччен пӗлтернӗччӗ. Аса илтерер: инкек пӗлтӗрхи пуш уйӑхӗн 4-мӗшӗнче сиксе тухнӑ. Вентиляци шахтинче 15 метр тӑршшӗ тимӗр пӑрӑха вырнаҫтарнӑ вӑхӑтра пӑрӑхӑн аялти пайне каснӑ чухне ҫав татӑк рабочин пуҫӗ ҫине ӳкнӗ. Шар курни инкек вырӑнӗнчех вилсе кайнӑ..

Ҫавӑншӑн Йӗпреҫ муниципалллӑ округӗнчи усламҫӑна явап тыттарнӑ. Тӗпчевҫӗсем тата суд шухӑшланӑ тӑрӑх, пӑтӑрмах усламҫӑ ӗҫ хӑрушсӑрлӑхне пӑхӑнманран пулса иртнӗ. Суд арҫынна тӗрмене хупса ухмасӑр ҫулталӑклӑха ирӗкрен хӑтарма йышӑннӑ.

21.мвд.рф сӑнӳкерчӗкӗ

Ҫӗртме уйӑхӗн 6-мӗшӗнче Етӗрне хулинче аслашшӗпе (вырӑсла пӗлтернӗ хыпарта дед тенӗ. Тен, кукашшӗ-тӗр) мӑнукӗ шар курнӑ.

Вӗсем паян ирпе хулари Герцен урамӗпе машинӑпа пынӑ. Хайхисен «Лада Вести» ҫине «Ниссан» пырса кӗнӗ.

Малтанласа палӑртнӑ тӑрӑх, ют ҫӗршывра туса кӑларнӑ машинӑн рульне тытса пынӑ 19 ҫулти водитель тимсӗртерех пулнӑ. «Ладӑра» 63 ҫулти арҫынпа унӑн 5 ҫулти мӑнукӗ пулнӑ. Ача пӗчӗккисене лартса ҫуремелли ятарлӑ креслӑра ларса пынӑ, ҫавӑнпа вӑл шар курман.

Ют ҫӗршывра туса кӑларнӑ машина рулӗ умӗнчи ҫамрӑк урах пулнӑ.

Синоптиксем ҫулла мӗнле ҫанталӑк пулассине пӗлтернӗ. Вӗсем палӑртнӑ тӑрӑх, ытла экстремаллӑ температурӑсем пулмӗҫ. Пӗтӗмӗшле илсен, нормӑпа килӗшсе тӑрӗ е кӑшт ытларах пулӗ.

Чи ӑшши - утӑ уйӑхӗ, вӑтам температура 20 градуспа танлашӗ. Ҫурла уйӑхӗнче вӑтам температура 18 градус пулӗ, ҫӗртмере - 17,6 градус.

Чи шӑрӑх кунсем ҫӗртме уйӑхӗн вӗҫӗнче, утӑ пуҫламӑшӗнче пулӗҫ.

Юрӑпа ташӑ ансамблӗн сӑнӳкерчӗкӗ

Чӑваш патшалӑх юрӑпа ташӑ ансамблӗ ҫумӗнчи ача-пӑчан вокалпа хореографи студийӗн концерчӗ иртнӗ. Отчёт концертне Ачасене хӳтӗлемелли пӗтӗм тӗнчери куна хатӗрленӗ.

«Студие ҫӳрекенсем ҫулталӑк тӑршшӗпе тӑрӑшса ӑсталӑха алла илнӗ. Ку енӗпе вӗсене чӑн-чӑн проффессионалсем – Чӑваш патшалӑх юрӑпа ташӑ ансамблӗн артисчӗсем — пулӑшнӑ», – каласа кӑтартнӑ ансамблӗн директорӗн тивӗҫне пурнӑҫлакан Игорь Осипов.

Ҫулталӑк хушшинче 8 номер хатӗрленӗ, 2 сюита лартнӑ. 150 ытла костюм ҫӗленӗ. Ача-пӑча студине ҫӳрекенсем Питӗрте, Хусанта, Чулулара иртнӗ конкурссене хутшӑннӑ. Студие ансамбль ҫумӗнче 2021 ҫулта йӗркеленӗ.

sibmama.ru сайтри сӑн

Чӑваш Енре шкултан вӗренсе тухнӑ 8 ҫамрӑк литературӑпа, географипе тата химипе Патшалӑхӑн пӗрлехи экзаменӗнче 100 балл пухнӑ.

Патӑрьелти 1-мӗш шкултан, Вӑрнарти 1-мӗш шкултан, Шупашкарти 2-мӗш лицейран тата Муркаш округӗнчи Калайкассинчи шкултан вӗренсе тухнисем хими экзаменӗнче 100 балл илнӗ. Шупашкарти 5-мӗш гимнази выпускникӗ географипе чи нумай балл пухнӑ. Ҫӗмӗрлери 1-мӗш шкул тата Шупашкарти 5-мӗш гимнази выпускникӗсем литература экзаменӗнче палӑрнӑ.

"Контактри" сӑн

Республикӑри виҫӗ муниципалитет округӗнче пушар тухас хӑрушлӑх пысӑк пулнине палӑртнӑ. Паянхи кун тӗлне Улатӑр, Куславкка тата Сӗнтӗрвӑрри округӗсенче пушар хӑрушсӑрлӑхӗн 5-мӗш класӗ вӑйра.

Шупашкар, Ҫӗрпӳ, Вӑрмар, Шӑмӑршӑ, Пӑрачкав округӗсенче тата Шупашкар хулинче пушар тухас хӑрушлӑхӑн 4-мӗш класӗ пулнине палӑртнӑ.

Ҫавӑнпа асӑрханма ыйтаҫҫӗ: типӗ курӑк ҫунма, ҫынран килмен сӑлтава пула пушар тухма пултарать.