cheb-centr.soc.cap.ru сӑнӳкерчӗкӗ

Чӑваш Енре пурӑнакан Тӑван ҫӗршывӑн аслӑ вӑрҫин ветеранӗсене Чӑваш Ен Элтеперӗ Олег Николаев саламлать.

Республикӑн тӗп хулинче унӑн открыткисене халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем ҫитерсе параҫҫӗ.

«Сире 1941-1945 ҫулсенчи Тӑван ҫӗршывӑн аслӑ вӑрҫи Ҫӗнтерӳпе вӗҫленнӗ кун ячӗпе саламлатӑп!

Ҫӗнтерӗве пысӑк тӳпе хывнӑшӑн, пирӗн ҫӗршывшӑнтата пирӗн халӑхшӑн тӑрӑшса паттӑрлӑх кӑтартнӑшӑн чӗререн тав тӑватӑп.

Сире ырлӑх-сывлӑх, тӑнӑҫлӑх, телей сунатӑп», — тесе саламланӑ Элтепер.

Ӗнер саламлӑ открыткӑна 95 ҫулти Роза Николаева патне ҫитернӗ.

politonline.ru сайтри сӑн

РФ Следстви комитечӗн Чӑваш Енри следстви управленийӗ пӗлтернӗ тӑрӑх, Комсомольски муниципаллӑ округӗнче пурӑнакан 45 ҫулти арҫын суд сакки ҫине ларнӑ. Ун тӗлӗшпе приговор янӑранӑ: штраф тӳлемелле.

Ҫак арҫын арӑмне тата унӑн 14 ҫулти хӗрне тӑтӑшах хӗненине палӑртнӑ. Пӗррехинче вара вӑл хӗрарӑма вӗлерессипе хӑратнӑ. Суда вӑл арӑмӗпе унӑн хӗрне 2023 ҫулхи юпа уйӑхӗнчен пуҫласа раштавччен хӗненине ӗнентернӗ.

takt-tv.ru сайтри сӑн

Шупашкарта пурӑнакан 9 ҫулти хӗрача виртуаллӑ вӑйӑ выляса ашшӗ-амӑшне 1,3 миллион тенкӗлӗх тӑкак кӑтартнӑ.

Ултавҫӑсем ӑна вӑйӑ валли кирлӗ япаласене туянмашкӑн тӗрлӗ задание пурнӑҫлама ыйтнӑ: амӑшӗн е ашшӗн блокировка туман телефонне сӑн ӳкерсе ямалла, банк приложенине кӗмелле... Ҫаксене пурнӑҫласа хӗрача 11 хутчен 100-шер тенкӗ куҫарнӑ, займ илнӗ, ку укҫапа вӑйӑ валли кирлӗ япаласем туяннӑ.

Ку тӗслӗх тӗлӗшпе пуҫиле ӗҫ пуҫарнӑ.

Чӑваш Енре туристсем йышлӑ килсе ҫӳренине кура номе фондне пысӑклатса пыраҫҫӗ. Кӑҫалхи карлач-нарӑс уйӑхӗсенче хӑна ҫурчӗсенче чарӑннӑ туристсен шучӗ пӗтӗрхи ҫулталӑк пуҫламӑшӗнчи икӗ уйӑхринчен 28 процент ӳснӗ.

Чӑваш Енӗн Экономика аталанӑвӗн министерстви пӗлтернӗ тӑрӑх, экотруизм валли ҫӗнӗ вырӑнсене кӑҫал Шупашкар, Улатӑр, Куславкка, Красноармейски тата Канаш муниципаллӑ округӗсенче уҫма палӑртнӑ. Асӑннӑ тӑрӑхсенче 235 номерӗ 165 ҫурт туса лартмалла.

cap.ru сайтри сӑн

Ака уйӑхӗн 9-мӗшӗнче Шупашкар пуҫлӑхӗ пулнӑ Денис Спирин ӗҫрен хӑйӗн ирӗкӗпе кайнӑ. Унтанпа унӑн тивӗҫӗсене Владимир Доброхотов пурнӑҫлать. Ҫӗнӗ мэра хӑҫан суйлӗҫ?

Конкурс ҫӗртме уйӑхӗн 11-мӗшӗнче пулӗ. Кандидатсенчен документсене ҫитес эрнерен йышӑнма пуҫлӗҫ. Ҫӗртмен 5-мӗшӗччен йышӑнӗҫ. Паян конкурса ирттерекен комиссин пӗрремӗш ларӑвӗ пулнӑ. Унта 12 ҫын кӗнӗ. Председателе суйланӑ. Вӑл - Чӑваш Енӗн пӗрремӗш вице-премьерӗ - финанс министрӗ Михаил Ноздряков. Комиссин иккӗмӗш ларӑвӗ ҫӗртмен 7-мӗшӗнче иртӗ.

Инкеклӗ лару-тӑру министерстви тунӑ сӑн

Ака уйӑхӗн 30-мӗшӗнче Етӗрнере икӗ хутлӑ ҫурт ҫунса кайнӑ. Вӑл – историпе культура еткерлӗхӗ. Унта чӑваш чӗлхине тӗпченӗ Николай Ашмарин ҫуралнӑ, ачалӑхӗ унта иртнӗ.

ЧР Культура министерстви пӗлтернӗ тӑрӑх, историпе культура еткерлӗхӗн докуменчӗсем унта упранман. 2021 ҫулта ЧР Элтеперӗ Олег Николаев ҫак ҫуртра музей уҫассине пӗлтернӗ. Реставраци тумашкӑн документсене хатӗрленӗ. Халӗ вара, пушара пула, ҫакна ҫӗнӗрен пӑхса тухма тивӗ. ЧР Культура министерствин тата Культура еткерлӗхне упракан патшалӑх центрӗн ӗҫченӗсем пушар мӗн чухлӗ тӑкак кӳнине шутлама вырӑна тухӗҫ.

Палӑртмалла: ҫурт 1870 ҫулта тунӑскер пулнӑ.

"Чеб.ру" сайтри сӑн

Чӑваш Енре парламентари пирки кӗнеке кӑларасшӑн. Вӑл 324 страницӑллӑ пулмалла. Ҫавна май аукцион иртӗ. Малтанхи хак – 822 пин те 190 тенкӗ.

Аукциона ҫу уйӑхӗн 8-мӗшӗнче петӗмлетӗҫ. Ҫӗнтерӳҫӗн кӗнекен дизайнне те хатӗрлемелле пулӗ. Ӗҫе килӗшӳ алӑ пуснӑранпа 15 кунра вӗҫлемелле.

Кӗнеке-альбом тӗрлӗ тӗслӗ, 324 страницӑллӑ пулӗ. Формачӗ – кӗнеке евӗрри. Вӑл 300 экземплярпа тухӗ, шуберӗ – 50.

Патӑрьелте ҫӗнӗ морг тӑвасшӑн. Ҫавна май аукцион ирттереҫҫӗ. Морг тумашкӑн 41 миллион та 517,5 пин тенкӗ кӑларса хума хатӗр.

Аукцион ҫу уйӑхӗн 17-мӗшӗнче иртӗ. Унта ҫӗнтернӗ подрядчикӑн ӗҫсене кӑҫалхи раштав уйӑхӗн 3-мӗшӗччен туса пӗтермелле.

Морг пӗр хутлӑ пулӗ, ӑна кирпӗчрен тумалла. Вӑл Патӑрьел районӗн тӗп пульницин территоринче 1980 ҫулта туса лартнӑ ҫурт ҫумӗнче пулӗ. Палартмалла: районсен хушшинчи паталогоанатоми уйрӑмӗ Шӑмӑршӑ, Елчӗк, Патӑрьел округӗсене йышӑнать.

Ака уйӑхӗн 29-мӗшӗнче Ҫӗмӗрле ҫывӑхӗнче Сӑр урлӑ Чулхула облаҫӗнчи Нават салине каҫмалли каҫҫа хута янӑ.

Контрактпа килӗшӳллӗн, подрядчикӗн ӑна ҫу уйӑхӗн 31-мӗшӗччен уҫмалла пулнӑ. Вӑл вара ӑна срокран маларах туса пӗтернӗ, акан 29-мӗшӗнче уҫнӑ.

Палӑртмалла: юханшыв ҫийӗн ҫӳремелли каҫҫа 1999 ҫулта тунӑ. Вӑл 47 понтонран тӑрать, пӗтӗмпе – 156 метр тӑршшӗ. Кӗпер Ҫӗмӗрле округӗпе Чулхула облаҫӗнчи Пильна районне ҫыхӑнтарать.

t.me/mintrud_21 каналтан илнӗ сӑнӳкерчӗк

Шупашкарти Вячеслав Ильин Пӗтӗм Раҫҫейри «Я могу! Творчество без границ» (чӑв. Эпӗ пултаратӑп! Чикӗсӗр пултарулӑх) фестиваль-конкурса тивӗҫлипе хутшӑннӑ. Пултарулӑх ӑмӑртӑвӗ Хусанти патшалӑх культура институтӗнче иртнӗ.

Ӑмӑртӑвӑн куҫӑнсӑр турне 500 ытла ача, куҫӑн турне 170 ача хутшӑннӑ.

Вячеслав Алина Михайлов репертуарӗнчи «Ан кулян, анне» юрра питех те чуна тивмелле шӑрантарнӑ, парнене тивӗҫнӗ.