cheb-centr.soc.cap.ru сӑнӳкерчӗкӗ

Пӗлтӗртенпе пирӗн ҫӗршывра Йывӑр хӗрарӑмсен кунне ҫулталӑкра икӗ хутчен палӑртма йышӑннӑ. Ӑна ака уйӑхӗн 7-мӗшӗнче тата юпа уйӑхӗн 7-мӗшӗнче палӑртаҫҫӗ. Ҫавна май ӗнер Шупашкар хулинчи 1-мӗш клиника больницинчи Амӑшӗн шкулӗнче тӗлпулу иртнӗ.

Унта тӗрлӗ специалист хутшӑннӑ. Пӗрисем кӑкӑр ӗмӗртни ачашӑн мӗн тери усӑллӑ пулни ҫинчен каласа кӑтартнӑ, теприсем йывӑр лару-тӑрӑва лексен хӗрарӑмсене кам пулӑшни ҫинчен ӑнлантарса панӑ.

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн психологӗ Ирина Кириллова йывӑр лару-тӑрури хӗрарӑмсене пулӑшакан уйрӑм пурри ҫинчен каласа кӑтартнӑ. Вӑл уйрӑм Хусанкай урамӗнчи 29а ҫуртра вырнаҫнӑ. Унта хӗрарӑмсене виҫӗ уйӑх усраҫҫӗ.

grozny-inform.ru сайтри сӑн

Архангельск хулинче пирӗн ентеше тытса чарнӑ. Вӑл ҫынна вӑрлама тӑнӑ тесе шутлаҫҫӗ.

43 ҫулти ҫак арҫын судпа унччен те айӑпланнӑ. Ун чухне ҫынна вӗлернӗшӗн тӗрмере ларнӑ. Хальхинче вӑл 22-ри хӗре тапӑннӑ. Следстви версийӗ тӑрӑх, вӑл ун патне пынӑ, сумка йӑтса пулӑшма ыйтнӑ. Унӑн пилӗкӗ ыратать-мӗн.

Хайхискерсем подъезда кӗнӗ. Унта вара арҫын хӗре лифта сӗтӗрсе кӗнӗ, хӑйӗн хваттерне илсе кӗме хӑтланнӑ. Юрать-ха, кӑшкӑрашнине участковӑй илтнӗ, вӑл пулӑшма ҫитнӗ.

Халӗ арҫынна татса чарнӑ. Следовательсем ӗҫе малалла тишкереҫҫӗ.

Ака уйӑхӗн 3-мӗшӗнче Ҫӗмӗрле районӗнчи Хутарти вӑтам шкулта Виктор Чугаров режиссёр ӳкернӗ «Чӑваш чӗлхи» фильма кӑтартнӑ.

«Контактра» халӑх тетелӗнчи хӑйӗн страницинче Валентина Телей юрӑҫ пӗлтернӗ тӑрӑх, «ача чухне вӑл ман пекех чӑвашла калаҫма пӗлмен. Тӑван чӗлхене вӗренес кӑмӑлӗ калама ҫук пысӑк пулнӑран вӑл тӑван чӗлхене ӑша илнӗ ҫеҫ мар, Парижра тата Берлинта пурӑнакан чӑвашсемпе тӗл пулса вӗсем ҫинчен фильм ӳкернӗ. Фильмра вӑл пуринпе те чӑвашла калаҫать. Ыттисемшӗн тӗслӗх пулса тӑрать».

t.me/yurasumy каналтан илнӗ сӑнӳкерчӗк

Паян, ака уйӑхӗн 5-мӗшӗнче, «Нива» автомбиле туса кӑларма тытӑннӑранпа 47 ҫул ҫитнӗ.

Автомобиль дизайнерӗ Валерий Семушкин Леонид Брежнев сӑнавлӑ машинӑна ларса 20 минута яхӑн ярӑннине аса илнӗ. Унтан автомобильтен тухнӑ та машинӑна тӑррине ал лаппипе ҫапса: «Автомобиле туса кӑларма тытӑнӑр!» — тесе хушнӑ.

Машинӑна малтанласа 9 пин тенкӗпе сутнӑ. Ку вӑл «Волгӑпа» «Москвич-412»-рен те хаклӑрах пулнӑ. Ҫӗнӗ автомобиле СССРта ҫеҫ мар, чикӗ леш енче те килӗштернӗ. «Нивӑна» тӗнчери 100 ҫӗршывра сутнӑ, Австрипе Ҫӗнӗ Зеландире вӑл чи анлӑ сарӑлнӑ внедорожник шутланнӑ. .

Петр Прусов конструктр каланӑ тӑрӑх, Европӑра вырӑс машинине туянма ҫанталӑк хистенӗ. 1979 ҫулхи хӗл питӗ юрлӑ пулнӑ, ҫавна май Европа ҫыннисем «Нива» йывӑр джипсем каяйман ҫӗрте те ҫӳреме пултарнинчен тӗлӗннӗ.

imghub.ru сайтри сӑн

Республикӑра ака уйӑхӗн 1-мӗшӗнче ҫурхи призыв пуҫланнӑ. Чӑваш Енри ҫар комиссарӗ Бахтиер Холиков «Советская Чувашия» хаҫата пӗлтернӗ тӑрӑх, кӑҫал республикӑран 1350 яш салтака каймалла. Каччӑсене ҫар чаҫӗсене ака уйӑхӗн варринче ӑсатма тытӑнӗҫ. Призыв утӑ уйӑхӗн 15-мӗшӗнче вӗҫленӗ.

Хальхинче ҫӗнӗлӗх пур. Унччен 27 ҫултан аслисене ҫара илмен, халӗ вара ҫак ӳсӗм 30 ҫулпа танлашнӑ. Ытти – унчченхи пекех. Служба срокӗ – 1 ҫул. Салтаксене Раҫҫейӗн ҫӗнӗ регионӗсене ямӗҫ.

Андрей Чибисӑн телеграм-каналӗнчи сӑн

Ӗнер Мурманск облаҫӗн кӗпӗрнаттӑрне Андрей Чибиса 42 ҫулти Александр Б. ҫӗҫӗпе тапӑннӑ. Кун хыҫҫӑн тӳрене операци тунӑ, вӑл халӗ реанимацире.

Андрей Чибис – пирӗн ентеш. Вӑл 1979 ҫулта Шупашкарта ҫуралнӑ. 2001 ҫулта Шупашкарти коопераци техникумӗнче вӗреннӗ. Мурманск облаҫӗн кӗпӗрнаттӑрӗнче вӑл 2019 ҫултанпа ӗҫлет.

Ӗнер Мурманскри «Строитель» культура ҫуртӗнче кӗпӗрнаттӑр халӑхпа тӗл пулнӑ. Ҫавӑн хыҫҫӑн тапӑннӑ та ӑна Александр, хырӑмӗнчен ҫӗҫӗпе чикнӗ. Хураха Росгварди ӗҫченӗ ураран персе амантнӑ, Александра тытса чарнӑ.

Ҫак арҫын йӗрке хуралҫисене каланӑ тӑрӑх, вӑл Чибиспа куҫа-куҫӑн тӗл пулса калаҫса курман, ҫывӑх пулман, анчах темшӗн ӑна килӗштермен. Унччен вӑл ҫын сывлӑхне ҫӑмӑл сиен кӳнӗшӗн явап тытнӑ пулнӑ. Халӗ следстви малалла пырать.

"На связи" форумри сӑн

Шупашкарти «Амазония» паркри Телей ятлӑ пӗвере ака уйӑхӗн 4-мӗшӗнче пулӑсем вилнине асӑрханӑ. Сахал мар, 100 яхӑн пулӑ ҫыран хӗррине тухса выртнӑ.

Кун пирки ЧР Ҫутҫанталӑк ресурсӗсен тата экологи министерствине пӗлтернӗ. Хальхи вӑхӑтра тӗрӗслев пырать, пулӑсем мӗншӗн вилнине палӑртаҫҫӗ.

Елизавета Долгова страницинчен илнӗ сӑнӳкерчӗк

Ака уйӑхӗн 2-мӗшӗнче Екатеринбургри чӑвашсем чӑваш культурин фестивальне ирттернӗ. Унта Чӑваш патшалӑх юрӑпа ташӑ ансамблӗ те хутшӑннӑ.

Чӑваш артисчӗсем Уралти халӑх ӳнерӗн центрӗн сцени ҫине тухнӑ. Фестивале пынисем валли фольклор коллективӗсем тӗрлӗ интерактив хатӗрленӗ. Ҫапла-ҫапла. Унта Удмурт Республикинчи, Мари Элти, Пушкӑртстанри, Казахстанри, Дагестанри тата Грузири коллективсем те хутшӑннӑ.

flectone.ru сайтри сӑн

Чӑваш Енре кӗрхи культурӑсем юр айӗнче пӗтме пултарнӑ. Ҫавна май республикӑра инкеклӗ лару-тӑру режимӗ пулнине палӑртнӑ. Хушӑва ЧР Элтеперӗ Олег Николаев алӑ пуснӑ.

Культурӑсем мӗншӗн пӗтме пултарнӑ-ха? Юр хулӑн пулнине, ҫӗр шӑнманнипе. Раҫҫей Гидпрометцентрӗ пӗлтернӗ тӑрӑх, пуш уйӑхӗн иккӗмӗш ҫурринче 3 сантиметр тарӑнӑшри тӑпра 0 градус патнелле пулнӑ.

Халӗ мӗн чухлӗ культура пӗтме пултарнине шутлаҫҫӗ. Сӑмах май, ҫакнашкал режим пулнине унччен Пӑрачкав тата Ҫӗмӗрле округӗсенче палӑртнӑ. Унта, малтанлӑха палӑртнӑ тӑрӑх, 9 пине яхӑн гектар ҫинчи культура пӗтнӗ. Пӗтӗмӗшле такак – 50 миллиона яхӑн тенкӗ.

big-rostov.ru сайтри сӑн

Ултавҫӑсем налук службин ӗҫченне те шӑнман пӑр ҫине лартса янӑ. Ҫӗнӗ Шупашкарта пурӑнакан 47 ҫулти хӗрарӑмӑн полицие кайса заявлени ҫырма тивнӗ.

Ӑна та стандартлӑ схемӑпах улталанӑ. Мессенджерта ун патне пуҫлӑх ятӗнчен ҫыру килнӗ, унпа кӗҫех йӗрке хуралҫисем ҫыхӑнаҫҫӗ-мӗн. Лешсем каланӑ тӑрӑх, хӗрарӑмӑн укҫине такамсем террористсене куҫарса парасшӑн. Вӗсемпе калаҫнӑ хыҫҫӑн хӗрарӑм палламан счетсем ҫине 3 миллион ытла тенкӗ куҫарнӑ. Ку укҫа- банкра кредит илни.