Чӑвашсене кӑҫал та Уява чӗнеҫҫӗ.
Тутарстанра йӑлана кӗнӗ Уяв кӑҫал утӑ уйӑхӗн 5-мӗшӗнче иртет. Ҫав, вырӑнтах: Элкей районӗнчи Сиктӗрме ялӗнче. Ҫитсе курӑр!
Уява кашни ҫулах ирттересси йӑлана кӗнӗ. Унта Раҫҫейри тӗрлӗ кӗтесре тӗпленнӗ чӑвашсем хутшӑнаҫҫӗ
Шупашкарти 40-мӗш вӑтам шкулта ӗҫлекен Алекснадр Степанов шкул ачисем валли «Хевте» уйлӑх (лагерь) йӗркелессине пӗлтернӗ. Уйлӑха «Хавал» ушкӑнпа пӗрле пуҫарса янӑ.
Вӑл кӑҫалхи утӑ уйӑхӗн 25-мӗшӗнчен пуҫласа ҫурла уйӑхӗн 1-мӗшӗччен «Алый парус» ача-пӑча санаторийӗнче иртӗ. Унта 20-25 ачана кӗтеҫҫӗ. Ку — тӳлевлӗ мероприяти. Пӗр ачашӑн 18,7 пин тенке тӳлемелле). Унта 8-16 ҫултисем хутшӑнма пултарӗҫ .
«Ертӳҫисен ушкӑнне хальлӗхе 4 ҫын кӗрет: Алпарух (Александр Блинов, пуҫлӑх), Айтар (Александр Степанов), Уйӑхпи (Вероника) тата Анна (Хусан федераци университечӗн студентки)», — пӗлтернӗ Александр Марсович халӑх тетелӗнчи хӑйӗн страницинче.
Программа вара ҫӑпларах пулӗ: кашни кун пӗрер сехет чӑваш чӗлхи тата ҫавӑн чухлех кашни кун пӗрер сехет пӗр-пӗр ют чӗлхе (тӗслӗхрен, акӑлчан, турккӑ, итальян чӗлхисем - ачасем хӑйсем суйлӗҫ) вӗренӗҫ.
Унсӑр пуҫне ачасем валли чӗлхе вӑййисем, ӑсталах лаҫҫисем ирттерӗҫ.
«Хавал» университетри пек эпир те ачасене кунӗпех чӑвашла калаҫтарма тӑрӑшӑпӑр», — хыпарлана Александр Степанов.
Ҫыхӑнмалли телефон: +7 952 022 9054. Телеграмри контакт: @cv_haval21 е @alparuh.
Раҫҫейри артистка Юлия Переверзева Канн фестивалӗнче «Паха тӗрӗ» фабрика тумӗпе тухнӑ. Вӑл ку тума Япони режиссерӗн RENOIR ятлӑ фильмӗн премьерине тӑхӑннӑ.
Юлия Переверзева – 35 ҫулта, вӑл Алтай крайӗнче ҫуралнӑ. Унӑн ашшӗ – чӑваш. Юлия ВГИК пӗтернӗ, халӗ Мускавра пурӑнать. Вал 6 фильмра ӳкерӗннӗ.
Ҫакна та палӑртмалла: Юлия кӑҫал «Мускав тата Мускав облаҫӗн королеви» илем тата амӑшлӑх конкурсӗн гран-прине илнӗ.
Шупашкарти Афанасьев урамӗнчи 9-мӗш ҫурт картишне хӑтлӑлатса пӗтернӗ. Халӗ унта тӗлӗнмелле хитре.
Строительсемпе пӗрле Шупашкарти Э. М. Юрьев ячӗллӗ ача-пӑча ӳнер шкулӗн хастарӗсем те ӗҫленӗ. Вӗсем Аслӑ Ҫӗнтерӳ пулнӑранпа 80 ҫул ҫитнине тата чӑваш культурине халалланӑ стенд хатӗрленӗ.
Ҫӗртме уйӑхӗн 10-11-мӗшӗсенче Шупашкар округӗнче «Ясна музыка» фестиваль 4-мӗш хут иртӗ. Кӑҫал унта пӗрремӗш хут ытти регионтан та пухӑнӗҫ. Кӑҫал фольклорти тата хальхи музыкӑри тараватлӑх йӑлисене уҫса парӗҫ.
Ҫӗртмен 10-мӗшӗнче «Ясна» этнокомлексра конкурсҫӑсем пултарулӑхӗпе паллаштарӗҫ, ӑсталӑх класӗсем, эскурисисем иртӗҫ, наци культурипе паллаштарӗҫ. Концерт 17 сехетре пуҫланӗ.
Ҫӗртмен 11-мӗшӗнче гала-концерт Шупашкарти Хӗрлӗ тӳремре иртӗ. Унта Раҫҫей тата пӗтӗм тӗнчери конкурссен лауреачӗсем сцена ҫине тухӗҫ.
Шупашкарта пурӑнакан Антон Лаврентьев «Артек» уйлӑхри «Ҫӗр – пирӗн пӗрлехи кил» пӗтӗм тӗнчери сменӑра Чӑваш Ен культурипе паллаштарнӑ. Унӑн чӑвашла тӗрленӗ ӗҫӗсем «Суук-Су» керменти экспозицие илем кӳнӗ.
Палӑртмалла: Антон 11 ҫултанпа тӗрлет, ку ӑсталӑх пирки вӑл хаваспах каласа кӑтартать.
Чӑваш кӗнеке издательствинче «Сирень сенкерӗ» кӗнеке кун ҫути курнӑ. Унӑн авторӗ – Елена Николаева ҫыравҫӑ-журналист. Редакторӗ – Ольга Иванова, ӳнерҫи – Ирина Калентьева.
Чӑваш кӗнеке издательствинче пӗлтернӗ тӑрӑх, хайлав пуххине авторӑн тӗрлӗ ҫулта ҫырнӑ новеллисем кӗнӗ. Елена Николаева 1974 ҫулхи ҫӗртме уйӑхӗн 3-мӗшӗнче Тӑвай районӗнчи Тушкилте ҫуралнӑ. Тӑван ялти вӑтам шкулта вӗреннӗ чухнех районта, республикӑра тухса тӑракан хаҫат-журналпа ҫыхӑну тытнӑ. 1991–1996 ҫулсенче И.Н. Ульянов ячӗллӗ Чӑваш патшалӑх университечӗн чӑваш филологийӗпе культура факультетӗнче вӗреннӗ.
Аслӑ шкул пӗтерсенех республикӑра тухса тӑракан «Хресчен сасси» хаҫатра ӗҫлеме пуҫланӑ. 2015 ҫултанпа «Хресчен сасси – КИЛ» хаҫатра пай редакторӗнче тӑрӑшать.
Иртнӗ эрнере, ака уйӑхӗн 24-мӗшӗнче, Муркашри культура ҫуртӗнче «Муркаш» фольклор коллективӗн 25 ҫулхине уявланӑ. Коллектива Чӑваш Республикин культурӑн тава тивӗҫлӗ ӗҫченӗсем А.В. Аникин, Ф.Ф. Григорьева, С.А. Каликов ертсе пыраҫҫӗ.
Чӑваш халӑх юррине ламран лама парса хӑварассипе йыш пысӑк тӳпе хывать. Асӑннӑ ансамбльтен ача-пӑчан «Шӑнкӑрав» тата «Шӑпчӑк» ансамблӗсем йӗркеленсе кайнӑ.
Юбилейпа саламлама Йӗпреҫ районӗнчи «Ахах», Шупашкарти «Эткер», Мари Элти «Мырылтенӑ, кушталтенӑ» ансамбльсем пырса ҫитнӗ. Унсӑр пуҫне Муркаш тӑрӑхӗнчи «Тӑванлӑх», «Екрем», «Хавас» ансамбльсем те саламланӑ.
Элӗкри литературӑпа таврапӗлӳлӗх музейӗнче Иван Яковлев ҫуралнӑ куна халалласа «Янра, чӑваш чӗлхи!» мероприяти ирттернӗ.
Мероприятие Элӗкри ИЯ. Яковлев ячӗлӗ вӑтам шкулта вӗренекенсем, Элӗкри ача-пӑча ӳнер шкулӗн баянисчӗ Владимир Терентьев тата вырӑнти тӗрӗҫӗсем хутшӑннӑ.
Пухӑннисене музей директорӗ Ольга Алексеева саламланӑ, Иван Яковлевӑн пуян эткерлӗхне тата чӗлхине пысӑка хурса хакламаллине палӑртса хӑварнӑ. Музей специалисчӗ Светлана Железнова чӑваш тӗррипе паллаштарнӑ. Ачасем музейра ӗслекен «Чӑваш тӗрри – чи илемли» куравпа паллашма пултарнӑ.
Унтан ачасем чӑвашсен тӗрлӗ вӑййине вылянӑ тата «Линька- линька» ташланӑ.
Кораккассинчи Людмила Андреева ӑста хӑйӗн сӑввине вуласа панӑ.
Раҫҫей Федерацийӗн Геройӗ Н.А.Петров ячӗллӗ Елчӗкри пӗтӗмӗшле пӗлӳ паракан вӑтам шкулта Чӑваш чӗлхи кунне халалласа уяв иртнӗ. Кун пирки асӑннӑ тӑрӑхӑн сайтӗнче хыпарланӑ.
Уяв шкул директорӗн Л.Н.Васильеван саламӗпе пуҫланнӑ. Вӑл тӑван чӗлхене юратма, хамӑр чӑваш пулнипе мӑнаҫланма чӗнсе каланӑ.
Уявра тӗрлӗ юрӑ-кӗвӗ янӑранӑ. 1 «б» класра вӗренекен Екатерина Чернова юрлакан юрра куракансем уйрӑмах тӑвӑллӑн алӑ ҫупса йышӑннӑ, хӗрсен илемлӗ ташши те куракансене килӗшнӗ.
Кӑҫал Аслӑ Ҫӗнтерӗве тунӑранпа 80 ҫул ҫитнӗ май вӗренекенсем хӑйсем ҫырнӑ сӑввисене вуланӑ.
+4.3 °C