Элӗкри литературӑпа таврапӗлӳлӗх музейӗнче Иван Яковлев ҫуралнӑ куна халалласа «Янра, чӑваш чӗлхи!» мероприяти ирттернӗ.
Мероприятие Элӗкри ИЯ. Яковлев ячӗлӗ вӑтам шкулта вӗренекенсем, Элӗкри ача-пӑча ӳнер шкулӗн баянисчӗ Владимир Терентьев тата вырӑнти тӗрӗҫӗсем хутшӑннӑ.
Пухӑннисене музей директорӗ Ольга Алексеева саламланӑ, Иван Яковлевӑн пуян эткерлӗхне тата чӗлхине пысӑка хурса хакламаллине палӑртса хӑварнӑ. Музей специалисчӗ Светлана Железнова чӑваш тӗррипе паллаштарнӑ. Ачасем музейра ӗслекен «Чӑваш тӗрри – чи илемли» куравпа паллашма пултарнӑ.
Унтан ачасем чӑвашсен тӗрлӗ вӑййине вылянӑ тата «Линька- линька» ташланӑ.
Кораккассинчи Людмила Андреева ӑста хӑйӗн сӑввине вуласа панӑ.
Раҫҫей Федерацийӗн Геройӗ Н.А.Петров ячӗллӗ Елчӗкри пӗтӗмӗшле пӗлӳ паракан вӑтам шкулта Чӑваш чӗлхи кунне халалласа уяв иртнӗ. Кун пирки асӑннӑ тӑрӑхӑн сайтӗнче хыпарланӑ.
Уяв шкул директорӗн Л.Н.Васильеван саламӗпе пуҫланнӑ. Вӑл тӑван чӗлхене юратма, хамӑр чӑваш пулнипе мӑнаҫланма чӗнсе каланӑ.
Уявра тӗрлӗ юрӑ-кӗвӗ янӑранӑ. 1 «б» класра вӗренекен Екатерина Чернова юрлакан юрра куракансем уйрӑмах тӑвӑллӑн алӑ ҫупса йышӑннӑ, хӗрсен илемлӗ ташши те куракансене килӗшнӗ.
Кӑҫал Аслӑ Ҫӗнтерӗве тунӑранпа 80 ҫул ҫитнӗ май вӗренекенсем хӑйсем ҫырнӑ сӑввисене вуланӑ.
Г.Н.Волков ячӗллӗ Аслӑ Елчӗкри пӗтӗмӗшле пӗлӳ паракан вӑтам шкулта Чӑваш чӗлхи кунне тивӗҫлипе уявланӑ. Мероприятие Надежда Хушкина вӗрентекен уҫнӑ. Вӑл чӑваш чӗлхи пуян та илемлӗ, янӑравлӑ та ҫепӗҫ, паха та асамлӑ пулнине; Иван Яковлев ячӗ чӑваш халӑхӗшӗн яланах хисеплӗ те чыслине, унӑн чапӗ халӑх хушшинче паянхи кун та иксӗлменнине мӑнаҫланса палӑртса хӑварнӑ.
Елчӗк районӗн сайтӗнче хыпарлана тӑрӑх, ачасем чӑваш писателӗсем ҫырнӑ сӑвӑсене илемлӗ каласа итлекенсене савӑнтарнӑ. Ҫӗнтерӗве 80 ҫул ҫитнине халалласа Петӗр Хусанкайӑн «Мунча шӑрши» сӑвви тӑрӑх лартнӑ инсценировка лартнӑ.
«Пуринчен малтан» телеграм-канал хыпарланӑ тӑрӑх, паян Шупашкарта «Кӗмӗл сасӑ» фестиваль иртнӗ.
Йӑлана кӗнӗ пултарулӑх конкурсне Чӑваш Енри кӑна мар, Тутарстанри, Пушкӑртстанри тата Пенза облаҫӗнчи ҫамрӑк юрӑҫсем те хутшӑннӑ.
Чи маттурри Елчӗк округӗнчи Виктория Романова пулнӑ, вӑл гран-прие тивӗҫнӗ. Ӑна санаторире 15 кун канмалли путевка панӑ.
Ака уйӑхӗн 21-мӗшӗнче Элӗк районӗнчи Чӑваш Сурӑмӗнчи пӗтӗмӗшле пӗлӳ паракан вӑтам шкулта чӑваш чӗлхи эрни пуҫланнӑ. Кун пирки асаннӑ шкулти чӑваш чӗлхи вӗрентекен Алина Петрова халӑх тетелӗнчи хӑйӗн страницинче.
Чӑваш чӗлхи эрнин пӗрремӗш кунӗнче «Тӑван чӗлхере – халӑх чунӗ» ятпа наукӑпа практика конференцийӗ иртнӗ. Конференцие аслӑ классенче вӗренекенсемпе пӗрлех шкулти вӗрентекенсем хутшӑннӑ, тӑван чӗлхепе тӑван литература пирки калаҫнӑ.
Ака уйӑхӗн 22-мӗшӗнче Муркаш районӗнчи Чӑваш Сурӑм вӑтам шкулӗнче «Эпир чӑваш ачисем» уяв иртнӗ. Ӑна ачасене И.Я.Яковлев ӗҫӗ-хӗлӗпе паллаштарас, тӑван халӑх культурине хаклама тата упрама вӗрентес тӗллевпе йӗркеленӗ.
Ачасем уявра чӑвашла сӑвӑсем каланӑ, юрӑсем юрланӑ, ташланӑ. Вырӑнти шкулта ӗҫлекен Алина Петрова пӗлтернӗ тӑрӑх, уяв питӗ хаваслӑ та савӑнӑҫлӑ иртнӗ.
«Пуринчен малтан» телеграм-канал пӗлтернӗ тӑрӑх, Ҫӗнӗ Шупашкарта «Асамат вулавӗсем» конкурс иртнӗ.
Поэзи ӑмӑртӑвне Аслӑ Ҫӗнтерӳ пулнӑранпа 80 ҫул, Константин Иванов поэт ҫуралнӑранпа 135 ҫул ҫитнине тата Чӑваш чӗлхи кунне халалланӑ.
Ӑмӑртӑва хулари тӗрлӗ шкулта чӑваш чӗлхипе литературине вӗрентекен 33 учитель хутшӑннӑ, вӗсем Чӑваш халӑх поэчӗн Светлана Асаматӑн «Чыс та мухтав сире...» кӗнекинчи Константин Иванова халалланӑ сӑвӑсене пӑхмасӑр илемлӗ каланӑ.
Ака уйӑхӗн 21-25-мӗшӗсенче Шупашкарти ача пахчисенче «Неделя народной культуры» (чӑв. Халӑх культурин эрни) фестиваль иртӗ. Шкул ҫулне ҫитменнисен учрежденийӗсенче ачасене чӑваш юмахӗсемпе, чӑваш юррисемпе тата халӑх ваййисемпе паллаштарӗҫ.
Чӑваш тумӗпе паллаштаракан, ал ӗҫне хӑнахтаракан ӑсталӑх лаҫҫисем ӗҫлӗҫ. Ачасене хулари музейсене илсе кайса тӑван тӑрӑх историйӗпе паллаштарӗҫ.
Пушкӑртстанри Ҫтерлӗ (Стерлитамак) хулинче «Ачалӑх тӗнчи» фестиваль-конкурс иртнӗ. Кун пирки «Хыпар» издательство ҫурчӗн журналисчӗ Елена Атаманова халӑх тетелӗнчи хӑйӗн страницинче пӗлтернӗ.
«Аякри тӑвансем тӗлӗнтерчӗҫ те, савӑнтарчӗҫ те. Ҫӗр-ҫӗр ача ҫитнӗччӗ уява, пурте-пурте чӑваш тумӗпе, капӑрлӑхсемпе. Чӑвашла хитрен юрлаҫҫӗ, паллӑ поэтсен сӑввисене шӑрантараҫҫӗ, чӑваш тумӗ ҫинчен каласа кӑтартма та пӗлеҫҫӗ.
Асӑрхӑр: ял ачисем мар, хулара пурӑнакан шӑпӑрлансем!
Пушкӑртстанра тем тесен те урӑхларах!!! Пушкӑртстанра чӑвашлӑха хисеплени, юратни, тӑван чӗлхене, культурӑна, йӑла-йӗркене сума суни тата вӑйлӑрах курӑнать! Вӗсем туслӑха хаклама, пӗрле чӑмӑртанса, пӗр-пӗрне ура хумасӑр, вак-тӗвекленмесӗр, пӗр-пӗрне ӑмсанмасӑр ӗҫлеме пӗлеҫҫӗ. Тата ҫав тери уҫӑ кӑмӑллӑ та тарават! Чаплӑ, чаплӑ Уяв тӑк уяв пулчӗ!» — хавхаланса та ҫунатланса пӗлтернӗ мероприяти пирки Елена Атаманова журналист.
Чӑваш Республикинчи ачасемпе ҫамрӑксен вулавӑшӗнче чӑваш чӗлхине халалланӑ мероприяти иртӗ. Кун пирки Дмитрий Моисеев ҫыравҫӑ халӑх тетелӗнчи хӑйӗн страницинче пӗлтернӗ.
«Ӗнер питӗ ӑшӑ, кӑмӑллӑ мероприяти иртрӗ. Вулавӑш ӗҫченӗceм студентсене чӑваш чӗлхи пирки каласа кӑтартрӗҫ, пире те сӑмах пачӗҫ.
Cтудентсем хастар пулчӗҫ, паллӑ поэтӑмӑрсен чӑваш чӗлхи ҫинчен хайланӑ cӑввисене вуларӗҫ, ыйтӑвӗсене те чӑвашлах пачӗҫ. Ҫамрӑксем тӑван чӗлхепе хитре калаҫма пӗлеҫҫӗ-xa», – хыпарланӑ вӑл.
+1.3 °C