pravdapfo.ru сӑнӳкерчӗкӗ

Чӑваш Енри пӗр предприяти пуҫлӑхӗ хыснана налук тӳлесе ҫитермен. Ку ӗҫпе РФ Следстви комитечӗн Чӑваш Енри управленийӗн тӗпчевҫисем тӗрӗслев пуҫарнӑ.

2020 ҫулхи кӑрлач уйӑхӗнчен пуҫласа 2023 ҫулхи пуш уйӑхӗччен арҫын тупӑшран тата хушма хакран илекен налука хыснана тӳлесе ҫитермен. Пурӗ 212 миллион тенкӗ ытла. Предприяти ҫирӗплетмелли тӗрлӗ хатӗр-хӗтӗр тата инструмент курттӑммӑн сутса пурӑнать иккен. Налук сахалрах тӳлес тесе декларацире суя цифрӑсем кӑтартнӑ.

Халӗ арҫын мӗнпур парӑма ҫеҫ мар, штрафпа пение те, пурӗ 314 миллион тенкӗ, тӳлесе татнӑ.

«Контактри» сӑн

Шупашкарти тухтӑрсем 18 ҫулти каччӑн пурнӑҫне ҫӑлнӑ. Унӑн чӗри тӑрук чарӑнса ларнӑ.

Ирхине каччӑ чиперех ҫӳренӗ, кӑшт каярах вара амӑшӗ ӑна тӑнсӑр выртнине курнӑ, унӑн питне кӑвак тӗс ҫапнӑ.

Васкавлӑ медпулӑшӑва шӑнкӑравласан амӑшӗ диспетчер мӗн каланине тунӑ вӑхӑтра тухтӑрсен бригади пулӑшма васканӑ. Шурӑ халатлисем каччӑн пурнӑҫӗшӗн 20 минут кӗрешнӗ. Телее, унӑн чӗри ӗҫлесе кайнӑ, ӑна больницӑна илсе ҫитернӗ.

«Контактри» сӑн

Чӑваш Республикинчи пултаруллӑ ҫемье «Ҫемье зарници» Пӗтӗм Раҫҫейри вӑйӑсенче 3-мӗш вырӑн йышӑннӑ. Сӑмах — Ҫӗрпӳре пурӑнакан Семеновсен ҫемйи пирки.

Ӑмӑрту ҫак кунсенче Волгоград хулинче иртнӗ. Семеновсен 24 ҫемьепе тупӑшма тивнӗ. Пирӗн ештешсен команди «Ҫӗрпӳ патриочӗсем» ятлӑ пулнӑ. Вӗсене унта хутшӑнмашкӑн «ВОИН» центрӑн республикӑри филиалӗ хатӗрленӗ.

gazeta.ru сайтри сӑн

Юпа уйӑхӗн 1-мӗшӗнче сирена янӑранине илтсен хӑраса ан ӳкӗр. Ҫак кун республикӑра ӑна тӗрӗслӗҫ кӑна.

Ҫак кун сирена икӗ хутчен янӑрӗ: 10 сехет те 30 минутра тата 10 сехет те 40 минутра.

Халӑха лӑпкӑ пулма ыйтаҫҫӗ. Ытти чухне, ку тӗрӗслев мар пулсан, сирена янӑрасан часрах телевизор е радио ҫутмалла, унта мӗн каланине пурнӑҫламалла. Кун пирки май пур таран ытларах ҫынна пӗлтермелле.

"Контактри" сӑн

Красноармейски округӗнчи Алманч ялӗнчи Матвеевсен ылтӑн туйӗ ҫитнӗ. Ҫак ятпа вӗсене ЗАГС ӗҫченӗсем саламланӑ.

Кил ӑшшин управҫи Искра Афанасьевна Шупашкарти 15-мӗш ача пахчи-яслире нумай ҫул тӑрӑшнӑ. Владимир Максимович Шалти ӗҫсен министерствинче аслӑ следователь пулнӑ, подполковник званийӗ таран ҫитнӗ.

Ҫемье телейӗн вӑрттӑнлӑхне уҫнӑ вӗсем: пӗр-пӗрне хисеплемелле, пулӑшса пымалла.

"Контактри" сӑн

Ҫӗмӗрле хулинче модельлӗ вулавӑш уҫӑлнӑ. Унӑн дизайнне вырӑнти ӳнерҫӗ Сергей Разгудаев хатӗрленӗ.

Унта хӑтлӑ та хӑйне евӗр стильлӗ. Вуламалли зона, интернета тухмалли май туса панӑ ӗҫ вырӑнӗсем, ача-пӑча кӗтесӗ тата мероприятисем ирттермелли вырӑн пур.

Фасада росписьпе илемлетни, интерьерлӑ панносем, стенасем ҫинчи живопиҫ – ҫаксене йӑлтах Сергей Разгудаев хатӗрленӗ.

nsn.fm сайтри сӑн

Статистика кӑтартнӑ тӑрӑх. Чӑваш Республикинчӗ халӑхран пуҫтаракан сӗте хаклӑрахпа туянма пуҫланӑ.

Ку уйӑхра пӗр литра вӑтамран 25-27 тенкӗпе пуҫтарнӑ. Ку пӗлтӗрхи ҫак тапхӑртипе танлаштарсан 2 тенкӗ нумайрах.

Юлашки вӑхӑтра халӑхран сӗт илекенсем сахалланнӑ, республикипе пӗтӗмпе 276 предприниматель юлнӑ. Усламҫӑсем уйрӑмах Патӑрьел округӗнче нумай. Унта 42 предпримниматель халӑхран сӗт пуҫтарать.

Юрӑпа ташӑ ансамблӗн сӑнӳкерчӗкӗ

Чӑваш патшалӑх юрӑпа ташӑ ансамблӗ юпа уйӑхӗн 21-мӗшӗнче хӑйӗн 102-мӗш пултарулӑх сезонне уҫӗ. Ун чухне вӑл куракансене «Чӑваш тӗнчи» театрализациленӗ концерт программине йыхравлать.

Программӑн режиссёр-постановщикӗ – ансамблӗн илемлӗх ертӳҫи, тӗп балетмейстерӗ Алексей Тимошенко.

Концерт 18 сехет те 30 минутра пуҫланӗ.

Пирӗн ҫӗршывра ҫитес ҫулхи производство планне ҫирӗплетнӗ.

2025 ҫулхи раштав уйӑхӗн 31-мӗшӗнчен пуҫласа 2026 ҫулхи кӑрлач уйӑхӗн 11-мӗшӗсенче канӑпӑр.

Унсӑр пуҫне канмалли кунсем ҫапларах пулӗҫ: нарӑс уйӑхӗн 21-23-мӗшӗсенче, пуш уйӑхӗн 7-9-мӗшӗсенче, ҫу уйӑхӗн 1-3-мӗшӗсенче тата ҫу уйӑхӗн 9-1-мӗшӗсенче, ҫӗртме уйӑхӗн 12-14-мӗшӗсенче, чӳк уйӑхӗн 4-мӗшӗнче, раштав уйӑхӗн 31-мӗшӗнче.

«Чеб.ру» сайтри сӑн

Шупашкарти Н.В.Никольский ячӗллӗ професси колледжӗ малашне урӑхла ятлӑ пулӗ: Н.В.Никольский ячӗллӗ педагогика колледжӗ. Постановление ЧР Министрсен Кабинечӗн председателӗ Сергей Артамонов алӑ пуснӑ.

Колледжӑн виҫӗ филиал: Шупашкарта – иккӗ, тепри – Канашра. Ҫапла оптимизаци хыҫҫӑн пулнӑ. 2015 ҫулта Шупашкарти механика-технологи техникумне тата педагогика колледжне пӗрлештернӗ. 2023 ҫулта вӗсемпе Канашри педагогика колледжӗ пӗрлешнӗ.