Росреестр Чӑваш Енри 100 ҫулти икӗ ҫил арманне шута илнӗ. Иккӗшӗ те Шупашкар округӗнчи Шоркка ялӑ ҫывӑхӗнче вырнаҫнӑ. Вӗсем йывӑҫран тунисем.

Ҫак ҫил арманӗсем - Степановсен ҫемйин. Пӗрне 1911 ҫулта ашшӗ хӑпартнӑ, теприне 1926 ҫулта ывӑлӗ туса лартнӑ. Пӗрремӗшӗн шалти механизмӗ лайӑх упранса юлнӑ. Иккӗмӗшӗн вара йывӑҫ каркасӗ хавшанӑ.

Палӑртмалла: ку - Раҫҫейре ял тӑрӑхӗнче харӑсах икӗ арман упранса юлнӑ пӗртен-пӗр тӗслӗх.

Ольга Иванован «Контактра» страницинчен илнӗ сӑнӳкерчӗк

Чӑваш кӗнеке издательствин редакторӗ тата ҫыравҫӑ Ольга Австрийская ӗнер, Чӑваш чӗлхи кунӗнче, Шупашкарти Ашмарин урамӗнчи шкулта иртнӗ литература тӗлпулӑвне хутшӑннӑ.

Пултаруллӑ пике «Контактра» халӑх тетелӗнче пӗлтернӗ тӑрӑх, 8 «А» тата 8 «Б» классемпе литература, поэзи ҫинчен калаҫнӑ. «Хамӑн пултарулӑх ҫулӗ, «Чӑлах пуканесем», «Пӗчӗкҫӗ шевле. Я – маленькая точка во Вселенной...» кӗнекесем ҫинчен каласа кӑтартрӑм, сӑвӑсем вуларӑм. Издательство ӗҫӗ-хӗлӗ, алҫыруран еплерех хатӗр кӑларӑм пулса тӑни ҫинчен те сӑмах хускатрӑм», — хыпарланӑ Ольга.

Ҫыравҫӑ асӑннӑ шкулта 8-мӗш класра ӑс пухакан Даша Кондратьевӑн калавӗпе тата сӑввисемпе те паллашнӑ. «Хӗрача тарӑн шухӑшлӑ произведенисем хайлать, пуласлӑхра кӗнеке кӑларасшӑн», — ырланӑ ача тӑрӑшӑвне ҫамрӑк ҫыравҫӑ.

luganmedia.ru сӑнӳкерчӗкӗ

Луганск хулинче Илемпи ятлӑ ҫӑка ӳсет. Унӑн хунавне Халӑх фрончӗн Чӑваш Ен хастарӗ Александр Филиппов нумаях пулмасть лартса хӑварнӑ. Ӑна вӑл унччен икӗ кун маларах ҫут тӗнчене килнӗ хӗрӗн ячӗпе Илемпи ят панӑ.

Чӑваш Енпе Луганск килӗштерсе ӗҫлеме пуҫланӑ май унта пирӗн патри хастарсем тӑтӑшах кайса ҫӳреҫҫӗ, май килнӗ таран пулӑшма тӑрӑшаҫҫӗ. Лугански Туслӑх паркне валли нумаях пулмасть Чӑваш Енрен тӗрлӗ йывӑҫ хунавне илсе кайнӑ.

Чӑвашсем ывӑл ҫуралсан юман лартнӑ, хӗр ҫуралсан — ҫӑка. Чӑваш хастарӗсенчен пӗри Александр Филиппов Луганскра ҫӑка хунавӗ лартнӑ. Ӑна вӑл Илемпи ят панӑ.

Малта – канмалли кунсем. Мӗнле ҫанталӑк пулӗ ун чухне? Синоптиксем мӗн хыпарлаҫҫӗ?

Ыран каллех ӑшӑ пулӗ, сывлӑш 23-28 градус таран ӑшӑнӗ. Ака уйӑхӗн 28-30-мӗшӗсенче уяр ҫанталӑк тӑрӗ, термометр 13-18 градус ӑшӑ кӑтартӗ.

Ҫу уйӑхӗн 1-2-мӗшӗсенче ҫумӑрлӑ ҫанталӑк пулӗ, ҫурҫӗр циклонӗ ҫитӗ. Унтан Арктика сывлӑшӗ килӗ те сивӗтме тытӑнӗ. Хӑш-пӗр кун 5-10 градус кӑна ӑшӑ пулӗ, ҫӗрле шӑнтӗ.

Синоптиксем каланӑ тӑрӑх, пӗрмай ӑшӑ пулаймасть, сивӗ кунсем те таврӑнӗҫ.

cheb-centr.soc.cap.ru сӑнӳкерчӗкӗ

Ӗнер, Чӑваш чӗлхи кунӗнче, Шупашкар хулинчи кинемейсем ачасене масмак ӑсталама вӗрентнӗ. Вӗсем хулари 41-мӗш вӑтам шкула кайнӑ, унта вӗренекенсемпе тӗл пулнӑ.

Хастар кинемейсем — Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳрекен ватӑсем. Вӗсем унта ал ӗҫӗпе пӗрмай аппаланаҫҫӗ. Чӑваш чӗлхи кунӗнче вӗсем ачасене Чӑваш чӗлхи кунне хӑҫан тата мӗн тӗллевпе пуҫарса яни ҫинче, тӑван халӑхӑмӑрӑн пуян культури ҫинчен каласа кӑтартнӑ.

Ачасем масмак ӑсталанине кӑсӑкланса ӑша хывнӑ, хтре япалана пуҫа тӑхӑнса пӑхнӑ, ватӑсене алӑ ҫупса тав тунӑ.

Вера Иванова сӑнӳкерчӗкӗ

Паян «Ҫӗнтерӳ диктанчӗ» пӗтӗм тӗнчери историпе ҫутӗҫ диктанчӗ иртнӗ. Унта Шупашкарта пурӑнакан Фроловсем ҫемйипех хутшӑннӑ.

Николай Фролов Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра (диктант ҫырмалли лапамсене унта виҫӗ уйрӑмра йӗркеленӗ) мӑшӑрӗпе, Екатерина Сильвестровнӑпа, пырса ҫитнӗ. «Ун пек акцие эпӗ кӑҫалхипе иккӗмӗш хут хутшӑнатӑп. Кӑҫал арӑмпах килтӗм», — тенӗ ветеран.

Николай Николаевич диктанта ҫырма ҫарта тӑхӑннӑ формӑпа пырса ҫитнӗ. Вӑл тума арҫын яваплӑ мероприятсене хутшӑнма шкапран кӑларать.

ШӖМ тунӑ сӑн

Муркаш тӑрӑхӗнчи Хорнуй ялӗнчи 70 ҫулти арҫын ҫула кӗскетсе вӑрман урлӑ тухма хӑтланнӑ. Анчах ҫухалса кайнӑ.

Ку хыпар полицие ака уйӑхӗн 26-мӗшӗнче ҫур ҫӗр иртни 2 сехетре ҫитнӗ. Ватӑ арҫын каланӑ тӑрӑх, вӑл каҫхине Шупашкартан Ивановка таран автобуспа ҫитнӗ, киле вӑрман урлӑ кайма тухнӑ. Ҫухалса кайсан ҫумӑр айне лекнӗ, шӑнса кӳтнӗ.

Алексей Илларионов аслӑ инспектор ертсе пыракан экипаж вырӑна тухнӑ. Инспектор арҫын патне шӑнкӑравласа вӑл ӑҫта пулнине ӑнланма хӑтланнӑ, телевышка патне утма ыйтнӑ. Унтан полицейски машинӑн ҫутӑ тата сасӑ сигналӗсене ҫутнӑ. Арҫын ҫапла тухнӑ. Йӗрке хуралҫисем ӑна киле леҫсе янӑ.

cap.ru сайтри сӑн

Патӑрьел муниципаллӑ округӗнче сахӑр кӑшманӗ акма пуҫланӑ, Етӗрне округӗнче вара хӑмла ҫакма тытӑннӑ. Пӗр сӑмахпа, ҫурхи ӗҫсем вӗресе кӑна тӑраҫҫӗ.

Патӑрьел тӑрӑхӗнчи Лаврентьев фермер хуҫалӑхӗнче кунне 15 гектар кӑшман акнӑ. Ку акма палӑртнӑ лаптӑкӑн 7,5 проценчӗ. Чӑваш Енре ҫак культурӑна 900 гектар ҫинче лартма палӑртнӑ.

Етӗрне тӑрӑхӗнче вара «Выльский» ял хуҫалӑх производство кооперативӗнче хӑмла ҫакма тытӑннӑ. Кӑҫал ку ӗҫӗ 182 гектар ҫинче тумалла. Кунсӑр пуҫне 65 гектар ҫинче ҫӗнӗ плантацисем тумалла.

t.me/chuv_kray каналтан илнӗ сӑнӳкерчӗк

Чӑваш Енре пурӑнакан хӑш-пӗр ҫамрӑк чӑвашла туй ирттерме юратать. Ун пеккисенчен пӗрисем — Виктория тата Денис. Вӗсем туйӗ Чӑваш чӗлхи кунӗ умӗн, ака уйӑхӗн 24-мӗшӗнче, кӗрленӗ.

Пӗрне-пӗри юратакан икӗ чун хӑйсен туйне чӑвашла ирттерме шухӑш тытнӑ. Ҫамрӑксен пуҫарӑвне вӗсен тӑванӗсемпе ҫывӑх ҫыннисем те ырланӑ.

«Чӑн-чӑн чӑваш туйӗ час-час пулмасть. Эпир пирӗн пурнӑҫӑмӑрти паллӑ кун чылайлӑха асра юлтӑр, кайран та аса илсе пурӑнмалӑх, ыттисене каласа кӑтартмалӑх пултӑр тесе тӑрӑшрӑмӑр», — тесе шухӑшлать ҫамрӑк арӑм.

tatar-inform.ru сайтри сӑн

Ака уйӑхӗн 25-мӗшӗнче, Чӑваш чӗлхи кунӗнче, Тутарстани Пӑвара Иван Яковлевӑн бюстне уҫнӑ.

Постамента гранитран хатӗрленӗ, хӑй бюстне – пӑхӑртан. Ӑна РОНОна хирӗҫ вырнаҫнӑ Ача-пӑча ӳнер шкулӗ умне лартнӑ.

Палӑк авторӗ – паллӑ скульптор Владимир Нагорнов. Укҫан вырӑнти Чӑваш наци культура автономийӗн председателӗ Владимир Ильин пулӑшнӑ.

Пӑва районӗн пуҫлӑхӗ Ранис Камартдинов каланӑ тӑрӑх, ку чӑваш алфавитне йӗркелесе янӑ Иван Яковлевича хисеплени, унӑн ҫитӗнӗвӗсене манманни.