Кандинский нейросеть сӑнӳкерчӗкӗ

Ҫӗн Шупашкарти карас ҫыхӑнӑвн салонне пӗри вӑрӑ шухӑшӗпе пырса каӗнӗ. Вӑл сутуҫӑна карас телефонне кӑтартма ыйтнӑ.

Ҫамрӑк ҫын 25 пин тенкӗ тӑракан смартфон алла кӗрсен унпа лавккаран тухса тарнӑ.

Пӑтӑрмах пирки сутуҫӑ йӗрке хуралҫисене пӗлтернӗ. Вӗсем вӑрра 8 минутран тытса чарнӑ. Вӑл юнашар урамра пулнӑ. Телефон та ун ҫумӗнче пулнӑ.

"Контактри" сӑн

Ҫӗрпӳ округӗнчи Пысӑк Чӑрӑш ялӗ ҫывӑхӗнче карьер пур. Унтан вак чул кӑлараҫҫӗ.

Хальччен нумай чул кӑларнӑ. Шӑтӑка каялла вара ҫӳп-ҫаппа хуплама шутланӑ ахӑртнех.

Ҫывӑхра вара - ял, уй-хир, Кӗҫӗн Ҫавал юханшывӗ. Ҫынсем 300 метр аякра ҫеҫ пурӑнаҫҫӗ. Ҫывӑхра ҫӳп-ҫап купи пулни, паллах, лайӑх мар.

Ял ҫыннисем унсӑрӑн та кӑмӑлсӑр: ҫывӗпех карьерта чакаланакан машинӑсен сассине итлесе пурӑнаҫҫӗ. Ку хӑҫанччен ҫапла пулӗ? Юре-ха, вак чул кӑлараҫҫӗ, анчах унта мӗн тума ҫӳп-ҫап турттармалла? Ҫакӑ пӑшӑрхантарать ял ҫыннисене.

"Контактри" сӑн

Олимп вӑййисенче гендер шӑв-шавӗ ҫӗкленнӗ. Хӗрарӑмсен хушшинче бокс енӗпе 1/4 финал пынӑ чухне Итали спортсменки Анжела Карини Алжир спортменкине, хӑйне хӗрарӑм текен арҫынна Имане Хелифа (трансгендер ӗнтӗ), хирӗҫ 46 ҫеккунт ҫеҫ тытӑнса тӑнӑ. Карини малалла кӗрешмен, «Мана питӗ ыраттарать», - тенӗ. Унтан ӑна алӑ та паман.

Сӑмах май, пӗлтӗр Хелифа юнра тестостерон нумай тесе тӗнче чемпионатне кӗртмен, Олимп вӑййисене хутшӑнма вара ирӗк панӑ.

Пресс-конференцире Карини хӗрарӑмсен спортне трансгендерсене хутшӑнмашкӑн чарма чӗнсе каланӑ.

Паян ҫанталӑк сивӗрех-ха, ҫурҫӗр округӗсенче ҫумӑр ҫукалать. Ыран вара, синоптиксем пӗлтернӗ тӑрӑх, ҫанталӑк лайӑхланма тытӑнать.

Ҫумӑр малашне те ҫукалама пултарать-ха, анчах ыран 20-25 градус таран ӑшӑтӗ, вырсарникун вара 27 градус пулӗ.

Тунтикун каллех сунчӑк кирлӗ пулӗ. Эрне варринче ҫумӑр ҫума пӑрахӗ, ҫил ҫурҫӗр енчен вӗрӗ. Кӑнтӑрласерен 22-27 градус, ҫӗрлесерен 15-17 градус ӑшӑ пулӗ.

Гидрометцентр пӗлтернӗ тӑрӑх, ҫитес 10 кунра сывлӑш температури нормӑпа килӗшӳллӗн пулӗ. Ҫурла пуҫламӑшӗнче вара вӑл 18 градус ӑшӑпа танлашать.

Инкеклӗ лару-тӑру министерстви тунӑ сӑн

Паян ҫӑлав службине Ҫӗрпӳ округӗнче ҫын путса вилни пирки шӑнкӑравласа пӗлтернӗ. «Асамат» турбаза ҫывӑхӗнчи пӗвере, Ҫӗньялта, 41 ҫулти хӗрарӑм шыв айне кайнӑ. Вӑл Красноармейски округӗнчен пулнӑ.

Ҫак инкеке курнӑ ҫынсем каланӑ тӑрӑх, хӗрарӑм кимӗпе ярӑннӑ, ҫаврӑнса ӳксен вӑл шыв айне кайнӑ та тухман. Унӑн виллине водолазсем шыраҫҫӗ.

Палӑртмалла: ҫулталӑк пуҫланнӑранпа республикӑра 27 ҫын путнӑ. Ҫав йышра - 3 ача.

Паян, ҫурла уйӑхӗн 2-мӗшӗнче, Чӑваш Республикин культурӑн тава тивӗҫлӗ ӗҫченӗ, Ф.П. Павлов ячӗллӗ Шупашкарти музыка училищин концертмейстерӗ Татьяна Асламас 70 ҫул тултарнӑ.

Канаш хулинче ҫуралнӑ ҫав хӗрарӑмӑн пӗтӗмӗшле ӗҫ стажӗ 50 ҫул иккен, ҫав шутран 48 ҫулне вӑл Шупашкарти музыка училищинче ӗҫлесе ирттернӗ. Вӑл — хорпа, солистсемпе, ансамбль дирижёрӗсемпе ӗҫлес енӗпе пысӑк опытлӑ специалист, нумай музыка инструменчӗпе калама пӗлет.

Татьяна Анисимовна хӑйӗн мухтавлӑ ашшӗн, паллӑ чӑваш композиторӑн Анисим Асламасӑн эткерлӗхне упраса хӑварассишӗн нумай тӑрӑшать: тӗрлӗ концерт, астӑвӑм каҫӗсем ирттерет, унӑн пултарулӑхӗпе ҫамрӑк ӑрӑва паллаштарать.

Контактри «Чувашский край» сӑнӳкерчӗк

92 ҫулти Тамара Гетманова ахаль ларма юратмасть. Вӑл халӗ те тӗрлет, ҫыхать. Нумаях пулмасть кинемей «Голубые сойки» ӗҫе вӗҫленӗ. Вӑл ӑна пурнӑҫланӑ чухне тӗрлемелли виҫӗ техникӑпа усӑ курнӑ.

Тамара Степановна Шупашкар хулинчи халӑха социаллӑ пулӑшу паракан комплекслӑ центрти «Хозяюшка» клуба ҫӳрет. Хӑй Тутарстанра ҫуралнӑ, Шупашкарта вырӑс чӗлхи вӗрентекенӗнче ӗҫленӗ. Кинемей ятарлӑ ҫар операцийӗнчи салтаксем валли 30 мӑшӑри нуски ҫыхнине те палӑртмалла.

«Раҫҫейри ҫулталӑк йывӑҫӗ» сасӑлав вӗҫленнӗ. Шел те, хальхинче чӑваш юманӗ малти вырӑна йышӑнайман.

Сасӑлава Ҫӗмӗрлери культурӑпа кану паркӗнче ӳсекен Аслӑ Петӗр юманӗ хутшӑннӑ. Вӑл 2975 сасӑ пухса тӑваттӑмӗш вырӑна йышӑннӑ. Юман 350 ҫул ӳсет, вӑл 32 метр ҫӳллӗш.

Кӑҫал сасӑлавра пӗрремӗш вырӑна Ростов облаҫӗнчи юман йышӑннӑ. Иккӗмӗшпе виҫҫӗмӗш вырӑнсене Белгород облаҫӗнчи тата Ӗпхӳри юмансем пайланӑ.

cap.ru сӑнӳкерчӗкӗ

Кӑҫал авӑн уйӑхӗн 1-мӗшӗ, Пӗлӳ кунӗ, вырсарникуна лекет. Ҫавна май шкулти линейкӑсене тунтикун, авӑн уйӑхӗн 2-мӗшӗнче, ирттерӗҫ. Ҫакна РФ Ҫутӗҫ министерстви сӗнӗвӗпе пурнӑҫлаҫҫӗ.

Кӑҫал ресрубликӑра 14 пине яхӑн ача парта хушшине пӗрремӗш хут ларӗ.

Сӑмах май, Шупашкарти «Садовый» микрорайонти шкул авӑнӑн 1-мӗшӗнче уҫӑлмӗ. Вӑл ӗҫлеме пуҫланӑ, анчах суд ӑна саккуна пӑсса хута янӑ тесе хупма йышӑннӑ. «Университет» микрорайонти шкул, унччен пӗлтертӗмӗр ӗнтӗ, раштав уйӑхӗнче уҫӑлӗ.

Телеграмри t.me/alenaelizarova каналтан илнӗ сӑнӳкерчӗк

Кӳкеҫри ваттисемпе инвалидсен интернат-ҫуртӗнче ҫӗнӗ директор ӗҫе пуҫӑннӑ. Директор тилхепине Гузель Ивановӑна тыттарнӑ.

Республикӑн ӗҫ тата социаллӑ хӳтлӗх министрӗ Алена Елизарова Телеграмри хӑйӗн страницинче пӗлтернӗ тӑрӑх, ҫӗнӗ пуҫлӑхпа коллектива паян паллаштарнӑ.

Гузель Иванова 10 ҫул ытла Ҫӗнӗ Шупашкарти социаллӑ реабилитаци центрӗнче тӑрӑшнӑ, кайран асӑннӑ хулари 12-мӗш ача пахчин заведующийӗнче ӗҫленӗ. Министр палӑртнӑ тӑрӑх, Гузель Иванован ӗҫе ертсе пырас опыт пысӑк.