Алёна Сергеева страницинчи сӑнӳкерчӗк

Чӑваш юрӑҫи Алёна Сергеева Дивноморскра юрлать.

Алёна халӑх тетелӗнчи хӑйӗн страницинче пӗлтернӗ тӑрӑх, вӑл яланах юрлама юратнӑ.

Кирек ӑҫта пурӑнсан та чунӗ юрласшӑн,ю пулнӑ. Сыктывкарта ӗҫлесе пурӑннӑ чух аслӑ шкул преподавателӗсемпе хора ҫӳренӗ, коми юррисене шӑрантарнӑ. «Студентсем ман ҫине тӗлӗнсе пӑхатчӗҫ. Халӗ Геленджик-Дивноморскра пурӑннӑ чух вырӑс халӑх тата Кубань юррисене юрлатӑп», — пӗлтернӗ Алёна. Вӑл «Дивноморские подружки» халӑх ансамблӗнче юрлать.

Светлана Гордеева страницинчен илнӗ сӑнӳкерчӗк

Чӑваш наци музейӗ кӑҫал республикӑри темиҫе районта фольклорпа этнографи экспедицийӗ ирттернӗ. Музей ӗҫченӗсем Улатӑр, Пӑрачкав тата Етӗрне муниципаллӑ округӗсенче пулнӑ май унта вырӑссем 16 ӗмӗртен пурӑннӑ вырӑнсемпе кӑсӑкланнӑ. Экспедицисенчи тата Сӗнтӗрвӑррипе Шупашкар районӗсенчи музейсенчи япаласемпе Чӑваш тӗррин музейӗнче «Русские» (чӑв. Вырӑссем) куравра паллашма пулать.

Синоптиксем ку эрнере республикӑра ҫанталӑк мӗнле пулассине палӑртнӑ. Паян ирхине кӑштах юр ҫунӑ. Ыран ҫанталӑк уяртӗ.

Юнкун тата эрнекун юр ҫукалӗ. Канмалли кунсем тӗлне ҫил вӑйланӗ. Эрне тӑршшӗпех термометр 0 градус патнелле кӑтартӗ. Кӑнтӑрласерен 0-рен кӑшт ӑшӑрах пулӗ, ҫӗрлесерен – кӑшт сивӗрех.

Хальлӗхе, синоптиксем пӗлтернӗ тӑрӑх, хӗллехи сивӗсем курӑнмаҫҫӗ. Гидрометцентр палӑртнӑ тӑрӑх, чӳкӗн иккӗмӗш декади нормӑран 2-3 градус ӑшӑрах пулӗ.

rg.ru сайтри сӑн

Ӗнер Шупашкарта пурӑнакансем каҫхине хула ҫийӗн метеорит вӗҫнине асӑрханӑ. Ҫакна видео та ӳкернӗ.

Пӗр видеона хула варринче ӳкернӗ, теприне – «Радужный» микрорайонта. Видеона пӑхсан тӳпере ҫуталакан япала вӗҫнине асӑрхама пулать.

Тутарстанра та ҫакнашкал кадрсем ӳкернӗ. Хусанти федераци университечӗн Астрономи обсерваторийӗн директорӗ палӑртнӑ тӑрӑх, вӑл пысӑках мар болид пулнӑ.

cap.ru сайтри сӑн

Республикӑри амӑшӗн капиталне 200 пин тенкӗ таран ӳстерме палӑртнӑ. Саккун проектне ЧР Ӗҫлев министерстви хатӗрленӗ.

Халӗ амӑшӗн каиталӗ 150 пин тенкӗпе танлашать. Ҫӗнӗ ҫултан вара ӑна 50 пин тенкӗ хӑпартма палӑртнӑ. Капитала тивӗҫнӗ, анчах хальлӗхе унпа усӑ курман ҫемьесене те 50 пин тенкӗ хушса парӗҫ.

Ҫитес ҫул амӑшӗн капиталне пама республика хыснинчен 197,6 миллион тенкӗ пӑхса хунӑ. Ку укҫа 1317 ҫемье валли ҫитмелле.

Культура институчӗн сӑнӳкерчӗкӗ

Чӑваш патшалӑх культурӑпа ӳнер институтӗнче Сергей Казаковӑн пултарулӑх каҫӗ иртнӗ. Ӑна асӑннӑ шкулӑн преподавателӗн юбилейне халалланӑ.

Юбилей каҫӗнче юрӑ-кӗвӗ янӑранӑ, ура ҫапса ташланӑ.

«Жизнь в ритме» ят панӑ концерта пухӑннисем – институт ертӳҫисем тата Каҫал тӑрӑхӗнчи ентешӗсем юбиляра чунтан саламланӑ.

«Чӑваш Ен» ПТРК видеовӗнчен илнӗ сӑнӳкерчӗк

«Чӑваш Ен» патшалӑх телерадиокомпанийӗн журналисчӗ Алексей Енейкин Кемӗр чӑвашӗсем ҫинчен фильм ӳкернӗ. Ӑна вӑл «Пурӑнатпӑр-ха, тӑван» ят панӑ.

Ҫӗпӗре тата тайгана чӑвашсем иртнӗ ӗмӗр пуҫламӑшӗнче йышлӑн куҫса кайса ҫӗнӗ ялсем пуҫарса янӑ.

Алексей Енейкин пӗлтернӗ тӑрӑх,

Кузбасра пурӑнакан пиншер чӑваш тӑван халӑхӑмӑрӑн культурине аталантарать. Промышленность районӗнчи Ивано-Родионовск ялӗнче пурӑнакан Курицынсен ҫемйи уйрӑмах ырӑ тӗслӗх кӑтартать-мӗн.

https://vk.com/wall-169628991_11323 сӑнӳкерчӗкӗ

Шупашкар хули «Волжский вояж» (чӑв. Атӑл вояжӗ) чукун ҫул туризм маршрутне лекнӗ. Ӑна «Раҫҫейӗн чукун ҫулӗсем» акционерсен обществи йӗркеленӗ.

Туристсем валли хатӗрленӗ ҫӗнӗ маршрут ҫапларах: «Мускав — Шупашкар — Йошкар-Ола —Чулхула».

«Атӑл вояжӗ»

круиз поезӗ ҫула ҫитес ҫулхи ака, ҫурла тата юпа уйӑхӗсенче тухӗ.

Билета Раҫҫейӗн чукун ҫулӗсен официаллӑ сайтӗнче ҫитес вӑхӑтра сутма тытӑнӗҫ.

"Контактри" сӑн

Чӑваш Ен спортсменӗсем Татьяна тата Александр Федоровсем Астанара самбо енӗпе иртнӗ тӗнче чемпионатӗнче лайӑх кӑтартусемпе палӑрнӑ. Вӗсем – пиччӗшӗпе йӑмӑкӗ.

Татьяна 50 килограмм тайман спортсменсен йышӗнче тупӑшса кӗмӗл медаль ҫӗнсе илнӗ. Унӑн пиччӗшӗ, тӗнче класлӑ спорт мастерӗ Александр 64 килограмм тайманнисен виҫе категорийӗнче тупӑшса пӑхӑр медале тивӗҫнӗ.

"Контактри" сӑн

Ӗнер Патӑрьел тӑрӑхӗнчен тухнӑ ентешсем уява пухӑннӑ – ентешлӗх уявӗ иртнӗ.

Патӑрьел ҫӗрӗ ҫинчен паллӑ ҫынсем сахал мар тухнӑ. Нумайӑшӗ ӗнӗр ентешлӗх уявне хутшӑннӑ. Унта пухӑннисене пултаруллӑ ҫынсем юрӑ-ташӑпа савӑнтарнӑ.

Сӑмах май, Патӑрьелсен ентешлӗхӗ, 1993 ҫулта йӗркеленнӗ.