rsl.ru сайтри сӑн

Статистика кӑтартнӑ тӑрӑх, юлашки вӑхӑтра Чӑваш Енре пурӑнакансем ытларах электронлӑ кӗнеке туянма пуҫланӑ. Ҫакна кӗнеке лавккисен тата цифра сервисӗсен кӑтартӑвӗсем ҫирӗплетеҫҫӗ.

Кӑҫалхи 8 уйӑхра электронлӑ кӗнекен вулакансен йышӗ, пӗлтӗрхи ҫак тапхӑрпа танлаштарсан, самай ӳснӗ: 57% ытларах.

«Строки» кӗнеке сервисӗ акӑ мӗнле статитистикӑпа паллаштарнӑ: Чӑваш Енре пурӑнакансем ытларах юрату романӗсем, классика литературин хайлавӗсене тата детективсем вулама юратаҫҫӗ иккен.

«Чеб.ру» сайтран илнӗ сӑн

Ӗнер ирхине Шупашкарта шыв турттаракан ГАЗель водителӗ ҫынна таптаса кайнӑ. Ку инкек Мир проспектӗнче автовокзал патӗнче пулнӑ.

ГАЗель рулӗ умӗнче 29 ҫулти арҫын ларнӑ. Вӑл ҫуран утакансем ҫӳрекен вырӑнта каялла каялла чакнӑ чухне 75 ҫулти арҫынна асӑрхаман – ун ҫине пырса кӗнӗ. Арҫын ӳксе машина айнех пулнӑ.

Ӑна пульницӑна илсе ҫитернӗ. Анчах, шел те, тухтӑрсем унӑн пурнӑҫне ҫӑлайман – вӑл темиҫе сехетрен вилнӗ.

«Чеб.ру» сайтри сӑн

Чӑваш Енре пушара хирӗҫ режим вӑйра пулма пӑрахнӑ. Ӑна юпа уйӑхӗн 6-мӗшӗнче пӑрахӑҫланӑ. Хушӑва Министрсен Кабинечӗн ертӳҫи Сергей Артамонов алӑ пуснӑ.

Ҫавӑн пекех муниципалитетсене те ҫак режима пӑрахӑҫлама сӗннӗ. Аса илтерер: пушара хирӗҫ режим Чӑваш Енре ака уйӑхӗн 1-мӗшӗнчен вӑйра пулнӑ. Ҫак тапхӑрта вӑрманта кӑвайт чӗртме, ҫӳп-ҫап ҫунтарма, кӑвайт ҫинче апат пӗҫерме юраман.

Сӑмах май, пӗлтӗр республикӑра пушара хирӗҫ режима юпан 18-мӗшӗнче пӑрахӑҫланӑ.

forum.na-svyazi.ru сайтран илнӗ сӑнӳкерчӗк

Шупашкарта ачасем вылямалли лапам патӗнче пӗр кунхине ӳсӗр арҫын выртнӑ.

Пӑтӑрмах Кривов урамӗнчи нумай хваттерлӗ ҫуртсен картишӗнче пулнӑ. Асфальт ҫинче выртакан арҫыннӑн аллинче эрех кӗленчи пулнӑ.

Ӑна видео ӳкерсе илекенсем пулнӑ, унтан ҫавна халӑх тетелӗнче вырнаҫтарнӑ.

Йӗрке хуралҫисем ҫав арҫынна тупса палӑртнӑ. Вӑл 62-рискер иккен. Ӑна административлӑ майпа явап тыттарасси пирки икӗ протокол шӑрҫаланӑ.

«Ҫыхӑнура» порталта пӗлтернӗ тӑрӑх, видеона тата ытти ӳсӗр те лекнӗ, вӗсене явап тыттарнипе тыттарманни пирки паллӑ мар.

Чӑваш наци вулавӑшӗн халӑх тетелӗнчи пабликинчи сӑнӳкерчӗк

Чӑваш наци вулавӑшӗ буфет уҫас кӑмӑллине пӗлтерет.

Культура учрежденийӗ халӑх тетелӗнчи хӑйӗн пабликӗнче хыпарланӑ тӑрӑх, пӗчӗк те хӑтлӑ кафе уҫасшӑн. Ун валли арендатор шыраҫҫӗ.

Кафе 17 тӑваткал метр лаптӑк йышӑнӗ.

Тӗплӗнрех ыйтса пӗлес тесен +7(8352) 23-02-17 (хушма номер 107) телефонпа шӑнкравлама сӗнеҫҫӗ.

archives21.rchuv.ru сӑнӳкерчӗкӗ

Ӗнер, юпа уйӑхӗн 6-мӗшӗнче, Шупашкарта «XXIV Петровские чтения» (чӑв. XXIV Петров вулавӗсем) пӗтӗм Раҫҫейри ӑслӑлахпа практика конференцийӗ иртнӗ.

Ку форума Чӑваш наци музейӗ 2001 ҫултанпа ирттерет. Унта музей сферинчи ҫивӗч ыйтусене музей ӗҫченӗсем ӑсчахсемпе тата педагогсемпе пӗрле сӳтсе яваҫҫӗ.

Конференцие Чӑваш наци музейӗн пӗрремӗш директорне Михаил Петров-Тинехпие асра тытса ят панӑ.

Кӑҫалхи форума Тӑван ҫӗршывӑн хӳтӗлевҫин ҫулталӑкне, Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитнине тата Чӑваш Енри Ҫар мухтавӗн музейӗ 25 ҫул тултарнине халалланӑ.

Чӑваш Енӗн Культура министерстви халӑх тетелӗнче вырнаҫтарнӑ видеоран илнӗ скриншот

Чӑваш Енри маттур ачасем республика шайӗнче кӑҫалхипе виҫҫӗмӗш хут иртекен «Асам» фестивале хутшӑнма хатӗрленеҫҫӗ.

Республикӑри шкул театрӗсен конкурсӗнче ачасем сцена ҫине хӑйсем лартнӑ ӗҫсемпе тухӗҫ. Малтан вӗсене муниципалитет шайӗнче пахалӗҫ. Муниципалитет шайӗнчи конкурс юпа уйӑхӗн 14-мӗшӗччен пырӗ. Унта суйласа илнисем республикӑри фестивале хутшӑнӗҫ.

Сӑмах май каласан, кӑҫалхи фестиваль теми — Тӑван ҫӗршывӑн хӳтӗлевҫин ҫулталӑкӗ тата Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитни.

Камсем ҫӗнтернине раштав уйӑхӗн 5-мӗшӗнче пӗлтерӗҫ.

tass.ru сайтри сӑн

Чӑваш Енри 10 студент уйӑхсерен 10-шар пин тенкӗ илсе тӑрӗ. Ку тӳлеве тӑваттӑмӗш курсра вӗренекен ҫамрӑксем тивӗҫнӗ. Ӑна вӗсене вӗренӳ ҫулӗ тӑршшӗпех тӳлесе тӑрӗҫ.

Ҫак тӳлеве тивӗҫнисен йышне Ҫӗрпӳри аграрипе технологи техникумӗнчи Антон Антоновпа Никита Огурцов, Н.В.Никольский ячӗллӗ професси колледжӗнче пӗлӳ пухакан Анастасия Борзовӑпа Злата Иванова, Ҫӗнӗ Шупашкарти химипе механика техникумӗн студенчӗсем Илья Ельмовпа Евгений Медведев, Шупашкарти электромеханика колледжӗнче вӗренекен Денис Васильев, Шупашкарти строительство техникумӗн студентки Анна Гарифуллина, Шупашкарти экономикӑпа технологи колледжӗнче вӗренекен Вероника Кузьмина, Канашри транспортпа энергетика техникумӗнче ӑс пухакан Маргарита Фадеева лекнӗ.

ШӖМ тунӑ сӑн

Шупашкарта пурӑнакан 64-ри хӗрарӑм ултавҫӑсене 14 миллион тенкӗ куҫарса панӑ.

Ун патне палламан ҫын шӑнкӑравласа ӑна патшалӑх пулӑшӑвӗ илме сӗннӗ. Хӗрарӑм ӑна ӗненсе СМС-па килнӗ кода пӗлтернӗ. Кун хыҫҫӑн ултавҫӑсем «Госуслуги» портала ун ячӗпе кӗнӗ.

Унтан пулӑшу службин «ӗҫченӗсенчен» пӑтӑрмаха пӗтермелли инструкцисем килме пуҫланӑ. Вӗсем каласа пынине пурнӑҫласа хӗрарӑм пухнӑ пӗтӗм укҫине – 14 млн тенке – счечӗ ҫинчен илнӗ. Банк ӗҫченӗсем ӑна ултавҫӑсенчен сыхланма, укҫана счет ҫинчех хӑварма ӳкӗтленӗ пулсан та итлемен. Ҫав вӑхӑтра хӗрарӑмӑн тӑванӗсем те юнашарах пулнӑ.

forum.na-svyazi.ru видеоран илнӗ сӑнӳкерчӗк

Чӑваш Енри йӗрке хуралҫисем каччӑна пуҫпа ҫапнӑ пӑтӑрмаха тӗрӗслеҫҫӗ.

Юпа уйӑхӗн 3-мӗшӗнче Ҫӗнӗ Шупашкарти Винокуров урамӗнчи ҫуртсенчен пӗрин картишӗнче пӗр арҫын хирӗҫ пыракан каччӑ патне утса пырса ӑна пуҫӗпе ҫапнӑ. Кайран вӑл ним пулмн пекех лавккана кӗрсе кайнӑ.

Пӑтӑрмаха курнисем йӗрке хуралҫисене пӗлтернӗ. Арҫынна пакунлисем тытса чарнӑ. Вӑл 46-ри арҫын иккен.