ҪҪХПИ тунӑ сӑн

Паян Ҫӗнӗ Шупашкарта Электросамокатпа ярӑннӑ арҫын ача машина айне лекнӗ.

Малтанлӑха палӑртнӑ тӑрӑх, аварире автомашина водителӗ айӑплӑ. Руль умӗнче 33 ҫулти арҫын ларнӑ.

Вӑл Ҫӗнӗ Шупашкарти Пионерсен урамӗнче пынӑ чухне электросамокатпа пынӑ 11 ҫулти арҫын ачана асӑрхаман – ун ҫине пырса кӗнӗ. Аманнӑ ачана Шупашкара Республикӑри ача-пӑча клиника больницине илсе кайнӑ.

Чӑваш Енри блогерсем Пӗтӗм Раҫҫейри «ТопБЛОГ» проект финалне лекнӗ. Халӗ унта хутшӑнма хатӗрленӗҫҫӗ – вӑл юпа уйӑхӗн 22-24-мӗшӗсенче Калининград облаҫӗнче иртӗ.

Финала пӗтӗмпе 150 ҫын лекнӗ. Ҫак йышра пирӗн ентешсем те — Наталия Матвеева тата Екатерина Владимирова. Наталия – педагог тата психолог, Канашри шкулта биологи предметне вӗрентет. Унӑн соцсетьри страницине 12 пин ытла ҫын ҫырӑннӑ. Екатерина та педагогика енӗпе ӗҫлет – хӑйӗн блогӗнче ҫамрӑк учительсене пулӑшасси, культура эткерлӗхне упрасси пирки каласа кӑтартать.

forum.na-svyazi.ru сайтран илнӗ сӑнӳкерчӗк

Ӗнер, юпа уйӑхӗн 7-мӗшӗнче, хӑй вӑхӑтӗнче Шупашкарти электроаппаратура завочӗн гендиректорӗнче ӗҫленӗ Алексей Ильбеков вилнӗ. Вӑл хӗрӗх ҫулта ҫеҫ пулнӑ.

Мускаври автотранспорт институтӗнче вӗреннӗ. Хӑйӗн карьерине Шупашкарти агргат заводӗнче токарьтен пуҫланӑ. 10 ҫул хушшинче вӑл производство пуҫлӑхне ҫитнӗ. Кайран «Трактор заводчӗсем» концернта, «Сарэкс», «Четра – Промышленные машины» заводсенче ӗҫленӗ. 2021-2023 ҫулсенче вӑл электроаппаратура завочӗн гендиректорӗ пулнӑ. Ытти вырӑнта та пысӑк должноҫсенче тӑрӑшнӑ. Юлашки вӑхӑтра «ВНИИР-Прогресс» обществӑн гендиректорӗн ҫумӗ пулнӑ.

cheb сӑнӳкерчӗкӗ

Шупашкарти 1-мӗш клиника пульницинче пӗр каҫхине арҫын вӑрҫма тапранса кайнӑ. Сывлӑх сиплев учрежденийӗнчи пакунлисене систерекен кнопка ӗҫлесе кайсан вырӑна Росгварди ӗҫченӗсем пырса ҫитнӗ.

Юпа уйӑхӗн 5-мӗшӗнчи ирхи 3 сехетре пулса иртнӗ пӑтӑрмаха чарма пырса ҫитсен те арҫын лӑпланман, вӑл пульницӑри хуралҫӑна ҫапнӑ.

Харкашакан-ҫапӑҫакан арҫынна йӗрке хуралҫисем полици уйрӑмне илсе кайнӑ.

Вера Иванова сӑнӳкерчӗкӗ

Шупашкар хулинче пурӑнакан Аблесовсен ҫемйинче икӗ йӗкӗреш. Аслисем, ывӑлсем, самай ӳснӗ ӗнтӗ, вӗсем вунӑ ҫулта. Ҫулталӑк каялла ҫуралнӑ хӗр пӗрчисем те вӑй илсе пыраҫҫӗ.

Паян ҫемье Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрти Прокат пунктне пынӑ. Унта вӗсем йӗкӗрешсене лартса урама уҫӑлма илсе тухма меллӗ кӳме, ачасене апатлантармалли икӗ сӗтел тата шӑпӑрлансене аталанма пулӑшакан икӗ тетте вӑхӑтлӑха усӑ курма илнӗ.

«Кун пек прокат пункчӗ пурри питех те аван. Туянма туянӑн-ха, анчах кайран ӑҫта хумалла тесе пуҫ ватмалла. Кун пек килетӗн те ачасем кӑшт ӳссен япаласене каялла килсе паратӑн», — хавхаланса тав тунӑ кил хуҫи Пётр Васильевич.

Прокат пункчӗ хулари Стрелоксен 324-мӗш ҫуртӗнчи 21А ҫуртра вырнаҫнӑ. Ыйтса пӗлмелли телефон номерӗ: 51-02-68.

«Контактри» сӑн

Ҫӗмӗрлесен — кӑмӑллӑ хыпар. Хулари медицина центрне ҫамрӑк специалистсем ӗҫлеме килнӗ.

Вӗсем — Татьяна Фондеркина терапевт тата Татьяна Ушкова медсестра. Ҫамрӑк тухтӑрсем 13-мӗш терапи участокӗнче ӗҫлеме пуҫланӑ.

Татьяна Фондеркина — Хӗрлӗ Чутай районӗнчен. Кӑҫал вӑл И.Н.Ульянов ячӗллӗ Чӑваш патшалӑх университечӗн медицина факультетӗнчен вӗренсе тухнӑ.

Татьяна Ушкова вара — Ҫӗмӗрлеренех. Вӑл Шупашкарти медицина колледжӗнче тӗллевлӗ ӑс пухнӑ. Татьяна кӑҫал диплом илнӗ, кун хыҫҫӑнах Ҫӗмӗрлене ӗҫлеме таврӑннӑ.

"Чувашский край" паблкра вырнаҫтарнӑ сӑнӳкерчӗк

Смоленск облаҫӗнче «Лучший по профессии» (чӑв. Профессире чи лайӑххи) пӗтӗм Раҫҫейри конкурса пӗтӗмлетнӗ. Ҫӗнтерӳҫӗсен шутӗнче пирӗн ентешӗмӗр те пур.

Вӑл — «Шупашкарти агрегат завочӗ» промышленность компанийӗнче ӗҫлекен Сергей Анисимов. «Слесарь-инструментальщик» номинацире вӑл виҫҫӗмӗш вырӑн йышӑннӑ. Уншӑн ӑна 300 пин тенкӗ преми парса хавхалантарнӑ.

Чӑваш Ен ПТРК видеовӗнчен илнӗ скриншот

Елчӗкре Афалек Энтепе ( Олег Фёдорович Андреев) сӑвӑҫӑн асӑну каҫӗ иртнӗ. Вӑл пурӑннӑ пулсан 75 ҫул тултаратчӗ иккен. Мероприятие Елчӗкри вулавӑшра ирттернӗ.

«Пиртен пилӗк ҫул каялла уйрӑлса кайнӑ поэтӑн ячӗ, шел пулин те, республикипе янраса тӑракан ят мар: ӑна нумайӑшӗ пӗлмеҫҫӗ ҫав... Анчах вӑл питӗ ҫепӗҫ лирик, пултаруллӑ сӑвӑҫӑн чӗлхи илемлӗ. Вулама сӗнетӗп», — тесе ӑшшӑн хыпарланӑ мероприятире пулса курнӑ Марина Карягина халӑх тетелӗнчи хӑйӗн страницинче.

Афалек Энтепе вӗрентекен пулнӑ май Аслӑ Пӑла Тимеш вӑтам шкулӗнче хими, Энтепере нимӗҫ чӗлхипе чӑваш литератури вӗрентнӗ. Шкул директорӗнче те ӗҫленӗ, комсомолта та тимленӗ, парти райкомӗн секретарӗ те пулнӑ. Сӑвӑҫ чунӗллӗскер вара чунне ҫав енӗпе уҫнӑ.

cap.ru сайтри сӑн

Паян Ҫӗрпӳ муниципалитет округӗн пуҫлӑхне Алексей Иванова тытса чарнӑ. Ӑна УК-н 285-мӗш статйин 2-мӗш пайӗпе (должноҫпе усӑ курнӑшӑн) тата 289-мӗш статйипе (усламҫӑ ӗҫӗпе саккунсӑр майпа хӑтланнӑшӑн) килӗшӳллӗн айӑпласшӑн. Куншӑн тӗрмене 7 ҫул таран хупма пултараҫҫӗ.

Палӑртмалла: 35-ри Алексей Иванов Ҫӗрпӳ округне 2022 ҫулхи раштавран ертсе пырать. Унччен Шупашкар районӗнчи Лапсар ял тӑрӑхӗн пуҫлӑхӗ тата Шупашкар район администрацийӗн пуҫлӑхӗн ҫумӗ пулнӑ.

topdent.ru сайтри сӑн

Шупашкарти 21 ҫулти медсестра ултавҫӑсене пӗр кунра 1,2 млн тенкӗ куҫарса панӑ.

Ун патне палламан арҫын шӑнкӑравланӑ. «Ҫыхӑну операторӗ» иккен вӑл. Хайхискер хӗре пӗр тӑхтамасӑр сим-карта килӗшӗвне малалла тӑсма хушнӑ. Медсестра СМС-па килнӗ кода пӗлтернӗ. Кун хыҫҫӑн тин ултавҫӑ аллине лекнине ӑнланнӑ, «Госуслуги» порталти пароле часрах улӑштарнӑ.

Анчах ултавҫӑ та ҫывӑрман. Хӗрӗн аккаунтне такам кӗни пирки уведомлени килнӗ, ҫавӑнтах ку ыйтӑва татса памашкӑн шӑнкӑравламалли номер пулнӑ.

Хӗр ҫав номерпе шӑнкӑравланӑ. Палламан ҫын хӑйӗнпе «патшалӑх службин ӗҫченӗ» тесе паллаштарнӑ, укҫана ӑҫта куҫармаллине каласа пынӑ. Ку мел нухрата упраса хӑварма пулӑшӗ-мӗн. Ҫапла хӗр картта, кредит картти ҫинчи тата пухнӑ укҫине йӑлтах куҫарса панӑ.