forum.zarulem.ws сӑнӳкерчӗкӗ

Шупашкарта ҫу уйӑхӗн 1-мӗшӗнче Лексус икӗ автомобиль ҫине пырса кӗнӗ.

Асӑннӑ машина «Лента» суту-илӳ ҫурчӗ енчен «Шупашкар» универмаг енне ҫул тытнӑ чухне «53-мӗш шкул» патӗнче ҫула май пыракан икӗ ҫӑмӑл машинӑпа пырса ҫапӑннӑ. «VW Polo» тата «Opel Astra» машинӑсем сиенленнӗ. Унтан кроссовер ҫул варринчи тимӗр карта ҫине пырса кӗрсе чутах ҫаврӑнса ӳкмен. Апла пулин те вӑл малалла васканӑ.

"Контактри" сӑн

Паян Мускавра юр ҫуса лартнӑ. Синоптиксем кун пек вӑйлӑ юр юлашки 116 ҫулта рекорд пулнине палӑртнӑ.

Йывӑҫсем тӳннӗ, юпасем те ӳккеленӗ. Вӗсене пула машинӑсемпе ҫуртсем сиенленнӗ.

Сӑмах май, пӗлтӗр ҫу уйӑхӗн пуҫламӑшӗнче Чӑваш Республикинче те юр ҫунӑччӗ. 2003 ҫулхи ҫӗртмен 4-мӗшӗнче Шупашкарта юр ҫуса лартнӑччӗ. Ун чухне симӗс ҫулҫӑллӑ йывӑҫсем юр йывӑрӑшне чӑтаймасӑр тӳнӗччӗ.

Кӑҫал ҫу уйӑхӗн пуҫламӑшӗнчи кунсем питех ӑшӑ килмерӗҫ. Малалла мӗнле пулӗ? Синоптиксем мӗн калаҫҫӗ?

Ҫу уйӑхӗн иккӗмӗш тата виҫҫӗмӗш декадисенче типӗ те ӑшӑ ҫанталӑк тӑрӗ. Уйӑхӑн иккӗмӗш ҫурринче Шупашкарта сывлӑш 18-23 градус таран ӑшӑнӗ, хӑш-пӗр кунра – 25 градус таранах. Малтанлӑха пӗлтернӗ тӑрӑх, ҫу уйӑхӗн 25-мӗшӗнче аслатиллӗ шалкӑм ҫумӑр ҫума пултарать.

Иртнӗ уйӑхра Чӑваш кӗнеке издательствинче чаваш халӑх поэчӗн Ухсай Яккӑвӗн «Ҫырнисен пуххин» черетлӗ 8-мӗш томӗ кун ҫути курнӑ.

«Тӗрлӗрен» тесе ят панӑ кӑларӑма поэтӑн «Акӑшкӳл» поэмине, тӗрлӗ ҫулсенче хаҫат-журналта пичетленнӗ статйисемпе очеркӗсене, пичетленмен алҫырӑвӗсене кӗртнӗ.

«Пӗр кӗнекене, паллах, пӗтӗм статйи-очеркне вырнаҫтарма ҫук, ҫавӑнпа та халиччен хаҫат-журналта пичетленнисен ячӗсене список туса панӑ. Ҫавӑн пекех уйрӑм кӑларӑмсемпе тухнӑ тата хаҫат-журналта, сборниксенче кун ҫути курнӑ хайлавсен списокӗсем пур», — хыпарланӑ кӗнеке издательствинче.

Кӗнекене поэт хӗрӗ О. Я. Ухсай пухса хатӗрленӗ.

21.мвд.рф сайтри сӑнӳкерчӗк

Шупашкар хулинче пурӑнакансем хӑш-пӗр автомобилист хӑйӗн машинине Ҫӗнтерӗве 40 ҫул скверӗнче лартма юратнине асӑрханӑ. Хастарсем кун пирки ҫул-йӗр инспекторӗсене систернӗ.

Пакунлисем тӗрӗслеме вырӑна пырса ҫитнӗ. Темиҫе машинӑна Тӑван ҫӗршывӑн аслӑ вӑрҫинче пуҫ хунисене асӑнса лартнӑ мемориалпа юнашар тротуар ҫине лартса тухнине йӗрке хуралҫисем хӑйсен куҫӗпе хӑйсем курнӑ.

4 водитель тӗлӗшпе административлӑ протокол шӑрҫаланӑ май вӗсене пиншер тенкӗ штраф тӳлеттерӗҫ.

culture.cap.ru сӑнӳкерчӗкӗ

Ҫу уйӑхӗн 15-мӗшӗнче Шупашкарти Ф.П.Павлов ячӗллӗ музыка училищинче паллӑ совет тата Раҫҫей композиторне, пианистне, педагогне, СССР халӑх артистне Андрей Эшпая халалласа концерт иртӗ. Вӑл ҫуралнӑранпа 100 ҫул ҫитнӗ.

Андрей Эшпай Чӑваш Ене хӑйӗн иккӗмӗш тӑван ҫӗршывӗ тесе каланӑ. Унӑн амӑшӗ, Александр Тогаев чӑваш композиторӗн тӑванӗн хӗрӗ, Шупашкар районӗнчи Шемшер ялӗнче ҫуралнӑ. Унӑн ашшӗ — ҫармӑссен профессиллӗ пӗрремӗш композиторӗ. Вӑл фольклор пухнӑ. Ҫемье Степан Максимов чӑваш композиторӗпе туслӑ пулнӑ.

Пӗчӗк Андрей кашни ҫуллах Сӗнтӗрвӑррине Тогаевсем патӗнче пурӑннӑ. Унта Родион Щедрин тата Ростислав Бойко композиторсем те пӗрре ҫеҫ мар хӑнана килсе ҫӳренӗ.

culture.cap.ru сӑнӳкерчӗкӗ

Чӑваш Енри чи ҫамрӑк театр – Сӑнавлӑ театр. Ака уйӑхӗн 30-мӗшӗнче вӑл хӑйӗн 30 ҫулхине уявланӑ. Коллектива ҫав ятпа саламлама асӑннӑ коллективра ӗҫленисем, ытти культура учрежденийӗнче тӑрӑшакансем пырса ҫитнӗ.

Тӳрӗ-шараран театра саламлама республикӑн Культура министрӗн ҫумӗ Татьяна Казакова пырса ҫитнӗ.

Театрӑн директорӗ – Дмитрий Капустин.

​

Шупашкарта пурӑнакан Антон Лаврентьев «Артек» уйлӑхри «Ҫӗр – пирӗн пӗрлехи кил» пӗтӗм тӗнчери сменӑра Чӑваш Ен культурипе паллаштарнӑ. Унӑн чӑвашла тӗрленӗ ӗҫӗсем «Суук-Су» керменти экспозицие илем кӳнӗ.

Палӑртмалла: Антон 11 ҫултанпа тӗрлет, ку ӑсталӑх пирки вӑл хаваспах каласа кӑтартать.

ШӖМ тунӑ сӑн

Ултавҫӑсене 215 пин тенкӗ куҫарса панӑ, вӗсен умӗнче ҫаппа-ҫарамас калаҫнӑ, килти чӳрече каррисене ҫунтарса янӑ. Ҫакӑ йӑлтах Шупашкарта вӗренекен студенкӑпа пулса иртнӗ.

Вӑл палламан ҫын шӑнкӑравласан ярса панӑ каҫӑ ҫине пусса «Госуслуги» портала кӗнӗ. Палламан ҫын ҫыхӑнурах пулнӑ. Хӗр «Украина» сӑмаха илтсен хӑраса кайнӑ та телефона сӳнтернӗ.

Кайран ун патне смс килнӗ: ун ячӗпе портала кӗреҫҫӗ-мӗн, «техпулӑшу» номерӗсене те ярса панӑ. Вӑл пӗринпе шӑнкӑравланӑ. Палламан ҫын, банк ӗҫченӗ тенӗскер, хӗре хӑратса пӗтернӗ: урӑх ҫӗршыва укҫа куҫарнӑшӑн ӑна тӗрмене нумай ҫуллӑха хупаҫҫӗ-мӗн. Студентка пухнӑ укҫине тата кредит илсе палламан ҫынна куҫарса панӑ. Кайран ӑна верификаци тума хушнӑ. Кун валли хывӑнмалла-мӗн, видеоҫыхӑнупа калаҫса сӑвӑ вуламалла. Тӗрӗслеве вӗҫлеме хваттерти чӳрече каррисене чӗртсе яма хушнӑ. Ҫулӑм тухсан тин вӑл тӑна кӗнӗ, пушара сӳнтерсе полицие кайнӑ.

"Контактри" сӑн

Патӑрьел муниципалитет округӗнчи аграрисем ҫӗрулми лартма тухнӑ. Кӑҫал вӗсем, пӗлтӗрхипе танлаштарсан, ку ӗҫе виҫӗ эрне маларах пуҫӑннӑ.

Округри «Хӗрлӗ знамя» ЯХПК ака уйӑхӗн 25-мӗшӗнче, пӗрремӗш кунхине, палӑртнӑ 100 гектартан 10 гектар ҫӗрулми лартнӑ.

Палӑртса хӑварар: Патӑрьел округӗнче пӗтӗмпе 535 гектар «иккӗмӗш ҫӑкӑр» лартма палӑртнӑ.