Чӑваш Ене Чукоткӑран хӑнана килнӗ хӗрарӑм миллион ҫурӑ тенкӗсӗр тӑрса юлнӑ.

71 ҫулти пенсионера таванӗсем улталаман-ха. Мессенджерсенчен пӗринче ун патне шӑнкӑравласа вӑл ӗҫленӗ предприятире тӗрӗслев ирттернӗ те вӑл халӗ те унта ӗҫленине кӑтартакан суя хутсем тупса палӑртнӑ тесе пӗлтернӗ. Ку ӗҫе Федерацин хӑрушсӑрлӑх служби ӗҫченӗсем те тӗрӗслеҫҫӗ тесе ӗнентернӗ. Унсӑр пуҫне Украина ҫынни ун ячӗпе кредит илнӗ, хӑвӑрт кӑна хупмалла тесе хӑратнӑ.

Ултавҫӑсене ӗненсе хӗрарӑм 1,5 миллион тенке ултавҫӑсем каланӑ «хӑрушсӑр» счёт ҫине тесе ӗненнипе ултавҫӑсене куҫарса панӑ.

Хӑҫан ҫуллахи ӑшӑ таврӑнать? Синоптиксем пӗлтернӗ тӑрӑх, тунтикунпа ытларикун уяр ҫанталӑк тӑрӗ. Паян ҫил ҫурҫӗртен вӗрет, ыран кӑнтӑр енчен пулӗ, ҫавна май хӗвел ҫинче 25-30 градус ӑшӑ туйӑнӗ.

Юнкун вырӑнӑн-вырӑнӑн ҫумӑр ҫӑвӗ, аслати авӑтма пултарӗ, ҫил вӑланӗ. Кӗҫнерникун та ҫумӑрсӑр пулмӗ. Эрнекун вара ҫумӑр вӑйлах ҫӑвӗ. Канмалли кунсенче 13-18 градус ӑшӑ пулӗ. Ҫумӑр ҫӑвас хӑрушлӑх ҫук.

Малтанлӑха пӗлтернӗ тӑрӑх, ҫитес эрнере ҫанталӑк ӑшӑтма тытӑнӗ. Июлӗн иккӗмӗш ҫурринче шӑрӑх хуҫаланӗ.

t.me/nikamran каналтан илнӗ сӑнӳкерчӗк

Чӑваш Енре ОЗОН компанин сортировка пункчӗ уҫӑлма пултарать. Ку хыпара Телеграмри «Пруинчен малтан» каналта пелтерне.

Унта хыпарланӑ тӑрӑх, Чӑваш Ен делегацийӗ ку ыйтӑва «Озон Холдинг» представителӗсемпе Санкт-Петербургра иртекен экономика форумӗнче сӳтсе явнӑ.

Пункта республикӑн кӑнтӑр енчи районӗсенчен пӗринче хута ярасшӑн.

culture.cap.ru сӑнӳкерчӗкӗ

Иртнӗ эрнере Чӑваш патшалӑх симфони капелли черетлӗ сезона хупнӑ.

Концерт вырӑс музыкин паллӑ композиторӗсен хайлавӗсенчен тӑнӑ. Глинка романтизмӗнчен пуҫласа Гаврилин таранах. Ҫав каҫхи премьера вара Александр Островскийӗн «Женитьба Бальзаминова» камичӗ тӑрӑх лартнӑ балет валли Валерий Гаврилин ҫырнӑ музыка.

Аса илтерер: капеллӑн тӗп дирижерӗ – Наталья Яклашкина. Илемлех ертӳҫи тата дирижерӗ – Морис Яклашкин.

culture.cap.ru сӑнӳкерчӗкӗ

Иртнӗ эрнере Чӑваш патшалӑх академи драма театрӗнче Мордва Республикин тава тивӗҫлӗ писателӗн (ун пек ят та пур иккен) Валентина Мишанинан «Куйкӑрӑш» мистикӑллӑ драмине кӑтартнӑ.

Спектакль режиссёрӗ – Раҫҫейӗн, Азербайджанӑн, Калмӑк тата Тува республикисен тава тивӗҫлӗ ӳнер ӗҫченӗ, Чӑваш Енӗн патшалӑх премийӗн лауреачӗ Борис Манджиев.

Сценографипе Мария Шуплецова художник-постановщик тата ҫутӑ художникӗ Михаил Добрышин ӗҫленӗ. Композиторӗ – Калмӑк Республикин искусствӑсен тава тивӗҫлӗ ӗҫченӗ Аркадий Манджиев. Ташшисене Пушкӑртстанӑн тава тивӗҫлӗ ӗҫченӗ Рамиза Мухаметшина лартнӑ.

https://cheb-centr.soc.cap.ru/ сӑнӳкерчӗкӗ

Шупашкарта пурӑнакан ватӑсем пенсие тухса ҫӗнӗ ӑсталаха та ним мар алла илме пултараҫҫӗ. Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта вӗсене ҫӗвӗҫ пулма та хӑнӑхтараҫҫӗ.

«Манӑн социаллӑ центр» клубра пырса ҫӳрекен 68 ҫулти Татьяна Панфилова хӑйне валли халат ҫӗлесе тӑхӑннӑ. Ку ӑсталӑха ӑна центрти ӗҫ инструкторӗ Ирина Ковеза хӑнӑхтарнӑ.

Татьяна Викторовна каласа кӑтартнӑ тӑрӑх, унччен ҫӗвӗ ӗҫӗпе аппаланса курман. «Хӑрамасан тата юнашар ылтӑн алӑлла ӑста пулсан тем те вӗренме пулать иккен», - хавхаланса каласа кӑтартнӑ ҫитмӗл ҫула ҫывхарса пыракан хӗрарӑм.

«Контактри» сӑн

Пенза облаҫӗнчи Неверкино районӗнчи Бикмурзино ялӗнче «Шурӑ ту» патӗнче чӑваш таврпӗлӳҫисен слечӗ иртнӗ. Ӑна Зинаида Чайко, Олег Жемчугов тата ял ҫыннисем тӑрӑшнипе йӗркеленӗ. Ялти чӑвашсем хӑйсен культурипе йӑли-йӗркине упрама тӑрӑшаҫҫӗ.

Слета Тольяттири, Чӗмпӗрти тата Шупашкарти таврапӗлӳҫӗсем килнӗ. Вырӑнти таврапӗлӳҫӗ Михаил Щербаков «Илемь» туризм сукмакӗпе ертсе кайса ҫак вырӑн пирки каласа кӑтартнӑ. Слета пухӑннисем вырӑнти ватӑ ҫынсемпе калаҫнӑ, ӗлӗкхи йӑла-йӗрке пирки материал пухнӑ. Ҫав вӑхӑтрах ӗлӗкхи юрӑсене юрланӑ.

Слет апатланупа вӗҫленнӗ. Сӗтел ҫинче чӑваш наци ҫимӗҫӗсем кӑна пулнӑ: салма яшки, 7 кӗрперен пӗҫернӗ пӑтӑ, хуплу, чӑкӑт, килте вӗретнӗ сӑра.

cap.ru сӑнӳкерчӗкӗ

ЧР вӗренӳ министрӗн пӗрремӗш ҫумӗ пулнӑ Антонина Буданцова Шупашкарти 4-мӗш гимназие ертсе пыма тытӑннӑ. Вӑл министр ҫумӗнче 2024 ҫулхи кӑрлачран пуҫласа кӑҫалхи ҫу уйӑхӗччен ӗҫленӗ.

Гимназире вара унччен унта физкультура учителӗнче ӗҫленӗ ҫын директор пулнӑ. Вӑл должноҫрен кайнӑ. Ун умӗн вара чылай вӑхӑт, 2022 ҫулхи авӑн уйӑхӗнченпе, директор тупайман.

ria.ru сайтри сӑн

Паян ир-ирех Калининградри аэропортра Шупашкартан вӗҫсе килнӗ пӗрремӗш самолет пассажирӗсене ҫӑкӑр-тӑварпа, чӑваш юррипе кӗтсе илнӗ.

Самолет Шупашкартан ҫӗрле 23:50 сехетре рейса тухнӑ. Тепӗр 2 сехет те 5 минутран Храброво аэропортӗне анса ларнӑ.

Вӑхӑт ир еннелле кӑна сулӑннине пӑхмасӑр Чӑваш Енри пассажирсене «Балтийские чуваши» пултарулӑх ушкӑнӗ кӗтсе илнӗ.

Палӑртса хӑварар: рейса «Аэрофлот» компани пурнӑҫлать.

ru.wikipedia.org сайтри сӑн

Чӑваш Енре сайра тӗл пулакан кайӑка, хура грифа, асӑрханӑ. Юлашки хут ӑна пирӗн тӑрӑхра 100 ҫул каялла курнӑ.

Хура гриф ҫӑткӑн кайӑк шутланать.Вӑл Раҫҫейре ытларах кӑнтӑрти регионсенче тӗл пулать. Хальхи вӑхӑтра пирӗн ҫӗршывра 150-200 кӑна хура гриф юлнӑ.