vk.com/dramteatr21 сӑнӳкерчӗкӗ

Чӑваш патшалӑх академи драма театрӗ режиссёра пулӑшакан ӗҫе илессине пӗлтерет.

Режиссёр ассистенчӗн йӗркелу ӗҫӗпе аппаланмалла, унӑн опыт пулмасан та тем мар. Анчах ҫав ҫыннӑн ӗҫе йӗркелеме пӗлмелле, пултарулӑх коллективӗпе пӗр чӗлхе тупма ӑста пулмалла, тимлӗх кирлӗ.

Ассистентӑн репетици планне йӗркелеме хутшӑнмалла, расписанире пулса иртекен улшӑнусене сӑнасах тӑмалла, репетицисене сиктермелле мар, спектакльсемпе концертсем лартнӑ чух яваплӑ пулмалла, тӗп режиссёр хушнине пурнӑҫламалла.

"Контактри" сӑн

Мускав ҫывӑхӗнчи Одинцово хулинче СССР спорт мастерӗн Артур Аветисяна халалласа каратэ енӗпе анлӑ турнир иртнӗ. Унта Раҫҫейри 42 регионти 2200 ытла спортсмен хутшӑннӑ.

Чӑваш Енри спортсменсем те вӑй виҫнӗ. Ку кӑна мар, лайӑх кӑтартусемпе те палӑрнӑ. Владимир Шурманов, Георгий Яковлев тата Кирилл Исайкин хӑйсен ӳсӗмӗнчи спортсменсемпе тупӑшса ылтӑн медаль ҫӗнсе илнӗ. Иван Белов тата Руслан Самарин кӗмӗл медальлӗ пулнӑ. Анна Яковлева пӑхӑр медале тивӗҫнӗ. Ксения Никитина 18-20 ҫулсенчи спортсменсен хушшинче чи лайӑххи пулнӑ.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта ӗнер Ҫӑварни уявне ирттернӗ. Вӑл Стрелоксен 324-мӗш дивизийӗнче вырнаҫнӑ «Манӑн социаллӑ центр» клубра иртнӗ. Мероприятие Екатерина Ворошилова тата Оксана Николаева специалистсем хатӗрленӗ.

Ҫӑварние пуҫтарӑннисем сӗтел тулли апат-ҫимӗҫ хатӗрленӗ. Тутлӑ икерчӗпе, ытти апат-ҫимӗҫпе сайланнипех ҫырлахман, тӗрлӗ вӑйӑ ирттернӗ, чӑвашла юрласа та ташласа савӑннӑ.

«Паянхи уярра эпӗ ҫамрӑк чухнехи Ҫӑварние аса илтӗм. Чӑвашла юрӑсем шарантарса чуна йӑпатрӑмӑр», — тенӗ тава тивӗҫлӗ канури Галина Деомидова.

"Контактри" сӑн

Йӗпреҫ округӗнчи Хурамал ялӗнче ҫӗнӗ клуб хута яраҫҫӗ. Ку ӗҫе Канашри «Строитель» тулли мар общество строителӗсем пурнӑҫлаҫҫӗ.

Хальхи вӑхӑтра стенана хӑпартаҫҫӗ, пушар резервуарӗсене тӑваҫҫӗ, канализаци юхса тухмалли вырӑна, таса шыв резервуарне хатӗрлеҫҫӗ. Подрядчик культура ҫурчӗ таврашӗнчи территорие те хӑтлӑлатӗ.

Клубра 150 ҫын валли вырӑн, сцена, артистсен пӳлӗмӗ, вестюбель-фойе, гардероб тата унта ӗҫлекенсен пӳлӗмӗсем пулӗҫ.

"Контактри" сӑн

73 ҫулти Федор Конюхов кимӗпе тӗнче курса ҫӳрет. Унӑн кимми пирӗн патри «Хӗвел» кӑларнӑ хӗвел батарейисемпе ӗҫлет. Вӗсем унта – энерги паракан пӗртер-пӗр ҫӑлкуҫ, электроникӑна, ҫав шутра навигаци тытӑмне те, ӗҫлеме май параҫҫӗ.

Федор тӳрех икӗ океана парӑнтарасшӑн: Атлантика тата Инди. Ҫапла вӑл Кӑнтӑр Америкӑран Автралие ҫитесшӗн. Унӑн Хӗвелтухӑҫ Австралинчи Люин хысак таран ҫитме тата 4200 тинӗс милӗ юлнӑ.

"Про Город" тунӑ сӑн

Муркаш округӗнчи чӑваш халӑх ӑсти Петр Мазуркин йывҫӑран темӗн те пӗр ӑсталать: савӑт-сапаран пуҫласа музыка инструменчӗсем таранах. Хальччен вӑл 2 пин ытла япала тунӑ.

Хӑй каланӑ тӑрӑх, вӑл яланах йывӑҫран савӑт-сапа касса кӑларма юратнӑ. Ҫапла пуҫланса кайнӑ та унӑн ӗҫӗ. Сӑмах май, унӑн япалисем 100 пин тенкӗ таран тӑраҫҫӗ.

Мӑшӑрӗ Зинаида халӑх костюмӗсене ҫӗлет, пуканесем ӑсталать, тӗрлет. Халӗ вӗсем М-7 ҫул хӗрринче «Мазуркинсен вернисажне» тытса пыраҫҫӗ, экскурсисем, ачасемпе занятисем ирттереҫҫӗ.

К.В. Иванов ячӗллӗ Чӑваш патшалӑх академи драма театрӗ Пӗтӗм тӗнчери хӗрарӑмсен кунне уявлама чӗнет. Пуш уйӑхӗн 8-мӗшӗнче унта «Ҫурхи кулӑш миххи» спектакль-концерт иртӗ.

«Кулленхи ӗҫсене хӑварса кӑмӑл-туйӑмпа илем тӗнчине путӑр. Сирӗн юратнӑ артистсем сцена ҫине илемлӗ юрӑ-ташӑпа, шӳтлӗ халапсемпе тухӗҫ. Кашни юрӑ, кашни ташӑ, кашни ӑшӑ сӑмах ҫак концертра йӑлт сире валли пулӗ», — тесе йыхравланӑ анонсра.

Концерт хыҫҫӑн парнепе савӑнтарма шантараҫҫӗ.

t.me/chuvashia_sledcome сӑнӳкерчӗкӗ

Шупашкарта пурӑнакан пӗр арҫын пӗрле пурӑнакан хӗрарӑма виҫӗ кун хӗненӗ. Чарӑнмасӑр мар пулӗ те.

Ӳсӗрскер хӗрарӑма кӑҫалхи нарӑс уйӑхӗн 17-19-мӗшӗсенче хӗненӗ. Нарӑс уйӑхӗн 20-мӗшӗнче хӗрарӑм куҫне ӗмӗрлӗхе хупнӑ.

Арҫын тӗлӗшпе РФ Пуҫиле кодексӗн 111-мӗш статйин 4-мӗш пайӗпе пуҫиле ӗҫ пуҫарнӑ.

❗️«Варкӑш» литература клубӗнче Олеся Михайловӑн кӗнекине пахаланӑ

«Варкӑш» литература клубӗнче Олеся Михайловӑн «Пӗрремӗш ҫӗнтерӳ» кӗнекине хӑтланӑ. Вӑл – унӑн пӗрремӗш кӗнеки. Кӑларӑм 2024 ҫулта Чӑваш кӗнеке издательствинче пичетленсе тухнӑ.

«Кӗнеке ҫырасси – питӗ йывӑр ӗҫ. Пӗрре ларсах пулмасть. Тен, марафон чупса тухасси ҫӑмӑлрах та пуль», – тенӗ ҫамрӑк ҫыравҫӑ.

Палӑртмалла: Олеся – армрестлинг енӗпе Раҫҫей спорт мастерӗ, Европа чемпионӗ.

Кӗнекене сӳтсе явнӑ чухне автор яка ҫырнине, лайӑх ӳкерчӗксем тума пултарнине палӑртнӑ.

gryazoveckij-r19.gosweb.gosuslugi.ru сайтри сӑн

Шупашкарта 14 ҫулти хӗрача ашшӗ-амӑше пуйма пулӑшас тенӗ те... ултавҫӑсене 170 пин тенкӗ куҫарса панӑ.

Хӗрача мессенджер урлӑ интернет-аукциона хутшӑннӑ. Унта ҫапла пӗлтернӗ: кам укна нумайрах хывать, ҫавӑ нумайрах укҫа илет. Вӑл унӑн ячӗпе уҫнӑ вкладри укҫана, 170 пин тенке, куҫарса панӑ.

Ашшӗ-амӑшӗ хушӑран вклада укҫа хурса тӑнӑ, хӗрне ӑна никама та куҫарса памалли пирки ӑнлантарнӑ. Апла пулсан та ҫапла пулса тухнӑ.