cap.ru сайтри сӑн

Республикӑра вырма ӗҫӗ хӗрсе пырать. Аграрисем 207,4 пин гектар ҫинчи тырра вырса пӗтернӗ, плана 85% пурнӑҫланӑ. Пӗтӗмпе 683 пин тонна тырӑ туса илнӗ.

Чӑваш Енӗн вице-премьерӗ – ял хуҫалӑх министрӗ Андрей Макушев палӑртнӑ тӑрӑх, ял хуҫалӑх техникисем халӗ чарӑнмасӑр тенӗ пек ӗҫлеҫҫӗ, механизаторсем хирте иртен пуҫласа каҫчен тӑрӑшаҫҫӗ. Ҫанталӑк лайӑх тӑнӑ чухне республикӑра кунсерен вӑтамран 11 пин гектар ытла тыр-пул вырнӑ.

Округсен хушшинче Красноармейски округӗ тухӑҫлӑхӗпе (39,5 ц/га), Елчӗк округӗ вал пухӑвӗпе (71,7 пин тонна), Патӑрьел округӗ вырма хӑвӑртлӑхӗпе (кунта 95% ытла лаптӑка вырнӑ) лидерсем пулса тӑнӑ.

Тырӑ вырнипе пӗрлех ытти ял хуҫалӑх культурисене те пуҫтарса кӗртеҫҫӗ. Ҫӗр улмие 1 256 га лаптӑк ҫинче 36,1 пин тонна яхӑн пухнӑ, вӑтам тухӑҫлӑхӗ 287,6 ц/га. Уҫӑ вырӑнти пахча ҫимӗҫе 231 га лаптӑк ҫинчен пуҫтарнӑ, 5,4 пин тонна пухнӑ, вӑтам тухӑҫлӑхӗ 236 ц/га. Техника культурисене 12,1 пин га ытла лаптӑк ҫинчен пуҫтарнӑ.

Патӑрьел округӗнче 95 га сахар кӑшманӗ кӑларнӑ, пӗтӗмпе 4,3 пин тонна пухнӑ. Ҫӗрпӳ тата Тӑвай округӗсенче соя пуҫтарма пуҫланӑ: 124 га лаптӑкран 271 тонна пухнӑ.

Хӑмлана 92,2 га лаптӑк ҫинчен пуҫтарнӑ, пӗтӗмпе — 137,8 тонна.

#ял хуҫалӑхӗ, #вырма, #Ҫӗрпӳ районӗ, #Тӑвай районӗ, #Красноармейски районӗ, #Елчӗк районӗ, #Патӑрьел районӗ