culture.cap.ru сӑнӳкерчӗкӗ

Ҫеҫпӗл Мишши ячӗллӗ Чӑваш патшалӑх ҫамрӑксен театрӗ тӗрӗк халӑхӗсен пӗтӗм тӗнчери «Науруз» фестивалӗнчен таврӑннӑ. Унта вӑл Марина Карягина пьесипе лартнӑ «Ҫӗн Кун Ачи» спектакльпе хушӑннӑ. Фестиваль Хусанта иртнӗ.

Спектакль умӗн иртнӗ пресс-конференцире театр директорӗ Ольга Иванова тата Борис Манджиев режиссёр спектакле епле хатӗрлени ҫинчен каласа кӑтартнӑ. «22 ҫул ҫеҫ пурӑнса ҫавӑн чухле ӗҫ туса хӑварма пултарнӑ ҫын чухлӗ эпир хамӑр ӗмӗрте тӑваймӑпӑр. Чӑваш Ен ун пек ҫын пуррипе мӑнаҫланать. Спектакль урлӑ манӑн ҫамрӑк кураканран 25 ҫулта вӑл тӑван ҫӗршывшӑн хӑйӗн ҫине ҫавӑн чухлӗ яваплӑх илме тата уншӑн пурнӑҫне пама пултарассине ыйтас килчӗ», — каласа кӑтартнӑ рассказал Борис Наминович.

Тӗрӗк халӑхӗсен XVII «Науруз» пӗтӗм тӗнчери фестивалӗн ҫӗнтерӳҫисене ҫӗртме уйӑхӗн 22-мӗшӗнче палӑртӗҫ тата чыслӗҫ.

Константин Степанов телеграм-каналӗнчи сӑн

«Правда ПФО» интернет-хаҫат пӗлтернӗ тӑрӑх, ЛДПР партирен Чӑваш Ен Элтеперӗн суйлавне Константин Степанов хайӗн кандидатурине тӑратать.

Константин Степанов Шупашкарта 1986 ҫулта ҫуралнӑ. Ӗҫ биографине автомеханикрен пуҫнӑ, кайран тӗрлӗ профессире тӑрӑшнӑ, усламҫӑ та пулнӑ. 2018 ҫулта Тӗнче цивилизацийӗсен институтне пӗтернӗ, 2025 ҫулта – Раҫҫей коопераци университечӗн магистратурине (иккӗшӗ те юриспруденци енӗпе).

Вӑл 2020 ҫулта та Элтепер суйлавне хутшӑннӑ, ун чухне виҫҫӗмӗш вырӑнта пулнӑ.

Лилия Яковлева архивӗнчи сӑн

Шупашкарти Лилия Яковлева граффити ӳкерсе ҫӗнтернӗ.

Халӗ унӑн ӳкерчӗкӗ Чулхулари Кремле илемлетет. Пӗтӗм Раҫҫейри граффити фестивалӗ шӑпах унта иртнӗ.

Лилия Шупашкар гербӗ ҫинчи пилӗк кӑвакала ӳкернӗ. Вӑл «Этника стилӗ» номинацире палӑрса мала тухнӑ.

Сӑмах май, Лилия – ЧР Патшалӑх Канашӗн Ҫамрӑксен палатин членӗ, регионти «Динамо» аэробика уйрӑмӗн ертӳҫи. Кунсӑр пуҫне вӑл Шупашкарти Н.В.Никольский ячӗллӗ професси колледжӗнче вӗрентет.

Куславкка районӗнчи пӗр ялта пурӑнакан Лукьяновсем ҫӗр ҫырли туса илме тӗллев лартнӑ. Ҫав ӗмӗтпе хавхаланса Анна Лукьянова патшалӑх контрактне алӑ пусса хыснаран укҫа илнӗ те ӑна хушма хуҫалӑха аталантарма янӑ. Тӗрӗсрех каласан, ҫӗр ҫырлин чаплӑ йышши сортне туяннӑ.

Малтанах вӗсем шикленнине пытарамаҫҫӗ: «Калча вӑй илӗ-и? Туса илме пултарӑпӑр-и?» Анчах пӗрремӗш ана ҫырла пама тытӑнсан хӗрарӑм хавхаланнӑ, халӗ вӑл ҫырла лаптӑкне пысӑклатма ӗмӗтленет.

Аннӑн упӑшки хурт-хӑмӑр ӗрчетет.

Шупашкарта пурӑнакан 53 ҫулти хӗрарӑм-бухгалтер ултавҫӑсен капкӑнне лекнӗ.

Кассирта ӗҫлекенскер патне мессенджерсенчен пӗринче такамсем шӑнкӑравласа смсри кода ыйтнӑ, ку вӑл энергосбыт компанийӗпе ҫыхӑннине пӗлтернӗ.

Кӑштахран ун патне арҫын шӑнкӑравланӑ, хӑйӗнпе финанс мониторингӗн специалисчӗ тесе паллаштарнӑ, маларах хӗрарӑм ултавҫӑсемпе калаҫнӑ, халӗ ун ячӗпе вӗсем кредит илесшӗн тесе пӗлтернӗ. Укҫана упраса хӑварас тесен хӑрушсӑр счет ҫине куҫармаллине ӗнентернӗ. Миллион ҫурӑ ытла тенке такамсене куҫарса панӑ хыҫҫӑн тин хӗрарам хӑй улталаннине ӑнланса илнӗ.

Шупашкарта пурӑнакан арҫын ултавҫӑсене ӗненсе машинине сутса янӑ та ҫав укҫана вӗсене куҫарса панӑ.

Арҫын патне ҫӗртме уйӑхӗн 5-мӗшӗнче такамсем шӑнкӑравласа курьер илсе килне япалана илме код ыйтнӑ. Арсын нимле курьера та кӗтмен пулин те кода такамсене йӑпӑр-япӑр каланӑ. Патшалӑх пулӑшӑвӗн порталне кӗмелли кода ултавҫӑсем арҫынран пӗрремӗш код йӑнӑш пулчӗ тесе ыйтса пӗлнӗ. Унтан Хӑрушсӑрлӑх службин ӗҫченӗ текен этем шӑнкӑравланӑ. Вӑл ӑна унччен ултавҫӑсемпе калаҫнине, вӗсем ун ячӗпе банкра кредит илсе тултарассине, машинине вара сутса ярассине пӗлтернӗ.

Ют ҫын сутса яриччен арҫын «Тойота Королла» автомобиле хӑй сутса ярас тенӗ, укҫана «шанчӑклӑ» вырӑна, «сейф ячейкине» куҫарма сӗннине итлесе ҫӑвӑн пек туна. Ҫапла вара вӑл 700 пин тенкӗсӗр тӑрса та юлнӑ.

Кредит илнӗ укҫана та куҫарас тенӗ те анчах банк ӗҫченӗсем ку операцие пурнӑҫлама ирӗк паман. Ҫавӑнпа вӑл укҫана алла илес тесе банка кайнӑ. Унта вӑл хӑй улталаннине ӑнланса илнӗ.

chuvashia.sledcom.ru сӑнӳкерчӗкӗ

Шупашкарти Кӑнтӑр-хӗвеланӑҫ бульварӗнчи ҫуртсенчен пӗрин картишӗнче ҫу уйӑхӗн 14-мӗшӗнче арҫын виллине тупнӑ. Ҫавӑн хыҫҫӑн РФ Пуҫиле кодексӗн 105-мӗш статйин 1-меш пайӗпе пуҫиле ӗҫ пуҫарнӑ.

Йӗрке хуралҫисем ҫын вӗлернӗ этеме тытса чарнӑ. Вӑл арҫыннӑн пӗлӗшӗ пулнӑ. Иккӗшӗн хушшинче ӑнланманлӑх сиксе тухнӑ та ҫӗҫӗ ярса илсе темиҫе хутчен чикнӗ. Унтан вӑл ҫав вырӑнтан пӑрӑнса кайнӑ. Алла ҫӗҫӗ ярса илни ӳсӗр пулнӑ. Шар курни йывӑр сурана пула ҫавӑнтах куҫне ӗмӗрлӗхе хупнӑ.

Шупашкарта пурӑнакан Нина Алексеева паян 100 ҫул тултарнӑ. Етерне хулинче ҫуралнӑскер тӑван хулинчи ватам шкултан 1944 ҫулта вӗренсе тухсан вырӑнти педагогика училищине веренме кӗнӗ. Унтан нимӗҫ чӗлхипе математика учителӗнче ӗҫленӗ, каярах вара — Шупашкарти электроаппаратура заводӗнче.

Нина Васильевнӑн чунне савӑнтараканни - икӗ ачи, икӗ мӑнукӗ тата мӑнукӗсен виҫӗ ачи. Паян кинемей Людмила хӗрӗпе пӗрле пурӑнать.

Дмитрий Захаров министр телеграм-каналӗнчи сӑн

Чӑваш Енри шкултан вӗренсе тухнӑ 12 ҫамрӑк вырӑс чӗлхипе иртнӗ экзаменра 100 балл пухнӑ. Кун пирки Дмитрий Захаров министр телеграм-каналӗнче хыпарланӑ.

Ҫак йышра – Ольга Маллина (Шупашкарти 2-мӗш лицей), Алла Миронова (Йӗпреҫри 1-мӗш шкул), Михаил Николаев (Шупашкарти 5-мӗш гимнази), Софья Синеева (Патӑрьелти 1-мӗш шкул), Елизавета Сорокина (Шупашкарти 1-мӗш гимнази), Анна Тихонова (Вӑрнарти 2-мӗш шкул), Эльвина Хамидуллова (Патӑрьелти 1-мӗш шкул), Виолетта Яруткина (Шупашкарти 37-мӗш шкул), Анна Гайдукова (Ҫӗнӗ Шупашкарти 6-мӗш гимнази), Ярослава Гурьева (Шупашкарти 1-мӗш гимнази), Юлия Крайнова (Шупашкарти 2-мӗш лицей), Лилия Ляллина (Патӑрьелти 1-мӗш шкул).

Кӑҫал ҫулла ҫумӑр ҫусах тӑрать. Синоптиксем унсӑр пуҫне ҫывӑх вӑхӑтра сивӗтессине пӗлтереҫҫӗ.

Паян та, ыран та ҫумӑрлӑ ҫанталӑк тӑрӗ. Юнкунпа кӗҫнерникун кӑна уяр пулӗ. Эрнекун каллех ҫумӑр ҫума тытӑнӗ. Ҫӗрле пушшех те вӑйлӑ ҫӑвӗ. Эрне вӗҫнелле кӑнтӑрла 12-17 градус кӑна ӑшӑ пулӗ.

Шӑматкун ҫӗрле термометр 6-8 градус ҫеҫ ӑшӑ кӑтартӗ. Атмосфера пусӑмӗ пӗчӗкленӗ, ҫурҫӗр-хӗвеланӑҫ енчен вӗрекен ҫил вӑйланӗ. Вырсарникун ҫумӑр ҫумӗ.

Малтанлӑха пӗлтернӗ тӑрӑх, Республика кунӗ те, ҫӗртме уйӑхӗн 24-мӗшӗ, ҫумӑрсӑр иртмӗ. Ҫуллахи 25-30 градус ӑшӑ уйӑх вӗҫӗнче кӑна таврӑнӗ.