И.Я. Яковлев ҫуралнӑранпа 160 ҫул ҫитнине уявламалли кун ҫывхарсах пырать, уйӑх та юлмарӗ ӗнтӗ.

Пирӗн сайт та ку уява хатӗрленет. Нумай пулмасть пирӗн сайтра Эдурад Фоминӑн «Чи хитре чӗлхе» кӗнеки вырнаҫрӗ. Кӗнекине Эдурад питӗ лайӑх ҫырнӑ, шыв юхнӑ евӗр вуланать. Енчен те эсир чӑваш чӗлхине вӗренетӗр пулсан, е сирӗн чӗлхе самаях пӑсӑлнӑ пулсан — ку кӗнекепе паллашма сӗнетпӗр. Унта кулленхи пурнӑҫра тӗл пулакан йӑнӑшсене илсе кӑтартнӑ, чӗлхепе ҫыхӑннӑ пулӑмсене уҫса панӑ.

Ну епле, вулар-и?

Ака уйӑхӗн 1-5-мӗшӗсенче Чӑваш Республикинчи вӗренӳ тата ҫамрӑксен политикин министерстви тата Чӑваш чӗлхин инҫет вӗрентӳ центрӗ И.Я. Яковлев ҫуралнӑранпа 160 ҫул ҫитнӗ ятпа интернет-олимпиада ирттереҫҫӗ. Олимпиадӑна 9-11 класра вӗренекенсем хутшӑнма пултараҫҫӗ.

Интернет-олимпиадӑна И. Я. Яковлев пурнӑҫӗпе ӗҫӗ-хӗлне тӗпчес ӗҫе ачасене явӑҫтарас, вӗсене чӑваш халӑх тата чӗлхин историйӗпе интереслентерес тата интернет технологисемпе туллинрех усӑ курма хӑнӑхтарас тӗллевсемпе йӗркеленӗ.

Олимпиада ыйтӑвӗсене интернетри http://pedkanash.chuvash.org сайтра ака уйӑхӗн 1-мӗшӗнче вырнаҫтараҫҫӗ. Пӗтӗмпе вунӑ ыйту пулать. Вӗсен тулли хуравӗсене ака уйӑхӗн 6-мӗшӗччен civmih2@narod.ru адреспа электрон ҫыру ҫумне ҫыпӑҫтарнӑ файл пек йышӑнаҫҫӗ.

9-пе 11-мӗш классенчи вӗренекенсем, ӑнӑҫу сире сунатпӑр!

Маларах пӗлтертӗмер ӗнтӗ — пуш уйӑхӗн 28-мӗшӗнче Красноармейски районӗн тӗпӗнче «Шетмӗпе Ҫавал кӗввисем» кункурсӑн иккӗмӗш пайӗ иртни пирки. Шупашкар районӗнчен ку конкурса Кӳкеҫри культура ҫумӗнчи «Юманлӑх» волкал ансамлӗпе Иккасси ялӗнчи пултарулӑх ушкӑнӗ хутшӑнчӗҫ. Конкурса В.Г. Федоров ҫырнӑ «Мӑшӑрпалах телей тупасччӗ», «Кил савни» тата А.А. Печниковӑн «Тӑван ял», «Астӑватӑн» юррисене илсе кайрӗҫ.

Пушӑ алӑпа таврӑнмарӗҫ. Анатолий Печников «Вокал ушкӑнӗ валли ҫырнӑ чи чаплӑ произведени» номинацин лауриачӗ ятне тивӗҫрӗ. Кӳкеҫри культура ҫуртӗнчи ансамбльте юрлакан Ирине Беспаловӑна вара чи лайӑх юрӑҫ ятпа саламларӗҫ.

Хыпар ҫӑлкуҫӗ

Пуш уйӑхӗн 30-шӗнче Питӗр хулинче Митта Ваҫлейӗ ҫуралнӑранпа 100 ҫул ҫитнине асӑнса Чӑваш ҫамрӑкӗсен инициативлӑ ушкӑнӗ каҫ ирттерчӗ. Мероприятин спонсорӗсем ООО «Иннопель» (Мускав) тат ЗАО «Ренейссанс констракшн» (Питӗр) пулчӗҫ.

Хыпар ҫӑлкуҫӗ

Иккассинче ҫуралса ӳснӗ Николай Шупуҫҫынни ҫырнӑ «Янтрак янтравӗ» поэма 100 ҫул тултарчӗ. Вӑл 1908 ҫулта Константин Ивановӑн «Нарспи» поэмипе пӗрле «Чӑваш халапӗсем» ятлӑ Чӗмпӗрте кӑларнӑ кӗнекере кун ҫути курнӑ.

Ӑна пичете Чӗмпӗр чӑваш шкулӗн директорӗ И.Я.Яковлев хатӗрленӗ. Унтах Шупуҫҫыннин «Хура чӗкеҫ», «Ӑслӑ суеҫӗ», «Вӗре ҫӗлен» сӑвӑллӑ юмахӗсем тата «Хунар ҫути» сӑвви кӗнӗ.

«Янтрак янтравӗ» – XX ӗмӗр пуҫламӑшӗнчи чӑваш ялӗн пурнӑҫне сӑнласа паракан произведени. Поэт Раҫҫейри 1905-1907 ҫулсенчи пӗрремӗш революци хумӗ Чӗмпӗре ҫитнӗ ҫулсенче унти чӑваш шкулӗнче вӗреннӗ, революционерсен кружокӗсене ҫӳренӗ, рабочисен вӑрттӑн пухӑвӗсене хутшӑннӑ. Ҫавӑнпа вӑл, ҫамрӑк кӑна пулин те, ун чухнехи социаллӑ лару-тӑрӑва туйнӑ. Чӗринче ҫавнашкал поэма ҫуралнин сӑлтавне революциллӗ туйӑм чӑтса ирттернипе ӑнлантармалла пулӗ.

Малалла...

Ак ӗнтӗ ҫур кунӗсем те ҫитрӗҫ — юр васкавлӑн ирӗле пуҫларӗ. Юрӗ ирӗлни чуна савӑнтарать, кӑмӑла ҫӗклет — тепӗр енчен хӗл хушшинче пуҫтарӑннӑ ҫуп-ҫап юр айӑнчен тухса куҫ умне лекет. Паллах, тасамарлӑх кӑмӑла ниепле те ҫӗклеймӗ, ҫавна май ку эрне хушшинче Кӳкеҫре «Таса посёлок» акци иртрӗ.

Ӗҫ шыракансенчен йӗркеленӗ ушкӑнсем Шоссе урамӗпе иртекен федераллӑ ҫул хӗрринчи ҫӗре ҫӳп-ҫапран тасатрӗҫ, «Шырав» (Поиск) ТМЯО ӗҫченӗсем Шоссепе Совет урамӗсенче хӗл тӑршшӗпе пуҫтарӑннӑ каяшсене пуҫтарса тухрӗҫ, «МСО «Кӳкеҫ» ТМЯО ӗҫченӗсем Совет урамӗнчи ҫӑкасене касса тирпейлерӗҫ.

Ҫапла май Кӳкеҫ хитреленсе, тасаланса пырать.

Хыпар ҫӑлкуҫӗ

Антаркти шельфӗнчен кӗтмен ҫӗртен пысӑк пӑрлӑх катӑлса тухрӗ. Унӑн лаптӑкӗ 570 тв. ҫх. Вӑл Антарктидӑн анӑҫ енчен уйрӑлса кайрӗ.

Британи полярникӗ-ӑслӑхҫи Девид Вогхен шухӑшӗпе, ҫутҫанталӑкӑн ҫак ӗҫ планетӑра пӗтӗмлӗвлӗ ӑшӑну пирки пулса тухрӗ, палӑртать РБК.

Тӗпчевҫӗсем каланипе, ҫитес кунсенче Кӑнтӑр полюсӗн континенталлӑ шельфӗнчен тепӗр пӑр татки татӑлма пултарӗ. Кӑнтӑр материкӗнчи ҫӑкӑн пек калӑпӑшлӑ пӑрлӑх арканӑвӗсем 1995 тата 2002 ҫулсенче пулса иртнӗ.

Mail.ru хыпарӗсем

Кая юлса та пулин ҫак хыпара сире пӗлтерес: паян (пуш уйӑхӗн 28-мӗшӗнче) Красномармейскинчи Халӑх пултарулӑх ҫуртӗнче «Шетмӗпе Ҫавал кӗввисем» кункурсӑн иккӗмӗш пайӗ иртет. Вӑл шӑп та лӑп 18 сехетре паян пуҫланнӑ. Конкурса Шетмӗпе Ҫавал юханшывсем тӑрӑхӗнче вырнаҫнӑ районсенчи пултарулӑх ушкӑнӗсем хутшӑнаҫҫӗ Вӑл тӑрӑха Элӗк, Вӑрнар, Йӗпреҫ, Канаш, Красноармейски, Ҫӗмӗрле, Ҫӗрпӳ, Шупашкар, Сӗнтӗрвӑрри, Муркаш районӗсем кӗреҫҫӗ — ҫур республика!

Конкурсӑн пӗрремеш пайӗ иртнӗ ӗнтӗ — вӑл кашни районта пуш уйӑхӗн 26-мӗшӗнче пулнӑ. Кашни районтан чи лайӑх ушкӑна суйласа илсе вӗсене иккӗмӗш пайне кӗртеҫҫӗ.

Малалла...

Красноармейски районӗнче ҫулталӑк вӗрентевҫине 1992 ҫултанпах суйлаҫҫӗ. Унтанпа нумай вӑхӑт иртрӗ — кашни ҫул чи лайӑх вӗрентевҫӗне суйлама районти вӗрентӳ системин чи лайӑххисем пуҫтарӑнаҫҫӗ. Чи сумлисенчен ыттисем яланах вӗренме, вӗсен шайне ҫитме тӑрӑшаҫҫӗ.

Кӑҫалхи конкурс «Ҫирӗп кӗлеткере ҫирӗп ӑҫ» ятпа иртрӗ. Конкурса ҫавна май ҫак тӗллеве ҫирӗп тытса пырса верентекен вӗрентӳҫӗсем хутшӑнчӗҫ. Пурӗ районти 9 шкултан пулчӗҫ вӗсем.

Пушӑн 28-мӗшӗнче вара район администрацийӗн вӗрентӳ пайӗн информаципе методика пӳлӗмӗнче конкурса пӗтӗмлетсе унта хутшӑннӑ вӗрентӳҫӗсене саламларӗҫ.

* Алманч шкулӗн пуҫламӑш классен вӗрентӳҫи Антонина Леонидовна Николаева «Шыраса тупнӑ методика» номинацире ҫӗнтерчӗ.

* Красноармейскинчи 2-мӗш шкулта математикӑна вӗрентекен Надежда Владимировна Андреева «Пултаруллӑ проект» номинацине тивӗҫрӗ.

* Пикшик шкулӗн пуҫламӑш классен вӗрентӳҫи Наталия Эдуардовна Тихонова «Педагогика импровизацийӗсем» номинацине тивӗҫрӗ.

Малалла...

XXIII Тӗнче кубокне хатӗрленсе ирттерес тӗллевпе федерации йӗркелӳ комитечӗн членӗ, ЧР Правительствин вице-премьерӗ Г.С. Федоров ертсе пынипе Чӑваш Республикин РФ Президенчӗ ҫумӗнчи Полномочиллӗ представительствинче канашлу пулнӑ. Унта тӗл пулусем йӗркелес, официаллӑ ҫынсене, тӳресене, спортсменсене, хӑнасене Мускавра кӗтсе илес тата вӗсене Чӑваш Ене ӑсатса ярас ыйтусене пӑхса тухнӑ. Ҫу уйӑхӗн 6-8-мӗшӗсенче тӗп хулари Внуково, Домодедово, Шереметьево-1 тата Шереметьево-2 азропортсене 55 ҫӗршывран 600 ытла ҫын килсе ҫитмелле. Ҫавӑнпа та вӗсене сӗнӳ парас, пулӑшас ыйту пӗлтерӗшлӗ. Ҫавна май канашлура Чӑваш Енрен килсе Мускаври вӗрену заведенийӗсенче вӗренекен, ют чӗлхесене пӗлекен студентсен хушшинче волонтерсен ушкӑнне йӗркелес тӗллевпе конкурс ирттерме йышӑннӑ. Суйласа илнӗ волонтерсене Чӑваш Енӗн Полномочиллӗ представительствинче пӗлӳ парӗҫ. Хӑнасене вӗсем Кубок символӗсемлӗ ятарлӑ тумпа тата чӑваш наци костюмӗпе кӗтсе илӗҫ.

Конкурс пирки Мускава (495) 953-16-72 телефонпа шӑнкӑравласа е polprchuv@col.ru электрон адреспа тӗплӗнрех пӗлме пулать.

Малалла...