«На связи» форумри сӑн

Чӑваш транспорт управленийӗ пӗлтернӗ тӑрӑх, 60-мӗш троллейбус Ҫӗнӗ Шупашкартан килнӗ чухне «Ҫӗнӗ хула» микрорайон урлӑ кайӗ.

«Химтехникум – Университет» маршрутпа ҫӳрекен троллейбус Шупашкар еннелле кайнӑ чухне Сӗнтӗрвӑрри ҫулӗнчен «Ҫӗнӗ хула» микрорайона пӑрӑнса кӗрӗ. Кайран ҪҪХПИ посчӗ пулнӑ вырӑнтан тухӗ. Малалла вара хӑйӗн ҫулӗпех кайӗ.

Хальлӗхе маршрут хӑҫан улшӑнассине пӗлтермен.

Вера Иванова сӑнӳкерчӗкӗ

Шупашкарта пурӑнакан Екатерина Емелина паян, авӑн уйӑхӗн 11-мӗшӗнче, 100 ҫул тултарнӑ.

Екатерина Захаровна Улатӑрта ҫуралнӑ. Унти ял хуҫалӑх техникумӗнче, кайран Шупашкарти коопераци техникумӗнче вӗреннӗ. Потребкоопераци тытӑмӗнче ӗҫленӗ. Потребкооперацин тава тивӗҫлӗ ӗҫченӗ ята тивӗҫнӗ.

Халӗ вӑл Шупашкарта пурӑнать. Ӑна кӗрӳшӗпе мӑнукӗ пӑхаҫҫӗ. Ватӑ ҫын хӑй те ӑспа-тӑнпа пурӑнать, утса ҫӳрет. Мӑнукӗ каланӑ тӑрӑх, нумай хваттерлӗ ҫуртри хваттер виҫҫӗмӗш хутра вырнаҫнӑ та ватӑ ҫынна тухса ҫӳреме йывӑртарах.

Ватӑ ҫынна Шупашкарти тӳре-шара саламланӑ, Владимир Путинӑн открыткине те илсе ҫитернӗ. Ҫӗршыв Президенчӗ саламлани ватта пушшех те савӑнтарнӑ.

Яндекс сӑнӳкерчӗкӗ

Дмитрий Губерниев спорт комментаторӗ паянхи телеэфирта каллех Чӑваш Ене аса илчӗ.

Паллӑ комментатор пирӗн республикӑна унччен те хурланӑччӗ. 2018 ҫулта вӑл Чӑваш Енри биатлон центрӗ кирлине спортӑн ҫак енӗпе иртекен Тӗнче кубокӗн пӗрремӗш тапхӑрӗнче те, виҫҫӗмӗшӗнче те «МАТЧ» телеканалпа тӳрӗ эфирта каланине Чӑваш халӑх сайчӗ пӗлтернӗччӗ-ха.

Кайран ҫав центра турӗҫ-турӗҫех. Анчах ӗҫе пуҫӗпех вӗҫне ҫитереймен-мӗн-ха.

Паян Губерниев каллех пирӗн республикӑна аса илчӗ. Кӑҫал ҫулла унта ҫуллахи ӑмӑрту иртмелле пулнӑ иккен. Дмитрий Губерниев яваплисене ӗҫе тивӗҫлипе пурнӑҫлама чӗнсе сенкер экран урлӑ каларӗ.

"Контактри" сӑн

Патӑрьелти 1-мӗш шкул ачисем Китайри фестивале хутшӑннӑ.

Вӗсем Бэйдайхэ хулинче иртнӗ Пӗтӗм тӗнчери наци культурисен фестивалӗнче пулнӑ.

Чӑваш Енри ачасем Китайра чӑваш культурипе, тумӗпе, юрри-ташшипе паллаштарнӑ.

Фестиваль йӗркелӳҫисем Никита Бичурин востоковед Чӑваш Енрен пулнине каласа кӑтартнӑ.

Олимп резервӗн 2-мӗш спорт шкулӗ халӑх тетелӗнче вырнаҫтарнӑ сӑнӳкерчӗк

Ҫак кунсенче, авӑн уйӑхӗн 8-15-мӗшӗсенче, Пермь тӑрӑхӗнчи Чайковский хулинче биатлон енӗпе Раҫҫей чемпионачӗ иртет.

Унта Чӑваш Енри биатлонистсем те хутшӑнаҫҫӗ: Николай Алексеев, Даниил Акимов, Даниил Динисов, Дмитрий Петров, Даниил Бычков тата Антон Яковлев.

Паян арҫынсем йӗлтӗр роллерӗпе 20 километра чупса, тӑватӑ хутчен персе (иккӗ — выртса, иккӗ — тӑрса) ӑмӑртаҫҫӗ.

Старта 30-мӗш номерпе Даниил Акимов, 43-мӗшпе Николай Алексеев тухӗ.

Шупашкар районӗн администрацийӗнчен илнӗ сӑнӳкерчӗк

Авӑн уйӑхӗн 8-мӗшӗнче Шупашкар тӑрӑхӗнчи Томакасси ялӗнче чӑваш халӑх юрри-кӗввин фестивалӗ иртнӗ. Ӑна чӑваш фольклорне пухнӑ Гаврил Федорова халалланӑ.

Округри фольклор фестивальне вӑйӑ картине тӑнинчен пуҫланӑ. Унта уява пынӑ мӗнпур коллектив хутшӑннӑ.

Унтан вӗсем хӑйсен пултарулӑхӗпе паллаштарнӑ, чылайӑшӗ Гаврилов Фёдоров репертуарӗнчи хайлавсене янӑратнӑ.

Анна Егорова халӑх тетелӗнче вырнаҫтарнӑ сӑнӳкерчӗк

Шупашкарти Ираида Матьянова — «Тӑван чӗлхепе тӑван литературӑна чи лайӑх вӗрентекен» конкурс лауреачӗ пулса тӑнӑ.

Аса илтерер: Буряти Республикинче «Тӑван чӗлхепе тӑван литературӑна чи лайӑх вӗрентекен» конкурсӑн юлашки тапхӑрӗ иртнӗ. Унта Чӑваш Республикин чысне Шупашкар хулин хавшак сывлӑхлӑ ачасен 2-мӗш шкулӗн вӗрентекенӗ Ираида Матьянова тивӗҫлипе хутшӑннӑ, лауреат пулса тӑнӑ.

"Контактри" сӑн

Шупашкарти Дарина Богоявленская Пӗтӗм Раҫҫейри «Королева ринга» телешоун финалне тухнӑ.

Вӑл финала тухас тесе Мускавра онлайн-кастинг тата виҫӗ куна тӑсӑлнӑ интенсив витӗр тухнӑ.

Шоуна авӑнӑн 25-мӗшӗнче пӗтӗмлетӗҫ. Финалисткӑсене пурне те 1-ер миллион тенкӗ тата ҫулталӑклӑх контракт парӗҫ. Ҫӗнтерӳҫӗ вара 10 миллион тенке тата 1 миллион тенкӗ шалӑва тивӗҫӗ.

Сӑмах май, Дарина 2020 ҫулта «Чӑваш Ен мисӗ» пулнӑ. Халӗ Мускавра социаллӑ педагога вӗренет.

"Контактри" сӑн

Авӑнӑн 9-мӗшӗнче ҫӗрле Кӳкеҫ ҫывӑхӗнче машина пӑшие ҫапса хӑварнӑ. Водитель вырӑнтан тарса ҫухалнӑ.

Телее, чӗрчун чӗрех юлнӑ, анчах чылай вӑхӑт ура ҫине тӑраймасӑр выртнӑ. Вырӑна чӗрчунсен тӗнчине сыхлакан тӗп инспектор Владимир Тимофеев ҫитнӗ. Пӑшие пӑхсан вӑл вӑйлах суранланманнине, унӑн шок пулнине палӑртнӑ. Чӗрчун каллех ҫул ҫине ан тухтӑр тесе ӑна пӑхса тӑнӑ.

Ир енне пӑши ура ҫине тӑрса посадкӑналла кӗрсе кайнӑ.

"Контактри" сӑн

Чӑваш Енре пурӑнакансем мӗн вулама юратаҫҫӗ? Лев Толстойӑн «Анна Каренина» романне.

Ҫапла палӑртнӑ «Строки» кӗнеке сервисӗн аналитикӗсем.

Лев Толстойӑн хайлавӗсене вулакансен йышӗ, пӗлтӗрхипе танлаштарсан, 86% ӳснӗ. Тӗпчев палӑртнӑ тӑрӑз, вӗсене ытларах 35-44 ҫулсенчи хӗрарӑмсемпе 65 ҫултан аслӑрах арҫынсем вулаҫҫӗ.

18-24 ҫулсенчи ҫамрӑксем «После бала», «Семейное счастье», «Война и мир» хайлавсене кӑмӑллаҫҫӗ иккен.

Палӑртмалла: Чӑваш Енри пӗр ҫын вара Толстойӑн 12 хайлавне вуласа хӑйне евӗр чемпион пулса тӑнӑ.