ҪҪХПИ тунӑ сӑн

Ӗнер каҫхине Патӑрьел округӗнчи Хирти Пикшик ялӗнче икӗ арҫын ачана ҫапса кайнӑ. Иккӗшӗ те аманнӑ, иккӗшӗн те шӑмӑ хуҫӑлнӑ.

ҪҪХПИ пӗлтернӗ тӑрӑх, ВАЗ-2107 машина 11 ҫулти тата 7-ри пиччӗшӗпе шӑллӗ ҫине кӗрсе кайнӑ. Пӗри ун чухне велосипедпа пынӑ.

Руль умӗнче ҫав ялти 68 ҫулти арҫын ларнӑ. Вӑл ӳсӗр пулни паллӑ. Руль умӗнче вӑл – 2009 ҫултанпа, унӑн ОСАГО полисӗ те пулман.

Халӗ ку ӗҫ тӗлӗшпе тӗрӗслев пырать.

ҪҪХПИ тунӑ сӑн

Сӗнтӗрвӑрри округӗнче 17 ҫулти каччӑ машинӑпа кювета чӑмнӑ та тарнӑ.

Унпа салонра 15-ри хӗр пулнӑ, вӑл йывӑр аманнӑ, анчах каччӑ ӑна пӑрахса хӑварнӑ.

Ҫак инкек ӗнер 23 сехетре пулнӑ. Каччӑ «Лада» машина рульне итлеттереймесӗр кювета чӑмнӑ, унтан йывӑҫ ҫине пырса тӑрӑннӑ. Хӗр хыҫалта ларнӑ, вӑл хӑрушсӑрлӑх пиҫиххийӗпе ҫыхӑнманни паллӑ. Ӑна больницӑна илсе ҫитернӗ.

Халӗ полицейскисем водителе шыраҫҫӗ. Вӑл Ҫӗрпӳ тӑрӑхӗнчен пулни паллӑ.

ШӖМ тунӑ сӑн

Муркаш округӗнчи Мӑн Сӗнтӗр ялӗ ҫывӑхӗнче пулнӑ аварире 2 ҫын вилнӗ.

Ку хӑрушӑ авари ӗнер 10:50 сехетре пулнӑ. ВАЗ-2104 ҫул хӗрринчен тухса ҫаврӑнма тӑнӑ та КамАЗпа ҫапӑннӑ.

Ҫӑмӑл машина, водителӗ, 1950 ҫулта ҫуралнӑ арҫын, тата унӑн 1954 ҫулта ҫуралнӑ йӑмӑкӗ вырӑнтах вилнӗ.

Инкеклӗ лару-тӑру министерстви тунӑ сӑн

Улатӑр округӗнче 37 ҫулти арҫын пушарта вилнӗ. Ку инкек паян ҫӗрле Киря поселокӗнче Пушкин урмӗнче пулнӑ.

Ҫӑлавҫӑсем 126 тӑваткал метр лаптӑк ҫинче алхаснӑ пушара сӳнтерсен 37 ҫулти арҫын виллине тупнӑ.

Палӑртса хӑварар: ҫулталӑк пуҫланнӑранпа республикӑра 803 пушар пулнӑ. Вӗсенче 31 ҫыннӑн пурнӑҫӗ татӑлнӑ. 42 ҫын вара аманнӑ.

pravdapfo.ru сайтран илне сӑнӳкерчӗк

Канашри «Хуҫалӑхпа эксплуатаци служби» унитарлӑ пердприяти ертӳҫи шанӑҫран тухнӑ. Ҫавна пула ӑна ӗҫрен хӑтарнӑ. Кӑлтӑка прокуратура тӗрӗслевӗ вӑхӑтӗнче тупса палӑртнӑ.

Муниципалитетӑн хысна учрежденийӗн директорӗ 2023 тата 2024 ҫулсенче илнӗ тупӑш, пурлӑх пирки пӗлтермен.

Коррупцие хирӗҫ тӑрассипе ҫыхӑннӑ саккуна пӑхӑнманшӑн прокуратура вырӑнти администрацие асӑннӑ пуҫлӑха ӗҫрен кӑларма ыйтса асӑрхаттару хучӗ ӑсатнӑ.

cnnturk.com сайтри сӑн

Пӗлӗшне вӗри шывпа сапнӑ, унтан ун ҫине чейник ывӑтнӑ. Кун пек пӑтӑрмах Красноармейски округӗнче 2024 ҫулхи утӑ уйӑхӗнче пулнӑ.

Хӗрарӑм пӗлӗшне кӗвӗҫнӗ те вӗсем хирӗҫме пуҫланӑ. Ҫавӑн чухне хӗрарӑм ҫиллине чараймасӑр арҫынна вӗри шывпа сапнӑ, унтан чейнике те ун еннелле ывӑтнӑ. Арҫыннӑн кӑкӑрӗ, сывлав органӗсен тӗлӗнчи ӳчӗ пиҫсе кайнӑ. Шел те, вӑл реанимацире вилнӗ.

Хӗрарӑм судра явап тытнӑ. Анчах вӑл айӑпне йышӑнман. Вӑл чейникре сивӗ шыв пулнӑ тесе шухӑшланӑ-мӗн. Суд ӑна 1 ҫуллӑха ирӗксӗр хӑварма йышӑннӑ.

Прокуратура архивӗнчи сӑн

Паян Канашра Йӗпреҫ ҫулӗ ҫинче вырнаҫнӗ гаражра икӗ арҫын виллине тупнӑ. Кун пирки хыпар экстреннӑй службӑсене 11 сехетре ҫитнӗ.

Малтанлӑха палӑртнӑ тӑрӑх, 1962 ҫулта ҫуралнӑскерсем сӗрӗмлӗ газпа наркӑмӑшланса вилнӗ. Вӗсем гаражри нӳхрепрен бензин насосӗпе шыв кӑларнӑ.

Халӗ следстви умӗнхи тӗрӗслев пырать. Канашри районсен хушшинчи прокурорӗ Сергей Алексеев вырӑна ҫитнӗ.

Инкеклӗ лару-тӑру министерстви тунӑ сӑн

Куславкка округӗнчи Аслӑ Куснар ялӗнче 70 ҫулти арҫын пушарта вилнӗ. Ӗнер, утӑ уйӑхӗн 23-мӗшӗнче, кӑнтӑрла Ҫамрӑксен урамӗнчи ҫурт ҫунма тытӑннӑ. Шел те, кил хуҫи урама тухса ӗлкӗреймен, пушара сӳнтерсен унӑн виллине тупнӑ.

Малтанлӑха палӑртнӑ тӑрӑх, пушар пирус асӑрханмасӑр туртнӑран тухнӑ.

Сӑмах май, ҫулталӑк пуҫланнӑранпа республикӑра пирус асӑрханмасӑр туртнӑран 110 пушар тухнӑ, вӗсенче 13 ҫын вилнӗ.

«За рулем» порталти сӑн

«Шупашкар — Куславкка» маршрутка Алькеш поселокӗнче, тӗп хула еннелле кайнӑ чухне, трос карта ҫине пырса тӑрӑннӑ

Ку паян 16 сехет иртсен пулнӑ. Водитель руле итлеттереймесӗр икӗ ҫула уйӑракан трос карта ҫине пыса кӗнӗ. Карта микроавтобуса хирӗҫ ҫул ҫине тухса каясран чарнӑ.

Юрать-ха, авари вӑхӑтӗнче маршруткӑри ҫын пулман. Анчах саппас кустӑрма тухса ӳксе хирӗҫ килекен «десяткӑна» тӑрӑннӑ. Телее, никам та шар курман.

cap.ru сайтри сӑн

Шупашкарти Хусан ҫыранӗ ҫывӑхӗнче кимӗ ҫаврӑнса ӳкнӗ. Кун пирки ҫӑлав службине утӑ уйӑхӗн 20-мӗшӗнче каҫхине хыпар ҫитнӗ.

Кимӗре ҫынсем пулнӑ. Телее, никам та шар курман. Ҫӑлавҫӑсем вырӑна ҫитсе вӗсене шыраса тупнӑ та пулӑшнӑ, ҫынсене катерпа ҫыран хӗррине илсе тухнӑ.

Ҫӑлавҫасем кимме те ҫыран хӗррине илсе тухма пулӑшнӑ.