"На связи" форумри сӑн

Паян ирхи 6 сехет ҫурӑсенче Шупашкарта пурӑнакансем шаплатнӑ сасӑ илтнӗ. Хӗвелтухӑҫ поселокӗнчи нефтебазӑна пилотсӑр вӗҫекен аппарат ӳкнӗ. Юрать-ха, нефтебаза ӗҫлекенни пулман. Вӑл – реконструкцире.

Официаллӑ ҫӑлкуҫсем пӗлтернӗ тӑрӑх, шар курнисем ҫук. Ҫакна курнӑ ҫынсем каланӑ тӑрӑх, шаплатнӑ хыҫҫӑн тӗтӗм тухнӑ, анчах вӑл часах курӑнма пӑрахнӑ.

Ирхине вырӑнта ятарлӑ службӑсем ӗҫленӗ. Нефтебаза ҫывӑхӗнчи ҫулсене пӳлнӗ, машинӑсене яман.

Чӑваш Енре виҫӗ ҫынна вӗлерме тӑнӑ 29 ҫулти арҫын тӗлӗшпе пуҫиле ӗҫ пуҫарнӑ.

Тӗпчевҫӗсем палӑртнӑ тӑрах, кӑҫалхи нарӑс уйӑхӗн пуҫламӑшӗнче ҫав ҫамрӑк хӑй унччен пӗрле пурӑннӑ хӗрарӑма тавӑрма шутланӑ. Ҫавӑнпа вӑл унӑн тӑванӗсене вӗлерес тенӗ.

Усал шухӑшпа хӑйӗн пӗлӗшне ӳкӗтлесе те хӑратса хайхисен пӳртне чӗртсе яма хушнӑ.

Нарӑс уйӑхӗн 8-мӗшӗнче лешӗ Шупашкар тӑрӑхӗнчи яла ҫитсе пӳрте чӗртсе янӑ. Ҫав вӑхӑтра пӳртре хӗрарӑмӑн ашшӗ-амӑшӗ тата пиччӗшӗ ҫывӑрнӑ. Вӗсем вӑранса урама тухса тарма ӗлкӗрнӗ. 5 миллион тенкӗрен кая мар тенкӗлӗх вара шар кӑтартнӑ-кӑтартнах.

Ӗпхӳре пурӑнакан 15 ҫулти яш Шупашкарти лавккасенчен пӗринче система блокне вӑрланӑ. Ӑна вал Тутарстанра сутса янӑ.

Шупашкарти Калинин урамӗнчи лавккара тавар ҫухалнине сутуҫӑсем 10 кунран ҫеҫ сиснӗ.

Йӗрке хуралҫисем видеосӑнав камерине пӑхнӑ та 100 пин тенкӗ ытла тӑракан система блокне пӗр яш йӑтса тухса кайнине асӑрханӑ.

Ҫав кунах система блокӗ Президент бульварӗнчи йӑлари техника сутакан лавккаран та ҫухалнӑ.

Каччӑна халӗ тытса чарнӑ.

culture.ru сайтри сӑн

Улатӑрта пурӑнакан 40 ҫулти арҫынна ҫул ҫитмен ачана хур кӑтартнӑшӑн судпа айӑпланӑ.

Суд ҫирӗплетнӗ тӑрӑх, вӑл 8 ҫулти тӑван мар ывӑлне юратсах кайман, ӑна пӗрмай хӗненӗ, хур кӑтартнӑ. Ҫапла темиҫе уйӑх пулнӑ. Юрать-ха, паянхи кун ача амӑшӗпе ҫав арҫынран уйрӑм пурӑнать.

Ӑна тӗрмене хупмасӑр 3 ҫул та 2 уйӑхлӑха айӑпланӑ. Тӗрӗслев срокӗ – 2 ҫул ҫурӑ.

Шупашкар хулинче пурӑнакан 22 ҫулти хӗр патне мессенджерсенчен пӗринче ют ҫын шӑнкӑравланӑ. Вӑл хӑйӗнпе банк ӗҫченӗ тесе паллаштарнӑ. Пикен телефонӗнче сиенлӗ приложени пур, унран тасалма ятарлӑ приложени вырнаҫтармалла тесе ӗнентернӗ.

Хӗр ют ҫын каланине итленӗ. Кӑштахран ҫав арҫын тепре шӑнкӑравланӑ, хӑй ултавҫӑ пулнине пӗлтернӗ. Ҫав приложени урлӑ вӑл пикен сӑнӳкерчӗсене уҫласа илме пултарнине пӗлтернӗ, сӑнӳкерчӗксемшӗн 100 пин тенкӗ тапӑннӑ. Хӗрӗн интимлӑ сӑнӳкерчӗкӗсене вӑл пикен амӑшне ярса панӑ, ытти ҫын патне те ярса парассипе хӑратнӑ.

Ку пӑтӑрмах пӗлтӗрхи пуш уйӑхӗн 26-мӗшӗнче пулса иртнӗ. Пӗр арҫын Шалти ӗҫсен министерствин Шупашкарти управленийӗн полицин 5-мӗш уйрӑмне сирпӗтмелли хатӗр хунине пӗлтернӗ.

Яваплӑ службӑсем ҫийӗнчех ура ҫине тӑнӑ, анчах йалтах йӗркеллине палӑртнӑ.

Суйса шӑнкӑравлаканни вара 53 ҫулти арҫын пулнӑ. Суд ӑна 6 ҫул та 10 уйӑхлӑха пӗтӗмӗшле режимлӑ юсанмалли колоние асатнӑ.

gtrkamur.ru сайтри сӑн

Йӗпреҫ округӗнчи Вӑтаел ялӗнче хӑрушӑ пушар пулнӑ. Инкек ҫӗрле сиксе тухнӑ.

Шел те, ҫухатусӑр пулман. 89 ҫулти арҫын ҫкнма, пуҫланӑ мунчине сӳнтерес тенӗ те хӑй ҫунса вилнӗ. Пушар пӗтӗм хуҫалӑха ӗп тунӑ.

Ҫав кунах Канашра общежитире пӳлӗм ҫуннӑ.

Ҫуртран 20 ҫынна эвакуациленӗ

Ҫав шутра иккӗшӗ – ачасем.

t.me/mvd_chuvashia сӑнӳкерчӗкӗ

Шупашкарта ӳсӗр водитель общество транспорчӗн чарӑнӑвӗ ҫине пырса тӑрӑннӑ та конструкцие йӑтса антарнӑ. Телее, ҫав вӑхӑтра чарӑнура никмм та пулман, ҫӑпвӑнпа ҫынсем шар курман.

Пӑтӑрмах паян, пуш уйӑхӗн 3-мӗшӗнче, 12 сехет те 30 минутра Граждан урамӗнчи «Королев академик» чаранӑвӗнче пулса иртнӗ.

Чарӑну ҫине кӗрсе кайнӑ «Лада Ларгус» водителӗ ӳсӗр пулнӑ.

t.me/mvd_chuvashia сӑнӳкерчӗкӗ

Чӑваш Енре пурӑнакансем хушма укҫа ӗҫлесе илес тесе час-часах улталанаҫҫӗ.

Шупашкарта пурӑнакан 56 ҫулти ӗҫсӗр хӗрарӑм, ав¸ мессенджерсенчен пӗринче пӗлтерӳ курнӑ та инвестици платформинче укҫа ӗҫлесе илес тесе 925 пин тенкӗ хывнӑ, ҫав шутран 350 пинӗ хӑйӗн, ыттине хӗрарӑм кредит илнӗ.

Канашра воспитатель пулӑшаканӗнче тӑрӑшакан 42 султи хӗрарӑм ултавҫӑсем каланӑ счёт ҫине 200-е яхӑн пин тенкӗ хунӑ, ку укҫаран пысӑк пайне вӑл кредит илнӗ.

Шупашкарти 69 ҫулти пенсионер 146 пин тенкӗсӗр юлнӑ. Юрать, кредит илмен-ха. Хӑйӗн укҫи пулнӑ. 32-ри электромонтажник тавар туянас тесе 98 пинсӗр юлнӑ.

Инкеклӗ лару-тӑру министерстви тунӑ сӑн

Паян ирхине Шупашкар округӗнчи Анаткас Тӑрӑн ялӗнче пушар пулнӑ. «Хӗрлӗ автан» ташланине ирхи 5 сехетре асӑрханӑ.

Пушар 71 ҫулти хӗрарӑмӑн килӗнче алхаснӑ. Малтан хуралтӑ таврашӗ ҫунма тытӑннӑ. Ҫулӑм пӳрт тӳрри ҫине хӑвӑртах куҫнӑ. Шел те, кил хуҫи хӗрарӑмӗ урама тухса ӗлкӗреймен.

Пушар 128 тӑваткал метр ҫинче алхаснӑ. Ӑна сӳнтерме 13 ҫӑлавҫӑ тата 4 техника хутшӑннӑ.