Чӑваш Енре пурӑнакан пӗр арҫынна тӗклӗ тура тапӑннӑ. Пӑтӑрмах Красноармейски районӗнче пулса иртнӗ. Арҫын халӗ больницӑра, реанимаци уйрӑмӗнче, выртать.

Инкек Красноармейски районӗнчи Йӗпрем ялӗнче утӑ уйӑхӗн 6-мӗшӗнче ирхине пулса иртнӗ. «Газпром газораспределени Шупашкар» акционер обществин Ҫӗрпӳри филиалӗнче электрогазосварщик-врезчик пулса ӗҫлекен Йӗпрем ялӗнчи пӗр кил хуҫи патне ӗҫпе кайсан ӑна тӗклӗ тура тапӑннӑ. Ӑна аллинчен тата мӑйӗнчен сӑхса пӗтернӗ.

Арҫын тӑн ҫухатнӑ, анафилактика шокӗ пулнӑскере тухтӑрсем васкавлӑн реанимаци уйрӑмне илсе кайнӑ.

Халӗ ку пӑтӑрмах тӗлӗшпе республикӑн Ӗҫ сыхлавӗн инспекцийӗ тӗрӗслев пуҫарнӑ.

forum.na-svyazi.ru сӑнӳкерчӗкӗ

Ҫӗнӗ Шупашкарта ашшӗпе ывӑлӗ шыва путса вилнӗ. Инкек ӗнер, утӑ уйӑхӗн 5-мӗшӗнче, пулса иртнӗ.

Ашшӗпе ывӑлӗ шыва кӗме юраман вырӑнта пулнӑ иккен. Вӗсем шыв патне анакан бетон сарнӑ вырӑнта пулнӑ.

Инкек вырӑнне ҫӑлавҫӑсем ҫийӗнчех пырса ҫитнӗ. Водолаз арҫын ача виллине тӳрех тупнӑ, анчах унӑн ашшӗне тӳрех тупма май килмен,кӑштахран ӑна та асӑрахнӑ. Вӗсем иккӗшӗ те ҫипуҫпа пулнӑ.

Ҫапла вара пӗр киле пӗр кунта калама ҫук икӗ пысӑк хуйхӑ пырса ҫапнӑ. Ывӑлӗпе ашшӗ ҫипуҫпа пулнине кура, тен, вӗсенчен пӗрин йӑлмака бетон ҫинче ури шуса кайман-ши, тепри ӑна ҫӑлма тӑрӑшса хӑй те шыва путман-ши тесе те шухӑшлама май пур.

"PRO Город" видеовӗнчен илнӗ сӑнӳкерчӗк

Шупашкар хулинче пӗр водитель пассажирсем билет ыйтнӑран тарӑхнипе вӗсемпе вӑрҫма тапранса кайнӑ. Патӑрмах хулари 47-мӗш маршрутра пулса иртнӗ. Пассажирсем йӗрке хуралҫисене чӗнсе илнӗ. Ку истори мӗнпе вӗҫленни хальлӗхе паллӑ мар.

Водитель арҫын-пассажирпа тытӑҫса ҫапӑҫмах тапранса кайни видеокамерӑна лекнӗ. Ҫакна хӗрарӑм-пассажир ӳкернӗ. Водитель пассажирсен сумкине салонтан урапа тапса кӑларса перет. Унтан вӑл видео ӳкерекен хӗрарӑма та урама кӑнтаммӑн тӗксе кӑларса ярать. Ку самантра хӗрарӑм кӑшкӑрса ярать.

Пӑтӑрмаха лекнисем арӑмӗпе упӑшки пулнӑ. Шар курнӑ арҫын операци хыҫҫӑн пулнӑ иккен.

Ку хыпара вуланисем пассажирсене майлӑ пулни курӑнать. Вӗсен комментарийӗсем тӑрӑх хакласан, маршрут водителӗсем билет паманни, хӑйсене вара питӗ кӑнтам тытни пирки палӑрать.

Legion-Media.ru сӑнӳкерчӗкӗ

Филипп Киркоров юрӑҫ Америкӑри Пӗрлешӳллӗ Штатсен хысние 80 пин доллар тӳлӗ. Ку вӑл — налук укҫи.

Юрӑҫӑн Майаминче куҫман пурлӑх пур иккен. Пӗлтӗр виллӑн планировкине кӑштах ылмаштарнӑ, хӑш-пӗр пӳлӗмӗн пӗтӗмӗшле лаптӑкӗ кӑштах пӗчӗкленнӗ. Тӗп ҫуртри пӗрремӗш хут 12 тӑваткал метр пӗчӗкленнӗ, SPA-зона 7,5 тӑваткал метртан 2,8 тӑваткал метр таран чакнӑ.

2024 ҫулта артист америка хыснине 74,5 пине яхӑн доллар тӳленӗ, 2025 ҫулта — 77 пин доллар.

Филипп Киркоров артистӑн куҫман пурлӑх Латвире, Болгаринче пур. Майаминче виллӑна юрӑҫ 4,2 миллион долларпа (338,12 миллион тенкӗпе) туяннӑ, 2024 ҫулта вӑл ӑна 8 миллион долларпа (664,05 миллион тенкӗпе) сутма тӑнӑ, анчах туянакан тупӑнман.

Филипп Киркоровӑн икӗ ача ӳсет.

чеб.ру сӑнӳкерчӗкӗ

Кӑҫалхи нарӑс уйӑхӗнче ӳсӗр арҫын Шупашкарти аэропортра ҫапӑҫнӑ. Малтан вӑл тӗрӗсленӗ хыҫҫӑн кӗмелли зонӑна тӗрӗсленмесӗр кӗме хӑтланнӑ. Хӑйне асӑрхаттарнишӗн юратманран централизациленӗ видеосӑнав инспекторне питӗнчен чышкӑпа ҫапнӑ.

Унтан ӑна тытса чарнӑ та аэропортӑн полици пунктне илсе кӗртнӗ. Унта та вӑл пуҫтахланма чарӑнман, полици ӗҫченне, хӗрарӑма, кӳрентернӗ. Унтан полицин лини ҫинчи уйрӑмӗн пуҫлӑхне хырӑмран тата аллинчен ҫапнӑ, хырӑмран тапнӑ.

Урӑлсан арҫын айӑпа йышӑннӑ. Пуҫтахланнине, ӗҫри ҫынсемпе ҫапӑҫма тапранса кайнине, каласан та лӑпланманнине салтакри тусӗ вилнӗшӗн хытӑ куляннипе сӑлтавланӑ.

Унччен судпа айӑпланман арҫынна суд 1,8 ҫуллӑха тӗрмене хупса хумасӑр ирӗкрен хӑтарма йышӑннӑ.

forum.na-svyazi.ru сайтран илнӗ сӑнӳкерчӗк

Федерацин хӑрушсӑрлӑх службин Чӑваш Енри управленийӗн ӗҫченӗсем полицейски ӗҫченӗ Кӑркӑстана кайма тӑнине тупса палӑртнӑ. Ҫавӑншӑн ӑна 200 пин тенкӗ штраф хурса панӑ.

Ют ҫӗршыва тухса кайма тӑнӑ ҫын халӗ йӗрке хуралӗнче ӗҫлемест-ха. Апла пулин те унӑн ют ҫӗршыва кайма юраман. Мӗншӗн тесен вӑл патшалӑх вӑрттӑнлӑхӗпе ҫыхӑннӑ саккуна пӑснӑ.

Ҫав арҫын 2017–2024 ҫулсенче шалти ӗҫсен органӗнче тӑрӑшнӑ, патшалӑх вӑрттӑнлӑхӗ шутланакан даннӑйсене пӗлсе тӑнӑ. Ӗҫрен кайнӑ хыҫҫӑн унӑн 2025 ҫулхи чӳк уйӑхӗччен урӑх ҫӗршыва кайма юраман.

Экс-полицейски чӳк уйӑхӗччен тӑхтаса тӑрас темен, пӗлтӗрхи пуш уйӑхӗнче Кӑркӑстана кайса килес тенӗ. Ҫавӑншӑн ӑна суд 200 пин тенкӗ штраф тӳлеттерме йышӑннӑ. Суд приговорӗ вӑя кӗнӗ.

max.ru/progorod21 каналтан илнӗ сӑнӳкерчӗк

Шупашкарти Граждан урамӗнче пӗр водитель асламӑшӗпе (тен, кукамӑшӗ-тӗр. Вырӑсла хыпарта бабушка тенӗ) мӑнукне таптаса кайнӑ.

Ҫул урлӑ каҫнӑ чухне питех те асӑрхануллӑ пулмалла ҫав. Светофорӑн симӗс ҫутипе каҫнӑ чухне те малтан пӑхса илмелле. Светофор ҫук ҫӗрте пушшех те асӑрханмалла, мӗншӗн тесе тепӗр водитель йӑпӑр-япӑр чарӑнасшӑн мар.

Ҫавӑн пек инкек Шупашкарта пулса иртнӗ. Аслӑ ҫынпа ача Граждан урамӗнчи 20-мӗш ҫурт патӗнче пассажирсене каҫса ҫӳремелли вырӑнтан ҫул урлӑ каҫма тӑнӑ. Ҫав вӑхӑтра вӗсем ҫине пырса кӗнӗ.

«Лада Гранта» автомобиль урапи айне 55 ҫулти хӗрарӑмпа 6 ҫулти арҫын ача пулнӑ. Вӗсене иккӗшне те больницӑна илсе кайнӑ. Малтанласа палӑртнӑ тӑрӑх, вӗсен пуҫ мими чӗтреннӗ.

Инкек сӑлтавне палӑртассипе тӗпчевҫӗсем малалла ӗҫлеҫҫӗ.

Инкеклӗ лару-тӑру министерстви тунӑ сӑн

Канаш хулинче пушарнӑйсем пилӗк ҫулти хӗрачана ҫӑлнӑ. Ку инкек ӗнер, ҫӗртме уйӑхӗн 26-мӗшӗнче, каҫхине пулнӑ.

Хӗвелтухӑҫ микрорайонӗнче 5 хутлӑ ҫурт хваттерӗнче пушар тухнӑ – унта япала типӗтекен машина ҫунма тытӑннӑ. Кил хуҫи хӗрарӑмӗ лавккана кайнӑ, машинӑна вара сӳнтерсе хӑварман.

Ҫулӑм мачча, стенасем тата япаласем ҫине куҫнӑ. Килте вара пилӗк ҫулти хӗрача пӗчченех пулнӑ. Амӑшӗ ӑна пӗрле илсе кайман, хӑварнӑ.

Тӗтӗм тухнине курсан пушарнӑйсене кӳршисем чӗннӗ. Вӗсем вырӑна ҫитсен хваттер алӑкне ҫӗмӗрсе шала кӗнӗ, пӗчӗк хӗрачана тӗтӗм ӑшӗнчен илсе тухнӑ. Ҫав самант тӗлне ача сӗрӗмпе наркӑмӑшланса тӑнне ҫухатнӑ. Вӑйлах аптӑранӑскере Шупашкар хулинчи пульницӑна илсе ҫитернӗ. Халӗ унӑн пурнӑҫӗ хӑрушлӑхра мар.

Шупашкар хулинче пурӑнакан пӗр арҫын пӗлӗшне хӗнесе вӗлернӗ. Вилене тупнӑ хыҫҫӑн тӗпчевҫӗсем ҫын пурнӑҫне кам татнине тӗпчеме пуҫланӑ. Часах вӗсем кун пек усал ӗҫ тума пултарнӑ ҫын йӗрӗ ҫине те тухнӑ.

Тӗпчевҫӗсем палӑртнӑ тӑрӑх, кӑҫалхи ҫӗртме уйӑхӗн 20-мӗшӗнче 56 ҫулти арҫын ӳсӗр пулнӑ. Шупашкарти хваттерте вӑл пӗлӗшӗпе хирӗҫсе кайнӑ та чышкине ирӗке янӑ. Пӗрре сулса янипех ҫырлахман, хӗнесе пӗтернӗ. Суранланса пӗтнӗ арҫын инкек вырӑнӗнчех кӑштахран вилсе кайнӑ.

Ҫынна хӗнесе вӗлернӗ арҫынна пакунлисем кӑштахран тытса чарнӑ, ун тӗлӗшпе пуҫиле ӗс пуҫарнӑ. Суд ӑна вӑхӑтлӑха хупса хума йышӑннӑ.

Ҫав вӑхӑтрах тӗпчевҫӗсем ӗҫе малалла тӗпчеҫҫӗ, тӗрлӗ экспертиза ирттерӗҫ. Унтан ӗҫе суда ярса парӗҫ.

ИИ сӑнӳкерчӗкӗ

Шупашкар районӗнчи пӗр предприятире ҫынсене шалу тӳлемен. Парӑм виҫи 800 пин тенкӗрен иртсе кайнӑ.

Ҫынсене ӗҫлеттерме юратакан, анчах шалу тесен укҫа ҫук теме юратакан пӑтӑрмах унти «Энерги» тулли мар яваплӑ обществӑра пулса иртнӗ.

Предприятире шалу вӑхӑтра тӳленипе тӳлеменнине вырӑнти прокуратура тӗрӗслесе палӑртнӑ. Пакунлисем пӗтӗмлентнӗ тӑрӑх, 28 ҫын умӗнче предприяти 800 пин тенкӗ ытла парӑм пухса тултарнӑ.

Ӗҫ укҫине тӳлесе татассине надзор органӗ пӗрмай сӑнаса тӑнӑ. Сӑнанипех ҫырлахман-ха. Предприяти директорӗ тӗлӗшпе прокуратура административлӑ майпа ӗҫ пуҫарнӑ, яваплӑ ҫынна асӑрхаттару хучӗ ҫырса панӑ. Прокуратура хушша-хуппа кӗнин усси пулнӑ: халӗ шалу парӑмне йӑлтах тӳлесе татнӑ.