Улатӑр округӗнчи Восход поселокӗнче пурӑнакан Юрий Николаевияпа Альбина Борисовна Чистяковсем ҫамрӑк чухне паллашнӑ та паянхи кун та пӗрле. Вӗсем пӗрлешнӗренпе 55 ҫул ҫитнӗ.
Чистяковсем пурнӑҫне Восход поселокӗпе ҫыхӑнтарнӑ. Халӗ – тивӗҫлӗ канура. Мӑшӑр икӗ хӗр ӳстернӗ, халӗ пӗр мӑнукпа савӑнаҫҫӗ.
Кирек мӗнле лару-тӑрура та лӑпкӑ пулмалла, компромисс тупмалла – ҫапла шутлаҫҫӗ вӗсем. Ҫавӑнпа вӗсен ҫемйинче ӑнлану хуҫаланать.
Улатӑр районӗнчи Стемас ялӗнчи «кӗмӗл» нимеҫӗ Мускав укҫине тивӗҫнӗ. Вӑл «Молоды душой» (чӑв. Чунпа ҫамрӑк) грант конкурсне хутшӑннӑ. Ӑна федераци шайӗнче ирттернӗ. Конкурсра Улатӑр хӗрарӑмӗ «Социальные проекты» (чӑв. Социаллӑ проектсем) енӗпе ҫӗнтернӗ. Зоя Бусоргина 150 пин тенкӗ укҫана тивӗҫнӗ.
Конкурса ҫӗршывӑн 85 регионӗнчен 3 249 проект тӑратнӑ. «Социаллӑ проектсем» енӗпе 2 735 заявка пулнӑ. Вӗсенчен 103-шӗ финала тухнӑ.
Зоя Витальевна — Стемасри шкулта физкультура учителӗнче ӗҫлет. Унӑн стажӗ 40 ҫул ытла. Вӑл Восход поселокӗнчи ҫулланнӑ ҫынсене сывӑ пурнӑҫ йӑли-йӗркипе туслаштарассипе ҫине тӑрать. Нимеҫӗ пулса хӗрарӑм тӗрлӗ регионти пӗлтерӗшлӗ мероприятисене хутшӑннӑ.
Улатӑр районӗнче иртнӗ эрнере тӗрӗслев иртнӗ. Специалистсем Чӑваш Енӗн харпӑрлӑхӗнчи ял хуҫалӑх тӗллевӗллӗ ҫӗрпе вӗсен хуҫисем — арендаторсем — епле усӑ курнине пӑхса ҫаврӑннӑ.
Утӑ уйӑхӗн 6-мӗшӗнчи тӗрӗслев вӑхӑтӗнче 4305 гектар ҫӗр ҫинчи 13 участока пахаланӑ.
Тӗрӗслевҫӗсем Восход ял тӑрӑхӗнчи тата «Митра», «НДН Агро» тата «КиПиАй Агро Сеченово» тулли мар яваплӑ обществӑри ял хуҫалӑх ҫӗрӗсене тӗрӗсленӗ.
Ҫӗрпе епле усӑ курнине ытти районпа ял тӑрӑхӗнче те пахалаҫҫӗ. Тыр-пул е ытти ял хуҫалӑх культури ӳсмелли лаптӑксенче ҫум курӑкпа хытхура, йывӑҫ-тӗм хунавӗ ашкарсан акт ҫыраҫҫӗ. Кӑлтӑка кӑтартнӑ хута Росссельхознадозрӑн республикӑри управленине ярса параҫҫӗ, унтисем ҫӗр хуҫисене явап тыттараҫҫӗ.
Хӗлле урапа, ҫулла ҫуна хатӗрлеме хушнӑ чӑваш. Ҫакна шута илсе те пулӗ газпа тивӗҫтерекенсем станцисемпе пӑрӑхсене халех йӗркене кӗртессипе тимлеҫҫӗ. Маларах вӗсем темиҫе районта юсав ӗҫӗсем ирттернӗччӗ. Утӑ уйӑхӗн 28-мӗшӗнче Улатӑр тӑрӑхӗнче ҫак енӗпе тимлесшӗн. Кун пирки «Газпром межрегионгаз Шупашкар» тулли мар яваплӑ общество пӗлтерет.
2015 ҫул валли палӑртнӑ планпа килӗшӳллӗн «Газпром трансгаз Чулхула» тулли мар яваплӑ обществӑн Сеченевски магистральлӗ газ пӑрӑхӗсен линипе производство управленийӗ Улатӑрти газ валеҫекен станцире юсав ӗҫӗ ирттерӗ. Ҫав вӑхӑтра асӑннӑ станци га пама пачах чарӑнӗ. Станцири юсав утӑ уйӑхӗн 28-мӗшӗнче ирхи 9 сехетрен пуҫласа 17 сехетчен тӑсӑлӗ.
Улатӑрти газ валеҫекен станци Ахматово, Восход, Иваньково-Ленино, Миренки, Санаторный, Стемас, Чуварлей, Ялушево ялӗсене газпа тивӗҫтерет. Юсав пынӑ вӑӑхтра газ хатӗрӗсен кранӗсене хупма чӗнсе калаҫҫӗ.
Утӑ уйӑхӗн 5-мӗшӗнче Улатӑр районӗнчи Стемас ялӗнче ачасен «Мини-мисс» конкурс иртнӗ. Унта Стемасри Любовь Созонова, Диана Тынтаева, Восход поселокӗнчи Ульяна Константинова, Ольга Сурикова, Иваньково-Ленино ялӗнчи Софья Казанцева хутшӑннӑ. Вӗсем пурте — 7–10 ҫулсенче.
Пӗчӗкскерсем малтан хӑйсемпе паллаштарнӑ. Унтан илемлӗ тумӗсене кӑтартнӑ. Кайран «Эпӗ пысӑк пулсан» тема тавра калаҫнӑ. Вӗсем мӗнле кӗвӗсене итлесе пӗлнӗ, хӑйсен ӑсталӑхне кӑтартнӑ…
Конкурссем вӗҫленсен жюри ҫӗнтерӳҫӗсене палӑртнӑ. «Мини-мисс» ята Софья Казанцева ҫӗнсе илнӗ. Артист пултарулӑхӗпе Любовь Созонова палӑрнӑ. «Мисс черченлӗх» номинацире Ульяна Константинова палӑрнӑ. Ольга Сурикова «Мисс граци» пулнӑ, Диана Тынтаева та куракансене тӗлӗнтернӗ.
+2.3 °C