ШӖМ тунӑ сӑн

Ӗнер, ҫурла уйӑхӗн 26-мӗшӗнче, 15 сехет те 50 минутра Шупашкар хулинче Сӗнтӗрвӑрри ҫулӗ ҫинче «Ирбис» заправка тӗлӗнче «Шупашкар – Ҫӗнӗ Шупашкар» маршрутпа ҫӳрекен 101-мӗш «С» автобус тата «Лада Гранта» ҫапӑннӑ.

«Гранта» рулӗ умӗнче ларнӑ 34 ҫулти водитель сылтӑмалла пӑрӑннӑ чухне тӗп ҫулпа Ҫӗнӗ Шупашкар еннелле каякан автобуса ирттерсе яман. Ҫав самантра автобусра 30 яхӑн пассажир пулнӑ

«Лада Гранта» водителӗ тата унти 32 ҫулти пассажир хӗрарӑм аманнӑ, вӗсене пульницӑна илсе кайнӑ. ЧР ШӖМӗ пӗлтернӗ тӑрӑх, автобусра пулнӑ пассажирсем тухтӑрсенчен пулӑшу ыйтман.

Ҫакӑ паллӑ: икӗ водитель те урӑ пулнӑ. Анчах автобус водителӗн диагностика картти пулманран ун тӗлӗшпе административлӑ протокол ҫырнӑ.

forum.zarulem.ws порталта вырнаҫтарнӑ сӑнӳкерчӗк

Ҫӗрпӳре ӳсӗр водителе тытса чарнӑ. Эрех ӗҫсе лартнӑ арҫын «Лада Веста» машинӑра пӗччен пулман, салонта унӑн 10 ҫулти ывӑлӗ ларса пынӑ.

Патшалӑхӑн ҫул-йӗр хӑрушсӑрлӑхӗн инспекторӗсем шурӑ тӗслӗ «Лада Веста» автомобиле асӑрханӑ. Пакунлисен экпиажне асӑрхасан водитель пӑлханма пуҫланӑ. Машинӑна чарӑнма ыйтсан вӑл газ ҫине пусса малалла вӗҫтернӗ. Анчах инспекторсенчен тарса ӳкме май килмен. Ҫул-йӗр инспекторӗсем машинӑна чарса лартнӑ.

Руль умӗнче Канаш районӗнче пурӑнакан 38 ҫулти арҫын пулнӑ. Вӑл арӑмӗпе тата ачипе больницӑна кайнӑ тесе ӗнентерме хӑтланнӑ. Хӑйӗн чӗлхи хытах ҫыхланнӑ.

Канаш районӗнчи ӳсӗр ҫав арҫыннӑн машинине штрафстоянкӑна ӑсатнӑ. Унӑн пысӑк штраф тӳлеме, водитель прависӗр юлма тивӗ. Тата ҫул ҫитменнисен ыйтӑвӗпе ӗҫлекен комиссие те ӑна чӗнӗҫ.

max.ru/progorod21 каналта вырнаҫтарнӑ сӑнӳкерчӗк

Куславкка районӗнчи Якунькасси ялӗнче кинемей виллине тупнӑ.

84 ҫулти хӗрарӑм хӑйӗн хуҫалӑхӗнчи нӳхрепре выртнӑ.

Вырӑна Раҫҫей Федерацийӗн Следстви комитечӗн Чӑваш Енри управленийӗн Куславкка районӗнчи ӗҫченӗсем пырса ҫитнӗ. Вӗсем малтанласа палӑртнӑ тӑрӑх, кинемей нӳхрепри шӑши таврашне пӗтерес тесе малтанхи кун унта пластик савӑт ҫунтарнӑ. Тепӗр кунне ватӑ ҫын нӳхрепе аннӑ.

Унта ансан ватӑ ҫынна япӑх пулса кайма пултарнӑ тесе шухӑшлаҫҫӗ, мӗншӗн тесен усал сывлӑш уҫӑлса пӗтеймен.

Нӳхрепре шар куракансем унччен те пулман мар. Ҫавӑнпа та унта аниччен ӑна уҫӑлтарнине нимӗн те ҫитмест. Сыхлакана Турӑ сыхлать тесе ваттисем ахальтен каламанах пулӗ. Халӗ кинемейӗн ҫывӑх ҫыннисен пысӑк хуйха чӑтса ирттерме тивӗ.

https://vkvideo.ru/video-43776317_456268321 видеоран илнӗ скриншот

Ҫӗнӗ Шупашкарти Советски урамӗнче пулса иртнӗ пӑтӑрмах пирки тӗнче тетелӗнчи пабликсенче хыпар сарӑлнӑччӗ-ха.

Кӑҫалхи ҫурла уйӑхӗн 21-мӗшӗнче ҫул-йӗр хӑрушсӑрлӑхӗн инспекторӗсем ҫул ҫинчи инкек пирки хут ҫырма пуҫланӑ. Ҫав вӑхӑтра вӑл тӗлтен иртсе пыракан виҫӗ арҫын урлӑ-пирлӗ калаҫма, йӗрке хуралҫисене усал сӑмахпа кӳрентерме пуҫланӑ.

Пакунлисем хайхисене йӗркеллӗ тытма ыйтни те витӗм кӳмен. Йӗркене пӑсакансене полицие илсе кайма тӑрсан та вӗсем тӑна кӗме шутламан: йӗрке хуралҫисен тумӗнчен ярса илнӗ, вӗсене тӗксе яма хӑтланнӑ.

Пуҫтахсене лӑплантарма пакунлисен ятарлӑ хатӗрсемпе усӑ курма тивнӗ.

Халӗ ҫав усалсене суд тенкелӗ ҫине лартнӑ, вӗсене 7-12 кун таран ирӗкрен хӑтарма йышӑннӑ.

chrpss.rchuv.ru сӑнӳкерчӗкӗ

Чӑваш Енри ҫӑлавҫӑсем вӑрманта ҫухалса кайнӑ хӗрарӑма пулӑшнӑ.

Пӑтӑрмах ӗнер, ҫурла уйӑхӗн 24-мӗшӗнче, Сӗнтӗрвӑрри районӗнче пулса иртнӗ. Хӗрарӑм кӑмпана кайнӑ вӑрманта ҫухалса кайнӑ. Ҫул тупайман енне вӑл ҫӑлавҫӑсенчен пулӑшу ыйтнӑ.

Чӑваш Республикин Шыравпа ҫӑлав службин пресс-службинче пӗлтернӗ тӑрӑх, пӑтӑрмаха ҫакланнӑ хӗрарӑма шырама Сӗнтӗрвӑрринчи станци ӗҫченӗсем тухса кайнӑ.

Чӑваш Республикин Шыравпа ҫӑлав службин Сӗнтӗрвӑрринчи станцийӗн специалисчӗсем хӗрарӑма вӑрах шыраман, ӑна вӗсем вӑрмантан тухма пулӑшнӑ. Хӗрарӑм сывлӑхӗ чиперех, ҫавӑнпа тухтӑрсене чӗнсе илмен. Вӑрмантан тухса пӗтнӗ хыҫҫӑн савӑннӑ кӑмпаҫӑ ҫывӑх ҫыннисем патне, васканӑ. Кӑмпине те тупнӑ вара, ун пирки кӗске хыпарта пӗлтермен.

ҪҪХПИ тунӑ сӑн

Паян Шупашкар хулинче икӗ шкул ачи «Лада Гранта» машина айне лекнӗ. Ку Сӗнтӗрвӑрри ҫулӗ ҫинчи 21-мӗш ҫурт ҫывӑхӗнче 14 сехет те 15 минутра пулнӑ. Унта светофор та ларать. Анчах ачасем ӑна пӑхман – ҫул ҫине тухса чупнӑ.

Вӗсем – 6-мӗш тата 8-мӗш класра вӗренекенскерсем. Ачасем машина умнех сиксе тухнӑ – вӗсемшӗн вара светофор хӗрлӗ ҫутнӑ. Ачасем аманнӑ. Вырӑна ҫитнӗ тухтӑрсем вӗсене тӗрӗсленӗ те часрах пульницӑна илсе кайма йышӑннӑ. Вӗсен сывлӑхӗсене шурӑ халатлисем тӗрӗслеҫҫӗ.

Ҫакӑ паллӑ: «Лада Гранта» машина водителӗ ӳсӗр пулман. Вӑл медосвидетельствовани витӗр тухнӑ.

Йӗрке хуралҫисем ашшӗ-амӑшне ачасемпе ҫул-йӗр ҫинче хӑйсене мӗнле тытасси пирки тӑтӑшах калаҫмалли пирки аса илтереҫҫӗ.

Следстви комитечӗ тунӑ сӑн

Ҫурла уйӑхӗн 22-мӗшӗнче каҫхине Шӑмӑршӑ районӗнчи Хайпӑла ялӗ ҫывӑхӗнче Аслӑ Хырла юханшывӗнчен 35 ҫулти арҫын виллине ҫыран хӗррине кӑларнӑ.

Вырӑна оперативлӑ следстви ушкӑнӗ ҫитнӗ, следстви умӗнхи тӗрӗслев пуҫарнӑ. Халӗ арҫын мӗнле путнине уҫӑмлатаҫҫӗ.

Сӑмах май, ҫурла уйӑхӗн пуҫланнӑранпа Чӑваш Енре шыв ҫинче инкек пулнӑ иккӗмӗш тӗслӗх ку. Ҫурла уйӑхӗн 4-мӗшӗнче Ҫӗрпӳ хули ҫывӑхӗнче Мӑн Ҫавал юханшывӗнче 26 ҫулти арҫын путса вилнӗ.

Утӑ уйӑхӗнче вара республикӑра 10 ҫын путса вилнӗ, вӗсенчен виҫҫӗшӗ – ачасем.

Инкеклӗ лару-тӑру министерстви тунӑ сӑн

Шупашкар районӗнче пулнӑ пушарта, шел те, ҫын пурнӑҫӗ татӑлнӑ. Инкек Шорчекасси ялӗнче пулнӑ.

Ялта пушар тухни пирки паян ирхине 9 сехет те 3 минутра пушар службине шӑнкӑравласа пӗлтернӗ. Вырӑна виҫӗ ятарлӑ техника тата пушарнӑйсем ҫитнӗ.

Шорчекассинче мунча ҫуннӑ. Ҫӑлавҫӑсем ҫулӑма сӳнтернӗ хыҫҫӑн арҫын виллине тупнӑ. Инкек хыҫҫӑн ҫак хыпара пӗлтернӗ самантра ҫав арҫын кам пулнине палӑртайман, ку тӗлӗшпе ӗҫленӗ.

21.rosguard.gov.ru сӑнӳкерчӗкӗ

Шупашкар хулинче пурӑнакан пӗр каччӑ кафене кайни пӑтӑрмахпа вӗҫленнӗ.

Пӑтӑрмах ҫурла уйӑхӗн 14-мӗшӗнче, ирхи пӗр сехетре, пулса иртнӗ. Хулари «Перекресток» суту-илӳ ҫуртӗнчи виҫҫӗмӗш хутра вырнаҫнӑ кафере ҫав каччӑ хӑйне килӗшӳсӗр тытнӑ-мӗн. Вӑл унта канма пынисене тата клубра ӗҫлекенсене кансӗрленӗ. Администраторпа официант ӑна клубра кайма ыйтсан каччӑ вӗсене хӗнесе пӗтернӗ.

Инкек пирки клуб ӗҫченӗсем пакунлӑ йӗрке хуралҫисене пульт пусса систернӗ. Вӗсем пӑтӑрмах вырӑнне васкавлӑн пырса ҫитнӗ.

Ведомствӑлла мар хурал ӗҫченӗсем 21 ҫулти каччӑна полицие илсе кайнӑ. Пакунлисем пӑтӑрмаха тӗпчӗҫ. Халӗ, тен, каччӑ кулянать пулӗ те, чавса ҫывӑх та ҫыртма ҫук тесе ваттисем ахальтен каламан пуль ҫав.

Чӑваш Енӗн Инкеклӗ ӗҫсен министерствин Чӑваш Енри управленийӗн сӑнӳкерчӗкӗ

Муркаш районӗнчи пӗр килте вӗлле ҫунса кайнӑ. Пурӗ 20 штук. Инкек Куҫкин ялӗнче ҫурла уйӑхӗн 14-мӗшӗнче ирхи 5 сехетре пулса иртнӗ.

Ҫӑлавҫӑсем патне кӳршӗсем шӑнкӑравласа систернӗ. Шӑпах вӗсем пускилӗсен хуралтисем ҫунма пуҫланине асӑрханӑ.

Вырӑна 4 техника тата Инкеклӗ ӗҫсен министерствин 8 ӗҫченӗ пырса ҫитнӗ. Вӗсем пӳрте пушартан ҫӑлса хӑварма пултарнӑ, анчах хуралтӑсем вутпа кӗлленнӗ. Ҫав шутра — 20 вӗлле. Йывӑҫ пӳртӗн хыҫалти пайӗ те сиенленнӗ.

Пушар сӑлтавне специалистсем палӑртӗҫ.

Ҫав кунах Канаш районӗнчи Ҫӗнӗ Пӗршенер ялӗнче 38 ҫулти кил хуҫин мунчи хыпса илнӗ. Вут-ҫулӑма ҫӑлавҫӑсем пырса сӳнтернӗ.

Ҫӗмӗрлере вара Мир урамӗнчи 40-мӗш ҫуртра пӗр хваттерте кухньӑра пушар тухнӑ.