pravdapfo.ru сайтран илнӗ сӑнӳкерчӗк

Муркаш районӗнче пурӑнакан арҫынна ҫӗре ҫумкурӑк айне тунӑшӑн штрафланӑ. Кун пирки Россельхознадзорӑн республикӑри управленийӗ пӗлтернӗ.

Муркаш районӗнчи пӗр ялта пурӑнакан ҫав арҫыннӑн 47,76 гектар лартӑк ҫӗр пур иккен. Ӑна ял хуҫалӑх тӗллевӗпе усӑ курмалла. Апла пулсан, ун ҫинче ял хуҫалӑх культурине туса илмелле. Анчах хуҫа ҫӗрпе усӑ курмасть иккен. Сухаламан, вӑхӑтра ҫулса тирпейлемен ҫӗр часах хытхура тата йывӑҫ-тӗм хунавӗ айне пулать.

Кӑҫалхи нарӑс уйӑхӗнче ҫӗр хуҫине Россельхознадзор управленийӗ ҫӗре тивӗҫлипе уса курмалли пирки асӑрхаттару хучӗ ҫырса панӑ. Ҫӗре кӑҫалхи ҫӗртме уйӑхӗн 22-мӗшӗччен пусӑ ҫаврӑнӑшне кӗртмелле пулнӑ. Анчах унӑн хуҫи каланине итлемен.

Халӗ ку ӗҫе суд пӑхса тухнӑ та ҫӗр хуҫине штрафлама йышӑннӑ.

ҪҪХПИ тунӑ сӑн

Ӗнер, юпа уйӑхӗн 2-мӗшӗнче, Шупашкар округӗнчи Ишек ялӗ патӗнче хӗрарӑм вилнӗ: ӑна икӗ машина ҫапса кайнӑ.

Малтанлӑха палӑртнӑ тӑрӑх, каҫхи 6 сехетре хӗрарӑм «зебра» тӑрӑх каҫма тӑнӑ. Ҫавӑн чухне ӑна «Киа Спортейдж» машина, Ҫӗмӗрле хули енчен Шупашкар еннелле каяканскер, сулахай тӗкӗрпе лекнӗ. Руль умӗнче 1970 ҫулта ҫуралнӑ арҫын ларнӑ. Кун хыҫҫӑн хӗрарӑм ҫул ҫине ӳкнӗ те «Лада Приора» айне лекнӗ. Унта руль умӗнче 2001 ҫулта ҫуралнӑ арҫын пулнӑ.

Хӗрарӑм йывӑр сурансене пула васкавлӑ медпулӑшу киличчен вилнӗ. Вӑл кам иккенне тӳрех палӑртайман, вӑл 65-70 ҫулсенчи пек курӑннӑ.

https://vk.ru/wall-43618728_6039770 видеоран илнӗ сӑнӳкерчӗк

Казахстан президенчӗ оборона министрне отставкӑна янӑ. Кун пек йышӑнӑва Касым-Жомарт Токаев алӑ пуснӑ.

Асӑннӑ ҫӗршывӑн оборона министрне Даурен Косанова Каспи тинӗсӗнчи пӑтӑрмах хыҫҫӑн отставкӑна яма йышӑннӑ. Каспи тинӗсӗнчи Ҫарпа тинӗс вӑйӗсен вӗренӗвӗ вӑхӑтӗнче пысӑк инкек пулнӑ. Ҫавӑн чухне ҫанталӑк кӗтмен ҫӗртен япӑхнӑ, 14 ҫар ҫынни вилнӗ.

Ведомство пуҫлӑхне ӗҫрен кӑларса янипе пӗрлех Оборона министерствинчи пысӑк должноҫре ларнӑ пилӗк ҫынна тытса чарнӑ.

Сӑмах май каласан, Казахстан президенчӗ 1953 ҫулта Алма-Ата (халӗ Алматы) хулинче ҫуралнӑ. Унӑн ашшӗ – Кемель Токаев (1923-1986), Тӑван ҫӗршывӑн аслӑ вӑрҫин участникӗ, казах литературинче детективпа приключени жанрне пуҫарса янӑ. Амӑшӗ – Турар Шабарбаева (1931-2000), Алма-Атари ют чӗлхесен педагогика институтӗнче ӗҫленӗ. К.К. Токаев 1975 ҫулта Мускаври халӑхсем хушшинчи патшалӑх институтӗнчен вӗренсе тухнӑ.

Инкеклӗ ӗҫсен министерствин сӑнӳкерчӗкӗ

Паян Елчӗк районӗнчи пӗр ялта пушар тухнӑ. Чӑваш Енӗн Инкеклӗ ӗҫсен министерствин Чӑваш Енри управленийӗнче пӗлтернӗ тӑрӑх, Тӑрӑм ялӗнче мунча тата пӳрт ҫунать. Малтан пушар мунчара тухнӑ, кайран вут-ҫулӑм пӳрте тата хуралтӑсене ярса илнӗ.

Пушара 1-БИС текен ранг панӑ. Пушара сӳнтерме пушарпа кӗрешекенсем пырса ҫитнӗ. Вӗсем пушар тухнӑ ҫуртпа юнашар пӳрте вут-ҫулӑмран сыхласа хӑварма пултарнӑ. Инкекре ҫынсем пиҫсе кайса е сӗрӗмпе наркӑмӑшланса шар курман.

Пушар мӗнрен тухнине специалистсем палӑртӗҫ.

Пушара пула шар курнине укҫа ҫине куҫарса хакласан, вӑл кил хуҫисене калама ҫук пысӑк хуйхӑ илсе ҫитернине тавҫӑрма йывӑр мар. «Вӑрӑран юлать, пушартан юлмасть», — тесе ваттисем ахальтен каламан.

Чӑваш Енри пӗр студент хӑйӗн банк карттисене ют ҫынсене панӑ.

Республикӑри вӗренӳ заведенийӗсенчен пӗринче ӑс пухакан 19 ҫулти каччӑ банк карттисене ют ҫынсене 8500 тенкӗпе сутса янӑ.

Асӑннӑ карттӑсем пулӑшнипе ултавҫӑсем Чулхула арҫыннине 2 миллион тенкӗлӗх улталанӑ.

Пуҫиле шырав ӗҫӗн ӗҫченӗсем банк карттисен хуҫине, Чӑваш Енри студента, тупса палӑртнӑ. Ун тӗлӗшпе РФ Пуҫиле кодексӗн 187-мӗш статйин 3-мӗш пайӗпе пуҫиле ӗҫ пуҫарнӑ. Ку вӑл укҫана саккуна пӑсса куҫарнишӗн тенине пӗлтерет.

Шупашкарти каччӑна 3 ҫул таран ирӗкрен хӑтарма пултараҫҫӗ. Пӗр енчен, пӗчӗк ача та мар пек, банк карттине ҫынна сутса лармалла маррине ӑнланмалла пек. Ун пирки йӗрке хуралҫисем те час-часах асӑрхаттараҫҫӗ.

forum.zarulem.ws порталтан илнӗ сӑнӳкерчӗк

Чӑваш Енре автобус рулӗ умне ӳсӗрле ларнӑ водителе тытса чарнӑ.

Ӗнер, авӑн уйӑхӗн 24-мӗшӗнче, республикӑра «Автобус» рейд иртнӗ. Ҫавӑн чухне ӳсӗр водителе тытса чарнӑ. Вӑл тухтӑр патӗнче тӗрӗсленме килӗшмен. Ҫавна май Раҫҫейӗн правӑна административлӑ майпа пӑснин ҫинчен калакан кодексӗн 12.26-мӗш статйин 1-мӗш пайӗпе ӗҫ пуҫарнӑ. Ӑна 45 пин тенкӗ таран штрафлама тата водитель прависӗр ҫулталӑк ҫурӑран пуҫласа 2 ҫул таран хӑварма пултараҫҫӗ.

Рейд вӑхӑтӗнче 597 автобус тӗрӗсленӗ, 108 материал ҫырнӑ. 19 тӗслӗхре водительсем хӑрушсӑрлӑх пиҫиххине ҫыхмасӑр ҫӳренӗ, пассажирсене турттармалли правилӑна 6 хутчен пӑснӑ, техника енчен кӑлтӑк 6 хутчен тупса палӑртнӑ.

Кӑҫалхи сакӑр уйӑхра автобуспа ҫыхӑннӑ инкекре 2 ҫын вилнӗ.

Шупашкар хулинче Ленин Комсомолӗн урамӗнче «зебра» ҫинче хӗрарӑмпа хӗрачана таптаса кайнӑ автокран водителӗ тӗлӗшпе пуҫиле ӗҫ пуҫарнӑ. Руль умӗнче Ҫӗнӗ Шупашкар хулинче пурӑнакан 63 ҫулти арҫын ларнӑ. Йӗрке хуралҫисем палӑртнӑ тӑрӑх, кӑҫал ҫул-йӗр ҫинчи йӗркене пӑснӑшӑн административлӑ майпа 36 хутчен явап тыттарнӑ. Ытларахӑшӗ – пысӑк хӑвӑртлӑхпа ҫӳренӗшӗн.

Аса илтерер: инкек ӗнер, авӑн уйӑхӗн 24-мӗшӗнче, 10:15 сехетре Ленин Комсомолӗн урамӗнче пулнӑ. 41 ҫулти хӗрарӑм хӗрачапа пӗрле «зебра» урлӑ каҫнӑ, унта светофор ҫук. Ҫав вӑхӑтра вӗсем ҫине автокран пырса кӗнӗ. Водитель таптаса кайсан кӑна чарӑннӑ.

Хӗрача тӗлӗнмелле майпа чӗрӗ юлнӑ, ӑна тухтӑрсем вырӑнта пулӑшу панӑ, пульницӑна илсе кайман. Хӗрарӑм вара вӑйлӑ суранланнӑ, вӑл васкавлӑ медпулӑшу киличченех вилнӗ.

max.ru/progorod21 каналтан илнӗ сӑнӳкерчӗк

Ӳсӗр ҫыншӑн тинӗс те чӗркуҫҫи таран теҫҫӗ те, Сӗнтӗрвӑрри районӗнче пурӑнакан арҫын ӳсӗр пуҫпа артистланма тапранса кайнӑ.

«Ауди» ҫулпа унталла та кунталла пӑрӑнса кайса пынине асӑрхасан пакунлисем ӑна чарнӑ. Руль умӗнчине алкотестерпа тӗрӗсленӗ те пӗр литр юнра 1,430 миллиграмм спирт пулнине палӑртнӑ. Водитель тухтӑрсем патне кайса тӗрӗсленме килӗшмен, хӑйӗн вара водитель удостоверенийӗ те пулман.

Ҫул-йӗр инспекторӗсем умӗнче арҫын хытах артистланма тапранса кайнӑ: ӳкӗннӗҫи те пулнӑ, унтан пакунлисене кӳренсе кӑтартнӑ, ҫул ҫине тухса ларнӑ. Анчах машинӑна пӗрех штрафстоянкӑна ӑсатнӑ.

Кайран арҫын йӗрке хуралҫисем машинӑна хӑйсене ӗҫпе кирлӗ пулнӑран илсе кайрӗҫ тесе евитлесе шӑнкӑравланӑ.

Халӗ ӑна суйса шӑнкӑравланӑшӑн пуҫиле майпа явап тыттарма пултараҫҫӗ.

s://max.ru/progorod21 каналтан илнӗ сӑнӳкерчӗк

Ҫӗнӗ Шупашкарта пурӑнакан яш гаражра вилнӗ.

Ача унта мопед юсама кайнӑ. Ҫавӑн чухне вӑл тӗтӗм-сӗрӗмпе наркӑмӑшланнӑ тесе шухӑшлаҫҫӗ.

Ҫав ача пӗр каҫхине «Ольдеевский» гараж кооперативӗнче техникӑпа аппаланнӑ чухне хӑйне япӑх туйма пуҫланӑ. Инкек вырӑнне васкавлӑ пулӑшу паракан тухтӑрсем ҫийӗнчех пырса ҫитнӗ иккен, анчах вӗсем яша ҫӑлса хӑварайман.

Гаражра ытти ҫамрӑк та пулнӑ. Тухтӑрсене вӗсем чӗнсе илнӗ курӑнать.

Вырӑна пырса ҫитнӗ тухтӑрсем ачан пурнӑҫне ҫӑлса хӑварайман.

Халӗ инкек сӑлтавне специалистсем палӑртӗҫ. Вӗсем малтанласа шухӑшланӑ тӑрӑх, гаражра мопед юсанӑ чухне яш бензин пӑсӗпе е мопед кӑларакан сӗрӗмпе наркӑмӑшланма пултарнӑ. Пакунлисем ку ӗҫе халӗ малалла тӗпчеҫҫӗ.

Шупашкар хулинче ҫул-йӗр ҫинче пысӑк инкек пулнӑ: автокран 41 ҫулти хӗрарӑма вилмеллех таптаса кайнӑ.

Ку паян 10:15 сехетре Ленин Комсомолӗн урамӗнче пулнӑ. Хӗрарӑм хӗрачапа пӗрле «зебра» урлӑ каҫнӑ, унта светофор ҫук. Ҫав вӑхӑтра вӗсем ҫине автокран пырса кӗнӗ. Водитель таптаса кайсан кӑна чарӑннӑ.

Хӗрача тӗлӗнмелле майпа чӗрӗ юлнӑ, ӑна тухтӑрсем вырӑнта пулӑшу панӑ, пульницӑна илсе кайман. Хӗрарӑм вара вӑйлӑ суранланнӑ, вӑл васкавлӑ медпулӑшу киличченех вилнӗ.

Халӗ йӗрке хуралҫисем ӗҫ-пуҫа уҫӑмлатаҫҫӗ.