Муркаш округӗнчи Ильинка ялӗнчи ватӑ юман тавра хӑтлӑх кӗртеҫҫӗ. Вӑл – 373 ҫулта, пӗлтӗр Пӗтӗм Раҫҫейри «Ҫулталӑкри йывӑҫ» конкурсра пӗрремӗш вырӑн йышӑннӑ. Ҫавна май ана сыватмалли процедурӑсем тумалли сертификат панӑ.

Ҫулла Мускаври экспертсем килсе юмана санитари тӗлӗшпе каснӑ, диагностика тунӑ. Ҫирӗпрех пултӑр тесе тымарне шӗвӗ им-ҫам янӑ. Нумаях пулмасть ун таврашне илемлетмелли проекта хатӗрлесе пӗтернӗ.

demo-chrio.rchuv.ru сайтри сӑн

Ҫӗнӗ Шупашкарти 18-мӗш лицейри историпе обществознани вӗрентекенӗ Артем Максимов Раҫҫей шайӗнче иртекен «Ҫулталӑкри вӗрентекен» конкурсра Чӑваш Ен чысне хӳтӗлет.

Конкурс пуҫланнӑ. Пӗрремӗш тур Саратов хулинче иртет. Артем Владимирович унта обществознанипе урок ирттернӗ, ачасем кӑсӑклӑ ыйтусене сӳтсе явнӑ. Халӗ унӑн «Педагогпа – интервью» тапхӑр витӗр тухмалла: унта жюри пайташӗсемпе калаҫӗҫ. Кайран 20 вӗрентекен иккӗмӗш тура хутшӑнӗ.

Конкурс ҫӗнтерӳҫисене Вӗрентекен кунӗнче, юпан 5-мӗшӗнче, чыслӗҫ.

m.ok.ru сайтри сӑн

Ҫанталӑк питех сивӗ тӑманнипе, талӑкри вӑтам температура 8 градус ӑшӑран сахалрах пулманнипе Шупашкарта хутса ӑшӑтмалли сезона пуҫӑнман-ха. Ку ыйтӑва администрацире иртнӗ планеркӑра сӳтсе явнӑ.

Синоптиксем малтанлӑха пӗлтернӗ тӑрӑх, ҫанталӑк юпа уйӑхӗн варриччен ӑшӑ тӑма пултарать. Ҫавна май мэри ӑшӑ хӑҫан яма планланине пӗлтернӗ: юпа уйӑхӗн 10-мӗшӗнче.

Сӑмах май, пӗлтӗр Шупашкарта юпа уйӑхӗн 9-мӗшӗнче ӑшӑ панӑ.

Галина Григорьева сӑнӳкерчӗкӗ

Чӑваш Ен делегацийӗ нумаях пулмасть Кабарда-Балкари Республикинче пулнӑ.

Йӑхташӑмӑрсене Нальчик чӑвашсен общество организацийӗн

председателӗ Алена Чернова ӑшшӑн кӗтсе илнӗ.

Чӑвашсене «Ҫӑлкуҫ» уйлӑхра

вырнаҫтарнӑ, республика тӑрӑх кӑтартса ҫӳренӗ.

Чӑвашсен делегацийӗ Кабарда-Балкари ҫӗрӗ ҫинче Чӳк ирттернӗ, юпа вырнаҫтарнӑ. Ӑна Алексей Казаков скульптор хатӗрленӗ.

Ҫемье архивӗнчи сӑн

Улатӑр округӗнчи Восход поселокӗнче пурӑнакан Юрий Николаевияпа Альбина Борисовна Чистяковсем ҫамрӑк чухне паллашнӑ та паянхи кун та пӗрле. Вӗсем пӗрлешнӗренпе 55 ҫул ҫитнӗ.

Чистяковсем пурнӑҫне Восход поселокӗпе ҫыхӑнтарнӑ. Халӗ – тивӗҫлӗ канура. Мӑшӑр икӗ хӗр ӳстернӗ, халӗ пӗр мӑнукпа савӑнаҫҫӗ.

Кирек мӗнле лару-тӑрура та лӑпкӑ пулмалла, компромисс тупмалла – ҫапла шутлаҫҫӗ вӗсем. Ҫавӑнпа вӗсен ҫемйинче ӑнлану хуҫаланать.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра паянтан ҫӗнӗ ыын ертсе пыма тытӑннӑ. Яваплӑ ҫак тилхепене Ҫӗнӗ Шупашкарти ача пахчисенчен пӗрин заведующийӗ пулса тӑрӑшнӑ Светлана Милкинӑна тыттарнӑ.

Светлана Николаевна — пӗлӗвӗпе социаллӑ педагог.

Коллектива ҫӗнӗ ертӳҫӗпе Чӑваш Енӗн ӗҫ тата социаллӑ хӳтлӗх министрӗ Алена Елизарова паллаштарнӑ май центр пирки нумай ӑшӑ сӑмах каланӑ, вӑл пултаруллине, ытти ҫавӑн пек учрежденишӗн тӗслӗх пулса тӑнине палӑртса хӑварнӑ.

Министр центр директорӗн тивӗҫне явапӑхпа ҫулталӑк ытла ӑнӑҫлӑ пурнӑҫланӑ Аркадий Скворцова та (учрежденире вӑл — директор ҫумӗ) тав тунӑ.

"Контактри" сӑн

Чӑваш Енре хутӑш чӑвашсен «Тапӑ» фестивалӗ иртнӗ. Вӑл Тӑвай округӗнче пулнӑ.

Фестивале тӗрлӗ округран килнӗ: Вӑрмар, Куславкка, Шупашкар, Сӗнтӗрвӑрри, Ҫӗрпӳ, Красноармейски тӑрӑхӗсенчен. Вӗсем историпе, йӑла-йӗркепе, ӳнерпе пайланма пухӑннӑ.

Фестивале хутшӑнакансем тӗрлӗ инструмент каланӑ, юрланӑ, историсем каласа кӑтартнӑ. «Алран кайми аки-сухи» юрлани чи хумхануллӑ самант пулнӑ.

ШӖМ тунӑ сӑн

Карачура лесничествинче 13 вӗренене, икӗ юмана, пӗр ҫӑкана такам каснине асӑрханӑ. Каярахпа вутта 67 ҫулти арҫыннӑн дачинче тупнӑ.

Арҫын йывӑҫсене мӗншӗн каснине ӑнлантарнӑ: вӗсене пула сулхӑн, ҫавӑнпа пахча ҫимӗҫ ӳсмест-мӗн. Йывӑҫ касмашкӑн ятарласа ирӗк илмеллине пӗлмен имӗш вӑл.

Ҫапах явапне тытмалла. Тивӗҫлӗ канури арҫын тӗлӗшпе пуҫиле ӗҫ пуҫарнӑ. ЧР Ҫутҫанталӑк министерстви пӗлтернӗ тӑрӑх, йывӑҫсене касса вӑл ҫур миллиона яхӑн тенкӗлӗх тӑкак кӳнӗ.

Шупашкарти 2-мӗш лицейра ачасене истори предметне вӗрентекен Петр Михеев «Классная тема» телешоуна хутшӑнни пирки пӗлтернӗччӗ. Вӑл финала тухнӑ. Халӗ, авӑнӑн 23-29-мӗшӗсенче, сасӑлав иртет.

Петр Михеев «Святые России» видеурок хатӗрленӗ. Уншӑн ҫак каҫӑпа сасӑлама пулать: https://vk.com/feed?w=poll-207448939_980197024.

Аса илтерер: проекта хутшӑнма 6,5 пин заявка килнӗ. Чи кӗҫӗнни 21 ҫулта, чи асли 77-ре. Финали сасӑлава халӗ 35 педагог хутшӑнать.

culture.cap.ru сӑнӳкерчӗкӗ

Канаш муниципаллӑ округӗнчи Мӑкӑр ялӗнчи клуба ҫӗнетсе пӗтренпепе пӗрех.

Округ пуҫлӑхӗ Сергей Михайлов Мӑкӑр ялӗнче пурӑнакансем питех те хастар тесе каланӑ май вӗсем тӗрлӗ конкурса хутшӑннине, тӗрленине, ҫыхнине, юрлама ӑста пулнине пӗлтернӗ. Кӗмӗл волонтёрсен отрячӗ те пур-мӗн.

Ялта 400 ытла ҫын пурӑнать. Ялти клуб вӗсене питех те кирлӗ. Кивӗ ҫурт юрӑхсӑра тухнӑ, туалет та урамра-мӗн. Малашне те йӑлитах урӑхла пулӗ.

Ҫӗнӗ ҫурт авӑн уйӑхӗн вӗҫӗнче уҫӑлӗ.