Инкеклӗ лару-тӑру министерстви тунӑ сӑн

Паян ирхине Шупашкарти Агрегат савутӗнче пушар пулнӑ. Унта склад ҫуннӑ.

Пушар ирхи 7 сехет те 8 минутра тухнӑ. Ҫулӑм хатӗр продукци упранакан пӗр хутлӑ ҫуртра алхасма тытӑннӑ. Ҫулӑм 20 тӑваткал метрлӑ офис пӳлӗмне ярса илнӗ.

Пушара 15 минутран сӳнтернӗ. Халӗ инкек сӑлтавне уҫӑмлатаҫҫӗ. Палӑртмалла: ҫулталӑк пуҫланнӑранпа республикӑра 1286 пушар пулнӑ.

gryazoveckij-r19.gosweb.gosuslugi.ru сайтри сӑн

Ҫӗмӗрле округӗнчи 48 ҫулти арҫын Мускава кайса палламан ҫынна укҫа куҫарса панӑ, унтан Хусана кайса машинине сутса янӑ, укҫине каллех куҫарса панӑ. Унтан тин вӑл полицие кайнӑ.

Ултавҫӑсем стандартлӑ схемӑпа усӑ курнӑ: мессенджерта шӑнкӑравланӑ, унӑн счечӗ ҫинчи укҫана террористсем патне куҫарнӑ имӗш. Унпа йӗрке хуралҫи калаҫать имӗш.

Арҫын кун пирки арӑмне каланӑ. Лешӗ ку ултавҫӑсем пулнине каланӑ. Анчах арҫын ӗненмен. Малтан вӑл хӑйсен тӑрӑхӗнче 2,5 млн кредит илнӗ. Унтан Мускава кайса укҫана палламан ҫынна тыттарнӑ. Мускавра вӑл тепӗр 1,3 млн кредит илсе палламан ҫынна панӑ.

Киле таврӑннӑ чухне ун патне каллех шӑнкӑравланӑ. Унӑн машини арестра имӗш. Арҫын Хусана кайса ӑна йӳнӗрехпе сутнӑ. Укҫине каллех куҫарса панӑ.

Иномаркк ҫухалнине арӑмӗ асӑрханӑ, ыйтма пуҫланӑ. Арҫын нумай вӑхӑт каласа паман, мӗншӗн тесен следстви пирки пӗлтерместӗп тесе сӑмах панӑ. Кайран арӑмне итлесе полицие кайнӑ. Ҫапла вӑл ултавҫӑсене пӗтӗмпе 5 млн та 480 пин тенкӗ куҫарса панӑ.

Валентина Алексеева архивӗнчи сӑн

Шупашкарта ҫуралса ӳснӗ, халӗ Мускавра вӗренекен Валентина Алексеева Мексикӑра иртекен илем конкурсне хутшӑнни пирки пӗлтернӗччӗ. Паян ирхине кӑтартусем паллӑ пулнӑ.

Пирӗн ентеш малтан топ-30 йыша кӗнӗ, унтан - топ-12 йыша. Анчах топ-5 йыша Валентина лекеймен. Унта Чили, Перу, Венесуэла, Дани тата Пуэрто Рико пикисем кӗнӗ. Ҫӗнтерӳҫӗ ятне вара Дани хӗрӗ Виктория Кьер тивӗҫнӗ.

Палӑртмалла: конкурса тӗнчери 130 пике хутшӑннӑ.

"Контактри" сӑн

Анна Хмелева Атӑлҫи федераци округӗнче шахматла выляссипе иртнӗ ӑмӑртура 19 ҫул тултарман хӗрсен хушшинче ылтӑн медаль ҫӗнсе илнӗ. Хӑвӑрт шахматла выляса та вӑл палӑрнӑ: пӑхӑр медаль илнӗ. Денис Кириллов та маттур: хӑйӗн ӳсӗмӗн категорийӗнче виҫҫӗмӗш вырӑна тухнӑ.

Палӑртмалла: ӑмӑрту Самар облаҫӗнче иртнӗ. Уҫта 14 регионтан 400 ҫын хутшӑннӑ.

ШӖМ тунӑ сӑн

ШӖМӗн Шупашкарти уйрӑмӗн ӗҫченӗсем Тӑван ҫӗршывӑн Аслӑ вӑрҫине хутшӑннӑ салтакӑн ҫырӑвне вулама пулӑшнӑ. Виҫ кӗтеслӗ ҫыру хула ҫыннин килӗнче нумай ҫул упраннӑ. Анчах текст тӗсӗ пӗтме пуҫланӑ, вуланман. Полицейскисем ятарлӑ программӑпа усӑ курса ӑна вулама пулӑшнӑ.

Ҫырура И.В. Сустин хӗрлӗ армеец амӑшне ывӑлӗ 1944 ҫулхи утӑн 25-мӗшӗнче Эстонири Нарвы хулине ирӗке кӑларнӑ чухне вилнине пӗлтернӗ. Сустин пуҫ хунӑ салтакӑн япалисен хушшинче ҫыру тупнӑ: вӑл вилсен кун пирки ҫывӑх ҫыннисене пӗлтерме ыйтнӑ.

"Контактри" сӑн

«Ватлӑх - савӑнӑҫ» ырӑ кӑмӑллӑх фончӗ Вӑрмарти комплекслӑ центрпа пӗрле ватӑ ҫынсене малалла пулӑшать. Нумаях пулмасть вӗсем кӑмака хутса пурӑнакан, 65 ҫултан аслӑрах тата сывлӑх енчен хавшак ҫынсене вутӑ кӳрсе панӑ.

«Ку питӗ кӑмӑллӑ! Эсир пире ӑшӑтатӑр кӑна мар, малалла пурӑнма шанчӑк, ӗненӳ тата вӑй парнелетӗр», - тенӗ ватӑсем.

Кун пек пулӑшу чӑннипех те пархатарлӑ. Вӑл пурнӑҫра йывӑр лару-тӑрӑва лекнӗ ҫынсене уйрӑмах кирлӗ.

Синоптиксем пӗлтернӗ тӑрӑх, паян каҫхине тата ҫӗрле юр ҫӑвӗ, ҫил-тӑман вӗҫтерӗ. Ыран ир тӗлне ҫӗр шурӑ юрпа хупланӗ.

Анчах хальхинче юр нумай выртмӗ. Вырсарникун термометр 0-рен ӑшӑрах кӑтартӗ. Ҫавӑн пек ҫанталӑк ҫитес эрне тӑршшӗпех тӑрӗ. Кӑнтӑрласерен 5-7 градус таран ӑшӑтӗ.

Малтанлӑха пӗлтернӗ тӑрӑх, чӳк уйӑхӗн виҫҫӗмӗш декадинче кӑна 0-рен сивӗрех пулӗ.

Инкеклӗ лару-тӑру министерстви тунӑ сӑн

Паян Елчӗк округӗнчи Хӑвӑлҫырма ялӗнче ирхи 7 сехетре Ҫаран урамӗнче пушар пулнӑ. Ҫӑлавҫӑсем пушара сӳнтерсен арҫын виллине тупнӑ. Вӑл 42 ҫулта пулнӑ.

Пушара сӳнтернӗ ҫӗре икӗ техника хутшӑннӑ. Ҫулӑм пӳртри пӗр пӳлӗме тӗп тунӑ.

Палӑртмалла: ҫулталӑк пуҫланнӑранпа Чӑваш Енре 1278 пушар пулнӑ. Вӗсенче 48 ҫын вилнӗ, 66-ӑн аманнӑ. 128 ҫынна ҫӑлма май килнӗ.

Чӑваш патшалӑх гуманитари ӑслӑлӑхӗсен институчӗ тата «Яндекс» чӑваш калаҫӑвӗн синтезаторне шухӑшласа кӑларасшӑн. Ку ӗҫе институт чӑвашла пӗлекен хӑй ирӗкҫӗсене явӑҫтарасшӑн.

Нумаях пулмасть видеоконференци мелӗпе ӗҫлӗ ушкӑнӑн черетлӗ тӗлпулӑвӗ иртнӗ. Унта малалла мӗнле ӗҫлемеллине палӑртнӑ.

Сӑмах май, Яндекс-куҫаруҫӑра чӑваш чӗлхи 2020 ҫулхи нарӑс уйӑхӗнче тупӑннӑ. Тӑватӑ ҫул ҫурӑран ӑна Google-куҫаруҫӑра пурнӑҫланӑ.

cap.ru сайтри сӑн

Ҫӗнӗ Шупашкарти 4-мӗш шкулта нумай ача апатпа наркӑмӑшланнӑ. Пульницӑна пулӑшу ыйтма 20 ҫын пынӑ, вӗсенчен 19-шӗ – ачасем.

Виҫҫӗшне инфекци уйрӑмне вырттарнӑ. Ыттисене медпулӑшу панӑ хыҫҫӑн киле сипленме янӑ. Пульницӑна пынӑ пӗтӗм ҫыннӑн пӗр пек чир паллисем пулнӑ: вӗсем апатпа ҫыхӑннӑ.

Прокуратура тата Следстви комитечӗн Чӑваш Енри Следстви управленийӗ тӗрӗслев пуҫарнӑ. Ҫакӑ паллӑ: ҫак шкулта апатланӑва йӗркелекенни – Шупашкарти 2-мӗш ҫӑкӑр савучӗ.