21.mchs.gov.ru сӑнӳкерчӗкӗ

Ӗнер, авӑн уйӑхӗн О-мӗшенче, Шупашкар районӗнчи «Утёс» санаторире пушар тухнӑ. Инкек каҫхи сакӑр сехет хыҫҫӑн пулнӑ.

Вут-ҫулӑм санаторири пилӗк хутлӑ ҫуртра алхасма тытӑннӑ. Пушара пӗр сехетре сӳнтерме май килнӗ. Вут-ҫулӑма сӳнтерме 6 машина пырса ҫитнӗ.

Вут-ҫулӑм алхаснӑ ҫуртпа санатори усӑ курмасть иккен. Пӑтӑрмах сӑлтавне специалистсем палӑртӗҫ.

forum.na-svyazi.ru порталтан илнӗ сӑнӳкерчӗк

Ӗнер, авӑн уйӑхӗн 6-мӗшӗнче, Шупашкар районӗнчи Питтукассинче чикансен хушшинче ӑнланманлӑх сиксе тухнӑ. Йӑлари ыйтупа ҫыхӑннӑ тавлашу «ытлашши сурансемсӗр вӗҫленнӗ». Кун пирки «Ҫыхӑнура» форумра пӗлтернӗ.

Пӗр-пӗринпе ҫапӑҫма тытӑнса кайнисене йӗрке хуралҫисем илсе кайнӑ.

Ҫавӑн хыҫҫӑн Алькеша (унта чикансем йышлӑ пурӑнаҫҫӗ) полицин тата Росгварлин патрулӗсем пырса ҫитнӗ. Унта Росгвардин хӗҫ-пӑшаллӑ «Тигр» автомобилӗ те пулнӑ.

cheb.ru сӑнӳкерчӗкӗ

Шупашкарти хӑш-пӗр шкула КПП витӗр кӗме тивӗ. Вырӑсларан ҫав аббревиатурӑна чӑвашла куҫарсан тӗрӗслевпе пропуск пункчӗ тенине пӗлтерет.

КППсене, сӑмахран, хулари 43-мӗш, 46-мӗш тата 53-мӗш шкулсен умӗнче лартса тухнӑ иккен.

Сheb.ru порталта Алексей Радченко пӗлтернӗ тӑрӑх, асӑннӑ виҫӗ шкулта та территори хӑтсӑр. Вӗсенче футброл уйӗсене СССР самани хыҫҫӑн ҫӗнетмен. «Картишсемпе КППсем — шкулсене уҫнӑ хыҫҫӑн туса лартнӑ чи пӗлтерӗшӗ те хаклӑ объектсем-тӗр», — йӗплесе илнӗ статья авторӗ.

«Карта тытни шкул ачисемшӗн пысӑк чӑрмав мар. Усал шухӑшлисем вара ун урлӑ ним мар сиксе каҫайӗҫ», — пӗтӗмлетнӗ Алексей Радченко.

https://vk.com/wall391792345_4922

Чӑваш кӗнеке издательствинче «Чувашская быль Галины Изратовой» кӗнеке-альбом кӑларма хатӗрленеҫҫӗ. Автор-составителӗ – Елена Енькка.

Галина Изратова (1957–2016) паллӑ ӳнерҫӗ. Вӑл, тӗпрен илсен, тӑмран йӑваласа пуканесем ӑсталанӑ тата пир-авӑртан пуканесем ӑсталанӑ. Ҫав ӗҫсем ансат, анчах вӗсенче чӑваш чунӗ сисӗнет.

Кӗнеке темиҫе ярӑмран тӑрӗ: авторӑн кун-ҫулӗпе паллаштарнинчен тытӑнса унӑн ӗҫӗсене кӑтартса пани таран.

Марина Карягина халӑх тетелӗнчи страницинчен илнӗ сӑнӳкерчӗк

«Пулаҫҫӗ вӗт тӗнчере ҫакӑн пек пултаруллӑ та ӗҫчен хӗрсем: пӑрчӑкан пек вӑр-вар, чӗкеҫ пек чӗвӗлти, кӑввик кӑвакарчӑн пек кӑмӑллӑ!» Ҫакӑн пек ырласа ҫырнӑ Марина Карягина тележурналист халӑх тетелӗсенчен пӗринчи хӑйӗн страницинче. «Хальхинче Дина Трякова ал ӗҫ маҫтӑрӗ пирки-ха сӑмахӑм», — тенӗ вӑл.

Йӗреҫ районӗнчи Пучинке хӗрӗ Дагестанра иртнӗ халӑх пултарулӑхӗн фестивалӗнче ӗҫтешӗсемпе пӗрле Чӑваш Ен культурипе паллаштарнӑ. Марина Карягина унран илнӗ интервью «Россия 1» каналпа эфира тухӗ.

cap.ru cӑнӳкерчӗкӗ

Вӑрнарти 2-мӗш вӑтам шкулта акӑлчан чӗлхине вӗрентекен Ольга Физер уроксенче Иван Яковлевпа паллаштарасшӑн.

«Чӑваш Енри ҫулталӑк учителӗ – 2019» конкурс ҫӗтерӳҫи тата лауреачӗ хӑйӗн педагогика опычӗпе паллаштарнӑ. Хӗрарӑм уроксенче чӑваш халӑхне ҫутта кӑларнӑ Иван Яковлев ҫинчен каласа кӑтартать.

Педагог тата вӗрентекен шухӑшланӑ тӑрӑх, Иван Яковлев — наци паттӑрӗ. Чӑваш Енре ун ҫинчен пӗлеҫҫӗ-ха, анчах ун пирки республика тулашӗнче те пӗлмелле, ун ҫинчен ытти чӗлхепе те каласа кӑтартмалла тесе шухӑшлать Ольга Валериановна.

t.me/chuv_kray каналтан илнӗ сӑнӳкерчӗк

Чӑваш Енре пурӑнакансем хӑйсен ывӑл-хӗрне вырӑссен авалхи ячӗсене хума юратаҫҫӗ. 8 уйӑхри статистикӑна тишкерсен пирӗн республикӑра Сухвисемпе Тарисем, Кириласемпе Макҫӑмсем йышлӑ.

Сӑмах май каласан, асӑннӑ тапхӑрта 6 491 пепке ҫут тӗнчене килнӗ, вӗсенчен 3 333-шӗ — арҫын ачасем, 3198-шӗ — хӗрачасем.

Арҫын ачасене Артём, Матвей, Роман, Михаил, Александр, Максим, Иван, Кирилл, Егор, Лев, Даниил, Тимур, Дмитрий, Илья, Арсений, Тимофей, Марк, Давид, Никита, Павел ят хуракансем йышлӑ. Хӗрачасене — Ева, Анна, София, Виктория, Ксения, Дарья, Варвара, Мария, Милана, Анастасия, Полина, Валерия, Арина, Василиса, Елизавета, Мирослава, Кира, Екатерина, Алиса, Александра.

«Чӑваш халӑх сайчӗ» ӗҫлеме пуҫланӑранпа кӑҫал 18 ҫул ҫитрӗ.

«Чӑваш халӑх сайчӗн» 18 ҫулхи кун-ҫулӗ

Шӑп та лӑп авӑнӑн 7-мӗшне унӑн ҫуралнӑ кунӗ пек палӑртнӑ та ӗнтӗ. Паллах, ку портала, хальхи вӑхӑтра МИХ пек ӗҫлекенскере, пӗр кунра ӑсталаман. Малтан шухӑш ҫуралнӑ, кайран сайта хатӗрлеме пуҫланӑ, унтан ӑна вырнаҫтарма укҫа-тенкӗ шыранӑ… 2005 ҫулхи авӑнӑн 7-мӗшӗнче Портал шутне кӗрекен «Чӑваш халӑх канашлӑвӗ» ӗҫлесе кайнӑ. Хальхи вӑхӑтра вӑл ҫук ӗнтӗ, анчах ҫуралнӑ кун валли ҫав самантпа усӑ куратпӑр.

2005 ҫул тӗнче тетелӗнче чӑваш чӗлхине сарассишӗн уйрӑм палӑртмалли вӑхӑт. Шӑп ҫавӑн чухне Чӑвашла Википеди аталанма пуҫларӗ. 2004 ҫул вӗҫӗнче унта темиҫе статья кӑна пулнӑ пулсан, 2005 ҫулта вӗсен шучӗ пысӑк хӑвӑртлӑхпа ӳсме тытӑнчӗ. Википедине тултарнӑ май тӗнче тетелӗнче чӑвашла информаци ҫукки лайӑх курӑнчӗ. Ку ҫитменлӗхе пӗтерме малтан юмахсен сайтне хута янӑччӗ (ара, халӑх пултарулӑхӗ-ҫке, вӑл текстсене вырнаҫтарма никамран та ирӗк ыйтмалла мар), анчах вӑл чӑваш чӗлхине тӗнче тетелӗнче аталантарма май пултарайманни курӑнчӗ.

Малалла...

Чулхулари чӑвашсен видеовӗнчен илнӗ скриншот

Ҫурла уйӑхӗн 27-мӗшӗнче Чулхулара сӑвӑҫсен тӗлпулӑвӗ иртнӗ.

«Поэтический «Дружный Нижний» (чӑв. Поэзилле туслӑ Чулхула) ят панӑ мероприяти хулари Ленин ячӗллӗ вулавӑшӑн шурӑ залӗнче (ун пекки те пур иккен) иртнӗ.

Чӑваш поэзийӗпе тата хӑй ҫырнӑ сӑвӑсемпе Екатерина Макаренко паллаштарнӑ.

«Ирхи тӗпел» кӑларӑмри видеоран илнӗ скриншот

Марина Карягина ертсе пыракан «Ирхи тӗпел» кӑларӑмра (ӑна «Чӑваш Ен» ПТРК кӑтартать) Канаш районӗнчи Мӑкӑр ялӗнчи пултаруллӑ икӗ хӗрарӑм пулнӑ.

Марина Карягина халӑх тетелӗнче пӗлтернӗ тӑрӑх, студие Вероника Долматова баянпа, Вероника Иванова купӑспа пырса кӗнӗ.

Икӗ Вероника (вӗсем — иккӗмӗш сыпӑкри йӑмӑкӗпе аппӑшӗ) вырӑнти «Туслӑх» фольклор ушкӑнне ҫӳреҫҫӗ.

Вероника Ивановна профессилле купӑсҫӑ мар, анчах вӑл ҫак инструментпа ӑста калама пӗлет, ҫавна хӑй тӗллӗн вӗреннӗ.

Вероника Юрьевна виҫӗ ача амӑшӗ пулин те студие тухья тӑхӑнса пынӑ. Вӑл ӑнлантарса панӑ тӑрӑх, хитре чӑваш кӗпипе тухьяна аппӑшӗ, Вероника Ивановна, тӗрлесе панӑ, ҫавна кӑтартас тесе вӑл хӗр тумне тӑхӑннӑ.

Вероника Иванова вырӑнти фольклор ушкӑнне ертсе пырать, ушкӑнри хӑй тӗллӗн вӗреннӗ артистсене те чӑваш тумне тӗрлесе парать. Унсӑр пуҫне вӑл тӗрӗ ӑсталӑхне ачасене вӗрентет.