cap.ru сӑнӳкерчӗкӗ

Чӑваш Енре ҫитес ҫула мӗне халалласси паллӑ. ЧР Элтеперӗ Олег Николаев кун пирки «Ҫамрӑксен хули» форумра пӗлтернӗ.

Олег Алексеевич каланӑ тӑрӑх, 2024 ҫула Чӑваш Енре экологие халаллама пултарӗҫ. Хальлӗхе ку ыйтӑва сӳтсе яваҫҫӗ. Анчах экологи теми пӗрремӗш вырӑнта.

Аса илтерер: кӑҫал пирӗн республикӑра Телейлӗ ачалӑх ҫулталӑкӗ. 2022 ҫул вара Паллӑ ентешсен ҫулӗ пулнӑ.

ШӖМ тунӑ сӑн

Шупашкар районӗнчи 42 ҫулти хӗрарӑма руль умне ӳсӗрле ларнӑшӑн судра явап тыттарӗҫ. Ҫитменнине, вӑл руль умне эрех сыпсан пӗрре мар ларнӑ.

Утӑ уйӑхӗн 25-мӗшӗнче ӑна ҫул-йӗр инспекторӗсем Типҫырма ялӗнче чарнӑ. Унӑн вара права та пулман. Ӑна руль умне ӳсӗрле ларнӑшӑн унчченех туртса илнӗ. Анчах хӗрарӑма ку та чарман - вӑл ав каллех эрех ӗҫсен руль умне ларнӑ. Ун тӗлӗшпе пуҫиле ӗҫ пуҫарнӑ.

«ПроГород» кӑларӑма ярса панӑ сӑн

Паян кӑнтӑрла хыҫҫӑн пушар сӳнтерме васкакан машина аварие ҫакланнӑ. Ҫӑмӑл машина ӑна ирттерсе яманран вӑл унпа ҫапӑннӑ, кайран тротуар ҫине кӗрсе кайнӑ.

«Прогород» кӑларӑм пӗлтернӗ тӑрӑх пӑтӑрмах Ҫӗнӗ Шупашкарти Винокуровпа Пӗрремӗш май урамӗсем хӗресленнӗ вырӑнта 14 сехет те 22 минутра пулса иртнӗ. Аварие курнӑ ҫынсем каласа панӑ тӑрӑх пушар сӳнтерме васкакан машинӑн сирени вӑл вӑхӑтра ӗҫленӗ.

Малтанласа пӗлтернӗ тӑрӑх ҫул ҫинчи пӑтӑрмахра никам та аманман. Хӗрлӗ тӗслӗ ҫӑмӑл машина вара самаях сиенленнӗ.

Муркаш районӗнчи Ильинка тӑрӑхӗнче ӳсекен чӑваш юманӗ «Раҫҫейри ҫулталӑк йывӑҫӗ» конкурсра ҫӗнтерни пирки хыпарланӑччӗ. Аса илтерер: 372 ҫул ӳсекен юман сасӑлавра чи нумай сасӑ пухнӑ. Ҫавна май пирӗн республика тӗнче стандарчӗсемпе пӑхмалли сертификата тивӗҫӗ.

Чӑваш йывӑҫне паян федераци каналӗпе «Доброе утро» кӑларӑмра кӑтартнӑ. Сюжетра ЧР Элтеперӗ Олег Николаев ватӑ чӑваш юманӗ 69 регионти конкурентсене ҫӗнтернине палӑртнӑ.

"Про Город" сайтӗнчи сӑн

Ӗнер, ҫурла уйӑхӗн 4-мӗшӗнче, Шупашкарти тӗп пляжра арҫын ҫухалнӑ. Вырӑна тӳрех Инкеклӗ лару-тӑру министерствин ӗҫченӗсем ҫитнӗ.

Водолазсем арҫын виллине каҫхине, 18 сехет ҫурӑра, тупнӑ. Унӑн вилли тӗп пляжран 50-70 метрта пулнӑ.

Аса илтерер: ӗнер Лапсарти пӗвере хӗрача виллине тупнӑ.

ldpr.ru сайтри сӑн

Лапсарти пӗвере хӗрача путса вилнӗ. Республикӑри ҫӑлавпа шырав служби пӗлтернӗ тӑрӑх, ку инкек ҫурла уйӑхӗн 3-мӗшӗнче 13 сехет иртсен пулнӑ. Водолазсем унӑн виллине тупса ҫыран хӗррине илсе тухнӑ та тӑванӗсене панӑ.

Астӑвӑр: шыв хӗрринче асӑрхануллӑ пулмалла. Ачасене аслисемсӗр шыва кӗме ямалла мар. Ҫавӑн пекех ӳсӗр ҫынсен те шывра чӑмпӑлтатма юрамасть. Статистика кӑтартнӑ тӑрӑх, шыв ҫинче чылай инкек эрех-сӑрана пула пулать.

сеспель.рф сӑнӳкерчӗкӗ

Ҫеҫпӗл Мишши ячӗллӗ Чӑваш патшалӑх ҫамрӑксен театрӗ Александр Островский ҫыравҫӑн «Гроза» (чӑв. Аслати) драмине лартма хатӗрленет. Асӑннӑ ӗҫе вӗсем паллӑ вырӑс ҫыравҫи ҫуралнӑранпа 200 ҫул ҫитнине халаллӗҫ.

Сӑмах май каласан, асӑннӑ учрежденире «Аслати» драмӑна 1969 тата 2007 ҫулсенче лартнӑ-ха. Хальхинче ӗҫе куракансем патне вырӑсла илсе ҫитерӗҫ. Премьера авӑн уйӑхӗн 12-мӗшӗнче пулӗ.

Александр Островский драмине лартма театра Иван Чигасов ҫамрӑк режиссёра йыхравланӑ.

chuvbook.ru сӑнӳкерчӗкӗ

Ӗнер, ҫурла уйӑхӗн 3-мӗшӗнче, Шупашкарти Константин Иванов ячӗллӗ Литература музейӗнче Альберт Канаш поэт ҫуралнӑранпа 95 ҫул ҫитнине халалланӑ литературӑпа музыка уявӗ иртнӗ.

Мероприятие писательсемпе журналистсем, вӗрентекенсемпе шкул ачисем пуҫтарӑннӑ. Музейра поэтӑн сӑнӳкерчӗкӗсемпе тата кӗнекисемпе паллаштаракан «Эпир – аптрамансем» курав йӗркеленӗ.

«Мероприятие Литература музейӗн наука ӗҫченӗ Галина Еливанова ертсе пычӗ. Уява «Надежда» халӑх ансамблӗ «Чечексем, чечексем» юрӑпа уҫрӗ. Сӑввин авторӗ, паллах, – Альпӑрт Канаш. Унӑн лирикӑллӑ хайлавӗсемпе композиторсем чылай юрӑ кӗвӗленӗ.

Ҫӗрпӳ районне кӗрекен Чурачӑк шкулӗнчи чӑваш чӗлхи вӗрентекенӗ Венера Иванова Литература музейне пӗччен мар, мӑнукӗсемпе пӗрле килнӗ – Шупашкарти 30-мӗш шкулта ӑс пухакан Артемпа Арина Парусовсем А. Канашӑн сӑввисене пӑхмасӑр каларӗҫ», — хыпарланӑ Чӑваш кӗнеке издательствинче.

chuvbook.ru сӑнӳкерчӗкӗ

Мӗн тарӑн чӑваш халӑхӗ ӑҫта кӑна сапаланса пӗтмен-ши, тӗнчен тата ҫӗршывӑн хӑш кӗтесӗнче кӑна тӗпленмен-ши?! Бурят Республикинче те пурӑнать чӑваш. Унти йӑхташӑмӑрсен ентешлӗхне Надежда Колесникова (Надежда Аякри) ертсе пырать.

Надежда Николаевна ҫинчен ҫак йӗркесен авторӗ маларах темиҫе хутчен те ҫырнӑччӗ, вӑл хӑйсен республикине пырса курма та йыхравланӑччӗ.

Надежда Колесникова Тутарстанри Аксу ялӗнчен куҫса кайнӑ чӑвашсен ҫемйинче 1968 ҫулта ҫуралнӑ. Нумаях пулмасть вӑл Чӑваш кӗнеке издательствинче «Вдали от Родины» кӗнеке пичетлесе кӑларнӑ.

Кӑларӑмра иртнӗ ӗмӗрӗн 50-мӗш ҫулӗсенче тутар чӑвашӗсем мӗншӗн Бурят Республикине куҫса кайни ҫинчен ҫырса кӑтартнӑ. Ҫерем ватакансем лайӑх шӑпа шырани тӳрре тухнӑ-и-ха? Кун пирки кӗнекене вуласан ӑнланса илме май килӗ.

chuvbook.ru сӑнӳкерчӗкӗ

Шупашкар хулин кунӗ тӗлне «Чувашия: вехи истории и современность» кӗнеке-альбом пичетленсе тухӗ. Ӑна Чӑваш кӗнеке издательствинче хатӗрлеҫҫӗ.

Издательствӑра пӗлтернӗ тӑрӑх, кӑларӑм истори материалӗсемпе тата сӑнӳкерчӗксемпе пуян пулӗ. Кӗнеке аваллӑхран пуҫласа паян кунчченхи тапхӑра уҫса парӗ.

Кӗнекене пухса хатӗрлекенӗсем тата авторӗсем — Е.В. Касимов, С.Н. Кодыбайкин, Ф.Н. Козлов историк-ученӑйсем.