|
Пӗлӳ кунӗ — савӑнӑҫлӑ та пӑлхавлӑ уяв. Уйрӑмах аслӑ шкулӑн пусми ҫинче пирвайхи утӑмсем тӑвакан яш-кӗрӗмшӗн. Алла студент билечӗ тытасси, „студент” ятне илсе пултаруллӑ ҫамрӑксен ретне тӑрасси — яланлӑхах асра юлакан пӑлхавлӑ самант. Чӑваш Патшалӑх университечӗн чӑваш филологийӗпе культура факультечӗшӗн те авӑнӑн 1-мӗшӗ — хаваслӑ уяв. Ҫак кун факультетӑн туслӑ ҫемьи — вӗрентекенсемпе студентсем — кӑҫалхи пӗрремӗш курссене чысласа саламлама пухӑнчӗҫ. Уява факультет деканӗ, филологи наукисен докторӗ В.Г. Родионов уҫрӗ, „пӗрремӗшсене” саламласа ҫирӗп вӑй-хӑват, чӑтӑмлӑх сунчӗ, тӑрӑшса пӗлӳ пухма сӗнчӗ. Декан саламӗпе хавхаланнӑ вӗрентекенсем те пӗр-пӗрин хыҫҫӑн тин-тин „пиҫсе тухнӑ” студентсене ырӑ сӑмахсем, кирлӗ сӗнӳсем пама тытӑнчӗҫ: вӗренӳре те, пур ӗҫре те ҫирӗп те вашават, хастар пулма хушрӗҫ, аслӑ курссене питех итлеме сӗнмерӗҫ. Вӗсем тӑрӑхласа „шӑн пӑр ҫине” те лартса яма пултараҫҫӗ иккен… Студентсем тесен, уяв вӑхӑтӗнчне вӗсене те сӑмах пачӗҫ аслисем. |
|
Авӑнӑн 13-мӗшӗнче Мускавра «Чӑваш дискотекисен» ҫӗнӗ сезонӗ уҫӑлать! Ҫамрӑксем, тринкки-транкки сиккелеме юратакансем, савӑнма та кулма кӑмӑллакансем! Сире пурне те «SOVA» каҫхи клуба йыхравлатпӑр! Тахҫантанпах чӑвашла ташламан, чӑваш юррине итлемен пулӗ. Килсе курӑр, аллӑрсемпе урӑрсене хуҫлаткаласа илӗр!
Пуҫламӑшӗ 18 сехетре. Клуб адресӗ ҫапла: Мускав хули, Симӗс проспект, 8/1 (Перово метрора тухмалла).
18 сехетпе 22 сехет ҫурӑччен чӑваш дискотеки иртӗ, савӑнӑҫ каҫне чӑваш артисчӗсем те хутшӑнӗҫ — Сергей Павловпа «D&K Dance» ташӑ ушкӑнӗ пулӗ.
Каччӑсен 200 тенкӗ, хӗрсен 150 тенкӗ тӳлесе кӗме тивӗ — укҫӑрсене манса ан хӑварӑр!
//тепӗр кунне дискотека епле иртни ҫинчен каласа парсан пире те хаваслӑ пулӗ :) |
|
Юпа уйӑхӗн 3-5-мӗшӗсенче Мускавра К.В. Иванов ячӗллӗ Чӑваш патшалӑх академи драма театрӗ хӑйӗн спектаклӗсене кӑтартӗ. Театр Мускаври гастроле Мускаври чӑваш наципе культура автоними пулӑшнипе килнӗ.
Юпа, 3. «Ялта» — 2 пайлӑ музыкӑллӑ драма (Ф. Павлов) Пуҫламӑшӗ 19 сехетре.
Юпа, 4. «Шухӑ вырӑнта» — 2 пайлӑ комеди (А.Н. Островский) Пуҫламӑшӗ 19 сехетре.
Юпа, 5. «Праски кинеми мӑнукне авлантарать» — 2 пайлӑ музыкӑллӑ комеди (А. Чебанов) Пуҫламӑшӗ 19 сехетре.
Пур спектакле те вырӑсла куҫарса пырӗҫ. Гастроль Таганка актёрӗсен пӗрлешӗвӗн театрӗнче (Театр Содружество актеров Таганки) иртӗ, унӑн адресӗ: Мускав, Земляной вал, 76/21, Тагански м. Театр касси 13 сехетрен 19 сехетчен ӗҫлет. Ыйтса пӗлмелли инҫесас: 915-11-48. Епле ҫитмеллине кунта пӗлме пулать: http://www.mirkart.ru/su?44882
Пурне те килсе курма чӗнетпӗр! |
|
Авӑнӑн 2-мӗшӗнче Марфа Трубина ҫыравҫӑ ҫуралнӑранпа 120 ҫул ҫитрӗ. Ку куна халалласа Куславкка районӗнчи чылай вулавӑшра ятарлӑ литература каҫӗсем, кӗнеке куравӗсем уҫӑлчӗҫ. Тӗрлемес ял вулавӑшӗнче ку кун «Трубина Мархви литература ӗҫӗнчи пултаруллӑхӗ» таврапӗлӳ урокӗ иртрӗ. Ӑна Л.Павлова вулавӑш заведующийӗ ирттерчӗ. Унсӑр пуҫне вулавӑшра «Трубина Мархви» кӗнеке куравӗпе те паллашрӗҫ. Унта вӗсем «Хӗллехи каҫсенче», «Ача чухнехи», тата ытти хайлава вуласа пӗлме пултарчӗҫ.
Марфа Трубина — чӑваш ҫыравҫи, Чӑваш Енӗн тава тивӗҫлӗ вӗрентевҫи. Хайлавсене ытларах ачасем валли ҫырнӑ.
Вӑл 1888 ҫулхи авӑнӑн 2-мӗшӗнче Хусан кӗпернине кӗрекен Шупашкар уесӗнчи (халӗ Куславкка районӗ) Куснар ялӗнче ҫуралса ӳснӗ. 1903 ҫулта ял шкулне пӗтернӗ хыҫҫӑн Чӗмпӗр чӑваш шкулне вӗренме кӗнӗ. Ҫыравҫӑ ӗҫне вӑл ҫак шкулта пикеннӗ.
|
|
Нумай пулмасть республикӑра чи ешӗл те чи хӑтлӑ ял-хуласене суйласа илнӗ. 2-мӗш категоринче Муркаш сали пӗрремӗш вырӑн йышӑннӑ. Ку категоринчи иккӗмӗш вырӑна Елчӗк, виҫҫӗмӗш вырӑна Сӗнтӗрвӑрри районӗнчи Малти Чиперуй йышӑннӑ. Паллах, Муркаш ахальтен мар ку ята илнӗ — ялти ҫуртсем кӑна мар, предприятисемпе организаци ҫурчӗсем те ҫулран ҫул илемленсех пыраҫҫӗ. Муркаш варринче вырнаҫнӑ физкультурӑпа сывлӑха упракан центр та ӑна самай илем кӳрет!
Ытти категорисенче ҫак ял-хулапа вырӑнсем мала тухрӗҫ: 1 категори: I. Улатӑр хули. II. Ҫӗмӗрле хули. III. Канаш хули.
3 категори: I. Шупашкарти «Эверест» компани ушкӑнӗ. II. Ҫӗнӗ Шупашкарти ГУП ЧР БОС. III. Шӑмӑршӑ районӗн федераллӑ казначействӑн управленийӗ.
4 категори: I. Ҫӗмӗрлери 3-мӗш вӑтам шкул. II. Куславкка районӗнчи Елчӗк шкулӗ. III. Етӗрне районӗнчи Кӑташ шкулӗ. |
|
Раҫҫей космонавтики федерацийӗпе «Байконур-Шупашкар» космонавтикӑна пулӑшакан ассоциаци юпа уйӑхӗн 11-12-мӗшӗсенче Байконура кайса курма чӗнет, экскурси ушкӑнне йӗркелет. Программӑра Байконур курасси, тӗрлӗ музейсемпе паллашасси, старт комплексӗсемпе паллашасси. Ҫавӑн пекех эсир «Союз» карап тӳпене вӗҫсе хӑпарнине курма пултаратӑр. Кайса курма кӑмӑллисем хӑйсен шухӑшне авӑнӑн 12-мӗшӗччен пӗлтермелле. Ҫыхӑну телефонӗ — (8352) 34-18-98. Хакӗ: пӗр ҫынран 40 пин тенкӗ.
|
|
Ӗнер, авӑнӑн 4-мӗшӗнче, А.Г. Николаева асӑнса Республикӑра чупасси енӗпе ӑмӑрту пуҫланчӗ. Ку ҫулхине вӑл 5-мӗш хут иртет ӗнтӗ. Чупакансем харӑссӑн пилӗк вырӑнтан тапраннӑ: Улатӑрпа Етӗрне хулисемпе Шӑмӑршӑ, Елчӗк, Пӑрачкав ялсенче. Эстафета виҫӗ кун хушшинче республикӑн пур хулисемпе районӗсене ҫитсе курӗ. Чупакансем хушшинче шкул ачисем, чупма юратакансем, спорт ветеранӗсем тата паллӑ спортсменсем пулӗҫ. Пӗр шкул ушкӑнӗ эстафетӑна тепӗр шкул ушкӑнне парӗ — ҫапла май пурӗ пин ҫухрӑм тарин ӑмӑрту тӑсӑлӗ. Авӑнӑн 6-мӗшӗнче вара пур ушкӑн пӗрлешӗ те Андриан Николаев ҫуралса ӳснӗ ялта 14 сехет тӗлне чупса ҫитӗ. Ӑмӑртӑва йӗркелекенсем: Чӑваш Енӗн спортпа вӗрентӳ Министерствисем, республикӑн районсемпе хуласен вырӑнти тытӑмлӑх органӗсем.
Ӑмӑрту ҫулӗсем:1-мӗш ушкӑн: 1 кун (авӑн, 4): Шӑмӑршӑ — Патӑрьел — Комсомольски 2 кун (авӑн, 5): Комсомольски — Канаш — Ҫӗрпӳ 3 кун (авӑн, 6): Ҫӗрпӳ — Туҫа — Шуршӑл
2-мӗш ушкӑн: 1 кун (авӑн, 4): Елчӗк — Аслӑ Таяпа — Тӑвай — Вӑрмар 2 кун (авӑн, 5): Вӑрмар — Энтри Пасар — Куславкка 3 кун (авӑн, 6): Куславкка — Октябрьски — Шуршӑл
3-мӗш ушкӑн: 1 кун (авӑн, 4): Улатӑр — Алтышево — Йӗпреҫ — Вӑрнар 2 кун (авӑн, 5): Вӑрнар — Красноармейски — Ҫӗрпӳ 3 кун (авӑн, 6): Ҫӗрпӳ — Кӳкеҫ — Шуршӑл
4-мӗш ушкӑн: 1 кун (авӑн, 4): Пӑрачкав — Мӑн Улхаш — Ҫӗмӗрле — Хӗрлӗ Чутай 2 кун (авӑн, 5): Хӗрлӗ Чутай — Элӗк — Ишек 3 кун (авӑн, 6): Ишек — Ҫӗнӗ Лапсар — Шуршӑл
5-мӗш ушкӑн: 1 кун (авӑн, 4): Етӗрне — Ваҫкасси Янасал — Муркаш 2 кун (авӑн, 5): Муркаш — Калайкасси — Шупашкар 3 кун (авӑн, 6): Шупашкар — Ҫӗнӗ Шупашкар — Шуршӑл
Чупма кӑмӑллакансене пурне те хутшӑнма чӗнетпӗр! |
|
Паян Пекинра маунтинбайк ӑмӑртӑвӗ иртрӗ. Ӑмӑрту пирӗн тӑрӑхри вӑхӑтпа 6 сехетре пуҫланчӗ. Пирӗн ентеш, Ирина Клементьева виҫҫӗмӗш тухрӗ — йӗс (бронза) медале тивӗҫрӗ.
Ирина Клементьева Патӑрьел районӗнчи Нӑрваш Шӑхаль ялӗнче 1977 ҫулхи чӳкӗн 10-мӗшӗнче ҫуралнӑ. Раҫҫейре тава тивӗҫлӗ маунтинбайк спорт мастерӗ шутланать. Чылай ӑмӑртусенче пӗрремӗш вырӑнсене йышӑннӑ.
|
|
Ҫурла уйӑхӗн 2-мӗшӗнче Альберт Канаш ҫуралнӑранпа 80 ҫул ҫитет. Ку куна халалласа Чӑваш наци музейӗнче «Павка сӑнарне умран нихҫан ямарӑм!» ятлӑ куҫса ҫӳрекен фотокурав уҫӑлчӗ. Куравра эсир Альберт Канашӑн ӳкерчӗкӗсене, тӗрлӗ хутсене курма пултаратӑр. Кунтах унӑн кӗнекисем, тӗрлӗ япалисем вырнаҫнӑ. Куравра пӗрремӗш хут А. Канаш савнӑ хӗрӗн сӑнӳкерчӗкне курма пулать — С.А. Александрова сӑнӗ сӑвӑҫа самай сӑвӑ ҫырма хистенӗ.
Альберт Георгиевич Канаш (чӑн хушамачӗ Кожанов) 1928 ҫулхи ҫурла уйӑхӗн 2-мӗшӗнче Сӗнтӗрвӑрри районне кӗрекен Октябрьскинче ҫуралнӑ. 1968 ҫулхи ҫӗртме уйӑхӗн 4-мӗшӗнче ҫут тӗнчерен уйрӑлса кайнӑ. 1962 ҫултанпа СССР ҪП членӗ шутланать. Йывӑр чире пула вырӑн ҫинчен тӑма пултарайман, ҫапах та парӑнман — сӑвӑсемпе поэмӑсем ҫырнӑ. 1960 ҫулта унӑн «Сӑвӑсем» ятлӑ кӗнеки пичетленсе тухнӑ. Каярах тата тепӗр икӗ сӑвӑсен пуххи тухнӑ: «Иккӗмӗш утӑм» (1965), «Шӑпчӑксем, сире итлесе» (1978). Савӑҫӑн вырӑсла тухнӑ кӗнеке те пур — 1972 ҫулта «На наковальне сердца» ятлӑ кӗнеке пичетленсе тухнӑ. |
|
Канаш районне кӗрекен Сител ял вулавӑшӗ ҫулла та пушанмасть. «Ҫулла та кӗнекепе» конкурс малалла тӑсӑлать — пӗчӗк вулавҫӑсем кӗнеке вуласах тӑраҫҫӗ. Ял ҫыннисемсӗр пуҫне вулавӑша тӑванӗсем патне килнисем те ҫӳреҫҫӗ — пурӗ 24-ӑн ҫырӑннӑ. Вулавӑшра ачасем кӗнекепе хаҫатсем вуланисӗр пуҫне шашкӑлла та выляма пултараҫҫӗ. Кунта вӗсем валли ятарлӑ пӗчӗк турнирсем иртеҫҫӗ.
|
+21.3 °C