"Контактри" сӑн

Тӑвайра пурӑнакан Евгений Витальевич тата Зинаида Николаевна пӗрлешнӗренпе 50 ҫул ҫитнине паллӑ тунӑ. Вӗсем икӗ ывӑлпа пӗр хӗр ҫуратса ӳстернӗ. Халӗ тӑватӑ мӑнукпа савӑнаҫҫӗ.

Евгений Витальевич - таврапӗлӳҫӗ, тӑван ен историйӗпе 7 кӗнеке кӑларнӑ. Вӑл ЧР этнокультурин тава тивӗҫлӗ ӗҫченӗн ятне тивӗҫнӗ. Ӑна «Пушар хуралӗн отличникӗ» паллӑпа чысланӑ.

Зинаида Николаевна пурнӑҫ тӑршшӗпе экономистра ӗҫленӗ. Ӗҫ стажӗ - 37 ҫул. Вӗсем иккӗшӗ ӗҫ ветеранӗн ятне илнӗ.

"Контактри" сӑн

Беларуҫри Могилев хулинче спорт гимнастики енӗпе уҫӑ Кубок иртет. Пирӗн ентеш, 16 ҫулти Екатерина Андреева, унта лайӑх кӑтартупа палӑрнӑ.

Вӑл нумай енлӗ кӗрешӳре 59,999 балл пухса пӑхӑр медале тивӗҫнӗ.

Палӑртса хӑварар: Екатерина ӑсталӑхне Олимп резервӗсен 6-мӗш спорт шкулӗнче Василий тата Маргарита Ивановсем патӗнче туптать. Катя - Раҫҫей спорт мастерӗ.

culture.cap.ru сӑнӳкерчӗкӗ

Чӑваш Енӗн Наци вулавӑшӗн «Кӗмӗл ӗмӗр» галерейинче ҫурла уйӑхн 27-мӗшӗнче «Цвет времени. Чувашская свадьба» (чӑв. Самана тӗсӗ. Чӑваш туйӗ) живопиҫпе декораци прикладной ӳнерӗн пӗтӗм тӗнчери иккӗмӗш арт-куравне хутшӑннисен куравӗ уҫӑлнӑ. Экспозицие туй йӑли-йӗркине халалланӑ.

Куравра хамӑр ҫӗршывӑн тӗрлӗ регионӗнчи тата унӑн тулашӗнчи ӑстасен ӗҫӗсемпе паллашма пулать. Ҫав шутра Иван Александров (Шупашкар), Татьяна Андреева (Шупашкар), Елена Баймяшкина (Хусан), Александр Буйкевич (Беларуҫ Республики), Наталья Григорьева (Хусан), Джумабек Базарбаев (Кӑркӑстан), Ирина Жемчужникова (Чулхула), Константин Кокель (Шупашкар), Татьяна Куртовская (Шупашкар), Викентий Лукиянов (Шупашкар), Михаил Поляков (Чулхула), Марина Полякова (Чулхула); Владимир Разин (Шупашкар), Ирина Рязанцева (Шупашкар), Татьяна Серебрякова (Шупашкар), Наталия Соловьёва (Шупашкар), Ольга Таланцева (Чикме), Ирины Чипенко (Шупашкар), Шупашкарти ӳнер училищин студенчӗсен ӗҫӗсем пур.

culture.cap.ru сӑнӳкерчӗкӗ

Куславккари Н.И. Лобачевский ячӗллӗ музейра «Человек, сломавший пространство» (чӑв. Уҫлӑха уҫнӑ ҫын) курав уҫӑлӗ. Кун пирки Чӑваш Енӗн Культура министерстви пӗлтернӗ.

Сӑмах май каласан, музей-ҫуртра ӗнер культура министрӗ Светлана Каликова пулнӑ.

Музей-ҫурт Николай Лобачевский вырӑс математикӗ 1848-1856 ҫулсенче пурӑннӑ ҫуртра вырнаҫнӑ. 1994 ҫулта унта музей уҫнӑ. Вӑл федераци пӗлтерӗшлӗ культура эткерлӗхӗн объекчӗ тата истори палӑкӗ шутланать.

Икӗ ҫул каялла унта «Уҫлӑха уҫнӑ ҫын» проекта пурнӑҫлама тытӑннӑ. Экспозицие кӑҫалхи раштав уйӑхӗн 1-мӗшӗ тӗлне уҫӗҫ.

Музея техника енчен пуянлатма федераци бюджетӗнчен 5 миллион тенкӗ, республика бюджетӗнчен 10 миллион тенкӗ уйӑрнӑ.

Прокуратура архивӗнчи сӑн

Ҫӗнӗ вӗренӳ ҫулӗнчен Шупашкарти 2-мӗш лицейра прокурор класӗ ӗҫлеме тытӑнӗ. Унта ку енӗпе пӗр 10-мӗш класс пулӗ, класри ачасем юриспруденцие тарӑнрах вӗренӗҫ. Вӗренӳ планне хатӗрленӗ. Ҫак класра яш-хӗре вырӑс чӗлхине, историе, бществознание тӗплӗнрех вӗрентӗҫ. Хушма дисциплинӑсем те пулӗҫ: «Правоведени» тата «Прокурор тӗрӗслевӗ».

Тӑватӑ енлӗ килӗшӗве ҫурла уйӑхӗн 28-мӗшӗнче алӑ пуснӑ: Чӑваш Ен прокуратури, ЧР Вӗренӳ министерстви, Шупашкар администрацийӗн вӗренӳ управленийӗ тата И.Н.Ульянов ячӗллӗ Чӑваш патшалӑх университечӗ.

cap.ru сайтри сӑн

Нумаях пулмасть Ҫӗнӗ Шупашкарти троллейбус паркӗ тӗпрен ҫӗнелнӗ. Халӗ вара унта кондукторсем те ӗҫлемеҫҫӗ – кашни транспорта валидатор вырнаҫтарнӑ, пассажирсене контролерсем те тӗрӗслекелеҫҫӗ.

Валидатор патне карточкӑна е телефона илсе пымалла, унтан сасӑ пуласса кӗтмелле. Терминал билет пичетлесе памасть. Ӑна bilet.nspk.ru сайтра е оператор сайтӗнче илме пулать. Валидаторпа билетшӑн тӳлесен укҫана счет ҫинчен каярахпа илӗҫ.

culture.cap.ru сӑнӳкерчӗкӗ

Ҫурла уйӑхӗн 28-мӗшӗнче Куславкка муниципаллӑ округӗнчи Илепар ялӗнче культура ҫурчӗ уҫӑлнӑ. Чӑваш Енӗн Культура министерствинче ӑна «Культура» наци проекчӗпе килӗшӳллӗн хӑпартса лартнине пӗлтереҫҫӗ.

Культура ҫуртне пӗлтӗр тума пуҫланӑ. Ӑна хальхи вӑхӑтри обрудованипе тивӗҫтернӗ май фильмсем кӑтартӗҫ, концертсем лартӗҫ. Кульутра ҫуртӗнче ачасем валли спорт тата пултарулӑх кружокӗсем ӗҫлессине ӗнентереҫҫӗ.

Кӑҫал пирӗн республикӑри муниципалитетсенче 14 клуб тӑваҫҫӗ. Вӗсенчен иккӗшне — вырӑнти хысна укҫипе, ҫиччӗшне — пуҫаруллӑ бюджет шучӗпе, пӗрне — «Культура» нацпроектпа, тӑваттӑшне — «Культурӑна аталантарасси» патшалӑх программипе.

minec.cap.ru сӑнӳкерчӗкӗ

Чӑваш Ене темиҫе туризм зонине пайланӑ. Кун пирки республикӑн экономика министрӗ Дмитрий Краснов пресс-конференцире пӗлтернӗ. Ҫурҫӗр, Хӗвелтухӑҫ тата Анӑҫ – ҫакӑн пек зонӑсем туса хунӑ.

«Ҫурҫӗр» туризмпа рекреаци зонине Шупашкар, Сӗнтӗрвӑрри, Куславкка, Ҫӗрпӳ, Етӗрне, Муркаш, Красноармейск тӑрӑхӗсем кӗреҫҫӗ. «Хӗвелтухӑҫ» зонӑна — Канаш, Комсомольски, Тӑвай, Патӑрьел, Шӑмӑршӑ, Вӑрмар тата Елчӗк тӑрӑхӗсем, «Хӗвеланӑҫ» зонӑна — Хӗрлӗ Чутай, Элӗк, Ҫӗмӗрле, Вӑрнар, Йӗпреҫ, Улатӑр, Пӑрачкав тӑрӑхӗсем.

vk.com сайтри сӑн ӳкерчӗк

ЧР Пуҫлӑхӗ Олег Николаев Чӑваш Енри Хӗрарӑмсен канашӗн председательне Наталья Николаевӑна /вӑл унӑн мӑшӑрӗ/ Чӑваш Республикин Хисеп грамотипе чысланӑ. Хушӑва ҫурла уйӑхӗн 15-мӗшӗнче алӑ пуснӑ.

Хула кунӗнче РФ Патшалӑх Думин депутатне Анатолий Аксакова, Министрсен Кабинечӗн председателӗн ҫумне Алексей Ладыкова та сцена ҫинче чысланӑ. Анчах Наталья Николаева унта пулман. Хушӑва алӑ пуснӑ чухне документа влаҫ органӗсен официаллӑ порталӗн саккунсен архивӗнче пичетлемен пулнӑ.

Хушупа килӗшӳллӗн Наталья Николаевӑна наградӑна «ҫемье институтне ҫирӗплетес ҫӗре тӳпе хывнӑшӑн тата общество ӗҫне хастар хутшӑннӑшӑн» панӑ.

Кандинский нейросеть сӑнӳкерчӗкӗ

Чӑваш Енре «Чӑваш Республикин Элтеперӗн лару-тӑру центрӗ» ятлӑ хысна учрежденине уҫнӑ.

Республикӑн влаҫ органӗсен официаллӑ порталӗнче пӗлтернӗ тӑрӑх, хысна учрежденийӗн штачӗ 3 единицӑран тӑрӗ.

Хысна учрежденийӗн тӗллевӗнчен пӗри — «Чӑваш Республикин Элтеперӗн тата Министрсен Кабинечӗн управлени ыйтӑвӗсемпе паха йышӑну тӑвасси». Вӑл ҫавӑн пекех лару-тӑрӑва сӑнаса-тишкерсе тӑрӗ.