cap.ru сӑнӳкерчӗкӗ

Ӗнер, авӑн уйӑхӗн 3-мӗшӗнче, Чӑваш Енре Пӗрлӗхлӗ кӗрешӗвӗн «Кӗрешӳ» республикӑри центрӗ уҫӑлнӑ. Ӑна Шупашкарти 11-мӗш спорт шкулӗнче йӗркеленӗ.

Ҫӗнӗ центрта 500 ытла ачапа ҫамрӑк тренировкӑна ҫӳрейӗҫ, вӗсемпе 10 преподаватель ӗҫлӗ.

Малтанласа центрта каратэ, киокушин, хутӑш ҫапӑҫу, панкратион, хӗвелтухӑҫ кӗрешӗвӗ, кудо енӗпе уйрӑмсем ӗҫлӗҫ, каярах кӗрешӗвӗн ытти енӗпе уҫӑлӗҫ.

Кӗрешӳ центрӗнче пысӑк шайри ӑмӑртусене ирттерме палӑртаҫҫӗ.

"Чеб.ру" сайтри сӑн

Ҫитес ҫул Республика кунӗ ӑҫта иртесси паллӑ. Йӑлана кӗнӗ тӑрӑх, паллах, Шупашкарта пулӗ. Тата уяв мероприятийӗсем Етӗрне округӗнче иртӗҫ. Республика кунне ирттерме шӑпах ҫак округ тивӗҫнӗ.

Аса илтерер: кӑҫал уяв Шупашкарта тата Тӑвай округӗнче пулнӑ. Сӑмах май, ҫитес ҫул Чӑваш автономи облаҫӗ йӗркеленнӗренпе 105 ҫул ҫитет.

"Контактри" сӑн

Авӑн уйӑхӗн 6-мӗшӗнче 11 сехетре ҫынсем Шӑмӑршӑ округӗнчи «Чӑваш вӑрманӗ» паркра пухӑнӗҫ. Унта Кӑмпа фестивалӗ иртӗ.

Хӑнасем «Кӑмпа чемпионатне» хутшӑнма пултарӗҫ. Ярмӑрккӑ сӗтелне чи лайӑх хатӗрлесси, кӑмпа костюмне кӑтартасси, кӑмпаран чи тутлӑ апат хатӗрлесси- ҫак енсемпе тупӑшӗҫ фестиваль хӑнисем.

Кӑмпа нумай пулӗ: маринадлани те, тӑварлани те, типӗтни те. Ҫавӑн пекех ҫырларан вӗретнӗ варени те, пал та, курӑкран вӗретнӗ чей те, милӗк те пулӗҫ.

"Контактри" сӑн

Шупашкарти тухтӑрсем малашне Дэвид операцине тӑвӗҫ. Ку - чӗре чирӗсене сиплемелли ҫӗнӗ мел.

Ҫак операцие тусан пациентсем юн кӗвелнине пӗтерекен эмелсене ӗҫмесӗрех пурӑнма пултараҫҫӗ. Ку кӑткӑс операцие Республикӑри кардиологи диспансерӗн тухтӑрӑсем пурнӑҫлаҫҫӗ.

Пӗрремӗш пациент Улатӑр округӗнчи Кире поселокӗнчи Александр Иванов пулнӑ. Унӑн - чӗре чирӗ. Унччен вӑл пуҫ ҫаврӑннине, сывлӑш ҫитменнине, кӑкӑр тӗлӗнчен хӗснине туйнӑ. Халӗ вара, операци хыҫҫӑн, унпа йӑлтах йӗркеллӗ.

Ҫитес ҫул Шупашкарти Пӗтӗм тӗнчери кинофестиваль 18-мӗш хут иртӗ. Вӑл хӑҫан пуласси халех паллӑ: ҫу уйӑхӗн 22-28-мӗшӗсенче.

Яланхи пекех конкурса хутшӑнакан тата хутшӑнман фильмсене кӑтартӗҫ. Ҫавӑн пекех ӑсталӑх класӗсем, общество акцийӗсем пулӗҫ, фильмсене авторӗсемпе пӗрле сӳтсе явӗҫ.

Палӑртса хӑварар: кинофестивале пӗрремӗш хут 2008 ҫулхи ҫӗртме уйӑхӗнче ирттернӗ.

cap.ru сӑнӳкерчӗкӗ

Чӑваш Енре салат ҫулҫи туса илме тытӑнасшӑн. Теплицӑсем Етӗрне округӗнче пулӗҫ. Унта ЧР ял хуҫалӑх министрӗ Сергей Артамонов ҫитсе курнӑ.

«Позитив» компани 4 гектар ҫӗр ҫинче теплица тӑвасшӑн. Кӑҫал 2400 тӑваткал метрне ҫаврӑнӑша кӗртме палӑртнӑ. Унта салат ҫулҫи кӑна мар, каярахпа хӑяр, помидор та лартса ӳстерме палӑртнӑ. Тен, пурӑна киле ытти пахча ҫимӗҫ те пулӗ.

Продукцие ҫавӑнтах упаковка туса лавккасене ӑсатӗҫ. Палӑртмалла: унччен республикӑра ҫавӑн чухлӗ салат никам та ҫитӗнтермен.

nb-ugra.ru сӑнӳкерчӗкӗ

Чӑваш Енре бомбӑран хӳтӗленмелли вырӑнсене тӗрӗслӗҫ. Ҫакӑн пирки республика Элтеперӗ Олег Николаев ятарлӑ йышӑнӑвах кӑларнӑ. Документа ҫурла уйӑхӗн 31-мӗшӗнче алӑ пуснӑ.

Халӑха хӳтӗленмелли тӗрлӗ сооружение тата ытти ҫавӑн йышши объекта инвентаризацилесси ҫинчен кӑларнӑ документа республикӑн влаҫ органӗсен официаллӑ порталӗнче вырнаҫтарнӑ.

Инвентаризацие маларах асӑннӑ объектсен шутне, вӗсен тӑрӑмне тата право статусне палӑртас тӗллевпе ирттереҫҫӗ.

Инвентаризаци валли ятарлӑ кломисси йӗркеленӗ. Ӑна республикӑн ял хуҫалӑх министрӗ Сергей Артамонов ертсе пырать. Йыша ҫавӑн пекех Инкеклӗ ӗҫсен патшалӑх комитечӗн Росреестрӑн, Инкеклӗ ӗҫсен министерствин, Сывлӑх сыхлав тата Стройминӗн ӗҫченӗсем кӗнӗ.

Тӗрӗслеве юпа уйӑхӗн 1-мӗшӗччен вӗҫлемелле.

Чӑваш патшалӑх пуканӗ театрӗ вырнаҫтарнӑ сӑнӳкерчӗк

Шупашкара Сахалинти театр килӗ. Чӑваш патшалӑх пукане театрӗнче пӗлтернӗ тӑрӑх, унччен вӑл пирӗн патра пулман.

Юпа уйӑхӗн 2-5-мӗшӗсенче театр «Пысӑк гастроль» проектпа килӗшӳллӗн килӗ. Ӑна Росконцерт ҫӗршывӑн Культура министерствин гастрольпе концерт планне тӗе хурса йӗркелет.

Чӑваш патшалӑх пуканӗ театрӗн сцени ҫинчи аякри хӑнасем «Золотой Цыпленок», «Убить Бобрыкина» и «Расскажи мне про Красную Шапочку» спектакльсем кӑтартӗҫ.

mirninskoe-r43.gosweb.gosuslugi.ru сӑнӳкерчӗкӗ

Чӑваш Ен приватизаципе укҫа тӑвасшӑн. Ҫитес иҫӗ ҫулта вӑл ҫавӑн пек майпа 10 миллион тенкӗллӗ пуласшӑн.

2016 ҫултанпа Чӑваш Енре патшалӑх пурлӑхне приватизациленипе 379 миллион тенкӗ укҫа тунӑ. 2025-2027 ҫулсенче 9,8 млн тенкӗлӗх сутма ӗмӗтленеҫҫӗ.

Чӑваш Енӗн патшалӑх пурлӑхне приватизацилессин пргноз планӗнче пӑхса хӑварнӑ тӑрӑх, 2025 ҫулта хысна 3,8 миллионран кая мар тенкӗ килмелле, 2026 тата 2027 ҫулсенче — 3-шер миллиона яхӑн тенкӗ.

Кӑҫал ҫулталӑк пуҫланнӑранпа патшалӑх пурлӑхне приватизацилесе 14 миллиона яхӑн тенкӗллӗ пулнӑ.

cap.ru сӑнӳкерчӗкӗ

Чӑваш Енӗн Правительствинче кадр улшӑнӑвӗ пулса иртӗ. Патшалӑхӑн юстици енӗпе ӗҫлекен службин пуҫлӑхӗн ҫумӗ пулса тӑрӑшнӑ Игорь Михайлова ӗҫрен кӑларнӑ. Документа республика ертӳҫи Олег Николоаев паян, авӑн уйӑхӗн 3-мӗшӗнче, алӑ пуснӑ.

Игорь Викторович — юридици пӗлӗвӗллӗ ҫын. Вӑл 2004 ҫулта Мускаври Ҫар университетӗнчен вӗренсе тухнӑ, унта вӑл юриспруденци енӗпе вӗреннӗ, специализацийӗ — «Прокурорпа тӗпчев ӗҫӗ».