yandex.com сӑнӳкерчӗкӗ

Ҫӗртме уйӑхӗн 26-мӗшӗнче Великобританирен Чӑваш Ен ҫыннисене тӑван ҫӗршыва илсе килнӗ. Кӑшӑлвирус пандемине пула ҫӗршывпа ҫӗршыв хушшинче самолетсем вӗҫме чарӑнсан ентешӗмӗрсем ют ҫӗрте тӑрса юлнӑ. Вӗсене тӑван тӑрӑха таврӑнма ҫӗршыв шайӗнче пулӑшаҫҫӗ. Ҫӗртмен 26-мӗшӗнче Великобританирен Мускава килнӗ самолетра пирӗн республикӑри икӗ ачапа икӗ ҫын пулнӑ. Ҫӗртме уйӑхӗн 28-мӗшӗ каҫхине Италирен Чӑваш Ен ҫыннисем иккӗн таврӑннӑ.

Ют ҫӗршывран килнисене Муркаш районӗнчи санаторисенчен пӗрне обсерватора ӑсатнӑ.

Ҫӗртме уйӑхӗн 29-мӗшӗ тӗлне 245 ҫын Раҫҫей тулашӗнче тӑрса юлнӑ, ҫав шутра – 32 ача.

Кӑҫалхи ака уйӑхӗн 10-мӗшӗнченпе тӑван тӑрӑха пирӗн республикӑри 147 ҫынна таврӑнма пулӑшнӑ.

Алексей Ладыковӑн Инстаграмри страницинчи сӑн

Шупашкарти Хӗрлӗ лапама реконструкци хыҫҫӑн уҫнӑ. Унта халӗ ҫын нумай ҫӳрет, ҫӗнӗлӗхсемпе паллашаҫҫӗ. Лапам уҫӑлнӑ кӑна-ха, вандалсем вара сӑтӑр кӳме ӗлкӗрнӗ.

Пралуксем, сывлӑх енчен хавшак ачасем валли тунӑ лапамри калитке, саксен сийӗ сиенленнӗ. Ҫаксене Шупашкар хула администрацийӗ асӑрханӑ. Администраци пуҫлӑхӗ Алексей Ладыков ҫынсене яваплӑрах пулма чӗнсе каланӑ.

Сӑмах май, ӗнер ҫил вӑйлӑ пулнӑран Хӗрлӗ лапамра демонстраци экранӗ ӳкнӗ, реклама баннерӗсем те тӳннӗ. Администраци ӑнлантарнӑ тӑрӑх, вӗсене ҫирӗплетсе ҫитереймен, ҫак ӗҫ пынӑ вӑхӑтра шӑпах ҫил алхаснӑ.

cmirocheb.rchuv.ru сайтри сӑн

Кӗҫех аслӑ шкула вӗренме кӗме палӑртнӑ яш-хӗр патшалӑхӑн пӗрлехи экзаменне тытӗҫ. Анчах кӑшӑлвирус сарӑлнӑ тапхӑрта ҫакна ирттернӗ чухне чылай саманта шута илмелле.

Шупашкарта ятарласа репетици те иртнӗ. Ачасене аудиторие мӗнле кӗртӗҫ? Еплерех лартса тухӗҫ? Репетицире ачасем вырӑнне мероприяти йӗркелӳҫисем пулнӑ. Вӑл 10-мӗш шкулта иртнӗ.

Ачасене экзаменра медицина маски, перчетке, дезинфекци хатӗрӗ, пирометр тата рециркулятор парӗҫ. Экзамен тытакансене аудиторие пӗчӗк ушкӑнпа кӗртӗҫ. Кашни класра 9 ачаран ытла пулмӗ, вӗсене зигзаг евӗр лартса тухӗҫ.

Полина Чамжаева. Ҫамрӑксен театрӗн архивӗнчи сӑнӳкерчӗк

Чаваш Республикин халӑх артистки Полина Чамжаева паян 60 ҫул тултарнӑ. Вӑл 1960 ҫулхи ҫӗртме уйӑхӗн 28-мӗшӗнче Канаш районӗнчи Пӗчӗк Малти Тукай ялӗнче ҫуралнӑ.

Сасси ҫемҫе, сӑнӗ ҫепӗҫ, кӗлетки хӳхӗм ҫак артистка ултӑ теҫетке ҫула ҫитнине ӗненме те йывӑр. 1979 ҫулта Чӑваш патшалӑх ҫамрӑксен театрӗнче ӗҫлеме пуҫланӑ вӑл. Пӗр вӑхӑтра теартан кайнӑччӗ. Анчах кайран каллех тӑван театрӑн сцени ҫине таврӑнчӗ. Ҫак ҫулсенче Полина Чамжаева вуншар сӑнар калӑпланӑ. Вӑл рольсем Чӑваш Енӗн театр ӳнерӗн ылтӑн фондне кӗрсе юлнӑ.

Нумаях пулмасть «Полина Чамжаева: «Сцена ҫинче тӗнче ҫаврӑнать» кӗнеке пичетленнӗччӗ. Ӑна кӑрлач уйӑхӗн 22-мӗшӗнче Чӑваш Ен Наци вулавӑшӗнче хӑтланӑччӗ.

wikimapia.org сӑнӳкерчӗкӗ

Муркаш районӗнчи Ҫӗлеменкасси ялӗнче карантин тесе йышӑннӑ. Ку хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ӗнер, ҫӗртме уйӑхӗн 27-мӗшӗнче, алӑ пуснӑ. Ҫапла йышӑнӑва республика ертӳҫи «Ветеринари ҫинчен» федераци саккунӗпе килӗшӳллӗн тата Чӑваш Ен Патшалӑх ветеринари службин ертӳҫи сӗннипе тунӑ.

Тискер чӗрчунсен урнӑ чирне палӑртнӑ хыҫҫӑн ҫӗленкассисен выльӑх-чӗрлӗх сутса туянма юрамӗ. Асӑннӑ террриторири чӗрчунсене куравсене те илсе кайма юрамасть.

Урнӑ чире пула йышӑннӑ карантин вӑхӑчӗ ӗнер пуҫланнӑ. Республика ертӳҫин хушӑвӗнче каланӑ тӑрӑх, чару мерисем выльӑх чирленӗ хыҫҫӑн икӗ уйӑх иртсен вӗҫленӗҫ.

Чӑваш Ен Вӗренӳ тата ҫамрӑксен политика министерстви пӗлтернӗ тӑрӑх, ача-пӑча уйлӑхӗсенче вырӑн йышӑнмалли вӑхӑта каяраха куҫарнӑ. Унта сӑмах Канашпа Ҫӗнӗ Шупашкар хулисем, Канаш районӗ пирки пырать. Ҫакӑ республика кӑшӑлвируспа ҫыхӑннӑ пӗрремӗш тапхӑрта ҫеҫ пулнипе ҫыхӑннӑ. Халӗ пирӗн тӑрӑхра иккӗмӗш тапхӑра та куҫайман, ҫав вӑхӑтрах Роспотребнадзор уйлӑхсене виҫҫӗмӗш тапхӑрсӑр та ӗҫлеттермӗ.

Шупашкар, Ҫӗнӗ Шупашкар, Канаш хулисемсӗр, Канаш райтнӗсемсӗр пуҫне ыттисен заявкисене ҫӗртмен 5-мӗшӗнче йышӑнма пуҫламалла. Анчах, тӳрех калар, ку вӑл – малтанласа палӑртнӑ тӑрӑх. Йӑлтах кӑшӑлвирус лару-тӑрӑвӗнчен килет.

Пӗтӗм тӗнчене шиклентерекен кӑшӑлвирус алхасма тытӑннӑрӑнпа пирӗн республикӑри 30 ҫын вилнӗ.

«Ҫыхӑнура» форум паян пӗлтернӗ тӑрӑх, кӑшӑлвирус тата тепӗр икӗ ҫын пурнӑҫне татнӑ. Шӑп та вӑл чире пула вилнӗ тесе ҫирӗплетсе калаймӑпӑр, тухтӑрсем каланӑ тӑрӑх, асӑннӑ вирус ерсен ытти чир-чӗр шала каять. Ҫӗртмен 26-мӗшӗнче кӑшӑлвирвс диагнозӗллӗ виҫӗ ҫын вилнӗччӗ. Вӗсем миҫере тата ӑҫтан пулнине республикӑн Сывлӑх сыхлав министерстви тӗплӗн пӗлтермен.

Ҫав вӑхӑтрах шанӑҫ паракан цифрӑсем те пур. Юлашки 24 сехетре пирӗн республикӑра 32 ҫын сывалнӑ. Аса илтерер: эпидемиологи тапхӑрӗ пуҫланнӑранпа кӑшӑлвируспа 4973 ҫын чирленӗ. Вӗсенчен 2862 ҫынна пульницӑран кӑларнӑ.

Cap.ru сӑнӳкерчӗкӗ

Чӑваш Енре социаллӑ-экономика аталанӑвӗн комплекслӑ программине хатӗрленӗ. Унпа Аслӑ экономика канашӗн ҫӗртме уйӑхӗн 24-мӗшӗнче иртнӗ ларӑвӗнче паллаштарнӑ. Унта РФ Федераци Канашӗн ертӳҫин ҫумӗ Николай Федоров, РФ Патшалӑх Думин депутачӗ Анатолий Аксаков хутшӑннӑччӗ.

Асӑннӑ программа – пилӗк ҫуллӑх. Ҫав вӑхӑтра 309 инвестици проекчӗ пурнӑҫа кӗртме палӑртнӑ. Асӑннӑ проектсемпе 2020-2025 ҫулсенче республикӑна 162,4 миллиард тенкӗ ытла укҫа килмелле. Уйрӑмах пысӑк суммӑна ҫурт-йӗр строительствине хывма палӑртнӑ. Ҫитес пилӗк ҫулта Чӑваш Ене инвестици хывма палӑртнинчен строительство отрасльне аталантарма 42,4 процент лекӗ, промышленноҫа – 29 процент, агропромышленность комплексне – 14 процент.

ivanovo.sm-news.ru сайтри сӑн

Шупашкарта пурӑнакан арҫын банк картти тупнӑ та унти укҫана тӑкакланӑ. Хуҫи ҫакна асӑрхасан карточкӑна блокировка тунӑ.

31 ҫулти арҫын тӗлӗшпе пуҫиле ӗҫ пуҫарнӑ. Карточкӑна унӑн пӗлӗшӗ тупнӑ. Ӑна ҫак арҫынна панӑ. Ку вара лавккасене кайса укҫана тӑкакланӑ. Ҫапла майпа вал 6 пин тенкӗ пӗтернӗ. Хуҫи блокировка тусан ҫеҫ карточкӑпа усӑ курайман.

Ун тӗлӗшпе пуҫарнӑ пуҫиле ӗҫе суд пӑхса тухнӑ. Арҫынна 8 уйӑхлӑха юсанмалли колоние ӑсатма йышӑннӑ.

123ru.net сайтри сӑн

Чӑваш Енре кӑшӑлвируспа чирлисен йышӗ кунсерен чакса пырать. Паян вӗсен списокне тепӗр 55 ҫын кӗнӗ, ӗнер 58 ҫынччӗ.

Республикӑра кӑшӑлвируспа чирлисен йышӗ 5 пине кӑшт ҫеҫ ҫитеймен – 4915 ҫын инфекциленнӗ. Вӗсенчен 2830-шӗ сывалнӑ. Юлашки талӑкра 23 ҫын инфекцие парӑнтарнӑ тесе палӑртнӑ.

Вилнисен йышӗ ҫавӑн пекех: 28 ҫын пурнӑҫран уйрӑлнӑ. Аса илтерер: ӗнер кӑшӑлвирусран виҫӗ ҫын вилнине пӗлтернӗччӗ.