ведомостинсо.рф сӑнӳкерчӗкӗ

Нумай хваттерлӗ ҫуртсенче пурнӑкансенчен 2014 ҫултанпа тӗплӗ юсавшӑн укҫа пуҫтарма тытӑнчӗҫ. Унӑн виҫи хваттер лаптӑкӗнчен килет. Чи малтанах, саккун вӑя кӗрсенех, пӗр тӑваткал метршӑн 5 тенкӗ те 20 пус кӑларса хумаллаччӗ. Кайран хак 6 тенкӗ те 30 пуса ҫитрӗ. Ҫитес ҫул хака 3,7 процент ӳстерсе 6 тенкӗ те 53 пуса ҫитересшӗн.

Паян Чӑваш Ен Министрсен Кабинечӗн ларӑвӗ иртнӗ. Унта тухса калаҫнӑ строительство, архитектура тата ҫурт-йӗрпе коммуналлӑ хуҫалӑх министрӗн тивӗҫӗсене пурнӑҫлакан Александр Героев сӗннипе Правительство пайташӗсем килӗшнӗ, вӗсем хака ӳстерес тенӗ. Тӗплӗ юсав укҫине юлашки икӗ ҫулта ӳстерменнине те палӑртмалла.

polis812.ru сайтри сӑн

Чӑваш Енре ҫулталӑк пуҫланнӑранпа 8407 ҫын кӑшӑлвируспа чирленӗ. Вӗсенчен 7120-шӗ сывалнӑ. Анчах вилекенсен йышӗ нумайлансах пырать. Авӑнӑн 22-мӗшӗнче каллех тепӗр икӗ ҫын инфекцие парӑнтараймасӑр пурнӑҫран уйрӑлни пирки пӗлтернӗ. Ҫапла вилнисен йышӗ 89 ҫынна ҫитнӗ.

Хальхи вӑхӑтра 1198 ҫын кӑшӑлвирусран сипленет. Юлашки талӑкра 33 ҫын сывалнӑ. Ҫав вӑхӑтрах 27 ҫын инфекциленнине палӑртнӑ.

Республикӑра кӑшӑлвирус сарӑлнин индексӗ 1-пе танлашать.

Ҫунана ҫулла, урапана хӗлле хатӗрлемелле. Паян ҫакӑн пирки «Газпром межрегионгаз Чебоксары» организаци ертӳҫи Кияметдин Мифтахутдинов аса илтернӗ. Вӑл журналистсене пресс-конференцие пхнӑ. Унта газ укҫипе парӑмлисем пирки сӑмах хускатнӑ.

Ӑшӑпа тивӗҫтерекен организацисен компани умӗнче парӑмлӑ тесе пӗлтерет пресс-конференцие хутшӑннӑ Валентина Багадерова журналист. Элӗк, Вӑрнар, Красноармейски, Хӗрлӗ Чутай, Сӗнтӗрвӑрри, Пӑрачкав, Ҫӗрпӳ, Шупашкар, Ҫӗмӗрле, Етӗрне районӗсен тата Улатӑр, Канаш, Шупашкар, Ҫӗмӗрле хулисенче парӑм виҫи уйрӑмах пысӑк иккен.

Сӗнтӗрвӑрри районӗн администрацине ҫӗнӗ ҫын ертсе пыма тытӑнӗ. Ку должноҫе Владимир Мустаев йышӑннӑ. Конкурса Сӗнтӗрвӑрри районӗн депутачӗсен пухӑвӗнче пӗтӗмлетнӗ.

Палӑртмалла: кӑҫал ҫӗртме уйӑхӗнче Анатолий Мясников район администрацине ертсе пыма пӑрахнӑ. Вӑл ку должноҫе 4 ҫул йышӑннӑ.

Депутатсем пухура Владимир Мустаева ҫиччӗмӗш созыври район пухӑвӗн полномочийӗсем вӗҫлениччен контрактпа ӗҫлеттерме йышӑннӑ.

Канашран Шупашкара килекен пуйӑс расписанийӗ вӑхӑтлӑха ылмашӗ.

«Раҫҫей чукун ҫулӗсем» акционерсен уҫӑ обществин Чулхулари филиалӗн пресс-службинче пӗлтернӗ тӑрӑх, расписание икӗ кунлӑха ҫеҫ улӑштарӗҫ.

Канашран республикӑмӑрӑн тӗп хулине килекен пуйӑс авӑн уйӑхӗн 27-мӗшӗнче тата юпа уйӑхӗн 1-мӗшӗнче станцирен 4 сехет те 34 минутра хускалӗ. Халӗ вӑл унтан 3 сехет те 51 минутра тапранать. 43 минут каярах хускални Ишлей станци патӗнче ҫула юсанипе ҫыхӑннӑ. Канашрах каярах тухнине кура ытти станцие те пуйӑс 43 минут каярах ҫитӗ. Шупашкарта вӑл 6 сехет те 58 минутра пулӗ.

Чӑваш Енре респираторлӑ чирсемпе чирлекенсен шучӗ иртнӗ эрнере каллех йышланнӑ. Халӗ вӗсен шучӗ 6 пинрен иртнӗ.

Авӑн уйӑхӗн 14-20-мӗшӗсенче 6 385 ҫынӑнне «респираторлӑ чир» диагноз лартнӑ, ку вӑл унчченхи эрнеринчен 1 081 тӗслӗх, е 20,4 процент, нумайрах. Цифрӑсене Роспотребнадзорӑн республикӑри управленийӗнче пӗлтернӗ.

Чирлекенсем Шупашкарта уйрӑмах йышлӑ. Унта 4 308 ҫынна ҫак амак ернӗ. Иккӗмӗш вырӑнта – Ҫӗнӗ Шупашкар (305 ҫын чирлет), виҫҫӗмӗшӗнче — Шупашкар районӗ (268).

Ҫав вӑхӑтрах специалистсем ку цифрӑсенсен шикленме сӗнмеҫҫӗ. Авӑн уйӑхӗнче ҫулсерен ҫавӑн пек тесе ӗнентереҫҫӗ. Пӗлтӗрхи авӑн уйӑхӗн 16-22-мӗшӗсенче респираторлӑ чирпе 6 094 ҫын чирленӗ. Унтан чирлисен йышӗ чакма пуҫланӑ.

Улатӑр районӗнчи Стемас ялӗнчи «кӗмӗл» нимеҫӗ Мускав укҫине тивӗҫнӗ. Вӑл «Молоды душой» (чӑв. Чунпа ҫамрӑк) грант конкурсне хутшӑннӑ. Ӑна федераци шайӗнче ирттернӗ. Конкурсра Улатӑр хӗрарӑмӗ «Социальные проекты» (чӑв. Социаллӑ проектсем) енӗпе ҫӗнтернӗ. Зоя Бусоргина 150 пин тенкӗ укҫана тивӗҫнӗ.

Конкурса ҫӗршывӑн 85 регионӗнчен 3 249 проект тӑратнӑ. «Социаллӑ проектсем» енӗпе 2 735 заявка пулнӑ. Вӗсенчен 103-шӗ финала тухнӑ.

Зоя Витальевна — Стемасри шкулта физкультура учителӗнче ӗҫлет. Унӑн стажӗ 40 ҫул ытла. Вӑл Восход поселокӗнчи ҫулланнӑ ҫынсене сывӑ пурнӑҫ йӑли-йӗркипе туслаштарассипе ҫине тӑрать. Нимеҫӗ пулса хӗрарӑм тӗрлӗ регионти пӗлтерӗшлӗ мероприятисене хутшӑннӑ.

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев Федераци Канашӗнче Чӑваш Енрен кам пулассине пӗлтернӗ тесе Чӑваш халӑх сайчӗ унчченех хыпарланӑччӗ. Ку вырӑнта Николай Федоровах юлать тенӗччӗ ун чухне.

Аса илтерер: регион Элтеперне суйланакан кашни кандидат суйлав кампанийӗ вӑхӑтӗнче сенатор должноҫӗ валли виҫӗ кандидат тӑратать, ҫӗнтерсен вӗсенчен пӗрне суйлать. Олег Николаев Федераци Канашӗн вице-спикерне Николай Федорова, «Пӗрлӗхлӗ Раҫҫей» партин Чӑваш Енри уйрӑмӗн ертӳҫине Алена Аршиновӑна, Раҫҫей Геройне Николай Гаврилова тӑратнӑччӗ. Паян Олег Николаев Элтепер должноҫне йышӑннӑ хыҫҫӑн темиҫе хушу кӑларнӑ. Вӗсенчен пӗринпе вӑл Николай Федорова сенатор портфельне пама йышӑннӑ.

Паян Чӑваш Ен Наци вулавӑшӗнче Любовь Федорован ҫӗнӗ кӗнекисен хӑтлавне ирттерчӗҫ. Ӑна библиотека ырӑ йӑлана пӑхӑнса тӳрӗ эфирта ирттерчӗ. Хӑтлава Ютубра пӑхма май килчӗ.

Любовь Федорова — Елчӗк районӗнчен тухнӑ хӗрарӑм-ҫыравҫӑ. Вӑл 1952 ҫулхи пуш уйӑхӗн 20-мӗшӗнче Энтепе ялӗнче ҫуралнӑ. Пӗр ҫул вӑл ял хуҫалӑх институтӗнче агронома вӗреннӗ, анчах пӑрахнӑ. 1980 ҫулта И.Н. Ульянов ячӗллӗ Чӑваш патшалӑх университетӗнчи историпе филологи факультетӗнче пӗлу илнӗ. Кайран вӑл Шупашкарти шкулсенчен пӗрне ӗҫе вырнаҫнӑ. Любовь Федоровӑн «Йӳҫӗ пыл» ятлӑ малтанхи кӗнеки 1992 ҫулта пичетленнӗ. Пӗр пиллӗкмӗш классенче вӗреннӗ чухне Мария Волкован кӗнекине хавхаланса вуланине аса илчӗ. Хӑйӗн малтанхи хайлавӗсене район хаҫатӗнче ҫеҫ мар, республикӑри литература журналӗсенче пичетленӗ. Вӑл — сакӑр кӗнеке авторӗ. Сӑвӑсем, калавсем, юптарусем ҫырать.

Cap.ru сӑнӳкерчӗкӗ

Паян Чӑваш Ен Правительствине отставкӑна янӑ. Ҫакӑн пек хушӑва республикӑн Элтеперӗ Олег Николаев должноҫе йышӑннӑ хыҫҫӑн алӑ пуснӑ. Ӗҫлӗ хута республикӑн влаҫ органӗсен официаллӑ порталӗнче вырнаҫтарнӑ.

Тӳрех палӑртар: асӑннӑ йышӑнӑва Чӑваш Ен Конституцийӗн 72-мӗш тата 91-мӗш статийӗсемпе килӗшӳллӗн тунӑ. Тепӗр майлӑ каласан, Элтепер должноҫне йышӑнсан Правительствӑна отставкӑна ямалла. Ӑна ҫӗнӗрен йӗркеличчен унчченхи йышӑн малтанхиллех ӗҫлемелле.

Паянах Олег Николаев тепӗр хушӑва та алӑ пуснӑ. ЧР Министрсен Кабинечӗн Ертӳҫи пулма вӑл хӑйне ҫирӗплетнӗ.