Чӑваш Ене раштав уйӑхӗнче кӑшӑлвирус прививкине кӳрсе килнине Чӑваш халӑх сайчӗ пӗлтернӗччӗ. Паянхи кун тӗлне ковидран 577 ҫынна прививка тунӑ. Кун пирки кӑшӑлвирус сарӑлнипе кӗрешекен республикӑри оперштабӑн паянхи ларӑвӗнче республикӑн сывлӑх сыхлав министрӗ Владимир Степанов пӗлтернӗ.

Асӑннӑ 577 ҫынран 429-шӗ — пульницӑсенче ӗҫлекенсем, 148-шӗ – вӗрентӳ тата социаллӑ организацисенче тӑрӑшакансем, ҫавӑн пекех нимеҫӗсем.

«Гам-КОВИД-ВАК» вакцинӑна республикӑри 11 пульницӑна валеҫсе панӑ.

Кӑшӑлвирусран прививка тутарас тесен 122 номерпе шӑнкӑравласа черете ҫырӑнмалла. Эмелшӗн укҫа тӳлемелле мар.

Кӑҫалхи кӑрлач уйӑхӗ пӗлтӗрхинчен 1-2 градус сивӗрех пулӗ тесе шухӑшлаҫҫӗ синоптиксем.

Кӑргач уйӑхӗн пӗрремӗш кунӗнчи каҫхине пӑрлӑ ҫумӑр ҫума пултарать. Кӑрлач уйӑхӗн 3-5-мӗшӗсенче юр ҫӑвӗ. Сывлӑш температури 0 градуса ҫывхарӗ. Шупашкарта виҫӗ кунта юр хулӑнӑшӗ 5 сантиметртан пуҫласа 10 сантиметр тарӑнӑш пулӗ.

Кайран тепре юр кӑрлач уйӑхӗн 10-мӗшӗнче тата 19-21-мӗшӗсенче ҫӑвӗ. Кӑрлач уйӑхӗн 17-26-мӗшӗсенче сывлӑш температури 10-11 градус пулӗ.

Кӑрлач уйӑхӗн вӗҫӗнче юр хулӑнӑшӗ хальхи 15 сантиметртан 25-30 сантиметра ҫитӗ.

Кӑшӑлвирус ҫынсен пурнӑҫне ҫав-ҫавах татать. Иртсе кайнӑ талӑкра тата тепӗр 11 ҫын вилнӗ. Ҫӗнӗ цифрӑсене стопкоронавирус.рф порталта пӗлтернӗ.

Ҫӗнӗрен чирлекенсен шучӗ те ӳссех пырать. Иртсе кайнӑ талӑкра пирӗн республикӑра ковидпа тата тепӗр 116 ҫын чирленине тупса палӑртнӑ. Пандеми пуҫланнӑранпа ку чир 16 пине яхӑн ҫынна ернӗ. Тата тӗрӗсрех каласан, 15 931 ҫын.

Ӗнер 136 пациент сывалнӑ. Пандеми пуҫланнӑранпа 14 292 ҫын сывалнӑ. Вилнисен шучӗ вара — 486.

Cap.ru сӑнӳкерчӗкӗ

Чӑваш Енре чухӑнлӑх шайне чакарасшӑн. Паян республикӑн Министрсен Кабинечӗн ларӑвӗнче регионӑн 2030 ҫулччен пурӑнма кирлӗ виҫерен пӗчӗкрех тупӑшлӑ йыша чакармалли программипе паллаштарнӑ. Ку ыйтупа ӗҫлев министрӗ Алена Елизарова сӑмах илнӗ.

Ҫӗршыв Президенчӗн хушӑвӗпе килӗшӳллӗн 2030 ҫул тӗлне ҫӗршыври чухӑнлӑх шайне 2017 ҫулхипе танлаштарсан икӗ хут чакармалла. Чӑваш Енре ҫак шай 2017 ҫулта 18,2% пулнӑ.

Пулӑшу мелӗсенчен пӗри — социаллӑ контракт. Ҫапла майпа хӑйсен ӗҫне пуҫарма, килти хушма хуҫалӑха аталантарма пулӑшаҫҫӗ. Ача-пӑчаллӑ, сахал тупӑшлӑ ҫемьесенчи кашни ҫын пуҫне вӑтамран тивекен виҫе халех 3,1 пин ытла тенкӗ ӳснӗ.

Чӑваш Енре пурӑнакансем кӑшӑлвирусран татах вилнӗ. Иртсе кайнӑ талӑкра ун пеккисен шучӗ 6 ҫынпа танлашнӑ. Чире вара пӗтӗмпе 127 ҫынӑнне тупса палӑртнӑ. Ҫулталӑк пуҫланнӑранпа ковид Чӑваш Енри 15206 ҫынна ернӗ.

Раштав уйӑхӗн 21-мӗшӗ тӗлне кӑшӑлвируспа 1231 ҫын чирлет. Сывалнӑ май пульницӑран 114 ҫынна кӑларнӑ.

Ковид пандемийӗ тесе пӗлтернӗренпе пирӗн тӑрӑхра 423 ҫын пурнӑҫран уйрӑлнӑ, 13 пин те 552 ҫын сывалнӑ.

Аса илтерер: паян РФ Патшалӑх Канашӗн депутатне, Канаш районӗнче ҫуралнӑ Валентин Шурчанова юлашки ҫула ӑсатнӑ. Вӑл та кӑшӑлвируспа чирленӗ, Мускаври пульницӑсенчен пӗринче сипленнӗ.

rostov.ru сӑнӳкерчӗкӗ

Чӑваш Енре пурӑнакансем кӑшӑлвируса пула ҫав-ҫавах шар кураҫҫӗ-ха. Паян, раштав уйӑхӗн 15-мӗшӗ тӗлне илсен, COVID-19 диагнозӗ лартнисен йышӗ 14436 ҫынна ҫитнӗ. Тепӗр майлӑ каласан, ӗнерхинчен 130 ҫын нумайланнӑ. Чире официаллӑ майпа шута илнисенчен 12915 ҫын сывалнӑ. Иртсе кайнӑ талӑкра тепӗр 4 ҫын пурнӑҫӗ татӑлнӑ. Ҫапла вара пандеми пуҫланнӑранпа кӑшӑлвирус ернӗ 379 ҫын пурнӑҫӗ татӑлнӑ.

Чӑваш Ене кӑшӑлвирусран прививка тумалли вакцина 500 доза кӳрсе килнине эпир ӗнер пӗлтернӗччӗ. Хальлӗхе — 500 доза. «Гам-Ковид-Вак» препарата районсемпе хуласенчи пульницӑсене валеҫмелле. Прививкӑна икӗ ӑстрӑмпа тумалла.

virusoff.net сайтри сӑн

Паян тепӗр 129 ҫын кӑшӑлвируспа инфекциленнӗ. Ҫапла майпа ку таранччен республика 14306 ҫын чирленӗ. Кун пирки стопкоронавирус.рф сайтра пӗлтернӗ.

14306 ҫынран 12820-шӗ сывалнӑ. Юлашки талӑкра вилекенсем каллех пулнӑ, хальхинче — 5 ҫын. Ку таранччен республикӑри 375 ҫыннӑн пурнӑҫӗ кӑшӑлвируса пула татӑлнӑ.

Юлашки талӑкра 129 ҫын инфекциленнӗ. Сывалакансем сахалрах пулнӑ: 98 ҫын. Хальхи вӑхӑтра Чӑваш Енре 1111 ҫын кӑшӑлвирусран сипленет. Вӗсем килте амбулатори мелӗпе е пульницӑра сипленеҫҫӗ.

Росстат пӗлтернӗ тӑрӑх, кӑҫал кӑрлач-юпа уйӑхӗсенче Чӑваш Енре, пӗлтӗрхипе танлаштарсан, 2 пин ытларах вилнӗ. Ку енӗпе пирӗн республика Атӑлҫи федераци округӗнче виҫҫӗмӗш-тӑваттӑмӗш вырӑн йышӑнать.

Каҫалхи 10 уйӑхра республикӑра 14880 ҫын вилнӗ. Пӗлтӗрхи ҫак тапхӑрпа танлаштарсан, ку 2083 /16,3 процент/ ҫын ытларах.

Ҫуралакансем те сахалрах пулнӑ. Кӑҫал 380 ача сахалрах ҫут тӗнчене килнӗ. Пӗлтӗр ку тапхӑрта 9774 ача ҫуралнӑ тӑк кӑҫал – 9394 пепке. Ҫапла майпа пирӗн республикӑра халӑх шучӗ 5486 ҫын чакнӑ. Ҫулталӑк каялла ку кӑтарту 3023 ҫынпа танлашнӑ.

Кӑшӑлвирус сарӑлнипе кӗрешес енӗпе ӗҫлекен оперштабӑн паянхи черетлӗ ларӑвӗнче Роспотребнадзорӑн Чӑваш Енри управленийӗн пуҫлӑхӗ Надежда Луговская коронавируспа чирлекенсен шучӗ ачасен хушшинче икӗ процент чакнине, 30-59 ҫулсенчи ҫынсен хушшинче ӳсме тытӑннине пӗлтернӗ. Вӑл каланӑ тӑрӑх, чирлекенсен шучӗ яланхиллех Шупашкарта пысӑк пулин те ҫак хисеп юлашки вӑхӑтра кӑштах чакнӑ. Ҫӗмӗрле хулинче, Хӗрлӗ Чутай районӗнче ӳссе кайнӑ.

Ҫӗмӗрле хулин администрацийӗн граждан оборонипе чрезвычайлӑ лару-тӑру енӗпе ӗҫлекен пай пуҫлӑхӗ Алексей Кочнев ку эрнере 52 тӗслӗхе шута илнине асӑнса хӑварнӑ. Кил хуҫисем нумаях пулмасть Мускавран ӗҫлесе таврӑннӑ иккен.

Хӗрлӗ Чутай районӗнче шута илнӗ 22 тӗслӗхрен 10-шӗ — ватӑ ҫынсем.

«Чирленисенчен 6-шне стационара вырттарнӑ, ыттисем килтех сипленеҫҫӗ», — тенӗ район администрацийӗн пуҫлӑхӗ Иван Михопаров.

Оперштаб ларӑвӗнче Етӗрне тата Тӑвай районӗсенчи тӑрӑма та тишкернӗ.

Чӑваш Енре пурӑнакансем кӑшӑлвируспа ҫаплипех чирлеҫҫӗ. Иртсе кайнӑ талӑкра пирӗн тӑрӑхри 118 ҫын чирленине шута илнӗ. Ӑна пула 3 ҫын пурнӑҫран уйрӑлнӑ. Сывалнипе 24 ҫынна пульницӑран кӑларнине пӗлтереҫҫӗ.

Аслӑ класра вӗренекен шкул ачисене икӗ эрне инҫет ҫыхӑну мелӗпе вӗрентрӗҫ. Студентсемпе училищӗсенче вӗренекенсем вара ку эрнере те килте вӗренеҫҫӗ.

Кӑшӑлвируса пула йышӑннӑ мерӑсем усламҫӑсене пысӑк сӑтӑр кунӗ. Пирӗн республикӑри предприятисем 2 миллиард тенкӗлӗх тӑкак тӳснӗ. Апатлану предприятийӗсенче фуд-кортсене уҫма ирӗк пачӗҫ.